30/11/2009

ზაურ გერგედავა-ოსეოფა



ნუმ გირსხიმანს თოლეფ შხვაშა;
ოსეოფა ბორჯი რენდო...
მურიცხეფიშ კოროცხუა
ვაიშინერსჷ თუთაშხაშა.
დიხა სოთინ ვეგენტებუ-
ნაცოდილა,ნაგვაგვალა,
გჷგაკილოთ,გჷგალუაფ,
მარდიშ გინონქირაფაშა,
დემონკ თესხე ცოდათ, ვარა
დუცუ ქიმკიბუნუანდჷ
მუშ მახალიშ ჩე თუმაშა.
ნუმ გირსხიმანს თოლეფ შხვაშა;
აშ მიკირთი შურ მალაფშა,
ილორც იხვამ ჯვეშობურო
გიჸორდინი თი ხონარშა,
ეგებ ღურას გუვოჭყორდე
სქანჲ კიდირ დო ჩხეშაშ ხათრშა.
გურსჷ გურით ქუმეფერე,
იბჟუმინათ ბჟარალაშა,
დღა დო სერი ეკანთხუნი,
დიმერეხუ,დიპანჯუნი,
გებჸალებუქჷ უსქანეთ დო,
მიდებგურგინუქჷ ცაშა.
ვეკმოჭყუა,ვეკმოთვალა,
ნიშან ვეშნომირღვა ზღვაშა,
ხატიშ გჷთანჯირაფალი
გოფუშკუნტელ მოჭყუდცალო,
ვეგნოზგირტა,ვამღამანკა.
ნუმ გირსხიმანს თოლეფჲ შხვაშა;
წკონდას ქენმოჯინი ართშა,
ლანდღვირ თოლეფიშჲ ნერჩის,
წკვერემი დო დაჩხირ შქასჷ
ჭერჭეთ ეკოზგუმონჯელი
გვერეფჲ მუჭო გიგვარგვასნა...
დო,შურ მონთხუ ანგელოზიშ,
მეჩიებუ ჩქიმ ნინაშა,
ეჰე! ჯვარცჷ ქეგმოჸონეს,
იბაბდებუქ მაჟირაშა,
სქან ჩილამურ ნორცხვაცალო
შურცჷ ენმაბარჩხალუნი,
თინა მისხუნ ჩხონაფაშა.
ნუმ გირსხიმანს თოლეფ შხვაშა;
აშო მიკირთ შურმალაფშა,
ეგებ ღურუს გვოჭყორდე,
სქან კდირ დო ჩხეშაშ ხათრშა.

27/11/2009

პროკოფი ხარჩილავა-თუთაშფერჲ თუთაშხას

გიმასიზმარ ღორონთის
ცაშე გიმულებუდ თუდო,
 ტანც მუნაფა მუკაქუნდუ
დუც ბჟა გიორთუდუ ქუდო.
ვარჩხილიში ფსუაცალო 
მუკობუდუ თუთა ცასჷ
დო თანდუდუ თუთაშფერო
ეთი თოისერ თუთაშხასჷ.
ანგელოზეფ მოურდესი
ღორონთიში მაჸვენჯეფო
დო თინეფიშჲ სქუალეფი
თე ქიანაშ მარენჯეფო.
გილეშესი იშო-აშო,
ცა იბირდჷ, ბჟა იბირდჷ,
დო კოც მითინ ვაცილჷდ,
ვართ ნახანდის მიოხირდჷ.
თხა დო გერი ართო გერდჷ,
მითინჲ ვარწყედ უჩა დღას...
მურგარენი სარკო ორდუ
თი თუთაშფერჲ თუთაშხასჷ. 

25/11/2009

თამაზ ფიფია-ნანაია,ნანა (ონწეშა გიობირალი)

ნანაია,ნანა სქუა,
ოცქვაფურსუ ირო ფთქუა:
აშამჯანუქ მურიცხჯგუა,
ბჟა დო თუთას გიგურუა! 


ონწეს რწკინუნქ,ბაია რექ,
სქან ქჲანა აია რე,
გურიშ ჰამო ნაია რე,
ირო გიბირც ინა ნანას.


შურობუმუ დიაშ მხარეშ
უსქვამაში სოთინ ვარე,
ბედქ გაშუას მუდგა ნწარექ,
ქიხუტოლე გურშა,ნანა.


