მეგობრებო! ავანტიურისტმა ტარიელ ფუტკარაძემ და მისმა დამქაშებმა გააქტიურეს პროპაგანდისტული დივერსიები ქართველური (პირველ რიგში მეგრული) ენების წინააღმდეგ. ჩვენი ადეკვატური პასუხი ამ არამზადების მიმართ იქნება უფრო მეტი კარგი ნაწარმოები ამ ენებზე, უფრო მეტი კარგი ლექსიკონი, უფრო მეტი კარგი ინტერნეტპროექტი (ამ ენების ონლაინ-კურსები,მულტფილმები,ონლაინ-ლექსიკონები მათ შორის ხმოვანიც და აშ.) მათი მიზანი ნგრევა და განადგურებაა,ჩვენი გადარჩენა და აღორძინება!მათი მიზანი ფალსიფიკაცია და სიმართლის მიჩქმალვაა  ჩვენი სიყალბესთან ბრძოლა!  ისინი ვერ გაიმარჯვებენ!     http://azrebi.ge/index.php?pid=1087

ედემ იზორია-ქიგესერუ

ქიგესურუ სი ხიოლი ვარდიშ  ჸაში,

ეგასოფუ ტანც ჟიმონტი ჸოროფაში,

გოსოფუნსუ მაჭირხოლიშ სუა ცაშე,

ბჟაში ოლუ- ბჟაშ ჩხორიას გოთანაშე.

ქაგაჩამუ  გენიჭვეში სი კვათირი,

ბორჯი სქანი მუსხანირე მონკათირე,

ვამგათირე, სი თე ჭარა ვამგათირე,

ქარს მაგორე, მათირიაშ ფსუათირე.

ქიგესურუ სი ხარება აფუნიში,

დო ალობა თი ხარებას აფუნიში,

გოსოფუნსუ მაჭირხოლიშ ფსუა ცაშე,

ბჟაში ოლუ-ბჟაშ ჩხორიას გოთანაშე.

ედემ იზორია-დორჩქალაფა

ცა ქიდერჩქალი,

ბორჯი,დეფანი,

ბჟაში ბარცხალი,

რუმე გოფონი.

მესკვი ჭოროფა,

სარკე ტაროზი,

ფუშქე ირი ფა-

-ია,ლეფონი.

ცაშკარი გოხი,

გატიბე დიხა,

გინატე დიხა,

გური მუფონი.

ჩხორიათ ბონი,

ბაბუ დო მოთა,

ჟინი ანთარი,

ორთე დო ორთა,

შური დეფანი,

გური დეფანი.

1.დორჩქალაფა-მშვიდობა,დამშვიდება

2.დეფანი-დააცხრე

3.მუფონი-მოუოხე

4.ორთე-სამყარო

5.ორთა-ბუნება,ორსახება,ღვთაება.

ედემ იზორია-ბჟა ვადოშქირტა

ბჟა ვადოშქირტა!

ასე ბორჯი ცაცის გილარე

    მუშ მალექინა

ფსუაშ სიორი რე სითელე

    ჩხე ჩილამური

მინშა ჰამო შურიშ კილარე,

     გურიშ გენია

სო იჭუ დო მის გინორთელე.

ცაშე ჩხორია მუზმაფერი,

      სჷმჷ ლესქერი,

    ხეს მივალუანს 

დო თეურე შარა ბონიე,

ორთეშ კარკაცი,ასა-გასა

გოდირაკილი

თოთო სითელე სქან სისქვამაშ

  გინალ ფონიე

      ღურა ვამონარღ

თოლიშ მერქა ართი თა რინა

   იშენ მუს მობაღ

ჩქიმ ოჸუნეს გინულინუე:

     შურურძღაფელას

ღურა-თელაშ აკართურენი

   ვამოძირათი

ჸუმენულო ვანობლინუე

ედემ იზორია-სენტენცია

მუდგა ვა რდენი

სქან ლანდიშა ვენგალენდინე,

კოს მუს დუდიში ფასი მუთუნ ვანოპალუე,

მარა ქუგოკო 

შხვა კაბეტის ველადინედა,

თიში უმოსო

დიჭვე ოკო,დიფაფალუე.

ედემ იზორია-კოჩანა

 პლანეტელეფი- 

   ცაში გერე ხვალე კოჩანა,

           ჟიკოსმიური

  ჟიორთალი თურმე ჸოფერე,

          კოჩი უმოსის

 ორთეფიშე მუთას მუჩანა,

       ქოთი ქუნოჯგვე

 მუთ გიღუნი ჯგირო გოფერე.

