ჟინიშ ორო თე ქანაშ
განჩ ქოფთქუენ, ვაშინერს,
ღორონთ ვაგომგტიბუანს
გურიშ-ჭუაშ მაშინეს.
მაფშალიაქ ილორიშ
ბაღის ბირა მიოტუ,
ოკალმახეს, ინოხონს
ბორია ინიკიონტუ.
ვარდიშ ბაღი მიღუდუნ,
ნამ მაზაკვალქ დომიჭყუ?
ჩქიმ კინოხონგ დოხორეს
ამდღა ქუაქ დოკირცხუ,
ოკუმაფეშ შურ ინთხანდგ
მუმაშ ოდას, უჭვესჷნ,
რინას ვაღუ ფურჩაშ ფას,
მუმაშ გურშა მიჭვესჷნ.
ერამხუტუს გუნია, -
თქუეს, სოდგა ძირესჷნ,
პიჯის ფიმულ ვამოჩანდჷ
ძიძეს ქუას, ჸვილესჷნ.
გაჩემებე კიპირისი, -
მიარჩქილენ, გურს უჩანსჷ, -
ოქუმიშ წყარ, დომგარით,
ჩილამურო მექურჩანს.
ბორია ჸურანს, წყარ ინგარს,
ცა, ქომწი, მუ გილამუნ,
აფხაზაშ დო მარგალიშ
ქანას მერჩხუნს ჩილამურ.
No comments:
Post a Comment