დიო ორექ ჭყინტურუა,
ჭკომუნქუ დო ირულუა,
რინას უკულჲ დიგურუა,
მუჟამც კოჩი მირდუქ,ნანა.


ათაქ ოკო ითაკარე,
ათაქ ოკო გიდგე კარე,
გიჩქუდასუ, შხვაშო ვარე,
ათეჯგუა ზღვა დო გვალა.


რინას ოკო ემანგარე,
თიშო ლიმა ვედიზარე,
ვარექ თაქი სი მეშარე,
გიმირჩქინე ოკო ძალა!


ბედი მუდგა ირთუდასუ-
სქანჲ აკანი გიჩქუდასუ,
ცოდა-მარდი ქორშუდასუ,
ვაგუზურდა ნტერსუ, ნანა!


სქანჲ ქჲანაშ მარსხებელო,
სამარგალოშ მარგებელო,
ირ დიდ საქმეშ გამგებელო,
საწმოხონოთ მირდი,ნანა!


ნანაია,ნანა სქუა,
ოცქვაფურსუ ირო ფთქუა:
აშამჯანუქ მურიცხჯგუა
ბჟა დო თუთას გიგურუა!
ნანაია,მარდუს,ნანა...

21/11/2009

ივეტა წითაშვილი-გოპირე

ხე ვამოთხა გოპირე,
ყვინთელ, კაბაჭარჭულერ,
კისერ ჸირტალ, ტანი სქვამ,
ჯღარ ფურცელით ხარხუნტელ.
ოპეულეს პეულეფს,
ქაცუეფით დორშვილეფს,
აკუნწყუმნა ანდანერ
ჸოფირელ – ვაჸოფირელ.
- მუ უნკუნჭაფ რენია
უგურე დო უშურე.
ყურმულო უჯინედეს
ზუკოლუნდეს, წონენდეს,
ბორიაქ წასაგებელქ,
ვამოხვარელქ, ვანტირელქ,
ქიმწაფაჩუ პეულეფ
ნატრებულ – ონატრებელ,
აკობანძღუ აკოსოფ
ხარებულ – ოხარებელ,
მითაჟამიშ ნაჩიებ
ქიმთარაყუ ოტყალეს: -
ხე ვამოფთხაშ მეთხუმა
მუთუნნერო ვაშინერს!
ქარ-ბორიაქ ვედეჯერ,
მუქ იჸუა თექ თეფერქ,
ტანს ოშფათ ქიგაკვამანჭ
გოპირელს-ვაგოპირელს.
ჭარაშა მის ეწარნე,
მის ულინუ უშარეთ?
ქარ-ბორია ჸოროფათ მოჭონკე დო
დუდს ქიჭყენდ.
ენა, მუქ შემერყუა,
რჩქინებულ-ურჩქინებელქ.
ირო ართნერო ვარე,
მინ ჩხანა რე, მინშა ჭვენს,
ქარ-ბორია სოდგარენ
გვალაშ იშო დოხინწე.
ხე ვამოფთხა ობაღეს
ხე უნკუნჭაფ ქეშარედ,
თაში ყოფე, თაში რე,
მუთ ვაშინერს!
ვაშინერს.

ივეტა წითაშვილი-სამარგალოს

ჰოუ, ნანა,
თოლი სქვამი
ცირეფ, ოსარსალაია,
ენგურ ჭკუაგუნოლასირ,
ართო ოხვარჩალაია,
ოდა კისერგჷნობეჭილ,
ჭველეფ ოწარწალაია,
აშო, გურშა ქომხუტოლეთ
,,ჩქიმი ჭიჭე მახარია”.
,,ასე ჩონგუ ქოფთქუათი”
ღვინიშ ეფშა მარანსია,
არძო ჭუა დიღვამანწკუ
ართათ შორი გვალასია.
სოურს შარა,
ჩქიმ მიჩქუდ დო,
არქა, შხვაში ვარდასია,
ჰოუ, ნანა,
სქანდა მოულ,
ხეს სი გოილუანქია,
სამარგალო სკან ძირაფაქ,
ირო ქუმაჭარასია.

