რამაზ კუპრავა-სოხუმს,ზღუაპის

სოხუმს,ზღუაპის პალმაშ თუდო,

მითინ ვეითორდ სქან მასქვამა,

ართ ბოშის შჷ ფიჭვეფიშე

სქან თოლეფიშ გითონჯამა...

წუწელ ორქოშ გურიში რდი,

იძიცანდი თუთაცალო,

ცირა სქვამი,ბრელს ოკოდი

საოსუროთ,სანოსალოთ...

მარა სი თის ვაუჯინი,

ქოფურინი შხვა შარაშა,

თი ჸოროფა გურს ენუხე

ჩუალირო,ამდღარ დღაშა...

თინა ორე, მუთი რჷშნი,

თი ბოშიში გურ ვათირე,

ჸოროფაშ დო ლერსიშ უმშო

ართ დღას ხოლო ვაგარზინე...

რამაზ კუპრავა-გიწორუ ბორჯიქ

სი თე ქჲანაშა

            მორთ თოლწკურელი

მუჭო უკოროცხ 

             სქან თურეფქითი,

თოლი განჯინი

             სი ქოძირი

ჟი მურიცხეფი

             დო გოდირაკილ

ქვიშნაშ ნოყელა,

        მონდა ბულეფით

გინოკასილი...

...მენცარულ რჩქინათ

       მოხორცქი დიხას,

ამდღა სი კუჩხი

           გეიდგ თუთაშა

დო ჭიჭე-ჭიჭეთ გურაფულე

            თე საარიკო

დო უთანჯო

         გალაქტიკეფსჷ...

სი ირ დღას ონჯანქ

უშულად დო

       ურძღაფელ თოლეფს

დო ოკვირუქ

          თი მურიცხეფს,

ნამუთ სი ძირი

          დებადინ თიწკმა...

ბრელ ხანიშ კინოხ

           გოხუმუ ქვიშნაქ

გეგლეპირტოლუ

           ნოჸელაქ თიში,

ნამუთ ორდუ

          სქან ჭიჭანობას

მონდა ბულეფით

        გინოკასილი

გიწორუ ბორჯიქ

         დო ათე შვანო

სი თევრეშე გაძახუ გური

      სოთჷ დებადი

აკაბურცხა

      თოლეფწკურილო...   

რამაზ კუპრავა-ვედირთუნ ეფერ დღა

ელახიქჷ,
გელესარკ,
დუდი გეშაჭოფუ
ბჟაქ,
ქიანერობაშ გვერდის
ამდღარ დღა
იჭყაფუ თაქ...


მინშე იჭყაფ
ჭიროთით,
მინშე ხოლო 
ხიოლით,
მუჭო გოჭყაფილ
რენ თეში
იროიან რსიოლით...


ელახიქჷ
გელესარკ,
დუდი გეშაჭოფუ
   ბჟაქ,
ვაგგაჭყორდან,
დღას ვედირთუნ,
ვედირთუნ ფერ
დღა იჭყაფ...

რამაზ კუპრავა-ცოდა მონკა რე

სი ვაგიჸორქჷ,მარა გიჩქუდას,

შურს ახიოლე მა სი დონმგარე...

ასე იბშინა: ეთი ონჯუას

ჩხე ჩილამურით მა სი გონგარე,

ჸურუ ვორდი დო ვამოგინუდჷ:

ცოდა მონკა რე,

                         ცოდა მონკა რე...

რამაზ კუპრავა-ნანა თქუანდ

ჩხე-ჩხე ღუმუს ეულუანდით
ლებიას კოტოშ ნახაშას,
კაზლას მიკომცხანტუნდეს
კალანდას დო მარაშნას...


ღორონთიში ჭყოლოფუა,
ჩქიმ ფანიას ვეგნოწუმ,
ბაბა დღაშ დო სერით ხანდენდ
-ბაბას დიო ვამურთუმ''...


ნანა თქუანდ:თქვა ქჷგგალეთ
ჭიჭე ჸვალ დო დიდი ღუმ...

რამაზ კუპრავა-ვემგოტე დო ვემმოტუა

გურს დაჩხირი ელმორზუნი

სი შეილებ თიშ შქირიტუა

ოდო შური ქენმაქანცჷნ

ვემგოტე დო ვემმოტუა...

სქანი უმშო ვეგნმაღინე

კაკალია დღა დო სერი,

თეს ვარწყექო,გირაგადუქ

დო კოს თოლშა ეწმასერუ...

