გიორგი სიჭინავა-აჭუ მარას ოჭუმარე

სერით ირო უკმელა რე,
სერც გოთანა ვაუჸორც,
ღორონთც ორთაშ დონწყუალა
გაუთებუდ მარუოს. 

აჭუ მარას ოჭუმარე,
ვაგოთანდას შარა ვარე;
ჯვეში რე დო ახალი რე,
ორთა ირო მახალი რე.

აჭუ მარას ოჭუმარე-
ათაქ ირფელჲ ჭუათ მურც,
სერ ითებ დო უკმელაშე
დღაში სინთე მოჭვათჷნც.

ორთაშ თოლიშ გონწყმა რე,
აჭუ მარას ოჭუმარე,
ჯვეში რე დო ახალი რე,
ორთა ირო მახალი რე.

ახალი ამბე მინჭუაფ,
ვორექ გურიშ გოჩამას,
ორთა ქვარას იჭუანც
სამარგალოშ გოთანას.

გიორგი სიჭინავა-უჩქიმეთ

აკისერ დო მუმულიშ
ჸიონუას ურჩქილექ,
დისერჷდა, მუ ფქიმინა,
კინ გოთანდჷ უჩქიმეთ.

ჸუდეშ ჭიჭე ოსინთეშე,
მუნაფილ ცას უჯინექ,
თენა ხოლო ვამონარღ-
გობჟათჷნცჷ უჩქიმეთ.

ფირქეფი დო არზეფით
ჭკუას ტყურათ მუქინე,
ქარ-ბორიას ჟინი ორთა
დარჩქალუანც უჩქიმეთ.

რინა მითინც ვაუკითხირ-
უკითხირო გოფრჩქინექ,
ღურა ხოლო სოდგარენ
გინომჭყვიდეს უჩქიმეთ.

მათ ქდომტეს ოქიმნალ,
ჭიე-ჭიე მუდგარენი.. ..
ყებურც დაჩხირი ქოშქირტჷდა
შური ოკო უმბარენი.

გიორგი სიჭინავა-ქენობსქიდი ოკოჩეს

კირდეს ცხიმურც გელუფალ,
მიკვე, მუჭო მუკოჩენდ;
კოც კოჩწკმა ვადარინე
დო კოჩ ვერგჷ უკოჩეთ.

მოკოდ ცხიმურცალო რინა,
სოთინჲ, ფერდის მუკორჩელც,
მარა დიხაშ ჸოროფათ
ქენოფსქიდი ოკოჩეს.

გიორგი სიჭინავა-ვაშინერც

ღურელც ტაბაკ მუშო ოკო –
ვაჸუმენც დო ვაშქირენც,
მარა თია ვეგლუდვენი
იშენითჷ ვაშინერც.


მარდი ცოდათ გინუგაფ
ჯგირობუა ვარჩქინელც,
გურქ მოირთდა, ვადოჭყუა,
ჭყალა იშენჲ ვაშინერც.


შანქარქ გაჸუ ჭკუმუნქჷდა
ხუთნერი დო ამშვინერც,
მარა ომბოლც, ხიტა ვარა,
ვამკუტახე, ვაშინერც.


კოჩი ტანიშჲ სინთელეს
ოდინუანც ორჩინელც,
უმინჯურო მიწოტება
ცოდა რე დო ვაშინერც.


სქან მაჸალეს გოუზგირტია,
სოლედგარენჲ მაჩინეს..
კოჩქჷ დუდი ქიმგენდდა
გითოჩამა ვაშინერც.


გური აფუ ფშინაფილი
ჰარამ თოლით მაჯინეს,
მეძობელიშჲ ჯგირობუა
გოწყინდასჷნი, ვაშინერც..


იფრელ ართი გაფუდას,
თენა ხოლო ვაშინერც,
ჸოროფა რე ოთასალი
უბადობას ვაში ნერჩ!

გიორგი სიჭინავა-ვეშმაღინე ტკიბირით

ართ დღას ვაღურუნი ფერი
თე ქიანას მი ძირით,
რინაშ დღალეფ ძგვატილ მაფ
კაკლარი დო ძიგირით.