ივეტა წითაშვილი-დამორჩილიშ ბუძოლია

დამორჩილიშ ბუძოლიას
არყებენა ბერწულეფ,
მელე-მოლე ქურღვაფუნა
მუნეფიში მაყარეფ.
ტანს კაბა ქუგოხარცქუნა
ჭითათ ელაძარწუფელ,
ბერწულეფიშ ელაჯინათ
პიჯ გუნჯამნა ჭუბურეფს.
წყარი ღალსჷ ქელაჸუნდუ,
მუშ ოლაგეს ვენტირედ,
ავარცხილს ახვარჩალუდუ
გურშა ველაცადინელ.
ბორია-ჭარკანტ ნაჩილათუს
იკილოთუდ ოხვამეს,
ჩილამურით ოშკვიდუანდ
ცოდას ელადაჩხირელს.
ცასჷ კარი გოუნჯამუ
ჭარკანტიში მოჯინეს,
გეცუმენა ზესკვეფ ჟიშე,
ართო ქიგორგოთუდეს.
თოლეფ გეწკურილ გაფუნო
გური ენოდარაზელ,
დამორჩილიშ ბუძოლიას
მუჭო გარზი უჩქიმეთ.
ვეშერყიპჷ ბერწულეფიშ
არყებული მაყარეფს,
წყარი ღალს ვაიძირუნო,
ოლაგეს ვადონტირელ
ჭარკანტიში ნაკილოთა,
ელნანგარა ოხვამეს,
ვარა ცას ვამკოიდგუდუო,
ჩარდახ ეკოჩარდახელ,
ზესკვეფს ვაუთქუალნანო,
გურშა ვენოცადინელ.
მა თეშ რაგად ვამოსკვანსი,
მა თეშ რაგად ვამშინერს,
მარა ოკო ქოიწუე
ჭკუა იშენ ქექე რე
ჩქიმ ოსხუნურ სი ვაგაში,
სქან ხიოლჲ მა ვორექ,
სი ჩქიმ გურიშ მურიცხ რექ დო
მათ ვადმარნე უსქანეთ,
სი ჩქიმ შარას ინჭუაფუქ,
მა სკან შარას გილვორექ,
შარას შარა გეკუძირ დო
ქიხვამანდეს მაყარეფ.
დამორჩილიშ ბუძოლიაქ
არძას დუგორ მაჸალე. 

ივეტა წითაშვილი-ცას მუნაფა ელასხუპ

ცას მუნაფა ელასხუპ,
მუნაფაშ გურს ზღვარზღვალანს,
გვალას რცხიმალ ცხიმურეფს
ჭვემა ელასხარსხალანს.
იკიონტუ ტყაშმაფა
უგამაგათ, არგამათ,
ელაჯინე მუნაფას,
იშოლუ დო რაჸვალანს.
მიკახორცქუ ჯაშე ჯას,
იშო -გვალას, აშო- ტყას,
ვაუტორხუ დუდს ვარა,
გურს გოლოფა ობარბანჯ.
ახავაია, თიშ ცოდა,
ქუფაფუაფ ჸოროფას,
მუზმა სერ დო გოთანას
იწირღოლ დო იწანწალ.
ნაჸოროფას ივარანს,
ნაჭვემურსჷ ჭაბაკანს,
ელაჯინე მუნაფას
მინ უკურთხანს, მინ ხვამანს.
გურს ნაბარბანჯ გოლოფას
ქოუფალუ გვიმარას,
სო ატყობუდ ჸოროფას,
ნამუ გვალას, ნამუ ტყას.
იკიონტუ ტყაშ მაფა,
გილეფაფუ არგამათ,
ტყურათ ირჯებ დო გორუნს
ოლაფარეს ჸოროფაშ.
ცას მუნაფა ელასხუპ,
ჭვემა მუშის სხარსხალანს,
ობარბანჯუ მაფაშ გურს,
იძიცანსჷ გვიმარა.

