ალიო ქობალია-აია რიელიში

ერია რე,მორია რე,
თუთაშფერი ბორია რე,
ზღვა ორიუ ოდიარეს,
ფორილიე ფურიალე.
მაფაშ ხორი–ხორიალე,
ხორგონი დო ხალია რე,
ორქოყილო ხვიარელსუ
ხაიაში ხოლუა რე.
გინოლასუ მიორენი,
მადინაფუ მედია რე,
მონიარე მიარენი–
უთურეფი მეფიარე.
ერია რე,მორია რე,
გილეფაფუ მორიალე,
ზღვასჷ კოკო გელაფირი
აფსირტე დო აია რე.


1.ფურიალე-ფრიალო კლდე
2.ხოლიარე-ქოლერა
3.ხალია-დაბლობი (ჭაობიანი)
4.ხორგონი-დაბლობი
5.მორიალე-მორიელი
6.კოკი-კუნძული
7.ხაია-ჭაობის მცენარე

ალიო ქობალია-ანა საჯიხე

ადა მარია, დადა მარია,
სი დომთხილე დო სი დებარია
ჩქიმი მოთა დო ბადიში ნარდია,
თაშ იხვამანდუ ანა საჯიხე.

ადა მარია, დადა მარია,
სი გემწონია ცოდა დო მარდია,
ცოდა – ჩქიმო დო ნარდის მომდარია
თაშ იხვამანდუ საჯიხე მახვამერი.

ადა მარია, დადა მარია,
კიდირს გიფინუნია ია დო ვარდია
სი ქოიჩქუნია ნანაიაშ დარდია –
თაშ იხვამანდუ საჯაია დადი.

სანთელს გარენია ჩილამურია,
უღუშა გემირთუნია ხაჯალურია,
სქანდა მუკომჭოფუნია ღურელ გურია-
თაშ იხვამანდუ საჯიხე განგარებული.

ადა მარია, დადა მარია,
დაჩხირო გუმორზუნია ზისხირელ ოსარია,
ჩქიმ სქუაშ ნოშირიენ დო სქანიში, ვარია,
ჟირხოლოშიავო, დიდაქირსე! – დადიქ.


1. ხაჯალური-გლეხთა საწამებელი მოწყობილობა დადიანების მმართველობისას
2. ოსარია (ოსარე)-პერანგი(საროჩკა)

ლია ნაროუშვილი-სამარგალოს

სამარგალო- გურიშ კილა,
ღორონთიში კართეშ ორო,
ღურჭულანა მარგალეფი,
ჯიმალეფიწკუმა-წორო.

ჩქიმი სქვამი სამარგალო,
ოხვამურ ჯაშ ელნარდირე,
გაფურინანც მაფშალია-
ოშ ხონარშა ელმაბირე.

ვოი ნანა გოლუაფირო,
სქანი მანგი მითინ ვარე;
მა ვორექჷ, ჭიჭე ჭყიში,
მასქურწკუმა მიდგუ კარე.

სქან სანთელო სქან გოლუა,
სამარგალო, ჩქიმი რინა,
მა ვამაკო, მა ვამოკო,
უსქანეთჷ წუმოძინა.

სამარგალო-გურიშ კილა,
ღორონთიში კართეშ ორო,
ღურჭულანა მარგალეფი,
ჯუმალეფიწკუმა-წორო.

ლია ნაროუშვილი-ჯინჯი ხატი

სამარგალო-ჯინჯი ხატი ჩქიმი,
თოლც ვა მოთხუ დღაშ დო სერით მა,
თაქ რე ჩქიმი გიორგი დო ცოტნე,
სქან სანთელო სქანი გოლუა.

მოსიზმარუ, გეთუ ქიანაშ ხანქჷ,
ვამმოსვანჯუ გურიშ ჭუაქ მა,
მაფშალიეფ ღურჭულანა ცასჷ,
სქან სანთელო, სქანი გოლუა.

სამარგალო,ოდაბადე ჩქიმი,
თოლიშ სინთე, ბორჯი გოთანა,
ერძამილი მურიცხეფ დო თუთა,
სქან სანთელო, სქანი გოლუა.

კონსტანტინეშ ნაკილოთა ბაღის,
დობრგათ ხოლო საარკვანო ჯა,
სამარგალო-ჯინჯიხატი ჩქიმი,
სქან სანთელო, სქანი გოლუა.

