ზაალ ჯალაღონია-ჭიჭე ვორდინი

ჭიჭე ვორდინი,
მინდორ დო ვე მოჭიჭარუდ.
მაჭირხოლი ეშმებირანდ
ჩქიმ უგუწყანე
სირჩქალეშე.
ასე თირელ ვორექ
დო მაჭირხოლს ხოლო
ვარჩქილე ჩქიმ სიჭითარე.
მუნაფაშე გიმოჯინე დო
მინშა ქომჩინ და მოხიოლ.
ათე ჩქიმ ჸვას
ამდღა დიდ კოჩი ინორე,
მარა კინ თი მაბოშია რე
ვე დო მინდორიეფ ვარ,
ოწონდე ხოლო ოჭიჭარუნ.
ჩქიმ ტანშე გეშასოფ ბორიაქ
დო ირფელ გოშინაშა
მიდეღ.
ვალიშ გუნაფურცელა ბირა
შარას ვეგლაჩენდ.
თოლიშ რობუს ინოცერცილ
დღალეფ ინოჯანუნა
ზოთონჯიშ ნაფუცქინაშ ფერი.
უგშულ დო გიშაულარ მა
საორჩანოთ დღას ვამიღუდ.
მინდორიშ გოშინა პეულეფ ქორენადა,
მა იპიქ, ბორჯათოხირილი ოწონდე.
ძაფშორო ქეკვასოფი ჩქიმ ხონარც
ძაფშორო ქეკვაბუნ ჩქიმ ხონარც,
დო ჩქიმ დუდშე ვარ,
ირფელშე იბრთუქ.
მიკვოპონუქ კიდას ვარ დო
სახეეფს.
ონთეშფერ თუთას ოსინთე
დოტახუ.
ძიცათ გოქუნილ კოჩი ინივალ.
ჩქიმ ჯოხო- ჩქიმ შარა რე,
ჩქიმ ორჩინელ- ჩქიმ ნოთე რე.
ჩქიმ ოკითხური-
ონოფულეშე გიშმურც.

ჯემალ პერტაია-უქოთომე ოგვაჯე

სამარგალო ოგვაჯე რე,უქოთომე,
სპილო ორე უჩქვალე დო უხორთუმე,
სამარგალო ოქრო ორე ღორონთუმე,
გაგთოვალნც, გაგთოფალნს ამდღა-ჭუმე.
სამარგალოს დუდშა პატი ვეგედვალუ,
ათეშენი ვაგიძიცინ-ვაგიფალუ,
შხვაშო გიხაჩქ,შხვაშჲ ლაიტი გიკაკალუ,
შხვაშჲ ოგვაჯეს მაექვალეფიშა გიკარკალუ.
შხვაში გორდჷ ყილოჯგუა ქომოლსკუა,
სქანი ტანით გილაიღალ შხვაში ჭუა,
სქუას მორდუ,უკულჲ კვარჩხშე ორთინუა,
მარგალობას უჯოგუა,ორინუა.
მითინც ვაუჸორც ქანას კოჩი ქიგერენდა,
სი კობუ რექ,ანწი მიშოთ იჸიქ მონდა,
სი ლანდღვირი,მაჭარუქო დღასჷ წკონდა?!
ზღვას ქაკათი,მარგალობა ქუგოკონდა!
სქან დიხემცჷ შხვეფი რდუნა თური-ტომცჷ,
სქანი წყარემც ნტერი ჭოფუნს ორქოშჲ ჩხომცჷ,
სი ვახვიე, სი ქოგუქჷ ჸვარილჲ კოცჷ,
გაგშაკურცხი!ქუდუძახი ჭკუა-გონცჷ!               

ჯემალ პერტაია-ღურუდუ ნინა

ღურუდუ ნინა, დამორჩილიშჲ ირქენდ ბორია,
მითინ ვათქუანდ გინოსქილადას ქიმვოგორია,
ნინაში მინჯე, კოლხიშჲ ბოშეფჲ აკობგორია,
მუთუნქ ვაგშამირთ, იფრელი-რდჷ მელანქოლია,
მიჩქ სი მიდურქჷ, სქასერიშე, კურკუმ, წკურუმცჷ,
უსქანობათჷ ჩხურ გემოჸოთანც, ტან გომფურუნცჷ,
უნინალობათ, რინა ვაღირ, ბურბუ ვაგარდე,
ალბათ,თი დრო რე საფლე ბთხორე,თი საწარკანტე,
ვეგებგონუე, გეშაკანჲ, მუთ ეკმორაგადე,
ათაქ ითებუ აიეტჲ დო კირკეშჲ შინი,
ეკიზგიმონჯუ თინეფიშჲ ნერჩჲ დო  შარა თინი,
ვეცადი მარა, მარცხებელშა, მა ვეკმართინჷ,
ჯიკუქ ქონმანთხჷ დო ჯიკუშე მა ვეგმართინჷ,
ღურუდუ ნინა, დამორჩილიშჲ ირქენდ ბორია.