ივეტა წითაშვილი-ჩენჯა

ჩეჯას ეშე ეზგუმონჭილს
ეწაფაფუ ნოჸელეფ,
მეახალუ გურიშ ჭუაქ,
ნარღებაშე წაურთ ფერქ.
ავრე დაჩხირ ეთაგვარგვაზ,
ევრე წყარმალ მიორე,
ჩილათირ დღალეფს ეკანგარს,
უფაფუანს ნოჸელეფს.
გოხოლუას მითინს ვარწყე
ელმარინეს, მოხვარეს,
არძო მუშის იწკუმონტუ,
არძო მუშის უჯინე.
ელაფარკალ ჭველა ჭველას,
იფინდიხნა ჭანდარეფ,
ღირთანს ჭარკანტ აკვარჩხილჲ
ქიანას ნწყუნს სოდგარენ.
თაში ჸოფე, ჭარაშ წისქვილ
მუშის მექუნს დღაშ დო სერს,
ქუმწუფართხაფ ჩეჯას ჭუა,
მუსვანჯუაფ ნოჸელეფ,
გუნწყუმ გურს სკვილ, კვარკვაზელ დო
თეზმა ხანიშ ნანარღეფ,
ჩენჯა ჩენჯას ქუგოლუაფ
კარკაცანდეს ნოჸელეფ.

18/11/2009

ივეტა წითაშვილი-სუაჭითა ფარფალია

ფსუაჭითა ფარფალია,
ელაღოზელ ღაჟურია,
მიკაფურნანდ კამელიაშ
მინჲ ართ პეულს, მინჲ მაჟიას.
სი სარალო ფარფალია,
მის რე გალაჸაფუქია?
ართ დღაშ რინა გაფუნია
ღორონთშე ჭყოლოფირია,
გური ჯგირო ქოუჩია,
დღა მალას ისერუნია.
ჩე პეულეფჲ კამელიას
ტანსჷ გაცხანტალუნია,
ჩილამურეფჲ ძიაცალო
მინ ასკუ, მინ უცენსია.
არძა ართი ვარენია,
შხვა რენია კამელია,
უფერუანს ფარფალია,
მინჲ ართ ღვანწკის, მინჲ მაჟიას,
ჩილამურეფს უსქირუანს
უჸოროფეთ სო ულია,
ართიანიშ ვორეთია,
ღურელით დო თელითია,
უჸოროფეთ თე ქიანა
ჩქიმო რე ლიებურია.
გეგკასერუ ფარფალია
ვეგეგონე რაგადია!
მუ ფქიმინა, მიორსია,
ვამნარღენქჷ მუთუნსია,
ჸოროფათჷ ართ დღაშ რინა,
თაში ხოლო ღირუნია!

14/11/2009

ივეტა წითაშვილი-ნდოლო ცუნდელჲ

ნდოლო ცუნდელჲ,
გვალა თილჲ,
ცა ნაჭვემა,
ნირს ფაჩილჲ,
შარა ულათ
შულადირჲ,
დაჩხირ ყებურს
დორძამილ,
ყანწჲ ღვინით
შუმაფილჲ,
გურ ჸოროფათ
წყუნაფილჲ,
ტყვია თოფის
მორხინილჲ,
ჭყორ ნაფურნა
ვაჭოფილჲ,
ცურუ ჯას ჟი
ჭირნაფილჲ,
ბუძგურიეფ ჯას
ცუმილჲ,
ხინჯი ბოგას
გოდგუმილჲ,
ოშ ნაულა,
ოშშა ნწყვილჲ,
აკნარღვეფი
აკონწყილჲ,
ოფულარი
ვაფულირჲ,
სიტყვაშ რთაფა
კვარკვანტი,
იშო-აშო
კვარკვანწი,
ნახარებუ
ხიოლი,
გოთანაში
ციორი,
მუმულეფიშ
ჸიონი,
დადულეფიშ
ფიორი,
ოშშა ჰამო
რაგადი,
ოშშა ჭვახეთ
კვარწახი,
ავრე ათორჩქინაფა,
ევრე ღირთაფ-რცქინაფა,
დღა-სერიში ჭუებულჲ
ვაიწუე, მუს გიფულჲ,
ტყურათ გოპუნქ
გუმართუქ,
მა ვავორექ
დუმართუ.
შარა ბოგას აკორე
ნირს გოთანას აწაფაფჲ
მუთუნ კოჩის ვაჭოფე
ჭყორ ფურინელ აკაშა.

გიორგი სიჭინავა-ღორონთჲ ქმაპატიენა

მირულენა მარულეფი
სამარგალოშჲ მინდორეფც,
დიხა ეჭიჭარესჷ დო
ფურინუა მინდომეს.

ქარ-ბორია მის აჭოფე
ღობერი დო ნორტყეფით,
ბორჯიშჲ მერქას მეთხოზჷნა
ჭყვინგალ-ჭყვინგალ ბორკეფით.

