ედემ იზორია-უღტახილი

 ჩქიმო ვარე მუთუნ ჭვიტი,

მუთუნ შარა

დო გოთანა გოლაშ იშო

ქალაფორე:

მუშენ ოკო ჸოფედიკო

თეშ მანწარა,

გინაჯინუ, მუშენ ოკო

ვამაგორე...

ფაფარამი გეშასოფი ჩე შამარა,

ოიმენდეთ გეითინი, ქოპოპორე:

უღტახილი, სქანი აშო, აბა. მორო,

თი გინალჷ მის დინაფუ, ვარა სორე...

შორო-ბორო მუნერიე ათე ჭარა;

მუ ერია, მუ მორია, მუ ალმორე:

შური მენტი, ქიმიანტე, აბა მორო

გინაჯინუ იგორენო, ოთოლორე...

თოისერი, სი, იმენდიშ ფსუაშ ორო,

ვაფურინე წიმი კირდე ფაფალარე...

ალ-გილუათ დიფაფალე, აბა, მორო

მიქ ინგარას ყებური დო ოლაფარე.

ჩქიმო ვარე მუთუნ ჭვიტი,

მუთუნ შარა,

ჩე გოთანა გოლაშ იშო

ქალაფორე:

მუშენ ოკო ჸოფედიკო

თეშ მანწარა:

გინაჯინუ, მუშენ

ოკო ვამაგორე...

ზეინაბ სარია-ჭუმანერ დღაშ მოძირაფა

 ოროიას ალახე

ჩე დედიბი ხვალახე.

ოგვაჯესჷ კარკალით
სუმ დუდვალუ მარქვალი.

სუმშა გაგმუკვანწუ ონწე,
ურდუ სქუა, მუში მონძე.

სუმი ურდუ ერცქემი,
ღორონთ, მარდი ქვერსემი!

სუმი ურდუ ყილო,
ვეჩითვალე კილო.

სუმიხოლო ქომოლი
ომბოლობაშ ორზოლით.

სუმი ჸა რე ფალირი,
სუმი შარა - ხარილი,
ხანდა ვარე დინაფილჲ,
თაში ჸოფე ჭარილი.

სკუალეფიშ ჯგირობუათ
ხომ მუთუნს ვადალახე,
ოროიას ალახე,
ჩე დედიბი ხვალახე.

მუდა სერ დო მუდა თუთა...
სუმი ბჟა დო სუმი თუთა...

სუმ ხორუა, სუმ მენდი,
მუქ იჸუას ეშ მეტი.

მიტკვარჩალნა მოთალეფ,
შურ დო გურიშ ორთალეფ...

........................

ოროიას ალახე
ჩე დედიბი ხვალახე...

ლაშა გვასალია-ჰე ჯიმალეფი...

ბირათ ოკო აკითანუას,

ბორია იჭყანს შქირთონსუ დო

რშვინილ თვალუას...

გურმეჭვიეფ გილაკონკნა

ნოთეშ ჭურჭულეფს,

ჩიტეფქ ყ-ოროფაშ ობირეშო

აკიღურჭულეს...

მოხა თუთასუ

სერ მუშობურ ფინქრო ინჭაფუ,

ჰე, ჯიმალეფი, დღახუე დო

შუმა იჭყაფუ!..

ლაშა გვასალია-გეთანდე მერცხას

 გედირთე ოკო, გემწოსოფე, გიკურცხინუე,

გეთანდე მერცხას, ვასქვანს თელას ღურუშ თოლეფი,

თე ტყაში წვეწვეფ ლანდარუო აკირცხონუე,

ქეგნიფაფუე ბურჩხეფი დო ჭველე- ჭოლეფი...

ბჭა ვამორწონს დო ორო- ოროს გორუნქ დანტირუს,

ტყობა- ტყობაშე შურშა მენდო ვადიხვანცუე,

ქიანა ჯიხას მუთუნნერო ვადგანტირინე,

კით საღორონთო ონჭაფეფშა ვენკიცაცუე...

მუთ ვაშინერსინ თიშა "ჰამენ" კოცს ვარაგადე,

ვემიღენს ქირსე- ეთანაფილ სარკო სარკალი,

ნირსო გობძუნა მითაჟამიშ ეზმოჯეშ ბადე.

დო უკვანწუანს დუდიშ ტყურას - ონწეს მარგალი...

მუშ არტახი დო მუშ კალამი, დო მუშ კვანწაფა,

ზორღას მეკირილ ონარღეშო ხოსარს გუართუქ,

თე ონტყოლეშის მუქ დუმოსქიდ გურიშ მარწაფათ,

თეშენრე შურიშ ორწოფუო მუთუნს ვავორთუქ...