ზაალ ჯალაღონია-შიმე რე ასე ცა დო გვალა

შიმე რე ასე ცა დო გვალა, ხიმფორ შუშელი,
შანგუშფერ გინოძ ელ დო მოლცჷ, აკორინელე.
ჟი ცას თოლეფი ავარვალუ მუჭოთ დაჩხირი
დო დიხაშ უჩა შკაფანიას ქალაწიმელე.
ებირბილერე ოდიარე ებურაცხილი,
გურ ქიმეჩამუ, გამწუდგინუ, გამწოთინელე.

გილეგურგინას თე გარაგანქ ეკორშვინელქჷ,
ვეშ მანგიორო ჩქიმ ტან მოკო თაქ ქუდვორჩენი,
შურუქალუო ადორებას მივოჯინექჷ,
გოფშა ქიანა აწმაძირე ჩე თუთაშნერი.
ანკარელი რე ათე რინა, გესქვილ ოშიშა
დო ანჩხაბერო დუცჷ მუნოხუ ლენ ცა ქვერსემი,
ასე ბორჯი რე, გეჭოფასუ კინე ოჭიში,
ჯგირო ქურჩქილით, გვალეფიშე ღვარანც ერცქემი.
ცაშე ზიტყვეფი გუთმოცენა მეხიშკაკალო,
მუდაშა გენთხაფჷ ფკოროცხითო ჭყონცჷ არგუნი,
მოჯგირეფიშე მოხვალამუ არძა სანგარო,
მეხინტკილიე ლასარ კირდე გურიშ მანგური.
სანყურე იჭუ, შერშილ ნარღით, შოლირ რინაშე,
სანწკელო ჩქინდა ბრელ მოურცუ, გინოტებული,
ირფელ გოკურცხუ, ნინა დირთუ კინე ჭვიმაშე,
კინ ქიმიძინანს მუთ ქიდიტენ ინოთებული.
ჩქიმდე გაღვენუ ულიებუ რინა შანილი,
ჩე ოჭმარესუ უჭურჭულანცჷ შურიშ სქვამ კვინჩა,
ჩქიმ გორჩქინაშა თე ქიანას ჯგირო რჩქვანელი,
სარკო გოკონდა, თე მერეთის მა აწოიჩა.
ჩე ჯაქ გელუ-და უკულ ინა მუთუნც ვაჭოფე,
ჩე გოთანასჷ უკმელაშე ოკო სხუნუა,
ლერსიშ ოსინთე გამკომინჯი, ხე გამთაჭოფე,
მა სი გიჩქუდას მითინიშა ვაისხუნუა,
ჩე ტორონჯისჷ კინე ხეშა ქაშაიხუნუა.

გიორგი სიჭინავა-ქარონის ნავში

ზუგდიდის ერთ-ერთი საჯარო სკოლის დაბალკლასელები მეგრულად ვერ დამელაპარაკნენ

მეგრულს ვერ ფლობდა მეგრელი ბავშვი,
ეს უცოდველი პატარა კრავი,
მშობლები ჩასხდნენ ქარონის ნავში
და მეფის ნავში ჰგონიათ თავი.

მარტო ვარ, ახლოს არავინ არ ჩანს,
რომ დარდი ჩემი გაიზიაროს,
ჭოროხის იქით ლაზეთი დამრჩა,
და ენგურს გაღმა საბედიანო.

ვინ შემიცვალა ლხინი გლოვითა,
მე ხომ ყველასთვის სიკეთე მსურდა,
ეფუთის სიბრძნე გაქრა ხსოვნიდან,
ოქროს საწმისი მომპარა ქურდმა.

ბედით კოლხის და ბედით იბერის,
ქვეყნად არავინ არ დარდიანობს,
მეგრულ ენასაც გედის სიმღერით
ემშვიდობება სადადიანო.