ფერდის გეკოჟვინგესჷ დო
ეშე სქვამას მირხინეს,
ხურხის ფაფარ ეფაჩილო
ცასჷ ქელაჭირხინეს.

დუდჲ ართიანც ქიმკოდვეს,
მუშობურათ რაგადეს,
უკულჲ მინჯეშჲ ჸოროფათ
აშო მალერაბადეს.

ჩქინი გური ვამაშუე
მუთუნ ხვამა-წირუას,
ღორონთჲ ქმაპატიენა
სქვამჲ ცხენეფიშჲ ხირუას.

გიორგი სიჭინავა-არიკ ოკო დოფსხუნათ

ხურჩა მოურც ხურჩინით,
არიკეფიშჲ ხურჯინით,
ბძირით, მარა მუ ბძირით:
წყარიშ დიდას უჯინით.

ბოგა ტყობას მინიბლით
ბიწკითჷ დო ფურცქინით,
ოფუტეშა დიფრთითჷნი,
ნაძირეფუს მუძინით.

არიკჲ ოკო დოფსხუნათ
შურჲ ქიგნვორთუათჷნი,
მართალიშა ვეგირზინე
ირო თინა ფთქუათჷნი,
შარა ვარე, ჯიმუცალო,
ტყურა ვაუკათუათჷნი.

გიორგი სიჭინავა-თხუმჷ

ჯიმაცალო საიმენდო,
საჸოროფო თხუმჷ,
ვამთასქჷ, ვამირგქჷ,
სქანით ქჷმოირთუმჷ.

ჩქინო ვარე თავადიში
მოინალე ჭყონი,
სი ორექჷ ჭკორეფწკმა
მართალი დო ბონი.

არძა ჩქიმი გაჭირება
სქანდა მუკომპონჷ,
სქან იმენდით ფთასნქჷ დო
სქან იმენდით ფხონჷ
ჩქიმი შური, ქოთომცალო,
სქან ჸას გილამჸონჷ.


თხუმუშჲ ღანდა,
თხუმუშჲ ბოგა,
თხუმუშჲ დიშქა,
თხუმუშჲ ოდა,
თხუმუშჲ ქვინჯე,
თხუმუშჲ კუბო..
სი ორექჷ  ჩქიმი მინჯე
დიხაშჲ ჟი დო
დიხაშჲ თუდო.

ჯიმაცალო საიმენდო,
საჸოროფო თხუმჷ,
ვამთასქჷ, ვამირგქჷ,
სქანით ქჷმოირთუმჷ .

გიორგი სიჭინავა-მეტყურეფიშჲ ქიანას

მეტყურეფიშჲ ქიანას,
ბულც წილჷნა იანარც,
შურო ბირგულჲ ქჷგორგჷნდა
ულაქ ვადგეგვიანას!

ბულიშჲ ამბე, ამჭუანჲ,
გასიმესჷ ციორით,
ასე ირ კოჩჲ, კარაჩხამო,
გილერულე ხიოლით.

ჟი ზოჯესჷ: - ტყურეფიშა
მართალჲ ვამიწყორუათ,
კათაქ ოკო დოშურდას
ვარენჲ თიში გორუათ!

ღორებულეფჲ ონჯუაშა
ტყა დო გვალას ილენდეს..
ჭუმე ხოლო ვემიარკენა
ათეჯგუა იმენდეფც!

გიორგი სიჭინავა-ჩქიმი რინა

თე ქიანა საღორონთო,
ანთასნერო მოხანტილი,
ნამთინეშო სამოთხე რე,
ნამთინეშო ქუანტკილი.


გაცუდებულჲ იმენდეფი
შქირატილო გილამიღჷ,
ოჭმარეში მუნაჩემი
ონჯუაქჷ მიდამიღჷ,


ვამითხუ დო ვამისხებჷ,
ნაჩუქებუშჲ მიჭირც გაფა,
მითინც ვამუეფუათ
მერჩქვანელიშჲ დათხინაფა.


ულირც ვადომრთინუანც
ქარ-ბორია მარშვინალი,
ოშჲ წანაში რინა მაფჷ
ართი დღაში გაშინალი.


დიხაშჲ ღართიქ დჷმაშირ,
ვორწყექ მალას ბღურუქჷნი,
ღორონთჲ თევრე მუს მოძირა
თაქ თოლც დომიწკურუნქჷნი.