რინოს კვარაცხელია-ლერს იმენდო ალამირე

ლერს იმენდო ალამირე,
შური გამისქვამუა,
ჩქიმ დუც ბრელ რე გინნაულა,
გურგინი დო ვალუა,
ცას მურიცხიშ მოხარცქუა,
თუდო დიხაშ ნწალუა,
მარა იშენ შური მიდგჷ,
დუღას ვუგვარგვალუა,
ჩქიმი ნარგი რინაშ ნერგის
პეულქ გამკოფალუა.
მოთალეფ რე ჩქიმ წამალი,
ღორონთქ დომიხვამუა,
ჩქიმი გური, ჭყოლირ გური,
თინემქ გამიხარუა.
ბჭარუნქ, ფსოფუნქ, იფსოფუქ,
ვამოზარჷ ჭარუა,-
ურაგადუშ რაგადი დო
უხარ თირიშ ხარუა.

პიერ კობახიძე-ჩქიმი ხეთა

კინ ქორძირი ჩქიმი ხეთა,
ჩქიმი ჯიხა, ჩქიმი ლარჩვა,
ურთაშ გოლა დო ჯეგეთა,
ჩქიმ ყებური, ჩქიმი ლარჭა;

მა მორდილქჷ ვეგერგიდა,
მარდუალი ირო ფშუქი,
სი რექ ჩქიმი ჯგირი დიდა,
სი რექ ჩქიმი თოლიშ შუქი.

მუდგა ვორდე, სოდგა ვორდე,
ანთას კლასიშ ნაგურეფი,
დღას ვაგმოჭყორდ სქან ჩე ქუა,
მუაჩქიმიშ ნაქურეფი.

სქან ძიგირი, სქან მუჸია,
სქანი ბჟაში გილნაწირა,
სქან შარეფი მუკი-მუკი,
დო ფარცვანხეშ სქვამი ცირა.

მა ფშუ ათე ობირეში,
კობახია ასლანგერი,
თინა თექი ოხორანსი,
სოდეთ ორე ნალანქერი..

თიშ კარეშა ვემიოთინანც,
ვართ ტურა დო ვართი გერი,
ყაბარდულო მონწყილი რე,
თიშ ცხენი დო ონანგერი.

მა ფშუ ათე ობირეში,
სქან გურეფიშ გილნაბირა,
თიშ უკული, ჩქიმი ხეთა,
ბრელშა ორექ გილნაპირა.

ირო გიბირქ, ვაბღურიდა,
კობახია კალიშ სქუა,
დიდაშ კართეთ ქიგნმოფორი,
სქან დიხა დო სქანი ქუა.

ათაშ ვორდათ, ჯგირო ვორდათ,
ვადმოსქიდა გურიჭვილო,
ჩქიმი ხეთა, ჯგირი ხეთა,
ირო ფალი გოლიუაფირო!

დავით ჯ. რაფავა-ტობავარჩხილი

ტობავარჩხილჲ წკონდა,
პეულეფიშ დოლო,
მელიშია მონდა,
ანდა ჭუა, კოლო.

ცაშკიბულიშ კონკას
თუთა ელნაფალა,
ოსარკალაია,
თილი ჭითაგვალა.

მერეკელა ტობა,
ანდა მონკა შინა,
უთოლონჭეშ კობა,
ნაკილოთა რინა.



1.მელიშია-მოცვი
2.ანდა-რამდენიმე
3.კობა-ნდომა
4.ცაშკიბული და ჭითაგვალა-მთები სამეგრელოში

მურთაზ ჩახავა-სო რე შურიშ მორცხება

გვალა-გიდალ ქვარამი,
კირდე-რობუ-წკვარამი,
ერცქემიში ქაწვანჯა,
ცას მეგ, ყამატარამი.

ქირი-სუაშარშალა...
ბჟა ველუნსუ ბარჩხალა,
ვართი-შხური, ვართი-ჭყიში...
ვართ-ხვამა დო ვართ ჭყალა.

მურთაზ ჩახავა-ჭიჭე ცირა

სი ვარექუნ ხასილასუ,
მა ირფელი მაცილანსუ,
გურშა ქეიფხუტოლუა,
სქანიჯგუა სქვამ ცირასუ.