მეგრულს ვერ ფლობდა მეგრელი ბავშვი,
ეს უცოდველი პატარა კრავი,
მშობლები ჩასხდნენ ქარონის ნავში
და მეფის ნავში ჰგონიათ თავი.

მარი ბროსეს წერილის ნაწყვეტი (მეგრული ენის შესახებ)

ბათუ დანელია-თირჷ დო ცირაშ ლერსი

ჯა ჯასი რე ჯუდუნსი დო
ამარ ჯა დო ემერ ჯა...
სი ვამუჩანქ მუთუნსიდა, 
მათ მათუნსი ვემერჩა...

თუნს, თუნსი დო, ცირა, მურქი -
თირ შურს ჯგირსჷ ურაგად...
თოლეფ ემიშ ჩილამურქჷ
თირშა სქან მეგურაფაქ.

ჯემალ პერტაია-დოზუკოლი

ნინას მუკულევა,
სინთეშა გაგმიღია
დო ვანკორავა,
სანთელ ქოგულევა
დოხვამ დო ვადაჭკორავა,
მოთას დაგურე,
სქან ნინას ვადაგორავა,
ხასლას გიჸუნდას,
სქან მოთალემც,
ვადეშორავა,
შხვაშ ნინაშ ცქვაფას,
დუდ დანები, ვეგებორავა,
ცხენცჷ მუკულე,სქანი რაში
ვადაჯორავა,
ზღვაშე ეკულირ,კემლაკესას
ვაგაჭყორავა,
თეს გიზუკოლუნც,უნჩაშ ჯიმა,
აკაკჲ ხორავა,
სქან გვარ გიღუდას,
,,ძეთ'' დო ,,შვილით'' ვადაბოლავა
ვარა ქაგურუქ, მუჭოთ ომპას,
გითობ ნწოლავა,
ნინას მუკულევა,
სინთეშა გაგმიღია
დო ვანკორავა.

ჯემალ პერტაია-სი ჩქიმ ნინა,მარგალური.

სი ჩქიმჲ ნინა მარგალური,
კჷრტეს გერდგჷ  ხაჯალური,
ტაბუ გერძ დო ვაგიღ ლური,
მიკვე აიშა მუთ მიღჲ შური.

სი ჩქიმჲ სქუა მარგალიში,
სი რექ ჩქიმი დიდ ოჭიში,
სი მოთა რექ აიეტიში,
ჩქინ ნინაში სი რექ ჭყიში.

ჩქიმ ქიანა სამარგალო,
ოსორშე დო საკაკალო,
ჸოროფა რექ ართო,ფალო,
ხუს ალაიშქუქ მასარცალო.

ზღვა ილენც დო ზღვა პიც ლოტკუნს,
ღალც მეჩხომე ფაცერს დოდგუნს,
კამბეჩ ჭყონჭყოს ენილონტყუ,
სქან ქიანას ხეს მი მოთხუნს.

ოჭუმარექჷ ქომადირთჷ,
იმენდიქჷ კინე დირჷ,
თე ქიანა სონდარო ირთ,
კოც მუთუნი ვაგუჭირდჷ.

1.ხაჯალური-გლეხთა საწამებელი მოწყობილობა ფეოდალურ სამეგრელოში

ზაალ ჯალაღონია-დოდირთი დო ჭარი

დოდირთი დო ჭარი, მითას ოჭირ ჯარი.
ხვალე ოკო ნთირე
შურიშ მონკა ჯვარი....
პუხუს მუგობ პუხუს.
ოდო, ათიქვექვე.
ბურდღაცალო მირჩქინ
ლექინი რე, ქექე.
მონკა რენო, სქან რე,
სქან გეძ არძა შანი.
გოითირანც მითა,
კინ სი მიარჩქვანი.
ტყურაიათ ვარე
ფურინუა ცაშა.
უჯინ ათე დიხას
ჩხორო მუნორთაშა.

ლაშა გვასალია-ქუმორთიდო

სი ვარდიკონ, მა მუ მოკოდ თე თუთაშა,

სი ვარდიკონ- ულერსეთი მებდინუდი...

აკმახართუდ ჯერღვეფი დო ჩე თუთაშხას

შურ მოხირილ ჭუაცალო გომთანდუდი...

ქუმორთი დო პეურეფი აკომპირე,

ქენომჭვათე გოთანაშა ფინქრიშ სუნჯი,

ვამორთკონი ნაკილოთა ხუმა მჭვახეთ

ოკმალურსუდ ნაგურგინა ბრელშა ჸუჯი...