ქემერთ გედირთი, გემწოსოფ დო გემწიბირგულე,

მერცხაშ გოთანას ვასქვანს, კუმელ, წკურილ თოლეფი!..

ლაშა გვასალია-აია რე დო ბაიაშა

 აია რე დო ბაიაშა

ართ ტკუ მემიძუ,

მიმონკენს რინას

შურიში დო

ფინქრიშ წვალება,

დიხა დო ცაშა სინთელუათ

ხვამა გომიძუ,

მუკარე კარეფს ჯგირობუაშ

გეშა ხარება...

სოიშა გოკო გილათხოზე

დღალეფს სანგარო,

დო ალაბირე ურგებუო

ქიანას გორჩვილს,

იძახე ირო - ვორეთია,

ბაბა, მანგარო,

ყია გიმოჭვილ აფუნსუ დო

მათხირ დამორჩილს -

ქახვარნო ცქვაფა, სათანაფო

ჭითა მარქვალეფს?

უჯინექ მინდორს, აშვოჯანუქ

ფანთილ ნაცალას,

მუჟამს ვამინჯენს შურობუმუს

ჭყიშ დო სარქალი,

კოჩ მურე, მახა, ჯა დო ქუა

ხოლო ცანცალანს!..

მოურს თანაფა, მიაძინუ

დღალეფს დღალეფი,

გაპეტელუნა ცანდილ ყამას

შხურ დო თხალეფი!..

მოურს თანაფა,

ნაზისხერა მოურს თანაფა,

ხანტუნა მინდორს

ჯვეშობურო

ხოჯ დო აგაფა...

მოურს თანაფა!..

ლაშა გვასალია-ჩქიმ გურფული

 მელე - მოლე ოწინდალე,

შქას ხობწყარიშ რჩხიალეფი,

კოკ - მუხურშე მუნაფანთა

მაკვაზიაშ რსხიალეფი...

ეკი- დიკი ლა-ჭუბერი

შკა რეჭეხიშ გითნაწირა,

ენიშქვართალ წვერედია

ოჩხომეში წყარიშ ცირა...

ოხვამეშე ჭანთ ილანდ,

ცაცხ დო ნუზუშ ნალანდირა,

მასქურს მუფარფალუაფ

ჩქიმ ჯგირ ბაბუშ ალნაბირა...

მუაჩქიმიშ ხუმა ცანდ

ალმასცალო ცას ჭკირუნსი,

მობარბანჩელ გურს დარანა

ხირიმშორო შურს რხინუნსი...

მაჭინკიაშ წანჭარეფი,

ოჩოკოჩიშ ნახიორა,

მიგვართალნა ჩეღალუთი

მიხართუნა: ხორა, ხორა...

დღა სკიბურო გატრიალუ

ხორც დო შურიშ დანტიას,

ღორონთ მარდო უზიმუნს

კოს მეხვამელ ჩე თიასი...

მუ ბორბოლო ემორჩქინი,

უდუნტირუ რსხიალით,

ვენმანტირ შურქ სოთინ,

ხვამათი დო რკიალით...

ელე- მოლე ქარქანთია,

ჩე გოთანაშ ჩხოროფილი,

გურფულ- ბჟალარ მახარია,

ჩქიმ თოლმახა ჸოროფილი!..

ლაშა გვასალია-ფხოსარე დო ბჟას ვონჭუქ

 ჩქიმ ხოსარს მუ ოხვარ

გურჭუელო ერჩქინელს,

უჭარ ლერსიშ ოფუტეს

მუნაფეფშა მერჩქინელს...

"ძია ბძირ დო კაკა ბძირ"

აგოთანაშ ეზმოჯეს,

ბორიეფს ვამართეს დო

მასქურიეფქ მოზოჯეს...

დომქაქალეს ჸუჯიშ ჸას

ფარფალიაშ ხონარით,

გომკურცხინეს მართუეფ

მინ ქოთი დო მინ ვარით...

ფხოსარე დო ცას ვონჭუქ,

მუს აჭოფე ნარტელ შურ,

ღორონთი დო მარდიანი

სი დოთხილე სქან შხური!..

---------------------

ხოსარი- ფიქრი,

ეზმოჯე- სიზმარი.

შალვა ჭეჟია-ქიგიჯინექ ელმოლსინ

 ქიგიჯინექ ელმოლსინ

ჩიტეფ თოლეფს ნაბუნა,

ეშე ცაშკარს გესოფნა,

ვარჩხილ წყარიშ ნაბონათ.

