ლაშა გვასალია-ფხოსარე დო ბჟას ვონჭუქ

 ჩქიმ ხოსარს მუ ოხვარ

გურჭუელო ერჩქინელს,

უჭარ ლერსიშ ოფუტეს

მუნაფეფშა მერჩქინელს...

"ძია ბძირ დო კაკა ბძირ"

აგოთანაშ ეზმოჯეს,

ბორიეფს ვამართეს დო

მასქურიეფქ მოზოჯეს...

დომქაქალეს ჸუჯიშ ჸას

ფარფალიაშ ხონარით,

გომკურცხინეს მართუეფ

მინ ქოთი დო მინ ვარით...

ფხოსარე დო ცას ვონჭუქ,

მუს აჭოფე ნარტელ შურ,

ღორონთი დო მარდიანი

სი დოთხილე სქან შხური!..

---------------------

ხოსარი- ფიქრი,

ეზმოჯე- სიზმარი.

შალვა ჭეჟია-ქიგიჯინექ ელმოლსინ

 ქიგიჯინექ ელმოლსინ

ჩიტეფ თოლეფს ნაბუნა,

ეშე ცაშკარს გესოფნა,

ვარჩხილ წყარიშ ნაბონათ.

მუდგანერო ირთუე,

მუდგანერო გირთუე,

ნინათ არძო რმაალანს,

მარა გურსი შაყარანს.

ფირქებს ელნამალას,

გიშნაგორა ნადუდის,

მუჭოთ ბორჯის ორთუმელს,

მუჭოთ შურიშ ობუნეს,

ირო ოკო დაუნენ,

სკან შარას დო სკან კარსი,

ირო ოკო გაუნენ,

შურ დო გურიშ ნაშარსი,

სოდგა რდას დო სოდგა ვარ,

სოდგა ვორდენ იშენით,

ირო ჟიშე იბჯინექ,

ირო თევრე იშენით,

თუდო მუთუნს ვეველუქ,

აქ პოტიკ რე ირფელინ,

ენას უცბას ქუგოფხვად,

აქ ვეძირე თიფერინ.

ანდა კათაშ გოჭყაფილ,

ანდა საქმე დოჭყაფილ,

მუჟამს არძო მიბრჩქილე,

მუჟამს ღორონთგონჭყაფილ,

ვენინტირე მონჭყაფილ,

თხუმურელი ნაჭკირას,

კოჩიშ ნინაშ დოჭყაფილ,

მებჭუნსი დო ბდაჩხირანს,

მარა მუშენ ვამიჩქუნ,

მარა მუჭოთ მა მიჩქუნ,

ოკო გურზე ნადაჩხირს,

ოკო გურზე ნაჭუას,

მუჭოთ შურიშ ობუნეშ,

მთავარ ჯერღვიშ ღაჭუას,

მუჭოთ ბორჯიშ ჩქინ რინაშ,

უშურგურე ნაჭუას.

ლაშა გვასალია-ჯაბი

ღორონთიშ ფურცქინუათ ალმასიმე, მახა,

სქანი შურიშე ეკნაღელი რაგადეფიში სიორი,

სქან უტომბაშ ანზრეფის სანთელუა

ცანცალერო ჟი ულირ, მინშა ჭუჭელერ,

ეცანდილ დო კვათიერი, ნირსიშ ჯღარო მაქიტალი,

ეფუნელ დო ხვარხვალერი...

ო, ჩქიმ მახა, მუჭო ბჩალუნს თანაფეფიშ უკმელუა,

გოჭითორელ ბორუეფი, ასე ხოლო დოვილნა

ღორონს დო მუმასინ ფერეფ...

იჭინგოლნა, სხარსხალა ეშმაკის ნინაცალო!

მიჩვაჩვალნა უჩხვინდე დო ჸვა ლანდღვილ

რსიოლეფი, უოჭიშე ბეძღერია ქომოლეფიშ

მენდო დო მიულაფუანა თოლუმუნტირ ჩხეშას...

აკილანდღუ ართდღას ირფელ დო აკიბლასუთ

ჩქით, ზორღა ქალერჩხუანს გიდალ ქვარაშა

თე ზესნახე პეულებს დო ჸუმურეფიშ დალიეფს!