თე ქიანა გურიშ ჭუაშ ოტყობინჯე,

უსქანეთი შურიშ ნტერო გინმართუდუ,

მოშკვიდუა ვარიათ დო იშენითჷ

მართუცალო მუკი- მუკი გუმართუქი...

ქოიორქდა ქემუბუნე თოლ ჩხანასი,

ქოიორქდა თუთაშ რსხება ქუმოძირი,

ვაიორქდა ქაშეტყობი მუნაფასჷ,

დო დამთხინე უსკილადჷ თართილ ჭირი...

სი ვარდიკონ, მა მუ მოკოდ სისმარეფშა,

სი ვარდიკონ, რინა ხოლო მუთ მოკოდჷ!..

ლაშა გვასალია-ბჟაქ მოზოჯ

ოფუჩაფალს, ოხვამალსი-

გურს ბირათ გიოჭალს,

ონირზებელს ორთაშ რთაშა

ოვილარს დო გიოჭყალს...

ართ სი პუნქ დო მიღირუქ

სიცორცხლე დო ჸოფუაშა,
ქუმოჯინე, თოლიკაკა,

ტორონჯეფიშ ჭოფუაშა...

ბჟაქ მოზოჯჷ თოთო დღასი

ცა- ოჭმარეთ მუნორთელი,

კარკატელი შორ შარეფი -

ონჭეშ ლარტყათ გინორთელი...

მუ ოხვარჷ ცა ხვილირსი

მაფატიაშ დარინალსი,

ოხვამესი მეტებულსი

ეშმაკეფიში გარინალსი...

მუ ოხვარუ, მუ ოხვარუ,

მუ ოხვარუ ქიანასი!..

ვახტანგ ხარჩილავა-ნანა მუჭო მოდირკი,

ნანა მუჭო მოდირკი,
ქიანა რე პოტიკი,
ჩიჩიეფიშ,ჩაჩანეფიშ, ჩათლახეფიშ
ჰოლდინგი!

ლაშა გვასალია-17 ჯაბი

ღორონთიშ ფურცქინუათ ალმასიმე, მახა,

სქანი შურიშე ეკნაღელი რაგადეფიში სიორი,

სქან უტომბაშ ანზრეფის სანთელუა

ცანცალერო ჟი ულირ, მინშა ჟუჟელერ,

ეცანდილ დო კვათიერი, ნირსიშ ჯღარო მაქიტალი,

ეფუნელ დო ხვარხვალერი...

ო, ჩქიმ მახა, მუჭო ბჩალუნს თანაფეფიშ უკმელუა,

გოჭითორელ ბორუეფი, ასე ხოლო დოვილნა

ღორონს დო მუმასინ ფერეფ...

იჭინგოლნა, სხარსხალა ეშმაკის ნინაცალო!

მიჩვაჩვალნა უჩხვინდე დო ყ-ვა ლანდღვილი

რსიოლეფი, უოჭიშე ბეძღერია ქომოლეფიშ

მენდო დო მიულაფუანა თოლუმუნტირ ჩხეშას...

აკილანდღუ ართდღას ირფელ დო აკიბლასუთ

ჩქით, ზორღა ქალერჩხუანს გიდალ ქვარაშა

თე ზესნახე პეულებს დო ყ-უმურეფიშ დალიეფს!

ვო მახა, ვო, მარდობუაშ მონწე, ათეს ირფელს ჩქიმცალო

ქარწყექ დო ქითმენქიდა დოშკირატექ სი სანგარო,

აკორღვაფექ სი სარალო, ქასკილად შურწულირეფს

შურობუმუშ მინდორეფი, გვალეფი დო ხარხუნტეფი...

გოკურცხ, მახა, შურო ქოიკინდდა, გობარჩხალე ართშა,

კოჩიში გახარებას აკაბურცხა ოკო, იმენდუა ხოლო ოხვარ

დო დუთხინუანს ოშურეთშე მოსოფილ კვიკვილეფს!..

ქაძირ, მახა, საგანოს სკან ჟინცაშა მებუნელ ძიცა...

ხორციშ დოპიჩუა გახვარდას შურსი, ფსუა მაიდეს

ჩანაფილი, მონწე-მონწეთ ოფურნალო.

