ლაშა გვასალია-ღურას (პოეტ შუკო ჯიქიას)

ტანს დაჩხერიშ გენიეფი გუმორე,

ჭყალაშ გეშა საცოდებათ ეფუნელ,

ღურას ქომწით – სამენცარო მუორე,

ვარდა ცას მუშენიე მებუნელ,

რინაში დო ურინჯობაშ არიკეფ,

ზორღაშ ქვინჯშე კუმაცალო მოფურკელ,

მუს დარკენა ჭკოლეფი დო ბადიდეფ

ჭარას რგებულს, კიონტიათ მოფურნელს...

ჸვერე თოლსჷ ვეიორზანს გოთანა,

ვაძირაფე ფურცელუაშ ჭვიეფი,

ტყვიას ირო ჭკვერს დო მენცარს ოოთანა,

ღურუს ხოლო ოსაჭირუ ჯგირეფი...

თე ცარიელ შურობუმუ, ბაბაგე,

ჭინკეფითუ ეფშაფე დო ძინელე,

დუს მახოლო მემიჩქ მალას წავაგე–

ლერს დოსქიდუ მართალი დო რჩქინელი...

ჸვა მორხინილ ყოყორეფიშ დანტირუს

თოლოსქვამე ჸოროფაში ვენტირე,

მოკო ჟინცას ნირსიცალო ვახოლე,

მუბღოლუა, გოლვაფირო, მა ხვალე

უხატე დო მეტყურიე ჭარასუ...

ღურას ქომწით სამენცარო მუორე,

შურ მუშენრე ცაშ კორკონტის რსხინელი?!

ლაშა გვასალია-ჩხაია

ღორონთეფიშ ნინა უჩქუ
გვალაშ კიდირს მირსიოლუ,
სისმარ გეუძ ხეშკა გურშა,
ფინქრეფიში ნირსი ორუ...
ჩხან–ჩხაია, ჩხანაშ ზესქვი,
მიბორბოლ დო მიხვარჩალუ,
თეშ მეჯინუ ლერსიშ მონწე
ეშმაკეფიშ ჭყანას ფჩალუ!..
ჟიშე ბურბულ მუნმაქანჩუ,
თუდო გვართაშ ბორბოლია,
ქირქეშ ჸაშე მუკნათოლა –
ქვარაგიდალ ხორხოლია...
ჯამპიშ ჩვაჩვა ნაწვანჯერი
მალაღურიშ ფსუაშ ფერი,
ფუცუცხამიშ ნაჭყილონტა –
ჭარჭულია, ჭერჭე გვერი...
თეშ მეჯინუ ლერსიშ მონწე
სისმარსუ დო ღურუს ფჩალუ,
ჩქიმ ჩხაია,ჩხორო ჩარჩხვა –
მიბორბოლ დო მიხვარჩალუ!..

ივეტა წითაშვილი-მაჯუდ პუხათ ქეშაპონე დიხას,

მაჯუდ პუხათ ქეშაპონე დიხას,

კარაკუნჩხას ქოუპირუ ჭითათ,

მორიალეს, მოროშ გამნარყ, რინტალს

ლეკუხაშა ქინთუტყობინ, ქინგარს,

ჯი აკულებ, აშო ვარწყე გიმალს,

ვაიჭარექ, წამალ მუჭო დიკაკ,

წვანდშა თიზმა იკეკ, თიზმა იხვანც,

აცანცალუ ასე კუდელ რიჸალ,

ლეკუხაშ ჸაქ ფურცელ ქუდარღ ჭიფას

მორიალეშ სიცოდილით, ჯინათ,

მითინ ვარე, არძა მიკმალ-დიკმალ,

მით რენ, ქურსით მინოლაფას ინჭანს,

ჩხანაქ ჩხორეფ აკოკორობ რჯღიმალქ,

ნაკორობას გართანს, კართას იბშანს,

მორიალეს ქაშუ შარაქ გიმალქ,

ჩხორო ჭუა ჩხორო გვალას ქიმკარღ,

გურს აცხვანტალ ხიოლ სარკო, რცხიმალ,

ლეკუხაშ ჸას მუთოტყობუ ტიბას,

მაჯუდ პუხა ქოხუტოლუ დიხას,

კარაკუნჩხას პეულ გაფაფ ჭითათ,

მორიალე, მოროშ გამნარყ, რინტალ

კინ ირანტალ, ვაუბაღ, მუთ მიკაბ.

ეს ყველამ უნდა წაიკითხოს!

http://azrebi.ge/index.php?pid=1087

„ფუტკარაძის სინდრომი“ და ინტელექტუალური შაჰიდიზმი ქართულ მეცნიერებაში

ივეტა წითაშვილი-ნუზუ

ნუზუ მუჭო ურზუ,
ქარბორიას უთურს,
მიჸორქია უწუ, _ 
სხუნუნს,
სხუნუნს,
სხუნუნს...
ჯღარ ნოჸელეფ ქუდურღ,
ჸალს ათასკუ, ჯუნუნს,
ანდა ფირქიქ ქუცუ, _
უკულ,
უკულ,
უკულ...
ცას ჭვემა მაბ პუხუს,
მუთ ვარდ ართათ ქუმურს,
ხიოლს გური ჸურუ,
ფულუნს,
ფულუნს,
ფულუნს,
ორაგადე მუთ რდუ
ვარაგადე მუთუნს,
ცაქ ბჟას ჩხორეფ რზუფულ,
ქუმწურღ,
ქუმწურღ,
ქუმწურღ,
ჸოროფა რე ჭურჭულ
უთებუ დო ჸურმულ,
ურა ცხენეფს შურშურ
ურულ,
ურულ,
ურულ,
ქარბორია უთურ,
მიკახორცხუ ნუზუს,
ნუზუ თაში ურზუ,
უსხუნ,
უსხუნ,
უსხუნ...