შურც ნტება ულამუ დო
ონდეთ მიმარგ კიბირით..
ინჭას წყარი ენოდგ, მარა
ვეშმაღინე ტკიბირით.

გიორგი სიჭინავა-გურმეჭვია

მუშ მანწარა უსამართო ჸოფე
თე ქიანა ჭათი გინორთვილი..
გურმეჭვიას გური აფუ ჭვილი,
ძერაქ მიდუღ ღუმა ჸოროფილი.

მითინ ვარე მოხვარე დო მინჯე,
გურმეჭვია შურდგუმა რე ჭიჭე.


1.გურმეჭვია-გულწითელა

გიორგი სიჭინავა-დორთაქ ვაგაშქურინას

ზოთონჯჲ რე დო შარა-შარას
ობირგულე გილაძ თირი,
ცოდა ორე კოჩიშ სქუა
მუმაწკჷმა ჩილათირი,
მუშ ჸუდეშე გინულირ დო
გალე ელასქილადირი.


დიხას მუთუნ ვეფალჷნც
ონდო თჷნც დო ჸინჷნცჷნი,
მუ გოხვარ, მაზაკვალი
ტვინც მოირხინნცჷნი,
ორქოთ მუგოთონუანც
ტყას მუთ ქიმთორწკინნცჷნი.

შურდინაფილქჷ ეშე ცაშა
მუჭო ოკო ფურინას,
მეჩირთიდა, კინ მუმაშა
დორთაქ ვაგაშქურინას.
ოღონც, შურქუ წკუმონტილი
შარეფ ოკო გოთინას..
ღორონთ მიახიოლანც
ჩილათირიშ დორთინას.

გიორგი სიჭინავა-სოდეთ დიხა ითებუნი

ამდღა ზღვაშა მიდაფრთი დო
წვალებურჲ შური მიდეპუნი,
ეგებ თაქ რდას უჯგუშ რინა
სოდეთ დიხა ითებუნი.


ვამიჩქ ანწი, ონჯუაშა,
ზღვაში ჯინა მუს მუჩანც,
მემიჩქჷდა, თაქი ხოლო,
ცოდა ფუნც დო იბურჯანც.


გაჭირებულც ირ დიხას
ქუა მოთხოზ დიკოხონც,
თე ზღვას ხოლო თენა ჸოფე-
დიდ ჩხომ ჭკუმუნც ჭიჭე ჩხომც..


მუშო მოკო თე ფირქეფი,
დუც მუ ჭირი აუჩემი,
ვაუჯგუნო, გილართე დო
მუთუნც გური ვაუჩენი.

გიორგი სიჭინავა-აფუნი

გოთანდჷ დო ბჟაქჷ გერთ,

ოცხიმურეს მუკულუ,

გოხოლუას მაფშალიაქ

სქვამას ქიმიოღურჭულუ.

ბარდეფი დო ბარდეფ შქას

გილაცოჸნც ყურდგელი.

ბრილიანტით აშაფშა რე

ნდოლო გინოცუნდელი.

შუკას ჭიჭე ბოშჲ მოურცჷ,

ჭიჭე ბოში, მაფალუ,

რჷნტუეფი მოურაჸ,

მეტი მუთა აპალუ;

მინდორ აშო მაზადუ

ნოხო ეთორჩაფილი,

ჭყინტ ნდოლოში წვენით აფჷ

ნარჩა გითოღაფილი,

იმენდეფი გააფაფჷ

ცაშე გითორღვაფილი..

აფუნჲ რე დო ირფელ ფუნც,

სერით ნდოლო ცუნდის შუნც,

იშო-აშო გილურქჷნი

ცქირპაპეფი გილაპუნც.

წყარეფი გეშასქირაფე

დო გორდი შარას მესხაპუნც.

ორთა ოცად მუნაფაშ

ცაშა ეშაჸუნაფას.


1.ორთა-ბუნება
2.აფუნი-გაზაფხული
3.ცქირპაპა-წივწივა (ჩიტის სახეობა) 

გიორგი სიჭინავა-ანწ მუთუნ ვარე

ანწ მუთუნ ვარე
თაქ ჩქიმი რინა,
მუშა ვორდა დო
მუშა იბჯინა.
ირ კოც ქუზალი
სიკეთე, ძინა,
ულაშ წოხოლე
მეტ მუ დიფჩინა.