მაულარეფ ვორეთ თევრე, თი ქიანაშა, ე, სარალო,

ჩქი მი დომტენა, შხავა მი დოსქილადე სამარდოთ?

თინა რე, მახა, ოკითხე დო გაგებელი - თაქ ქომჩქუნა დო

თექ მუ ღირ რინა ოშურეთის, მინჯელო დო უმინჯურო?

მუთუნ ჩქი ვამჩქუნა დო ვამარჩქილენა, დუდიშ მაჭყალ დო

უთოლქვინჯეთ გილმარულე მარგალემფს!...

ვო მახა, ვო, უშურობაშ მესანთელე დემკოჩი!..

კოტე ნაჭყებია-ანდანერი ლახარა

უღელე დო მეღელეჷ ჩქიმჷ რინა,
ქოთ ეკოხონ, ქოთ დიკოხონჷ, ქოთ ოჭმარე,
გოკოდასუნჷ, სქანჷ კუსაფის მი ირჩქილე,...
მინ ბორო რე, მინ ხანგა რე, მინ კოჩ ვარე.
ჟინ ანთარიშ ჩილამურით გოჸვაჸვილი
ხვათახვალე ჯიმა მაფუ ოდიარე,
მითაჟამიშ ჭუაშ-ჭუას მიგინანსჷ,
ჩქიმ შურიში მანათალი მორდია რე.
ხეს სანთელსჷ აშმოჭუანს ჩქიმი სქუა,
ნამუშოთი გური მაფუ ნახანდეფი,
მოთალეფით ოშა-გოშათ გომშინანა,
ანგელოზიშ ხვამელ სუათ ნახანტეფი.
მა მერჸიათ სოდგია-სოდგაი გილვოგაგა,
მი მირჩქილე, ვარ მუ ფთქუა ორჩქილარი,
მატყურაფალი ანტკეცი წყარს დონწყველე დო
ჟიშე ჩქიმი მაჭყვადალი მოჩქ ლარი.
საწყალი ჩხომი, პიჯი წყარით აფუ ეფშა,
უწყარეთ შურო მურე ათქუენი,
ართშა ბძირი, ურაგადეთ მუ რდ მიწუნი,
გურშა მუჭომი წყინი ალნობათქუენი.
უჯიმალეთ ქუდოფსქიდი, უჯიმოლქ,
ჰამო ნინას მა მი მუკომწაწუანს,
ხორხოტაშე კონწარ დურღენქ გეშამფალ,
საწმოხონო გოშინაში მაწუალქ.
დონჯირელ ზღვა ცას უღირღინ კან-კანეშა,
სპლიყვი გაძიცანს ცუცქეფიში ნალალასუ,
დიო ართ ტკუ ვემიოხე ბჟადალუშა,
ბჟაშ ულაშა, ვორწყექ სიტყვა მუმალასუ,
უზიტყვეთ ნამ მოლერსე მა იპიქ,
მი ურჩქილე ეკორძღელი ჩქიმ ნინას,
ჭუმენერსი მუშ წურწუფა მოუნჭაფუ,
გუთაჯინე ჩქიმ სვენაშე გინულასუ.
ახავაი, მი იპიკო ოკო, მარა,
კისერს ინწრას მომჭირეს სადიოს,
ბურბუ ჩქიჩქიში ნაბურდღინა მუს გაგენს
ართ ბორჯის ცაში მიმანჭაფუ კანდიორს.
უღელე დო მეღელე რდ ჩქიმი რინა,
ჩქიმ ოჭმარე აწოუნდუ გოთანასუ,
ანწ ვამიჩქუ, მუჭო იი, სოდე იი,
სოიშა ვერტა ახალ თუთაშ მორთალასუ.

კოტე ნაჭყებია-სო რე?

