იალონშე მიბრულედი,
ცუნდი ვარდჷ სქირაფილი,
მახვამარეფ მანცხვარკარსჷ
გერდეს ოჭიშ დირაკილო...
მოხიოლდეს მანცხვარიში
ყოლანდარიშ ეშარგინა,
საფულეფიშ ქუალეფსჷ
ენოლაფირ აფდეს ნინა...
მასორენდეს თი კიდელა,-
ღორონთითჷ მოხანტილი,
ვოქუჩუდით ჩქიჩქუეფი
თოლ დო გური გონჯამილო...
იხვამანდჷ თეოფილე,
თოლეფ ცაშა მებიჯილო,
ღვას ხეთ ქუმომფერუანდჷ
ხე აფუდუ ჰამოთ რგილი...
ვერწემ ჯაშე იფრჩქილედი
მაფშალიაშ ჰამო ხუმას,
ირემ ქალეფ გეღობილი
მიკოკირუდ ხიბაწკუმა...მორო მუჭო გუმოჭყორდჸ
ინგირს კილეშ მოსუმალა
კორობუა ჭუბურიში
ტყა-ტყა,რზენ-რზენ,გვალა-გვალა...
მუთ ქოფშუნი,ირიათო
იმენდ მიღუდ ღორონთიში,
ჭიჭანობას-მანცხვარიში,
დიდანობას-ილორიში...
No comments:
Post a Comment