სოსო კაკუბავა-ნარტი (ჯიმას)

ზენიშ დიხას უფერუანქ, მიჩქუ,
ოქუმიშ ცა დუდშა გისხუნ, ჯიმა,
ჯვეშობურო ქიქანქალნო სიორ
ცხაცხუშ ჯინჯის, სუკის, - ეკალწკჷმა?
დია - დიხას შურ ქუნთხანსო ხვითოშ,
ქოშოლუნსო ცუნდ ლაიტიშ სუას,
ქახვარუნო შურო მუთუნს იმენდ,
ამარ, გოღა გინოღალირ ჭუას?
ბჟაშ ილულას ქისარკუნო სქვამას,
ზღვაშ ზოლიშ ჟი ცაშ ფონ ძოწიშ ფერით?
ურჩქილექინ, წყარიშ ხუმა, ალბათ,
ოშნერ ფირქემს მუშკოჸოთანს სერით.
ანარაშ დუდს ქორწკინჷნსო ვარჩხილ,
ჩე მუნაფა ქიგნოჸუნსო გვალას?
ხვიჩალ თოლეფჲ გოუჯინი ალონს დო
გვალო შხვა დღა გოთანდუნშო მალას!
სი გიჩქ, ჯიმა თე ართ ტკოუ დიხას,
მუშ მადიდა ჸოროფა რე ტყობუნჷ,
დადიანიშ ბაღიშ ჩიტ დო ვარდა,
ოქუმ-წყარიშ კალმახ ნეტე, ქოპუნ!
ილორიშ კარს სანთელს დობჭუნთ მალას
ილორიშ ჯვარქ ქიკორინდა შურო,
ბირა-ბირათ გათანუანს სერეფს,
მაფშალია ანწით ჯვეშობურო.


1.ანარა-მთა სამურზაყანოში