13/11/2009

გიორგი სიჭინავა-ორთაშ ზარალი

მუ გოჭირ მარგალი
სი გუგულიშ მარქვალი,
დუდიშ მაღორებელი
მიწკუმა რე მართალი.
გამგინებ ზოთონც,
დღალეფ ურსხებ მარტის,
მი მერჩანც მარდის,
შხვაშ ოგვაჯეს ნარდის. 
 
* * *

 ირფელც მუში ოჩი გეძჷ, 
ირფელ მუშის გაფულენც
ბორჯიშ ელასირელი ხამ
იმენდეფც ცაფულანც.
წყარეფ ვეგიხუნუანც
ხვამარდეფიშ ნაულას.
კოჩიშ თოლი ვაძირჷნც
ღორონთიშ ნაფულას.
დოთჷნცჷ დო დოჭვენცჷნი,
ცა გოსარკჷნც მუნაფილი
დო ბჟაცალო გამწოდირთჷ
შურ, ჸოროფათ ფუნაფილი.
კინე დირთუ აფუნი დო
გეითოფალუნც ხუმაფილი...
სი ღორონთიშ ნაჭყოლოფა
შხვაშა გაფჷ თხუაფილი.
მუ ოკოდჷ სქან მარქვალც
ტურტურუაშ ოგვაჯეს,
ინეფქ შხვადო მირდესჷ დო
ფსუა შხვადო გოფაჩეს.
აკა აშო მიკირთი დო
გონწყი გური, წყუნაფილი,
ცოდა იზმა მონკა ვარე
ჩილამურით რტუაფილი.
ნარღეფქ გურც დიხვილუდა
ნტერიში ჯინშენ იბირით
დო სი ხოლო ონირზჷდი
ათე რინას, კიდირით;
უკულ ოჭიშ ქურთინე დო
ვამიჩქ, მი მუს თქუანცჷნი,
მუშ მაქექა ჸოფე შარა
მასქურ გიჯიკუანცჷნი.
სი ვარწყექო, ეკიშ გვალა,
ჩე მუნაფაქ გონირსჷნი,
ვარა, თავრე, ცხიმურეფც,
ქარ-ბორია ონირზჷნი?
თუდო, დოლო, სქანიცალო,
დუც სიჭიჭათ იჩუანც,
მარა ირ კოჩი, მით ქორენ,
კუჩხის გიობიჯგუანც.
ნგერი მუთუნ ნგერი ვარე
ომანეშა ინტებუნი,
დუდ გაფ ონგარალი,
მითინ ვაგენირზებუნი.

* * *
 აკაბურცხა სამარგალო, 
აკა, ბუცუცუნია,
რაგადანა ლეხი რე დო,
მალას დოღურუნია.
ათეზმა გაჭირებას
თინა ვაგურზუნია...
ლეხ ვაბადენც სქუალეფც,
ლეხის უცენც მუნტურეფ,
უმინჯურო მეტებული,
ქომწი შურო მუთუ რექ.
სო დარღვი სოლე მარღვი
ათეზმა უთურეფჲ...
ქორჭკუმუნა სქან ტანიშე
გიშნაულა მუნტურეფჲ.

* * *
 გუგულეფი გურღვინჯებ, 
ართ დღას, მუნაფილც,
ათე ჩქიმ ჸავავაში
რაგადი დო ჸურაფის.
მაჩინეს: ,,მარგალიშ
მანგი ვარე გუგული,
ინა დუცჷ ქიჩინენც
ჭიჭეს მირდუნ უკული.“

* * *

მართალჲ რე დო მუ უწუა,
ქიმუჩინა ბოდიშის,
ნარღი, გურცჷ, ოღურალო,
მიძგვიტუანს ოდგიშის.
ორთაშ ზარალჲ ვორექჷ დო
ცოდა მუნობძ ოჭიშის...
გუგულეფიშჲ ჭკუა ვაძჷ
ამდღანერჲ ოდიშის.

11/11/2009

გიორგი სიჭინავა-ჯგირობუა მუ მუღალუ.

ჯგირობუა მუ მუღალუ,
წანეფიში მოძინას,
მუთ მიძირუნ,ირიფელი
ვადანტირე გოშინას.
ბორჯი გასაჭყოლიდეს
ხოლო მუჟამს მოძირანც,
დიო ვონირზჷქჷ მარა,
ღურა იშენ მორჯგინანც.
სო ორე დო სო ზოჯჷნცჷ
წკუმონტილიშ მათინალჲ ,
ათაქ იფრელ სისმარი რე,
მუთუნ ვარე გაშინალჲ .