სო რე ჩქიმი ობინეხე,
ჩქიმ ჭოდი დო ჩქიმ პანეში,
ჭვიტლური დო ჩეჭიფეში,...
კაჭიჭი დო ოჯალეში.
ჩქიმ შონურ დო ხოჯიშ თოლი,
კოლოში დო ეგუძგური,
ვაი, ბრელი მუ იბჩია
კოს მუთუნშა ვეგუძ გური.
მემაჯინეს თე ონჭეშე
გურშა ბრელ მაფჷ ნახვატეფი,
ბორჯიშ გასჷ ქიგედინე
ჩქიმ ნოა დო მახვატელი.
ჩქიმ ლაგვანი - ჸვაფიჩალი
სუმარეფით ჸუმენული,
მუ ჯვეშეფიშ მუკნაულა
ჸუჩა ჭიფას მინმეულუ.
ჸასჷ ზესქვი ვეგლებირსჷ,,
მაფშალიას ქუფურინჷ,
ზღვადალიშე იაზონსჷ
მანებელო ქუმურინჷ..
მედეასით მუს მოკითხე,
შხვაში კაბას ითირანსჷ,
მუნაფაშე ჩეთი ვარი
მალას ჭითათ მითირანსჷ.
სო გილაფრთა უშარეთჷ,
სონ გერგეზი სო გიფცხირი,
საწმოხონოს ონჭუნ ნერი
ღორონთ სინთე ქუმოძირი.
მუკი-მუკი იბჯინექ დო
გუმაღერღენწ ოშფა დემი,
ღორონთ, რთხულე, ქუმანჯღვერე,
„ჩელაშორო“ ვეშმოთენი.
სო რე ჩქიმი ობინეხე,
ჩქიმ ლაგვანი, ჸვაფიჩალი,
აიეტიშ ჭალეწკუმა
კინე ხინჯ მაფჷ გაბიჯალი.

ლაშა გვასალია-ამდღარობა

სანთელ შარას ორჩქინანსჷ
შურიშ სინთეთ ენტებულჲ,
წკურუმია მორცქინანს
ბარჩხალიაშ მეტებულჲ...
...

გატყურია თოლონჭეს
კუმაცალო გართუ შურჲ,
თეზმა ცოდას მუკარჩხალო
მუს ოხვარუ ხვალე შხურჲ?

მუნმარზანს მუნაფასჷ
დაჩხერეფსჷ ჭითა გვერი,
აკორთელე ორთაცალო
მინ ბორო დო მინი ჭკვერი...

გარხვანხვატუ ოფუტესჷ
დღა იმენდეფ დინაფილი,
თეშ მეჯინუს ბაღრეცალო
გური მაფუ შინაფილი...

სანთელ შარას ორჩქინანსჷ
შურიშ სინთეთ ენტებული,
წკურუმია მორცქინანს
უღორონთეთ მეტებული!..

ლაშა გვასალია-ნარღი

ვაშურდიო, ჯიმა,

უღურ შურიშ ჭუათჷ,

ვაგობაღნო ლიმა

ტყვიათი დო ქუათჷ...

დღალეფს მეთხოზ დღალეფჷ
ურსხებუო ჯაბით,
დალიებე გვალეფჷ
მუშ ბოშით დო ძღაბით...

მეუნს ჩე დო უჩა,
შურობუმუშ მენდის,
გურს კონ კვარჩხე უჩანქ
ათესი დო ეთის...

იმნატრუა ღურუს,
რინა ორე ნარღი,
აკოწკურილ კილოთ
უნჭაფუო მარღი...

გეგნოფშურდით, ჯიმა,
უსხუნ შურიშ ჭუათ,
გინმოშკვანა ლიმა
ტყვიათი დო ქუათ!..

კოტე ნაჭყებია-ჭუმანითჷ ამდღა იჭუ,

ჭუმანითჷ ამდღა იჭუ,
ბორზალეფიშჲ ჭუმინი რე,
თუთა სოდგა ალებიჯუ,
თუთა ირო შუმილი რე.
ცაშჲ ხურთქინი ალმარჩქილე,
მურიცხჲ ონჭეს ქვირითანსჷ,
ღურელს ღურუ ვამაჩინე,
ღურუ ღურუთ მინირთანსჷ.
მიდგარენი მიკაკჷნსჷ
სინთელეს ჩქიმჲ ქვინჯესჷ,
ჭყონჲ ელმეღანს სქუა კჷსჷ,
ჭყონქ კჷს ოკო უმინჯასჷ.
მა ჭარაში ჯინას ვორექ,
მურსუ, მურსუ, ვამაგუო?
დჷმაწყორჷ შურიშჲ ნერქჷ,
ალმაბათქჷ ჯა დო ქუა.
გეთმუძინანს მაზაკვალი
ამარდეში ნანწალასჷ,
ჩქიმჲ რულიში მაძაკელა
მოზოჯჷნსჷ ნამჷ წანას?

მზექალა შანიძის გამოსვლა ქართულ-მეგრულ-ლაზურ-სვანურ-ინგლისური ლექსიკონის პრეზენტაციაზე