ანწ მუთუნ ვარე
თაქ ჩქიმი რინა,
მა მიდაფრთიდა
სი ვემიწყინა,
ვეკმონგარა დო
ვეკმოკიჟინა,
ანწ მუთუნ ვარე
თაქ ჩქიმი რინა


მოლე ვორექ დო
ვამოხუჯუნდა,
მის უჩქ, შილებე
მელე უჯგუნდა.

გიორგი სიჭინავა-მარუო

ჩხანას თუდო გიმულებ დო

დუც ინწყუანც უჩა ზღვას,

აკოსერელც კინ თუთაშა

დორთა ოკო თუთაშხას.

მარაშ დღალეფც უგურუა

ბორჯიშ ჭიჭე ნახარცქას,

მურიცხეფიშ თარჩია რე,

თახა მოურც თახაშხას.

სერიშ უჩა ნოღართია

გოუსოფნა ღუმა შქას,

ჯუმას ოკო დოხვამლაფა

ათე მარაშ ჯუმაშხას.

მუთ გიძირჷნ თინა ორე,

თაშჲ ჸოფე დო თაში რდას,

ამსერ დიმუნუანც, მარა

გიფთანუა ცაში დღას;

ღორონთიშ ხეთ ერზაფილჲ

სინთექ ოკო ვაშქირტას.

ობი უჩა მურიცხი რე,

ქმმაკათუ ობიშხას,

ჩქიმ გორუას მუთა ოკო

ზუგიდი დო ხობიშქას.

თოლეფჲ მა შხვას მოძირანც

დო მირაგად გური შხვას,

ულირეფიში გოშინა დო

შურიშჲ დღა რე შურიშხას.

დო მაშქვითა გოთანას,

საღორონთო ბჟაში დღას,

ევაშ ცოდაშ ნაშქვიდას

ეგებ რსხება მაშიდას

მაბრუო დღა ხოლო ჸოფე,

მარა ჩქინდა მუთ მორთას,

იშჲ სინთეშა შარა მებჷ

ხვათახვალე გოლგოთას.

გიორგი სიჭინავა-მიშა მეიღუ...

სო ვენტა ათე
ორთაშ რსიოლცჷ,
რინა ვამარზენც
მუთუნ ხიოლცჷ.

თუდო სოდგარენ
მართუ ირთანცჷ,
დო დუც კვარია
გიმოყირტანცჷ.


ათე ზღვა ითამ
სოთინ ვენტირე,
მარა ორთაშო
ინა ჭვეთი რე.


გილვორექ შარას
შარა ერთელი
დო ვამიჩქ ანწი
მიშა მეფრთენი.

სქვამ მაფშალია
სი სო მეული,
მიშა მეიღუ
ნინძგით პეული?

გიორგი სიჭინავა-თუთარჩელა

ცა მურიცხით გოჭკადე დო
დუც გიმორე გოფშა თუთა,
მოშქურ დუმატყობასჷნი,
ელახიშე გობჟათჷდა.


სისანდობა სოთინ ვარე,
ხვალე ინგირი შუმინჷნც,
სისმარეფიშ მინდორეფც
შურეფი გილაფურინჷნც.


მასქურ გილექაქალჷ დო
უკვანწუანც ჯაშ ჸალეფც
ათეჯგუა სერც ლურანი,
მა ათენა მაჸალენც.


გევოდგინა, ქუვოძირა
თე სისქვამეს მაჸალეფც,
ვარა ჭუმე ოჭმარეს
ქომიწინა საჸალეს.

გიორგი სიჭინავა-ღორონთც ვემუდინუაფ

ათე ლერსეფც, მარგალურცჷ,
ნამუთ გურცჷ გაფუანდ,
ეშმაკ მივარანდჷ, მარა
ღორონთ მოჭარაფუანდ.


ჩქიმი ნინა, ამდღარ დღაშა,
სოთინ ვემიშინუაფ;
კოჩქჷ მიოდინუ, მარა
ღორონთც ვემუდინუაფ.