10/11/2009

გიორგი სიჭინავა-ჭიჭე მეშარე

რინაშჲ ჯვარც ვორექ მუკოჭკადილი
დო გურც მუმოგუ ჭიფე ლისმარი,
სი მირაგადუქ სქვამას ხანტილი,
ათე ქიანა ორე სისმარი.

ვაგონჯარუდას მაფაშჲ დიარა,
ვართ ჟინოსქუაშ ორქო–ვარჩხილი,
ცაშჲ თუდო ირ კოჩჲ ღურაშჲ თია რე
დო დიხას ონტუ ცოდაშჲ დაჩხირი.

,,მუსით ქარწყექნ ირფელ სქან ქორდას!“–
ათე ჩილათას ჸუნც მარებელი,
მუთუნ ვაიჸორდას, მითინ ვაიჸორდას,
კოჩიშჲ თოლეფიშჲ მაღორებელი.

გურც ოხიოლნ, შურც ანგარინე,
თე ოქიანე ცოდათ ეფშა რე,
სი ქოულ, მარა სოთი გალინე,
უგუთებ შარაშჲ ჭიჭე მეშარე.


1.ჟინოსქუა-აზნაური

გიორგი სიჭინავა-ჩქიმი ღურა ნოკობუე

ჯგირობუა მუთა ბძირი
დო მუთ გაიხარა გური,
უჩა ზღვაში წყარცჷ წყათნცჷ
აიეტიშჲ ჩილამური.

მა თი რჩქინას გივაჸუნი
მუთ ჩქიმ ჯვეშიქ მოგურუნი,
მარა ვამიჩქ ელახიშე
ჯიმა მუშენჲ მონდურუნი.

ამდღარ დღაშა ვამოგინჷ
მუ პატონეფჲ ოსურუნი,
დუდ სომეხშა მიკუძუ დო
ლაზ-მარგალშა ოშქურუნი.

ათეჯგუაშჲ მაძირაფუს,
ნოტე თოლეფჲ დომწკურუნი,
ჩქიმი ღურა ნოკობუე
უჩა შარა მოწურუნი.

ვანოჩქვენო, წყარიცალო
დოწენც რკინა, გონდღულუნი
საქორთუო ვეჸუაფჷ
სამარგალო დოღურუნი.

09/11/2009

გიორგი სიჭინავა-წყარჲ მეურც

წყარჲ მეურც ზღვაშა
იშო დო იშო,
ბორჯი მუნარე
ქიანას ჭყიშო.

იმენდეფჲ მემიღ
თეშა დო თიშა,
პუხუს მუმობუ
ორზოლო ქვიშა.

მეტჲ მუთუნ ვარე
თაქ კოჩიშჲ სქიშო..
წყარჲ მეურც ზღვაშა
იშო დო იშო.

გიორგი სიჭინავა-ჩელა




სერი ორე თუთარჩელა,
მუთა მეძჷ შქასერიშა,
ჩელა, დუდიშჲ ურგებელა
კინე ირთუ დარჩელიშა.


მონა დღასჷ ვაგაბედ
ეშე დუდიშჲ ეკუნას,
ქიმერჩქვანუ ეკი-დიკი
ნაბარნალაშჲ გეჸუნას.


მუ ოხვარჷ ათეზმა
გაჭირება ერღვაფილც,
მონობაშა ვადათხინე
მონობასჷ გეგაფილც.

თენა რენო ჩელა სქანი
გურაფა დო გიმნაზია,
სი ღირსება მუშო გოკო,
ინკორი დო ინკვაზია..

შარას მეურც ხვათახვალე,
სერი ორე თუთარჩელა,
საონჯღოროთ უკახალე,
ნარჩქანიშა ირთუ ჩელა.

07/11/2009

გიორგი სიჭინავა-მუშჲ იმენდით

მუშო გოკო ამდღარ ღურა
იშო-იშო გოზინდე,
ევრე ღურელც ორკდე დო
ავრე თელეფც ოძინდე;
ნტერეფიშჲ სახიოლოთ
სქანიანეფც ორკინდე.