თუთა ორდი თუთარჩია,
ჩე ნაბადო ქოდმარჩია...
შურ დომიტე წკირილო დო,
გურც დაჩხერი ბარბანჩია.

რაგადანდინ, ქორშუნია,
პეულეფი თორსუნია...
ნეტე მუთუნ ბრალს ვორდენი,
ღვანწკეფს დაჩხერ გორზუნია.

ჭიჭე ცირა, ცვირალია,
უჩა თოლეფ გვირალია,
ჩქიმი გური სი დოჸვილი,
ანწ ვარე მაპირალია.

მურთაზ ჩახავა-თოლი სქანი

თოლი სქანი -
მანჭიე დო მანჭი,
წკურუმირე-
ჯინჯშა ვედინვანჭი.
ჸოროფასუ
ვაკო ეზმა გაჩი,
ა, კილა დო
გური ვიშო განჯი.

მურთაზ ჩახავა-საჸოროფო საგანჩო

ამდღა გვალო
შხვანერ დღა რე, გვალო...
ჭვენს დო თჷნს დო
ქარ ირქენსუ ძალო,
ეი, ვარა!
დუც დიპილუნდ მარა
ხვათა-ხვალე
ვადმატენექ გვალო.

მურთაზ ჩახავა-ოთოლეშ

გოლეფს ნირსი მობუდუ დო
ეკიეკ მიკიბაწარუდუ,
გიმანთილსუ ნოქურს თუდო
წყარიშ რაჩხალ აზარუდუ.


გვართა ცასუ მუკნასოფა
მოქირინელ არგუნც გუდუ...
წყარიშ გვარგვალ როფა-როფა
ქუეფც გითმიპუროსქუდუ.

მურთაზ ჩახავა-შურიშ რტინი

ეკისერუ უსერეთ,
ცა გიორე ონგარ დღას...
ქარ იგანს დო ფურცელენს,
ევრე-ავრე ოფართხანს.

გოვალ, გოტყვაც თოლონჭეს,
ცაქ გიხირიტ ობჟალეს,
შქურინაფილ ტორონჯეფქ
გოლა გეგნიტკარჩალეს.

სო იდი დო სო ფურინი,
სო იდი დო სო ფურინი,
ქარწყექ მუჭო დოვღურინი,
ნეტე ღურელ ქოპუნინი...

გურქ ოკომცუ ქუმუცალო,
თოლეფქ ეკმაფშ ვალუას,
მუ გურზუ დო მუ მუცალუ
ჩხანაშ გითოფალუას.

მურთაზ ჩახავა-ჰაი, ჩქიმ ცოდა ნანა

თე ცხოვრება ზღვა ორდუნი,
მიჩქუდუო ბაბა,
გორჩქინელი კოჩი ჸოფე,
ზღვასუ დინნადღვაბა.
წყარც გეცუმილ ხანდა რე დო
კოჩით ხოლო-ხანგა,
ნამს ჩურუა ვახუჯუ დო
ოქრო-ვარჩხილს განგარს.
უჩა წყარი ძალენსუ დო
ჰაი ჩქიმ ცოდა ნანა...
ურძღაფელა ჩხომეფს პიჯი
მუჭო უქიქანა.
დონი ართო წკურუმი რე,
ნოშკვერ ქილია რე,
ორგიაში უმუშოთი,
მუთუნ რსხება ვარე...
შორშე მოჩქუ წყარიშ პიჯი,
ჩეჯალეფიშ რქია,
გოლენს ჟი გენმიგორგოლუ
გოფშა თუთარჩია.

სოსო კაკუბავა-თუთარჩელა

ზღვაშ-ფერ ცაშგურს ლურმორებულ
თუთა თოლეფს უმანუანს,
ტყას ხოლო ლურ გოტახუნ დო
სერს ჩქიმწკჷმა ოთანუანს.

დოშურდუდა, თუთა ლებო
ჩე მუნაფას ქაგთიფინანს,
ლანტით რულქ თოლგ გაქთუუღჷდა
მარწკინაია გაგმოთირანს.

ტყაშმაფა ღალს ამბეს არჩენსჷ,
მუსუთ გვალა მაჩინანსჷნ,
ცხაცხუშ წვანდშე ჩიტ სერს ორკინ,
შარა ვარე, ვარჯგინასჷნ?!

განჩი მუთუნ ვაგნიჩინე
ოკალმახეშ სიორიშა, -
ოჭაკეშ ტყაშ არიკ მოუღ
ემხვარეფიშ ნოხორიშა.

ოქუმ-წყარ ლურს ბორდიშანს დო
სათანჯოს ჟი მურიცხ ჭვიტანს,
ბებიშ ნაჭვა ჭვიშთარჯგუა
თუთა ცაშ ჸვას მიკოცვითანს!


1.ტყაშმაფა-მეგრული მითოლოგიის პერსონაჟი
2.სათანჯო-სოფელი სამურზაყანოში
3.ოქუმწყარი-მდინარე სამურზაყანოში

სოსო კაკუბავა-ემხვარიშ ნოხორი

ჯოღორ ლალჷნდ, ფურკ ეურდ
მიკიკაკჷდ ჯალეფს კჷდ
ჷდო ემხვარიშ ნოხორისჷ
ბორია გილეპოტიკჷდჷ.


ბჟა ეურდ დო ილუურდჷ
ობზაკალეს ზესქვ კუთანდჷ,
ამდღა თაშირდ, ჭუმან თეშ,
დღა გინძე რდჷნ, სერ კუნტა რდჷ.


ნუზუშ მანგო, ოქუმ-წყარც,
ბოგათ ჭყონიშ ჯა გოძჷდ,
გალე თჷნდჷნ, ჩქინ ბუხარსჷ
დაჩხირ მითობორბონჯჷდჷ.


აფუნც პეულს გატვიტვანდჷ,
სიორს ჸუმურს მუს უხარდ
დო დამორჩილს მარდუალ
დიხაშ ლებიშ შურ უნთხანდჷ.


ჯოღორ ლალჷნდ,ფურკ ეურდ,
ჟამს ბრელ მუთუნ ულამუდ,
დო ემხვარიშ ნოხორისჷ,
ბორია გილეპოტიკჷდჷ.

სოსო კაკუბავა-შამანეფიშ ქანაშ იშო

შამანეფიშ ქანაშ იშო
თირქ მიდეღას ქიჸი ქანა,
ოდინაფშე კუჭ-ხუმაფილ
გერეფ დიდას იგორანა.

ბორია ჸურანც ტურაცალო,
სერი რენ დო თუთა ვარე,
ამდღა ვარდა ჭუმან იშენ
ღორონც შურსჷ მივაბარე.

ჩე მუნაფა ქაქთომირჩით,
ჩე მუნაფა ქინმოქუნით,
ღურუქ ჭახანს ქიცალუ დო,
აფხაზეთშა მიდომჸუნით!

დიდა თექ პუნც, მუმა თექ პუნც,
თექ პუნც მამჷდა მარდუალი,
ნუზუშ ჯინჯის ჯვეშეფიში
საფლე-გურიშ მაჭუალი.

გალე თჷნს დო მის არჩქილე
გურჭყოლირიშ გურიშ ჭუა,
რინც დო სისმარც მიშეფაფუქ,
გოშინას შურს უჸუნუა.

ოქუმს ასე დამორჩილ რე,
ორქოშ ფუთქი მიკოძ ლაფას,
აჰ, შურ ქომწი, მუჭო გურზათ
თესხე გურიშ მჷკოლაფას?!

ღუმურიშის ჸურძენს წილნა,
მანჭარიშ შურ ინთხანს სოფელს,
ფრანგულა დო იზაბელაქ,
ლაგვანიშ დუდ გეგშასოფეს.

ოქუმ-წყარპიც წყარიშ დიდა
წყარიშ სარკეს ინაჯინე,
ტყას ოჩოკოც გილაჩაკანც,
სალამ ოკო ქჷმეუჩინე.

მელენ ბორია მოლენ ბორიას
ნუზუშ ჯინჯშა იჭანუანს,
თუთარჩელას მაფშალია
ბირა-ბირათ ოთანუანს.

შქასერს რეყეს წყარ გეჩენდუ,
მიკოთასუნს ტყაბიშ ფუთქურც,
ჭიჭიკეფიშ ღვათა იჭყაფ,
ქათალანძეშ ღალიშ გართუს.

