გიორგი სიჭინავა-ორთაშ ზარალი

მუ გოჭირ მარგალი
სი გუგულიშ მარქვალი,
დუდიშ მაღორებელი
მიწკუმა რე მართალი.
გამგინებ ზოთონც,
დღალეფ ურსხებ მარტის,
მი მერჩანც მარდის,
შხვაშ ოგვაჯეს ნარდის. 
 * * *
 ირფელც მუში ოჩი გეძჷ, 
ირფელ მუშის გაფულენც
ბორჯიშ ელასირელი ხამ
იმენდეფც ცაფულანც.
წყარეფ ვეგიხუნუანც
ხვამარდეფიშ ნაულას.
კოჩიშ თოლი ვაძირჷნც
ღორონთიშ ნაფულას.
დოთჷნცჷ დო დოჭვენცჷნი,
ცა გოსარკჷნც მუნაფილი
დო ბჟაცალო გამწოდირთჷ
შურ, ჸოროფათ ფუნაფილი.
კინე დირთუ აფუნი დო
გეითოფალუნც ხუმაფილი...
სი ღორონთიშ ნაჭყოლოფა
შხვაშა გაფჷ თხუაფილი.
მუ ოკოდჷ სქან მარქვალც
ტურტურუაშ ოგვაჯეს,
ინეფქ შხვადო მირდესჷ დო
ფსუა შხვადო გოფაჩეს.
აკა აშო მიკირთი დო
გონწყი გური, წყუნაფილი,
ცოდა იზმა მონკა ვარე
ჩილამურით რტუაფილი.
ნარღეფქ გურც დიხვილუდა
ნტერიში ჯინშენ იბირით
დო სი ხოლო ონირზჷდი
ათე რინას, კიდირით;
უკულ ოჭიშ ქურთინე დო
ვამიჩქ, მი მუს თქუანცჷნი,
მუშ მაქექა ჸოფე შარა
მასქურ გიჯიკუანცჷნი.
სი ვარწყექო, ეკიშ გვალა,
ჩე მუნაფაქ გონირსჷნი,
ვარა, თავრე, ცხიმურეფც,
ქარ-ბორია ონირზჷნი?
თუდო, დოლო, სქანიცალო,
დუც სიჭიჭათ იჩუანც,
მარა ირ კოჩი, მით ქორენ,
კუჩხის გიობიჯგუანც.
ნგერი მუთუნ ნგერი ვარე
ომანეშა ინტებუნი,
დუდ გაფ ონგარალი,
მითინ ვაგენირზებუნი.

* * *
 აკაბურცხა სამარგალო, 
აკა, ბუცუცუნია,
რაგადანა ლეხი რე დო,
მალას დოღურუნია.
ათეზმა გაჭირებას
თინა ვაგურზუნია...
ლეხ ვაბადენც სქუალეფც,
ლეხის უცენც მუნტურეფ,
უმინჯურო მეტებული,
ქომწი შურო მუთუ რექ.
სო დარღვი სოლე მარღვი
ათეზმა უთურეფჲ...
ქორჭკუმუნა სქან ტანიშე
გიშნაულა მუნტურეფჲ.

* * *
 გუგულეფი გურღვინჯებ, 
ართ დღას, მუნაფილც,
ათე ჩქიმ ჸავავაში
რაგადი დო ჸურაფის.
მაჩინეს: ,,მარგალიშ
მანგი ვარე გუგული,
ინა დუცჷ ქიჩინენც
ჭიჭეს მირდუნ უკული.“

* * *

მართალჲ რე დო მუ უწუა,
ქიმუჩინა ბოდიშის,
ნარღი, გურცჷ, ოღურალო,
მიძგვიტუანს ოდგიშის.
ორთაშ ზარალჲ ვორექჷ დო
ცოდა მუნობძ ოჭიშის...
გუგულეფიშჲ ჭკუა ვაძჷ
ამდღანერჲ ოდიშის.