იმენდ მიღუ,დუმართუქჷ,

შურსჷ თისჷ გინვორთუა,

ცა დო დიხაქ ეკინწყვასჷნ

ვემგოტე დო ვემმოტუა...

მა მილინდას,სი ჸოფედა,

საფულეს ქიგმოთუას,

ჩქიმ შურ თევრე ვემგოტენს დო,

მა სი ათაქ ვემმოტუა...

რამაზ კუპრავა-ავტოპორტრეტი

რინაშ დოფას ენოწკირუნქ,
გიგიბიში გარზე ნორცხვა,
ნინას ფულირს აბჟალარე
ირო სქან მარგალურს ოცქვა...

ბრელ ხანი რე,ულა გოკონ,
ხაზირი რექ ამდღა ხოლო,
იშენ სქიდუქ ჩქინ ორთაში,
ათე სისქვამეში ჭკორო...

თე ქიანაქ ვემგატებუ,
თი ქჲანაშა გოკო ულა
დღალეფ კოროცხილი გაფუ
ღორონთს გინოტებას თხულე...

ფსუალეფსჷ ქიჩანუა,
ქოფურინუნქ სი ჟი ცაშა,
შურ მიგოლჷ თექიანი
ელი-მოლიშ გოჯინაშა...

ოშურესჷ,შურეფწკუმა
გითახუნალ გიღუ ორო,
მარა იშენ სქიდუქ ირო
თაქიანი ჸოფაშ ჭკორო... 

რამაზ კუპრავა-დუდი ოკო დიპილე

გურ ჸოროფათ მაფუ ეფშა,

დუდი ოკო დიპილე,

ქიანა ვენწყუ,კალკალეშა

ჩქიმ საგანოს მიკილენ...

უიმენდოთ მიჸორქინი

შორშე ვარა ქირჩქილექ,

ქუმორჩქინას,მუს იქუნქი

დუდ მართალო დიპილენ?...

...ნგარამოდღას ჩქიმ ოზესჷ

გურიგაგათ მიკილენქ

რამაზ კუპრავა-ბაღანობაშ გოშინა

იალონშე მიბრულედი,

ცუნდი ვარდჷ სქირაფილი,

მახვამარეფ მანცხვარკარსჷ

გერდეს ოჭიშ დირაკილო...

მოხიოლდეს მანცხვარიში

ყოლანდარიშ ეშარგინა,

საფულეფიშ ქუალეფსჷ

ენოლაფირ აფდეს ნინა...

მასორენდეს თი კიდელა,-

ღორონთითჷ მოხანტილი,

ვოქუჩუდით ჩქიჩქუეფი

თოლ დო გური გონჯამილო...

იხვამანდჷ თეოფილე,

თოლეფ ცაშა მებიჯილო,

ღვას ხეთ ქუმომფერუანდჷ

ხე აფუდუ ჰამოთ რგილი...

ვერწემ ჯაშე იფრჩქილედი

მაფშალიაშ ჰამო ხუმას,

ირემ ქალეფ გეღობილი

მიკოკირუდ ხიბაწკუმა...


მორო მუჭო გუმოჭყორდჸ
ინგირს კილეშ მოსუმალა
კორობუა ჭუბურიში
ტყა-ტყა,რზენ-რზენ,გვალა-გვალა...


მუთ ქოფშუნი,ირიათო
იმენდ მიღუდ ღორონთიში,
ჭიჭანობას-მანცხვარიში,
დიდანობას-ილორიში...

რამაზ კუპრავა-მერეხი

ზღუა-სარკეცალო

                გოსისანდელი,

ვექანცჷ ისვანჯ,

               მა გითვოხექჷ

პალმეფიშ ოროს...

სოდგარენ გოტყვაც,

                   გოგურგინუ

დო უკულ ზღუაშე

                 გამწოჭოფ დუდი

ჯანჯუხაშ წვანდემქ 

                  ვეკოროცხ თისხიქ...

ბრელ რულაიათ

              გეჸუნს ტროტუარს,

ბრელქ ხოლო 

                დუდი გემთიღ კაფეშა...

მიდგა ატყობუ

               ამდღანერ ჭვემას,

თისჷ ვაგინ:  

              ჭვემა თეცალი

ვამურს კინე

               დო ვედიშოლუ,

ხანგა ჭვემათ

                ანწიან წიმი...  