         თიშ მაქვერსემა 

გოხოლჷნა ბორჯი საცაცე,

         მარსიელეფი

კოსმოსიშე იღვინჯგინანა,

         ირ ნირზებაშე

ხვალე ართშა ხე ვემკიცაცე,

       დო თის ვეცადათ

კოჩანაშე ვამორჯგინანი

1.ჟიორთალი-ზებუნებრივი

2.ორთეფი-სამყაროები

ედემ იზორია-ვარდიში ჸა

იშხენს ლაფაშე

უგუნყანეთ ბორჯი სკულეტი

დითა მუს ელჷ

დიადიხა ელავალირი,

მუზმა ჟიცაშა

ეშე მისოფჷ კოჩი პელეტი

იზმაშა ართუ

უჩა ჭარა გოშქუმალირი.

კოჩიშ ჯგირს ფური,

ელანქერე დო აიწორო

ბოროტი კეთილს

უძირძონუ იშენით გამწას

ვარდიშ ნოჸელას

მოგენს თენა ნამუსჷთ წორო

პირი ასქვამანს,

მოწონს მარა ქარა რე ვაწანს.

დო იშენ ვარდი

დიადიხა ელავალირი

ორე თოთო თი

დო ონატრა ლჷლჷშ ფერაფი

კინი კოჩი რე იმენდული

დო გოფალირი

კოჩიშ ხეს ელჷ

ვარდიში ჸა ქარაშ ღალირი. 

ედემ იზორია-ოჩე ჭალეფი

      ოჩე ჭალეფი

დო ფარყეფი, ოლე ხერეფი

   კირდე ლასარი

წვათანჯეფი მუ ვერეხეფი,

     ოგურგინეფი

კამარეფი,თევრე მესეფი

      ჭიჭე სკურჩეფი,

სკურეფი დო დიასკურეფი

      ოკარკალეფიშ

კვაკვალი დო კვიკვა სკვერეფი,

     ოჩიტოლეფი

ოირემეფი,ოკვინორეფი,

    ფალაზონეფი,

ალაზონეფი დო დობერეფი

 ა,ეიორჩქინუშ

უგუთებუ,კუნტა პორტრეტი

   ა,პოეზია,ა ლერსი დო ა,მუ პოეტი!

მერთი ემინჯი,

ირო გიჸორდას დო ვადაკორდა.

1.ოხარჩალე-ჩანჩქერი, მისი სინონიმებია ოვარვალე,ოქურჩინე

2.სკურჩა,სკური და დიასკური-პატარა მდინარე,მდინარე და დიდი მდინარე ასევე მდინარის სინონიმებია მალწყარი ან წარმალჷ   

3.ლასარი-გამკვრივებული ყინული,ყინულის ძნელად დასადნობი,გრძელი ლოლუა

ედემ იზორია-ჸოროფაშ ბალადა

მა ბშუ თუთარჩელა სერი

მა ბშუ ბორჯი ბედინერი

ჩქიმ შურიში ნოწკერია

პუტორანდ ფურცელს ბორია.

ჩე ჯა გური ალაჭვილი

კუსანდ,რკიანდ,დირაკილი,

მერეკელა ცა სარკილი,

მურიცხეფიშ გორაწკილი,

ჯა ედომუშ ნოჸელამო

იკვანწადუ იფრელამო.

მინ ირთუდუ ან დო განი,

ჟი შორს ჭითა კუდელამი,

ჭუმინ,ჭუმინ,ჭუმინია,

მიკარკანტჷდჷ საგანი.

სი ინგარდი თუთაშნერი,

თუთას გინარდ სქანი ნერი

აფუდ დინაფილი ფერი

სქანდე ოჭჷდჷ ეფერი.

სქან დო ჩქიმი უგუსოფ

გინოსქუდ კისერს კისერი

მოფუნდ თოლშე ჩილამური

მუკირჷდჷ გურსჷ გური.

მა ბშუ თუთარჩელა სერი

მა ბშუ ბორჯი ბედინერი...

ზაალ ჯალაღონია-მარგალს ნინა გოჭყოლად!

Livemocha-მ მეგრული ენის პროექტი დაამტკიცა!