მუ იმენდით დოხვადჷქ
ჭუმანერ დღაშჲ გოთანას,
ფარას ქოშაყარა, მარა
სო იჸიდე კოჩანას.

05/11/2009

გიორგი სიჭინავა-ჩქიმჲ ჯარგვალიშჲ ხოლოს

მუწვოჯანჷქ ნდოლოს,
ჩქიმ ჯარგვალიშჲ ხოლოს,
ჭვემაქ ოკო მორთას
ათე თუთაშჲ  მორთას.

ონარღებელჲ  ვამიღ,
ჸვანა ქჷმაფ ბარგილჲ,
ორტვინჲ  ხოლო მიჩანც
სუკის მუკოქარგილჲ.

ღობერც მელე, მინდორც
ჩელაია  ინკორც,
თე ოფუტეს ონჯარ
თიშჲ სისქვამე ირ კოც.

ზღვაშე მასქურჲ  ირქენც,
უფერუანც ირფელც..
მუწვოჯანჷქ ნდოლოს,
ჩქიმ ჯარგვალიშ ხოლოს.


1.ოფუტე-სოფელი (ლაზურად)

გიორგი სიჭინავა-შხური

მედეა დო აიეტიში
ოხვამერი შხური,
მუთუნც ვამრაგადჷქნი
მუშენ დემენდური.
ღორონთშა მაფ ზალებური
სქანი წკონდა შური.
სქანჲ ტყებიშა გეჭარილი
რჩქინა ჯვეშ კოლხური.
მიღუდუ დო მივოდინენჲ
მა ეთი დღას ბღური,
რინტუეფშა გორთირე დო
თოლეფჲ ქიგიბწკური.

გიორგი სიჭინავა-ცურუ

ცურუს ხოლო ნოკობუე
გეჩანდასჷ ბონასჷნი,
მარა ოჭიშ ვეიაჭოფე
შხვასჷ ვემკაპონასჷნი.

სარხოს მითინ ვემკინჭანცჷ
შორშე მუდგა თხუასჷნი,
თიშენ ორე ირიათო
ოცად მეტყობუასჷნი.

უსამართო ქიანასჷ
შეულებ ზარხულც თუასჷნი,
თინა ხოლო ვაიკვედას
წყარცჷ ქმანტუასჷნი.

ვაძირიო, ცურუ ჭყონცჷ
ოგურუანც ჭკუასჷნი,
მუ ჟი, ცაშა მინჭუაფ
დო ისჷ ოშქვიდუანცჷნი.

ათეჯგუაშ მაძირაფუს,
ღორონთჲ ქომწი მუ ბჭარენი,
ჭყონი ცურუს დოუფორ დო
ვეჩინებე მუ ჯა რენი.

01/11/2009

გიორგი სიჭინავა-ნამარგალჲ

აიშა მარგალჲ ჸოფე, მარა
ასე ორე ნამარგალჲ,
დოჸორადე იში ოდა,
ყამბარც ფოკვა ქჷმნუდვალ,
მიწოტებულ ნოხორის
ინჭირიას გოუფალ,
იშჲ ნაულას ვემიოხე
ნოქური დო ნაბარბალჲ,
გოჭყოლად ნანაში ნინა,
მედინაფ სამართალჲ;
ქორე, მარა მითინც კოჩო
ვემიორჩქ, ნამარგალჲ!

გიორგი სიჭინავა-რინა მოკო პელაზგური

ინა შხვანერ თოლით მორწყე,
გვალო შხვანერ ელაძ გური,
მიბურჯუანც გოთანაშა
მა სისმარეფ პელაზგური.

ევრე ინგარც პირამიდა
დო ათავრე კელასური
დო ვამოთხუ გოთანაშა
მა სისმარეფ პელაზგური.

ინგირი დო ცხენწყარ შქასჷ
ქენიფხვილჲ დო ქელაბღური;
ფსუაშ გოფაჩუა მოკო,
რინა მოკო პელაზგური!

ლაშა გვასალია-ფხოსარე დო ბჟას ვონჭუქ

  ჩქიმ ხოსარს მუ ოხვარ გურჭუელო ერჩქინელს, უჭარ ლერსიშ ოფუტეს მუნაფეფშა მერჩქინელს... "ძია ბძირ დო კაკა ბძირ" აგოთანაშ ეზმოჯეს, ბო...