სამარგალო ოგვაჯე რე,უქოთომე,
სპილო ორე უჩქვალე დო უხორთუმე,
სამარგალო ოქრო ორე ღორონთუმე,
გაგთოვალნც, გაგთოფალნს ამდღა-ჭუმე.
სამარგალოს დუდშა პატი ვეგედვალუ,
ათეშენი ვაგიძიცინ-ვაგიფალუ,
შხვაშო გიხაჩქ,შხვაშჲ ლაიტი გიკაკალუ,
შხვაშჲ ოგვაჯეს მაექვალეფიშა გიკარკალუ.
შხვაში გორდჷ ყილოჯგუა ქომოლსკუა,
სქანი ტანით გილაიღალ შხვაში ჭუა,
სქუას მორდუ,უკულჲ კვარჩხშე ორთინუა,
მარგალობას უჯოგუა,ორინუა.
მითინც ვაუჸორც ქანას კოჩი ქიგერენდა,
სი კობუ რექ,ანწი მიშოთ იჸიქ მონდა,
სი ლანდღვირი,მაჭარუქო დღასჷ წკონდა?!
ზღვას ქაკათი,მარგალობა ქუგოკონდა!
სქან დიხემცჷ შხვეფი რდუნა თური-ტომცჷ,
სქანი წყარემც ნტერი ჭოფუნს ორქოშჲ ჩხომცჷ,
სი ვახვიე, სი ქოგუქჷ ჸვარილჲ კოცჷ,
გაგშაკურცხი!ქუდუძახი ჭკუა-გონცჷ!
No comments:
Post a Comment