ვო მახა, ვო, მარდობუაშ მონწე, ათეს ირფელს ჩქიმცალო

ქარწყექ დო ქითმენქიდა დოშკირატექ სი სანგარო,

აკორღვაფექ სი სარალო, ქასკილად შურწულირეფს

შურობუმუშ მინდორეფი, გვალეფი დო ხარხუნტეფ...

გოკურცხ, მახა, შურო ქოიკინდდა, გობარჩხალე ართშა,

კოჩიში გახარებას აკაბურცხა ოკო, იმენდუა ხოლო ოხვარ

დო დუთხინუანს ოშურეთშე მოსოფილ კვიკვილეფს!..

ქაძირ, მახა, საგანოს სკან ჟინცაშა მებუნელ ძიცა...

ხორციშ დოპიჩუა გახვარდას შურსი, ფსუა მაიდეს

ჩანაფილი, მონწე-მონწეთ ოფურნალო.

მაულარეფ ვორეთ თევრე, თი ქიანაშა, ე, სარალო,

ჩქი მი დომტენა, შხავა მი დოსქილადე სამარდოთ?

თინა რე, მახა, ოკითხე დო გაგებელი - თაქ ქომჩქუნა დო

თექ მუ ღირ რინა ოშურეთის, მინჯელო დო უმინჯურო?

მუთუნ ჩქი ვამჩქუნა დო ვამარჩქილენა, დუდიშ მაჭყალ დო

უთოლქვინჯეთ გილმარულე მარგალემფს!...

ვო მახა, ვო, უშურობაშ მესანთელე დემკოჩ!..

კოტე ნაჭყებია-მარგალეფი

 გომორძგუა მარგალეფი,

ჯგირობუაშჲ მარგალეფი,

შურიშჲ ეფუტჲ მოჲზინდჷნა

სონშე კჷლნასარგალეფი,

ფულირ მუთუნ ვაჲღუნა,

რეთ წკონდა დო არგამეფი,

ჭიფე თოლით იჯინენა

კანკანეფი დო ართგანეფი...

ორქოშ ზიტყვა გილაჲღუნა

კვირბემც გინაცაცურეფი,

კჷნოხონიშჲ მენცარეფც

გერგეზულო აწურეთ,

ბრელჲ გაფუნა ჟინოთიშა

შურტომბათ ნაწურეფუ,

მარა შხვა დროქ ქჷდოდირთ,

თირელი რე ანწ ურემი.

ჩქიმი რექ დო კჷნ იჸჲიქ,

შხვანერი რე ამდღარჲ ნარღი,

სქანი ნაჯინჯაშჲ ორანი,

ვორწყექ, ვარე დასაბაღჷ,

თოლიშ ოწოხოლე ხომუ

მედეაში ხვამელ ბაღი,

ღანკმორთელო გიმანთხუნა

ჰალაია-აღიაღი.

წჷმოთი ორცას მიჯინენა,

ჩილამურო გჷთმოლ ჭვეთი,

კონკის პელეტჲ მუკმოხორცქუ,

ეკონია მურცუ შვეთ,

ნახანდისჷ მინჯე ოკო,

ხოლო ძამი უჭიშეთ,

იმენდი რე, ვეგნიბლასუთ

უსქეთჷ დო უჯიშეთ.

ირკოს ართო ქომძირჷდანი,

ჯვეშობური ხვე რდასჷნი,

მარგალურიშ ნინაშ მაფა

ორქოშ ტახტის ხედასჷნი,

მაჸალეთჷ მერჩქინელქჷ

ძიკალჲ დუდი ვერდასჷნი,

ართი ოშო ეთმიშასჷ

აიეტიშ თე თასილი.

ნონა ჯანაშია-დიდაშ ნერჩი

 თოლიშ ბირჯღიქ განმართ ჯინათ.

მის უჯინექ, ვარა მუს?

მითინ ვამურს.ვორწყექ მარა,

ფირქებს გინუორთუა შურს.

დუს იბღორე, შხვა ვორექ,

უსკვამაში დო ბედინერი,

ი ბორჯიქ გენკირულუ,

მუჟამს ვორდი გოჯინელი.

დუდი ჭირაკილო ვარი,

კინ მემიღუ ზისნახეთ,

სარკეს ვენუოჯინექუნ,

ამარ ცაშა ქიმუანჭე.

ჩქიმი ბოში დღას ვაღურუ,

გურს პუნს ჩქიმი ბათურია,

უსმართობაში გურმეჭვილი,

დიო ვორექ ვაღურია.