ცასჷ ორდუ ჩუალირი,
ასე აშო აზარეს,
თოლეფც კინე გოუნჯანა,
მუჭოთ ქრისტექ ლაზარეს.


დიო ცოდათ ნაგოლოფა,
შური ოკო დოჩხაპას,
უკულ მოგინაფუანა
ახალ რინაშ დოჭყაფას.

გიორგი სიჭინავა-ჩვამა

ჭიჭე ჩხომიშ მათხოზინე,
ურძღაფელა ჩვამა,
ხვალე ჭკუნქ დო ხვალე შუნქუ,
ვაიჩქ შხვაში ჩამა.

ფსუალეფი მუშო გოკო,
ნინძგი გაფუ ყამა,
შორშე კვატას ქოგჷქ,
მარა ვარექ იშ მასქვამა.


მა იშენით ვაბჯოგჷქ,
უჩარდია ჩვამა,
წყარშე აშო ვეკურქჷდა
ზღვასჷ დოიხვამა.

გიორგი სიჭინავა-ჯოჯოხეთის მივანჭით

ჯგირჲ ბჭკუმით დო ჯგირი ფშვით,
ლაგვან ღვინით ევოფშით,
იპიდით დო გიმოფჩით,
ორქო-ვარჩხილი დობზირით,
მარა თენა იშენით
ბორიაშ ეკოთხოზინირდ.
სქვამ ხასეფჲ მიჸუნდეს,
გურც ზისხირი მიფუნდეს,
მარდშა ცოდა მისხუნდეს;
ჩქინ გემოშა ვორდით დო
ჩქინ არშინით გობზიმით..
ქიმეფხვადით, თენა ხოლო
ბორიაშ ეკოთხოზინირდ.
დეუკმელ დო ქიფჩინით,
მუჭო ტყურათ დიფრჩინით,
ულირი დო ჯვეში ამბე
გურიჭვილო გიფშინით.
ჩილათა დო ქვერსემია
რჩინ თოლეფით ქობძირით..
ჯოჯოხეთის მივანჭით
ბორიაშ ეკოთხოზინით.

გიორგი სიჭინავა-დიონისე

დიონისე, დიონისე,
სამარგალოს დიო ნირზჲ რე,
გვალეფი დო მინდორეფი,
ირფელჲ ართო გეგნონირსე.

დაჭკოლებე ლაგვანეფი,
უჩა ღვინით ნაგვანეფი,
დანარღებე სქანიწკმა
მაშუმალი მარგალეფი.

ბირა, ძიცა, სხაპუათ
ბრელი გილეფხიორით,
მარა შური დამონკებე
წარმართჲ გურიშჲ ხიოლით.


დიონისე, დიონისე,
სამარგალოს დიო ნირსჲ რე,
ფურკო მეურც ცა დო დიხა,
ათაქჲ შურ დო ხორციშჲ ნირზჲ რე.


კოც ვაუჩქუ ათე ნირსი
მუ ოფულარც იჩუანც..
ჩე გოთანა ცას მუკობჷ,
მალას გეითისინთუანც.

გიორგი სიჭინავა-კოჩიშ რინა

კოჩიშ რინა მუთუნ ვარე,
გივობირა გიტარას,
გურს მაჭუ დო მეწამალე,
ღვინიშ შუმას მივარანს.

მა იშენით გივობი დო,
შური მითინქ ვაქალას,
წორო ოკო დიბშუმათ,
მა დო ჩქიმი ლახალაქ.

გური ოტობაია-ჰოუ ნანა

ჰოუ, ნანა, ჰანანი,
ნანაია,დირულე,
მინორთელ რე ქიანანი,
ლურც მუშენი ცირულე,
ნოყორ მოუქიქანი,
მუ რე დიდას კვირულე?
ჰოუ,ნანა,ჰანანი,
ნანაია, დირულე!

ოჩოკოჩი თირხონით,
ტყალეფიშე მირულე,
წყარიშ დიდა ქიფხოლით,
ჩქიმი თოლი გვირულე,
სისმარეფი ქიფხონით,
სინთალეფცუ წირულე,
ჰოუ,ნანა,ჰანანი,
ნანაია, დირულე!

მუსხი კოჩი ქდოწუ,
კოჩ ბედეკოჭვილჸურე,
ჩხონჩხამეფქჷ ქჷდოცუ,
ქიანას მი რე მილურე,
მუმა დიხას მითოძუ,
იშ აკანსჷ ხვილუ რე,
ჰოუ,ნანა, ჰანანი,
ნანაია,დირულე!

მიმოტუეს ნათესეფქჷ,
დო ხვალახე ბრკუნულე,
გოწარწ,ვარა ვაგიჭიშ,
მუმაშ ლეკურ რგილუ რე,
მორდე ოკო ტახილ ჯიშ,
ღულა კათას გინულე,
ჰოუ,ნანა,ჰანანი,
ნანაია,დირულე!


მუჭო ენმოჸვიჸვინანქ,
მუჭო ირფელს რჩქილურე,
დიო ტანით მიგინანქ,
დიო ტანით ბჩინულე,
მუჭო მითიქვიქვინანქ,
წყარი შოშო ძინულე,
ჰოუ,ნანა,ჰანანი,
ნანაია,დირულე!


სქანი ჭუტა ქარმატე,
ჭიჭე სქან წისქვილარა,
ართო გურშა ქალმანტე-
ბედიშ ნაკვისკილარა.
გვიმარა დო ლიმხონა,
ცირეფი დო კულანა,
ბამბეცალი ნირსეფი
ცაშა გეშაქულანა.


აფხაზა დო მარგალი,
ქორთუო დო ლაზონა,
მურიცხეფით გაძგვატუ,
ლური ნადარბაზონა.
ნანაია დირულე,
ჰოუ,ნანა,ჰანანი,
ჭუმანი ბჟა ბარჩხალა,
თოლეფს გითომღანანი.


1.ოჩოკოჩი-მეგრული მითოლოგიის პერსონაჟი, ვაცკაცი.
2.ქარმატე-წისქვილი (ლაზურად)
3.კულანი-გოგონა (ლაზურად)
4. ლიმხონა-გვიმრა (ლაზურად)

გური ოტობაია-ბაღანობა გუმაშინე ჩქინი

ჩქიმ ჸოროფა, ჩქიმ გურიში ჭუა,
სოვრე იმნტა, სოვრეშე იმნჭუა,
ქიფრჩინუქ დო იშენ ვორექ ჩქიჩქი,
გურს ბონდღუნსუ სქან თოლეფიშ ჩხვიჩხვი.
ბაღანობა გუმაშინე ჩქინი,
მუსხი სერ დო ჭუას გივორჯგინი.
ჩქიმ შარა რე ჩეშმანი დო თინუ,
სქან თოლეფშა დღასუ ვამანტინუ,
მუ დაჩხირ რდუ დორზამილ თე გურსუ,
ოხოხოი, მუსხი მუთუნს გურზუ,
ბაღანობა გუმაშინე ჩქინი,
მუსხი სერ დო ჭუას გივორჯგინი.
მირაგადნა-ჸუდეს ხექუ ხვალე,
მუს დართინე ბორჯი უკახალე,
ჩქიმ სურათეფს გაჯინექუ ირო,
ჩქიმ ლერსეფით ცხოვრენქ გოლვაფირო,
ბაღანობა გუმაშინე ჩქინი.
მუსხი სერ დო ჭუას გივორჯგინი.
ჩათხიებუქ როგუნჯ ქომონჯისუ,
ხვალე თიშო ოსაჭირუდ ისუ,
სი ჩქიმ შარაშ გოთანა რდი ძღაბი,
ტყურათ რენო შური დომიჟღვაბი,
ბაღანობა გუმაშინე ჩქინი,
მუსხი სერ დო ჭუას გივორჯგინი.
მორთი, ცირა, ქომიძირე აკა,
ქოძირ თე გურს მუჭო გილაკვაკვა,
ქოძირ თე გურს მუშ მასქვამა რექუ,
ქოძირ, ქოძირ, მუჭო გიმოჭვენქუ,
ბაღანობა გუმაშინე ჩქინი,
მუსხი სერ დო ჭუას გივორჯგინი!