პროექტი მიღებულია და დაწყებული! ეს იმას ნიშნავს რომ გარკვეული ხნის შემდეგ გვექნება მეგრული ენის ონლაინ კურსები. ვისაც გაუხარდა გილოცავთ!
http://livemocha.uservoice.com/forums/2163-feature-requests/suggestions/1619601-add-a-course-in-mingrelian

ედემ იზორია-ა,პოეზია

 ღობერიშ ლანდი:

ბონი შუკას თუთაშ ნალამბა,

  ჟაჟუ ქვეთიას

ინონწყვილი გვალა დო ლაბა,

     ხატიშ ქიონი,

გეუკმელას ელაფერდული,

   ოხარჩალიაშ

გელალუა დუდარდებული,

   ტანერღვაფილი

დუდკვანწია ჩეჯალეფი დო

    პეულიშ პირით

გოთირელი ჩე,ჩე ჸალეფი

     კურკუციეფი

რზენეფი დო ეკი გვალეფი,

    გოთე-გოთეფი,

წკვაფანეფი ირო ტყალეფი,

    ზღვაში გურგინი,

კირდე კირდეშე რანჯინელი

     კინი ტყალეფი,

ტახეფიშე ედარანჯელი

    წკვიბღალეფიში

რწკაფუა დო მიკიონტაფა,

   ოჩო კოჩეფიშ

ძგვაბალი დო ტყასჷ   ტყაშმაფა ,

     მალუეფუში,
გოფაჩუა,გეჩინორაფა,

       კალმახიშ  ცჷ მა,

თქურშინუა დო თქვიშინაფა.