მუდგანერო ირთუე,

მუდგანერო გირთუე,

ნინათ არძო რმაალანს,

მარა გურსი შაყარანს.

ფირქებს ელნამალას,

გიშნაგორა ნადუდის,

მუჭოთ ბორჯის ორთუმელს,

მუჭოთ შურიშ ობუნეს,

ირო ოკო დაუნენ,

სკან შარას დო სკან კარსი,

ირო ოკო გაუნენ,

შურ დო გურიშ ნაშარსი,

სოდგა რდას დო სოდგა ვარ,

სოდგა ვორდენ იშენით,

ირო ჟიშე იბჯინექ,

ირო თევრე იშენით,

თუდო მუთუნს ვეველუქ,

აქ პოტიკ რე ირფელინ,

ენას უცბას ქუგოფხვად,

აქ ვეძირე თიფერინ.

ანდა კათაშ გოჭყაფილ,

ანდა საქმე დოჭყაფილ,

მუჟამს არძო მიბრჩქილე,

მუჟამს ღორონთგონჭყაფილ,

ვენინტირე მონჭყაფილ,

თხუმურელი ნაჭკირას,

კოჩიშ ნინაშ დოჭყაფილ,

მებჭუნსი დო ბდაჩხირანს,

მარა მუშენ ვამიჩქუნ,

მარა მუჭოთ მა მიჩქუნ,

ოკო გურზე ნადაჩხირს,

ოკო გურზე ნაჭუას,

მუჭოთ შურიშ ობუნეშ,

მთავარ ჯერღვიშ ღაჭუას,

მუჭოთ ბორჯიშ ჩქინ რინაშ,

უშურგურე ნაჭუას.

ლაშა გვასალია-ჯაბი

ღორონთიშ ფურცქინუათ ალმასიმე, მახა,

სქანი შურიშე ეკნაღელი რაგადეფიში სიორი,

სქან უტომბაშ ანზრეფის სანთელუა

ცანცალერო ჟი ულირ, მინშა ჭუჭელერ,

ეცანდილ დო კვათიერი, ნირსიშ ჯღარო მაქიტალი,

ეფუნელ დო ხვარხვალერი...

ო, ჩქიმ მახა, მუჭო ბჩალუნს თანაფეფიშ უკმელუა,

გოჭითორელ ბორუეფი, ასე ხოლო დოვილნა

ღორონს დო მუმასინ ფერეფ...

იჭინგოლნა, სხარსხალა ეშმაკის ნინაცალო!

მიჩვაჩვალნა უჩხვინდე დო ჸვა ლანდღვილ

რსიოლეფი, უოჭიშე ბეძღერია ქომოლეფიშ

მენდო დო მიულაფუანა თოლუმუნტირ ჩხეშას...

აკილანდღუ ართდღას ირფელ დო აკიბლასუთ

ჩქით, ზორღა ქალერჩხუანს გიდალ ქვარაშა

თე ზესნახე პეულებს დო ჸუმურეფიშ დალიეფს!

ვო მახა, ვო, მარდობუაშ მონწე, ათეს ირფელს ჩქიმცალო

ქარწყექ დო ქითმენქიდა დოშკირატექ სი სანგარო,

აკორღვაფექ სი სარალო, ქასკილად შურწულირეფს

შურობუმუშ მინდორეფი, გვალეფი დო ხარხუნტეფ...

გოკურცხ, მახა, შურო ქოიკინდდა, გობარჩხალე ართშა,

კოჩიში გახარებას აკაბურცხა ოკო, იმენდუა ხოლო ოხვარ

დო დუთხინუანს ოშურეთშე მოსოფილ კვიკვილეფს!..

ქაძირ, მახა, საგანოს სკან ჟინცაშა მებუნელ ძიცა...

ხორციშ დოპიჩუა გახვარდას შურსი, ფსუა მაიდეს

ჩანაფილი, მონწე-მონწეთ ოფურნალო.

მაულარეფ ვორეთ თევრე, თი ქიანაშა, ე, სარალო,

ჩქი მი დომტენა, შხავა მი დოსქილადე სამარდოთ?

თინა რე, მახა, ოკითხე დო გაგებელი - თაქ ქომჩქუნა დო

თექ მუ ღირ რინა ოშურეთის, მინჯელო დო უმინჯურო?

მუთუნ ჩქი ვამჩქუნა დო ვამარჩქილენა, დუდიშ მაჭყალ დო

უთოლქვინჯეთ გილმარულე მარგალემფს!...

ვო მახა, ვო, უშურობაშ მესანთელე დემკოჩ!..