გოთანდუნ დო ტორონჯ ცაშ კარს,
ცაშფერ კჷდჷრს ქიმკახატანს,
მოგოთანეს თოლჯღარ ჭურჭულ
ანარაშ დუც გაჩენდ ჭახანც.

ოდინაფუ, ქანაშ ბოლოს,
ჸინქ მიდეღას ქიჸი ქანა,
კუჭ-ხუმაფილ გერეფ ტყაშე
მერეთმოსლას ირცქინანა.

ბორია ჸურანც გურიშ-საჭო,
დისერუ დო თუთა-ვარე,
ამდღა ვარდა, ჭუმან იშენ,
ღორონც შურსჷ მივაბარე.

სოსო კაკუბავა-საქორთუო

ცას ათაბიჯუ გვალაშ წვანდეფი,
ანარაშ დუსჷ ობრი წიანსჷ,
ბუნეფს ხავერდი მინოქუნსჷ დო
წყარეფ ეუფშაფ წვერენტიასჷ.

ოჭაკეშ ტყასჷ ერემ ღვარანსჷ,
მუშენ წუხენს?-ხვალე რენო?
ერამხუტიშ ურაშ ხუმა
ბორიას მოუღ უშბაშენო.

ჩხანასჷ დიხა დუმონკათებ,
ბოშის ველუთჷ, ბახუტიას,
მა მორდიობა მოკუთნ ჯიმა,
ბჟას მარებელ ვაფუდია.

ოქუმ-წყარ ჩქიმ კჷდჷრს მეფუნსჷ,
თესჷ გარზება ვაკოდუო?
გლახა მუთუნ ქუმორძუნდა,
სქან გოლუა საქორთუო!

სოსო კაკუბავა-მუ რდუ თინა!

შურს სიტიბაშ ზღვათ ემფშანდუნ,
ოქუმ წყარშე გინოჯინა,
თოლს ჩილამურ ილაპუნდუნ,
ღორონთ, მუ რდუ, მუ რდუ თინა?!
აფუნ ფსუას გოფაჩუნდუნ,
ვეთებუდუნ მიჩქუდ რინა,
ფურინ მოკოდ ტორონჯცალო,
მუ რდუ, ღორონთ მუ რდუ თინა?!
თოლ-ჯღარ ცირა გილეშ ქართის,
ჩქიმ წვალება ვაგმოშინა!
ქობძირუნდინ, ცა მანწყუმუდ,
ღორონთ, მუ რდუ, მუ რდუ თინა?!
ვეველუდინ, თეშ ქუმურთუმ,
ბედის დუგორ ჩქიმი ბინა,
კარ დურაზინ ვაგუუნჯინ,
მუ რდუ, ღორონთ, მუ რდუ თინა ?!
თეზმა ამბე ისოფ გურსუნ,
კოჩ ქორექდა, ვამედინა!
სი გიჩქ, ღორონთ, სი გიჩქ ხვალე,
მა გურს მუჭო მაჭუნ თინა!

სოსო კაკუბავა-უსიორო სისანდობა

უსიორო სისანდობას
შურიშდგჷმა გოსამარე,
ტყას მიდუღალ ჩქიმ ნოხორიშ,
ჯვეშ ჯარგვალიშ ოლაფარე.

სო რე ჩქიმი ოდა-ჸუდე,
წყარპიც იკოდგუდუნი,
დოხუმაფე ქვიჩალ ჸუმურ,
მარტის პეულც თუნდუნი.

ტერს დუჸვილ ჩქიმ ძიძესქუა, -
ერამხუტიშ მანგი რდუნი,
მუ ოხვარ ანწ დიამუშის,
თოლც ჩილამურ ვაკორდუნი.

ნირს გითოჸუნს გვალაშ ჯინსჷ
ცათ იმზადებ მანგარალო,
ქჷრ რეყეშ დუც ორგიას ორთ,
ალბათ, თეშ-დღაშ ოღალარო.

სოფელ უჩათ გონწერენ დო
ჯიჭონ ინგარც ღალიშ პიჯის,
გოლუაფირო, ჩე დღაშ იმენდ,
რენდა,ხოლო მუთა მიჭირც.

ცჷზანს, ცჷზანს ზენიშ დოლოს,
ჩქიმ გურც ხოლო ჸოროფა რე,
ტყას მიდუღალ ჩქიმ ნოხორი,
ჩქიმ ჯარგვალიშ ოლაფარე.