გივი ქარჩავა-ჩე გოთანა

გოუსქვამებუნა ქართიშ ვაგზალ. მა მუთ ქოფშუნ თაშნე გოვარვალერ დღას ვა რდ. ჩქიჩქობუაშე ქართის მითიპკილოთუქ დო ჯგირო ფშუ, აკა სამანჯელ მიღუდ, მუშ გეშა ვაგზალშა გიშულა მოხიოლუდუნ - უდეშე ძღვინით გოჭუჭატელ ლაგუჯის მიჯღონანდეს დო მინშა ლაგუჯის მუშ მუმაჯღონალ ხოლო მა უნუდ. სიტიბა მუმაკათუდ. ნანაშ კიდირშე ეტყაბარელ ჩქიჩქუშნერო, შქირენით მორთომაფილს დო ღიაფით ნდღულაფირს კინე ნანაიაშ კიდირს მუჭოთ წურბელა მუკოჭაბილსინ თეშ... შურიშ ინოხ სოთინ დუტე ქო მაპალუდუ-და ყორყელს ღიჟეთოფურგითნაწიმაცალო მიტიბუდ ირ აკან. ოსხირიშ გითოხვამუაბორჯის კაბერჭის გეცუნაფილ ცუხიშორზაშეცალო ბნდღულუდ... ერზამილ პაპროზიშ ღერეფით გილეფხაჩქუნდ ქართიშ ჩხურუთ ციცინაფილ ლერჩქვეფს... საათის გივოკიკინანდ ირ წუთის. ასე ვარ ასე. მუშენ ვა მოურს მუშ ბორჯის. წირკეშ ღალირ იშ დუდ დო მუნდ, ქო მოურს აბა სო ურს. კინ ციფერბლატის გითმიოწენს ნაკაკა თოლიშ შქირენულ რზამა. პაპროზიშ მაჟირა ღერ ბარგუნს, მასუმა მაჟირანს ლერჩქვეფს. ეხანობას, სხულიშ გინნაკვათაშა ვინგით გერაგვაფილ ოქირსეშორო რკიანს მუდგარენ. მოურს! მოურს! შულადა დო მერთომაფათ შვაპილ დუც ონდო ჩქიჩქუობაშ ჰამო შინა გაფაფუდუნ, რანწკის კათაქ გამაკორდ, აწიკინ დო შუშას მელე კომპიუტერს მუკოხუნელ ჩეშმან ცირას ქავოსქიდ  ჯუქურო. პასპორტ  დო ფარა ჭკირილშე გემთოვუსეტელე დო გიწოღალას თიშ ხოწილ კითეფიშ სიტიბას ქაშქირტ ჩქიმ ბუძგურიაქ... დუც გიმე გიმუკინ დო აწნარცხონა თუმაქ ოგვერდაშე ჩხვინდიშახ პიჯ დოუფორ. მუჭოთ ჯიჭონიშ გოგვიგვილერ ალეფქ მუშ ქვინჯღალ შქა დო ჯინჯისინ... ონდო ბილეთის გიშმაჭარუნდუნ დუდშა ვეუკინ. კითეფს კლავიატურას უხაკუანდ ჯაშა ღვენწკმიშახვილაფირ კიდუცალო, ნინა ჟინ ლერჩქვიშა მუნუძუდ დო გვერდო ფორილ აფუდ. ბჟაშ კიდირშე მუკნაჭვალა ჩხანათ გოზიზინაფილ, ყუნწმეხარცქილ დო დიხას გეფაშქაფილ ლაგინძია ჯამკაკალშა ქო უგუდ თუდონ ლერჩქვ. ოხვამეშ ძეკვენეფცალო გოთოლირ  ვინგ დო ყორყელ  ტყარ ტორონჯიშ ნინძგიშფერო უჭვიანდ დო ექი-აქო ჭუჭელეშ ნაცხვაცხვაცალო ჩინჩანა ფარაშ მაფართა-მაფართას აფუდ ეჭითინაფილ. ორქოშ ჯვარ გიობუდ, ქვერსემ დო სქვამ, დახე თიშ მადიდა ქო რდ, ნამდა ჯვარიშ დუდ გოძღოძღოწკუმა აჭყაფუდ... ჯვარიშ ქვინჯ, სოდეთ ქირსეს მუშ გელისმარელ კუჩხეფ მაზაკვალიშ ხოკოშა მუნუძუნ, ძუძუეფიშ ღარდაჭყაფუშა აშუსვანჯუდ. წყინწყარპიც, სობოგა დო ჯვეშ ხიბლას ბაღანობას შინკას იფხირდითინ თიქ ქუგმაშინ  უნელო. მონჭანუა მიშატყურაფილ ბიაშფერ, წყინწყარპიჯიშ 2 სვეტერია დო წიწინაფილ შინკა ინუ ვინთუდ რკინაშარაშ მოხანდეშ ჩე ოთანთანალაია მუკოქვენჯიშა... დიო ხოლო ალსამეთიშ ბაღის დუნარზემ  ალდაჩხირ  ინაბარბანჩუდ  ორქოშ ხეშე გიშნაჭახნაკა ძუძუეფშა. ფეთქუნდ დო ინარა ვალუდ პუტარგით გოპულატირ დადულ კალმახაცალო... - ა, პატონ  , მიდეღითია, - მიწუ დო ბილეთ  გეგთმოჭირინუნ, კვირკვეს ნაფართხა უმურცალო ქუგმოცუ ჯამკაკალქით, ტყარ ტორონჯქით, ბიაქით, შინკაქით დო კალმახაქით. მერქაშ მამალას დიფრთ  თექიანობაშა დო მიდგარენ ოსურქ ოჭიშის ხე ქიგემთვათვ  , მიმაშქვით ბილეთშავან, გვალო გაგშაპკურცხ დო დოპკვარჩხანე. ქართიშ ჭუხის მეფხარუნქ ირანულ დო ფრანგულ შურამიათ გოზიონთილ შოშეს დო ჩქიმ პაპროზიშ მაშქვიდაია ფურკის ვუკუმუანქ თეშით ხუთილ ჰავას. ბაბაღუზეთ ვორექ ნაბტან. გურ მონკათ უზუმპუანს ოგურეს, შურიშღალას მიკმოპჭირდუქ, ნასინჩხუცალო გუმორზანს. გავრიშორო ებუძოლაფირ ვორექ. აფუნ რე. აფუნ დუთმოდირთუ დო ფუნას იჭყანს შურიშ ინოხ. მაჯერღვია იჭყანს ასე ეშულას. ჩქიმ ანგაროს ფალუნს მაჯერღვია, ოთხირეს გინიშ ჯღონჯღო. ჩხონაფილ ჩქიმ ბებ წვანერს ორთუდ თიშის. კალიაშ წვანერს ახაზირენდ ხოლო, ხალირ თხირით ეზადილს. რკინაშარას მელე-მოლე ოძიგირე მოუძ დო თექ გილაპ უნდ მა კალიაშ ოწილუშა. ეკი დო დიკი მიბლენდით თოლონჭეშახ დო აკა ჩახვია ემაფშინედეს-და, ხიოლით ცას ვონჭუდით. ცხვარე დო ნწარე ელაჭკომაფუშ ზადუაშე თელ საგანოს შინელ რდუ ჩქიმ ბებ. სუნელს კაკუნდ  თიჯგურას, ტაბაკის თიშ დო ღუმუშ მეტ ვა გიღუდუკო მუთუნ გილადვალარინ, ვა გეონჯღორებუდ. ძღაბალობაშე უქომოჯნეთ დოსქილადირ, ქომოლიშ საქვარსით გეგაფილირდ, ღვინს დუთმოდგუნდ სქვერიშ ზისხირჯგურას, ორინჯ დო მაფურინჯეს ულუანდ ანდას. კიფერიშ ჯინს კველას გეხედ  დო ხაშილ ჭუჭელეთ ოდიარუანდ  ჭოიეფსინ, ამდღარ დღაცალო ფშუ. მა ხოლოშა ვემვოთინანდ, კითის მიცვანგუნდეს ჭოიეფ დო მოშქურუდ ღურუსხის. ოკუჩხანეშე ათოვუჯანუდ ბების, შხვადო ვებნჯირუდ სოთინ. ონჯირეწკუმა, კიდალაშა ხატ მუკუბუდ, ჯეგემარა დო ჩქიჩქ ქირსეშ ხატ. ართ დუცხე ქიცა უღუდ, დღაშ დო სერით თინა კინაკირუდ. ოჭუმარეს გამწოდოხოდუდ, ხატის ელაჯინედ დო იხვამანდ. ათე წუთის ხოლო ალმასიმე თიშ მარგალურ ხვამა: „ქიანაშ გორჩქინუ ღორონთ დო მარდიან, სქან ოროს ქუგობლუაფუდა, ჩქიმ სქუა დო მოთას, ჩქიმ დინოს, თოლსინთე ქიმეჩ დო ირნერ ჭუაშე ირსხ. მა თინეფიშ ჯგირობუაშა ქაშმოჯინე. უბადო თოლით მაჯინეს, მითინ ქო რე თეჯგურა-და, თოლ გელუწკურ დო ქვარა დუფშინე.“ ათეს თქუანდ, პიჯვარს გეგლიჭარუნდ დო გედირთუდ. ვანაფერო ჩქიმ ბებიქ მითინ დოჭყუკონ. თეშით შურუქალ ოსურირდ. დო, ვა პჭყენქია მა მითინს, თქუანდ. ჭყალა ვა შინერისა დო გინოჩამა, მითინ ოჭყალ ქო რენია-ვა-და ირ ღორონთიშ ოჭუმარეს ხატის ვოხვეწუქ დო ვახვამანქია დო მოჯგირე დო მოუბადეს თინა გეგშაგორუნსია. გერგობათუთას დოღურ. ჩქიმ გეშა პიც თუმა ვა მიჩანუა დო გობურძგონილქ ვა გილეძგვიბინუა-ვა, დომჩინ. მუშ ეკონია ხვამა ხატის ქატუ ანარკიაშე ჰამოთ ელნამბარა მასქურცალო. ამსერ უდეშა მევურქ. ბებიშ ჟარნეჩიშ უკულ ვა პოფექ სამარგალოს. ბაბა დო ნანა თექ მიწონებ. ჩქიმ ნაკვაჩხირჯგურა დაია. ჩქიმ ჯაბუნაკიშორ უდე. ჩქიმ ატამეფ დო სხულეფ, უშქურ დო წყი, მარსინაია ხვიმა დო ჩაფულა ლუღ, ხოჯიშთოლიშ დო ალადასტურიშ ღულა-ღულა ჯინჯეფ, ანდაშა წილირ დო წილოხირ, ანდა მეშარე დო მოჯგირეშ ოსხირსმელე ბირა-სხაპუათ გინმაზარებელ. ლეკეფიშ ორხაგუცალო გოჭარჭულერ ორტვინ მიწონებ. ჩქიმ ჯოღორ მიწონებ მუშ ყვაყვალა ლაკვწკუმა, დო ჩქიმ ქაბულა მიწონებ. შურ მიწონებ, ჩქიმ ბაღანობაშ შურ, ჩქიმ არკვანს, ჩქიმ ნორჩალს, ჩქიმ უდეშ კიდალეფს უნთხანსინ თი შურ. ჩქიმ ოზეს ოხვამეცალო კუმაფილ მარენჯობა დო შურდგუმაშ შურ. ამსერ უდეშა მევურქ, საბატონ-ჟაშხას გიმაცადებელო. მეტ ვა ფჩოდ. მარა თენათ ბლეცერანს დო გურს მირდუნს. ჩხვირკიშქვარაშფერო აკოსერილ ქართიშ ცას ელვოკიკინანქ დო კინ პაპროზით გილმეფხაჩქუნქ ლერჩქვეფს. *** ვაგონშა გემთვოსერგელე ჩქიმ მეკონეფ. კოჩიშობას სოდომ დო გომორ მიკნაველ აფუნ, ათაქიან შურით მეხვადუქ. ბგორუნქ ჩქიმ კუპეს დო ჩქიმ მეკონეფს გილახვენჯიშ თუდო მითვოქვირსანქ. ართ ნოშქერქილიაჯგურა უჩა ოსურ მითოხე დო მეჩხორიეშ ხალირ თასეფს ხვატუნს. ტინტილაჯგურა თოლეფს აჭი-დო-გაჭით უმარმალუანს დო ნარჩაშე ე უნაფილ ქუდიშ წვანდიშახ ბზიმუნს. მა გალე იბჯინექ დო შურ მოლ აყარებაშა. ჩქინ კუპეშ გიმალწკუმა რხინაფილ ბადიდ ალარე. ღვანწკ დო ვინგ თეშ აფ ღვირნაჭკილ, ნაწყარუშ გეშა ჭიფა-ჭიფას გუნახარცქა ლეკშა მოუგენს. ჩხვინდ გეჯღვალიკერ დო ტერტე. კიბირ  ვა გიაპალუდას ოკო სარალოს დო ჟინ ნოლ  დო ლერჩქვ  ოშმეშამო მარჭვაშა დინუსვანჯ. მუჭო გოლოფაშ გეშა მესქირაფილ წყარ ღარს მოკათაფაბორჯის დიჭყანს თხირთხინ დო ხირხინსინ, ეთეშ თხირთხინუნს, იცანცალ  , უზინდუანს დო უკილოთუანს, მარა მუშ ხვალიშ ეკმაღალარო ხოლო ვერგ, გიოხე. უნელო, შქახანიშ ჩხეშაგოთვითვინაფილ ოსურ  ქო მადირთ  დო, თოლგითოწკურილო, კანდიორო ალარაგადანს, მიკმაშქვითია აკა პატონ. სარკოს ვორწყექ - თე გოფშა ოსურიშ ძირაფა დო რხინაფილ ბადიდ ბოშკოჩო გინმირთუ. თოლეფ ურწკინუნს. მუმულცალო ჩირღონდუ. გითოღალირო ელუძიცანს გოფშა ოსურს, კოსტუმიშ ძგოპის მუთუნ ტანგოშ მასხაპალცალო ფიორით კინუკინანს-დო, მოზოჯითია - მიკმაშქვანს მეშარეს. ბადიდის მაბოშიაშ გურ ალაძ. ათე ბადიდიშ გურიშ უჯგუშო მითინს ვეიასხუნე ქომოლიშ თექიანურ რინაშ ფილოსოფიურ სმელენჯეფ. ჩქიმ კუპეშა ართ ეხომაფილ ოსურს ჭოკაჯგურა მარდუკოჩ მითმაზარენს. ოხვარ. ქორთულო რაგადანა. მარა მარგალეფ რენა, აბაშარეფ, გიოხე ჟირხოლოს. აკოტახილ ქორთულით ეთმუნწყუნს ოსურ  მუშ ჯიმასქუას, ჩქიმ დორთაშახ მუთუნ ვა გილალუა-ვა ბინას. ჭიჭე უმოს გიშათინილ, მარა იშენით აკოლაბარსელ ქორთულით გამენს ჯიმასქუა, ვა