ლაშა გვასალია-მუთუნ ბორბოლ დუაშედა...

ფაცხას მიხვილ ჭიჭე ცირა

ტორონჯეფიშ უსქვამაში,

ცას მიოკვაზ თიშ ნაბირა –

ნაგურიშ დო ნახვამაში...

გვალას მასქურ გარსიოლუ,

უძირაფუშ ნაცადეფი,

ჸოროფაშა სო განტინე –

გურ წყანწყილს დო,

ნაწამები

დღალეფ რინას მიოღობუ

მირონიში ნძალა შორო,

მაცხვანტალუ ცირაშ ნჯაბი –

დუს გოქუნილ ნარღიშ ორო...

სო ანტინე – ფაცხაშ კარი

ლერსეფით მაფ ეკირილი,

თოლქ ჟინცაშა ვაჩმარსხინ დო

შურ თიშენ მაფ მეკირილი –

სისქვამე დო ჸოროფაშა,

ცირაშ ჩხანა მაფატია,

მუთუნ ბორბოლ დუაშედა –

ღორონთ,

ღორონთ მაპატია...

ცას აკვაზენს თიშ ნაბირა –

ნაგურიშ დო ნახვამაში,

ფაცხას მიხვილ ჭიჭე ცირა

ანგელოზიშ უსქვამაში!..