რამაზ კუპრავა-იროიან დარინალი

შულადირ ბჟა,სინთუანი,
ჩქიმო ენუმურს ზღუაშა,
ღორონთქ დუდ ვემკოჲჭუანი
მაჟიათი მოულაშა...


უღურალი თე ჟამეთის
ვაჸოფე და ვართი ორე,
მუ ამბე რე ოშურეთის,
-აბზრე:მუ მობძ,მუ მუმორე...


ღორონთ,თე ქიანას ვორექ
მარენჯი დო მარინალი,
ომურიცხე გამსინთორი,
იროიან დარინალი...


სერესქენი მურიცხეფი-
ჩქიმი და დო ჯიმალეფი,
უგურჩქინსჷ გომრჩქინანა
შურიშ ონწეს გომირჩანა...


ლიბას ქეშმოღვაღვუანა,
რქიათ დომიქანცუანა,
ლურით იროიანითი
შურს ჩქიმს ქიმშალურუანა...

რამაზ კუპრავა-აკა ჯუნა

მიკარკაც დო მესხაპუნც,

კიდირ-ჩხეშაშ თანთალით,

ბოში-ნორცხვათ გინორთელი,

მოთხოზ გურიშ ცანცალით...

ტყაპის ბოშიქ ქიგიოჭოფუ,

ქეშაბათქეს ნაცალას,

მუ ჸიუაფ ვა უჯინათ

აკა ჯუნა ქაცალათ...

ჸოროფაში გოჭყაფილეფს

აკა ჯუნა ქაცალათ,

წუწელ ორქო ბოშ იბადებ

ოჭალეს და ნაცალას...

რამაზ კუპრავა-ციზი

ციზის

ცუნდიქ

ქუმაჸუნ,

მუნაფემქჷ

გიკინეს,

ენაულა ქამელიემქ

დუდი 

  გემწაციკინეს...

ოჭმარეშე 

გოცქვირონდეს

ბჟაქ გოტიბუნ,

გოპირეს...

ირშიალნა 

დღაშ დო სერით

თე ორთაში

 ობირეს...

რამაზ კუპრავა-ოტობაიას

მასქურ ქიგეურქენდჷნი
                 ლანჯიშ თუდო,
გითვოხედი,
მაქერე სხულს,წყის,ატამას,
                მინ დამაზის
გიმვოხედი...


ონდღურსჷ დო ოსერშესჷ
                   ტაბაკისჷ
მიკუხედი...
დადის გეჲთობტყობუნდი დო
                      მარულესჷ
გივოხედი...


ტაცალედჷ ონჯუაშა
                ჩქიმ ინგირსჷ
ენვოხედი...


თუთა ცასჷ მეხედჷ დო
             მა აბარწას
ეწვოხედი... 
  

რამაზ კუპრავა- DUM SPIRO, SPERO

რინი ჩქინ ითებ,

ვალიშ მამალას,

ათენა თაში ვარენო,მორო,

მა მიდურქუნი,თე ქიანაშა

შხვა ქუმოურსუ

ჩქიმ მანგიორო...

ქიანერობა ოდო ირთუნი,-

გვიგვილ გოპირანს

ატამაშფერო,-

რინა ართიანს

გოუსქვამათჷ ხიოლ მაშინა

თაქ ანდანერო...

ღორონთქ ლეტაშე

გჷმორჩქინესჷ,

დო არძა კინი

გინიბრთუთ ტვერო,

იმენდ იშენით

ვავოდინუათ,

ოდო შურ მიდგნან:

DUM SPIRO,SPERO! ...

რამაზ კუპრავა-ნეძიშ ხიმფორეფიცალო

ზეფირს გეპუნქ

                  მუნაფილი,

ომარგალეშ

             მომინჯურო,

კოჩიშ მონძე 

                ველამირე

გური ველაძუნა

                შურო...

ანდა მიჸორდ,

             ანდა მიჸორთ

დაცალო

          დო

             ჯიმაცალო,

გჷმათუთას

       ქუდოგიცენთ

                  ნეძიშ ხიმფორეფიცალო...

რამაზ კუპრავა-ნერა ,,ტანგო''

ჩქი გითვოხედით,

                 ჩე ჯაშ თუდო,

ზღუა ინიქანცჷდ

                 მუშ ონწეს

დო მარჩქილედეს

                  ხვარჩალი წყუში...