გაშქურინასია. გუთმაჯუნუ დო იტენს. ჩქიმ კუპეს ხოლო ართ მეშარე შარენს. ზერზელია დო გვანილ კოჩ, წალენჯიხარ რე. შუმილ რე დო მუდგარენ ლაგარდე კოჩიშ მეჯინა უღ. თენა ხოლო ქორთულო იჩიებ. იჩიებ ვარ, იკილოთ დო ისოფუ, მარა ვა აკანწყუ მუთუნქ. მა შურიშქალ ვა მაფ. თუდონ გილახვენჯიშ ბილეთ მიღ დო ვუჯინექ მუჟამ ეშეხირხოლუნა ჟინ, შულადირ ვორექ დო დორულაფა მოკო. სუმხოლო ჭკვაპალანა მუდგარენს. სუმხოლო ქორთულო. თე აბაშარ ცაგანო ელმორაგადანს, ჟიშე დონჯირელს მარსიოლუაფუნია. მა თოლ უჯის ვა ვარზენქ. ოსურეფ ვექანცუნა. ასე გეხენა დო უჯინენა, დაბა მუჟამს გითოფჩანს ჩქიმ ნერვეფ დო ჟინ გილანჯირალშა ეშაპცო უნქინ. მიარე ხანს ა ის ოჯინექ. კინე მუქ გეშეხირხოლ. ასე ჟირხოლო გურმოულირ რენა დო ჩქიმ სა ალეშ ჩიებას იჭყანა. მარგალ ქო ვორექინ ვა ოგონუნა დო გინილეს მარგალურშა. ბერიას ფულირ ნინათ უღუდუა მარგალურ  დო ლემენცეფწკუმა ლიმაბორჯის ოტყვინაფალო მარგალურს ხვარენდესიავან, თი ამბექ ქო გუმაშინ ხათე. ტყობინ დო ფულუაშ ნინა რენო მარგალურ? სა ალეშ გითარაგადალ? მემჩქუნდა ვარ. გითვოჯანუქ დო უჯხირზელო ვურჩქილექ მუჭო ეთმოპჭარუნან. ამდღანერ ახალობას მუთუნ კილ ქო უღუნ-და, სერიალეფს დო „დემონკრატიას“ მუთუნ გლახა ქო უღოლამუნ-და, ირფელ ართო მა ქუმკმოჭარეს. სერიალიშ ალა ოსურეფქ. მა შურიშქალ ვა მაფუნ, დასურო ვა ნოჩქვენია ეს ჩქინობურა-ვა-დო, ოჩიჩალო გახაზირებულ კოკუშეფცალო გოფაჩეს ფსუა დო კუდელ, ფურცქინშე რდგაბალშა გინილეს. უნელო ჩქიმ ტელეფონქ ქო მიორანწკალუ. მარგალურო. მარგალურ ბირა დინომჭარ დო თის ურწკიალუანს ირო. გეპჭოფ დო ქო დოვურაგადე. მარგალურო. ჩიება გავასურ დო ეიბჯინინ, თე ოსურეფ ეშ მაფართა-მაფართა თოლეფით ქომიკიკინანა. მუჭო ქო ბძირეს დო თიშვანს დიტყობეს. გოსისონდეს და მა ხოლო ქო დუმარულ. ცხენწყარ მინიბლით დო გუმაკურცხინ. გეიფხაბარკ, ხე დო პიჯ გამწიბობნ დო ხათე პაპროზის ქო მოვუნტე. მისერგელუდ ანაყუ ვაგონმობუნაფილ მანქანა, ჩქი მახინწალ მიჯოხონან თინა. მიშ დო მეხინწანდ ლურენჯ კათას, თე კათაშ სისმარეფს, თი სისმარეფიშ ჰამოს დო ჭუას დო მუს ხოლო აჭუდ პუხუს. *** ვანაფერო მიძირ თეჯგურა ოჭუმარე ჩქიმ ოფუტეს. ფორონჯიშფერო გოთანელ, ცაშე რგილ დო ჰამო შურიშღალა გიმოუღუდ დო დიხას ნირსის ო არშანდუნ ფერ. მიფშ უდეშა კუჩხით, დიო ხოლო შქაგვერდო გოთანელ ოჭუმარეს დო ლურით ჟიჟინაფილ პიჯ ურთაშ ოფარეს მუკოკვენწელერ გუმათანე მურიცხშა მემიჭოფუდ. ნანაშ გურ შხვა რე გვალო. პიჯშე ზიტყვა ვეკობლაფ, საბატონს მოვურქ მაქინ, მარა ტანშა ქო უგინაფ, გოთანაშა გეუდგინ, ყებურს დაჩხირ დუბენებ, წყარ ქუგვარგვალუაფ დო ამარ, შარამიოლს ქო მუმაზად. ბაბაქ ხოლო ჯვემაშ ფუთქაფით გეგმორთ დო ქო გუმაკირეს ჟირხოლოქ. ჯოღორქ ვა აწოფხვადუნ, გიფჩაკვირე, დღას