უკული ფარფალიაცალო

ქუმურსუ ფარფალიში ბორჯი,

ბებიში ხუმაშ ალასიმათ

ირო ყმაყოფილი ვორდი.

ინჭაწკმა ნეძი გედგუდ,

ნეძწკუმა რდუ პეულეფი,

ირთუდ ჩერიაშიმანგურო

ოჭმარეშე ეყუნელი.

წყურგილიშე ორკოლით

წყარ მომღუდუ ართო რგილი,

სარდაგიეფს ბაბ ხაჩქუნდ დო

პიჯი მაფუნია სქირი.

თოლიშ ბირჯღიქ განმართ ჯინათ.

მის უჯინექ, ვარა მუს?

მითინ ვამურს.ვორწყექ მარა,

ფირქებს გინუორთუა შურს.

დიდაშ ნერჩის მარწკინიეფ

ია-იეფს უსინთანა,

თუთა შურსუ ინმოჯინე

დო დუდი მიკომიძუ ჯაშა.

თამარ დარასელია-დ ო - ქუგმოთანდ შურდგუმას

 ... დ ო - ქუგმოთანდ შურდგუმას,

რ ე - ოჭმარე გურს მაფალუ,

მ ი - რე ანწი ბთირანსი დო

ფ ა - ლირ პირელ აწმავალუ.

ს ო ლ -ე იბდა შარას ბგორუნქ,

ლ ა - ნდღვირ არზეფ მირთუანს,

ს ი - ვარძირდა ათე რინას

ბზოჯუნდია მი თქუანს.

ს ი - სმარქ ცხადო

ლ ა - ნდღვირ შურშა

ს ო ლ-ე ალმაფიორას?!

ფა - ცხას მილახვილირ ხუმა

მ ი -შა მის

რ ე - მიონანს?!

დ ო - ნწყვე სერი ქვერსემიას,

ახალ დღაქ ქიდებად!!!

თამარ დარასელია-თოლს ელანჯამა

 თოლს ელანჯამა ჩხონაფათ მიოჩქ,

უკმელაშ ნირზ რე თოლწკურილ ჯინა,

ხუჯით მომთირუ ქვერსემ ცოდა

დო

შურ დოშულადე თიშ აწნაკინა.

გურს იბჭუა დო ჭუამერჩქვანილ

შარას დინაფილს ჩქიმით დობგორუ,

სქან შურ რე ჩქიმი რინაშ ოხვამე,

სქან გურ რე ჩქიმი შურიშ ოხორუ.

ლაშა გვასალია-მარგალურ თუთას

 ინჭას გვიმეფით ეშანწყილს

ქენვოჭოფ თუთა,

ომბოლო რსხინელ მურიცხეფს

ქაწაფორ ტუტაქ.

ოფორალს ბადეთ მობონდღილს

მონჭელო ურთანქ,

ვაგუტენქ სოთინ, კიონტითი

დუდ დო ტვინს მურთანქ...

მიოტუ ხვიჩინი, უსინთობა

მეხვარებ მუთას,

ქუდუტენქ ხვილირს- გაჯინალო

სკუას დო მოთას...

ებშა დო ხვიჩალს,

აშნარდის ურთას,

ჯეგეთას მორნელ-

მარგალერ თუთას!

ედემ იზორია-ქიგესურუ

ქიგესურუ, სი ხიოლი

ვარდიშ ჸაში;

ეგაფაჩუ ტანს ჟიმონტი

ჸოროფაში;

გოსოფუნსჷ მაჭირხოლიშ

ფსუა ცაშე

ბჟაში ოლჷ ჩხორიეფსჷ

გოთანაშე.

ქჷგაჩამუ გენი ჯვეში

სი კვათირი;

ბორჯი სქანი მუსხანიე

მონკათჷრე;

ვამგათირე სი თე ჭარა

ვამგათირე

კარს მჷგორე,

მათირიაშ ფსუათჷრე

ქიგესურუ, სი ხარება

აფუნიში

დო ალობა თი ხარებას

აფუ ნიში;

გოსოფუნსჷ მაჭირხოლიშ

ფსუა ცაშე

ბჟაში ოლჷ, ბჟაშ ჩხორიას

გოთანაშე

ქიგესურუ,

სი, ხარება ვარდიშ ჸაში;

ქიგესურუ,

სი, ხარება ალობაში...

ედემ იზორია-სამარგალოს

ზაურ გერგედავა-მარგალურჲ პოეზია