ალმალი ბჟაში 

                  მეშულადირი

ჩხორიეფი

                     გითიჭვიტანდეს

ჩე ჯალეფიშ

                  ხიმხორეფიშე.

ტაბაკი ორდუ 

                ოშნერ ვარდით

მოქუჩუჩელი,

                  ჩქი მიკუხედით

მელე-მოლე,

                  ზღუას გინოსორგჷდ

მეჩხომეფიში 

                    ნიშეფი ჭიჭე...

...ეკოსერელსჷ

              თე სისქვამეს

გინოფურუდ

               მელოდია 

    ნერა ტანგო-ში...

             მასქური რგილი,

მიფერუანდეს

             ონდე-ონდეთ

ოგინაფალო...

                    ენგოჯინედით,

თქვან საარიკო,

                  სისქვამეთ გინოლასირი

მა ვაგმოჭყორდჷ

                  ენოჯინა

თქვან რხიანი,

                  წყარამ თოლიში...

ძეწკვი ორქოში,

                   თქვა გეინწყით

სქვამ კისერიშე,

                   ქიგმობუნეთ დო:

ვორექ თქვანი მა ამსერიშე...

ირჩქილედ ტანგო,

               ჩქი ბსხაპუნდით

გურ-შქა სერიშა...

...შვანო დო შვანო

                  წუმვოლუქი

სერით ბორდიშით:

                     ქუმაპატიით,

ქუმაპატით,

                    ქიშილებენდა,

-ცოდა,თეს ცოდა 

                   ქოჯოხონდა,

თიმი სერიში...

...მუ რაგად ოკო,

                  რეთჷ ჩქიმდე

გურელაჭვილი...

                      ბორჯ მითირხონჷ,

                ჟი მინმორე

ცა-მუნაფილი,

                     ჸოროფათ თქვანით

ვორექ ჭვილი

                      დო ნდღულაფირი...
   
         

            

რამაზ კუპრავა-ნოტე აკა

ნოტე

     აკა

       ქუგომშინე,

ნოტე

      აკა

         ქიმიშე,

თოფურს

         ქორჩა,

              ეშნაწუას,

-ლაკაციაშ 

        პირიშე...

ლექსის

         წუგოკითხაფუა,

-ეშნაულას

        კიდირშე...

ნოტე

        ქუგომშინანდე,

ნოტე

        აკა ქიმიშე,

ნანაშ გურიშ

        ოხიოლეთ,

-ჸუდშა

        ნოსათ

           მინიშე...

რამაზ კუპრავა-კაფკა დო დეტექტივი (ჩე ლერსი)

ართ ცირას,
(ართ სქვამ ცირას)
ჩქიმ ბიბლიოთეკაშე
გემკუღი კაფკა...

(თე ცირაშე ჯგირ არზიშ ვორდი)
გეგნულინუ თოლი
გეჸალუ დახე:
ათე შერობა ვამაკითხირენია...

მუ ფქიმინიკო
გოფსისონდი...
ცირაქ დეტექტივ მობთხუ,
მუშენ ვაიღუნია,
გემნირთინუ ლეჩქვი...

მა თი ცირას,
(მანგარ სქვამ ცირას)
ქუგვოშინი,ჩქიმ ჸუდეშე
ჟირ კარით შეულებ ულა
დო კუჩხით გილულა
მალე თიშ თოლიშდუმაყათამალ
ფიგურასინი...

რამაზ კუპრავა-თე დუღაშე

შურს ვოჸოთა,
         შურ ეშმოლუ,
ვამოხვარუ
          მა მუთუნი...
ქოიძირნო,
           გურმეჭვია
დუღას
           ენიფართხალუნი...
ქომწი,
            გური ვეგლაჭუნო,
ქომწი,
            ვეგლაჭუნო გური,
გურიჭვილი
             გურმეჭვია
დუღას
                ენიფართხალუნი...
ქუმორთი დო
          ქიმმეხვარი,-
თე დუღაშე
           გეშამჸუნი...   

რამაზ კუპრავა-თიშმასქვამათ

ცას მურიცხიქ

         გამკოლუ დო

ზღუას ქინოლუ

          შქირატილო,

დეუკმელ დო

          ჭვემაქ მალართ

ცუნდიცალო მეტყობილო...

ნარღინ იშენით

           ვა მოკო,

თვალირ მაფდას

           მა დღალეფი,

თიშმასქვამათ

           შოლირი რე

ნუზუეფ 

            დო

                ჭანდარეფი...