ვა გიხვილუნა დო სო რე, მუშენ ვა ლალუნს-მაქ. - ჯოღორქ ულირ საბატონს მანქანას ქათასხაპუა. მიწუ ბაბაქ მორდებულო. მუშ ნა ვილა რდუკონ თეშ. გურს მუდგარენქ ქალმანწკირ ნაჭვემერ დო ნაგოლოფა ყამბარცალო. უდეშა გემნოფრთ. ნაჩინებ შურქ ქო მარაგ. უკახალე ოზეშა გეგმოფრთ. ნაჩინებ შურქ ქო მარაგ. უდეშ უკახალე ვით წანაშ წოხლე ჩქიმ დუნარგუა ჭყონს ქავოკინდე თოლ. მორდე დო გოფშაფე, ტან დოსქუ დო დოგიროხუ. ჯერღვ გამანგარებ. ხასილაშ მეძობელქ გამნმაკათ ხათე. ქო გიობია უწუ ბაბას დო დოფხვამუ. ქეგთიგურგინუ სქვერიშ ზისხირ დო ბირგულშა გოფაჩილ ხე ქიტკატკ - ა , ანწ ონჯუაშახ ჩერიაცალო იპკიონტუქია მა. გეიხირხოლ დო ბირა-ბირათ მუშ ოჩხოულეშა ქიგნაჭკირ. დაიაქ გოკურცხ. უნივერსიტეტიშ გამორსაშო იხაზირებ დო ინგლისურს გურაფულენს. ქიმმეხვარია. ვოხვარუქ. ინგლისურს გურაფულენა თიშ მახანეფ, ართიანიშ ორაგადეთ ქორთულ უღუნა. მარგალურ ვა რე მოდას. ნანა ჩახვიაშა ღვინს, ოჭკომალს დო ცუხიშორზაშეს დინმომინწკარანს დო დაიაწკუმა ართო სასაფლაშა მევურქ. დოპუნქ არძას დო სქვერიშ ზისხირით ვუჩხაპუნქ გურპიჯის. ოდუდალე ქუას გითმიოწენს ნდღულაფირ ცუხიშ ჩხე ჩილამურეფ. ბაბუ დო ბებიშ ოდუდალე ურე ჟირხოლო ორზაშე შქირტუ. იპუცუქ დო ბაბუშის ვუნტენქინ იზმახანს ბებიშის მუშით ეთმიანტებუ. უჭყანიე ჩხანა გიმაფარკალ დუც დო ბორია იწარწალ. დაიას ვურაგადუქ, სასაფლას დინორენ თი ხანგა ქო მიგორე აკა, ოჭკომალ ქო დოვუტუათ- მაქ. დოღურუა იქ. ზოთონჯის დო ზარხულს კუჩხუჩაფულე გილეშ  . მუშ უდე ქო გიოფარფალუ დო მიდგარენიშ გინორთვილ სასაფლას გითოჯანუდ. გათებე სარალო. იშ დუნანჯირა აკან გოუქვარქვაშუნა დო ასე ცას მიკოჭაბ ხანგაშ შინა. სოთინ ვა რე მეტ. მი ორს სასაფლას დინოხუნა. თაქ გოუხვადუქ ანდა საღორონთო დუნაზუკოლას, მეტ სოთინ ვარ. დიხაშ ჭყანას ხოლო, ვანა დო ორტვინიშ უმოსო თაქ იგინანქ. დიხაშ გუმარჩქინე, მადიარაფალ დო მაჩუალარ ჭყანას. თაქ იგინანქ დიხაშ უნტუარობას დო დიხაშ აშხარობას. მითაჟამიშ გოზიორილ ოდუდალე ქუალეფს დო ლეყეფამ ჯვარეფს ვართ წანა მუკოჭარ დო ვართ ნაჭარა ეშეკითხირე. მი ათუნთხორ თე ქუალეფს? მითინს ვა შ. მარა თი კათა 100, 200 დო გოკონ 300 წანაშ წოხლე ჩქიმცალო გილაბაჯგანდ  თაქ დო ჩქიმცალო გაჯინედ ჯაშ ჯინს გითონთხორილ მუშ წიმოხონეფიშ ქუალეფს. ამდღა მა გილვობაჯგანქ. მიკილენს წანეფ დო ჩქიმ ფუთქურამ ქუას ხოლო გაჯინედასი უაფ მიდგარენ. დიხაუჩა ირთანს. ქიანა გვარგვალანს. დო მუთუნ ვეთირუ. უდეშა დორთელს გონწყილ ტაბაკ დუთმოფხვადუ. ღუმუ, ვალ, ლებია რკვანილ, ლეჭკერე, ქოთომ ჭვილ დო სქვერიშ ზისხირ. მეძობელს შურ ონთხ დო დუც მინმორე კინ. იხვამანს, შუნს დო მეურს. აკოსერუაშახ ხოლო ართ ჟირშა ქაჭიშუანს თაშ. მაჟირა მეძობელ მოურს. ოსურ. ტაბაკშა ვოპეჯუქ დო დუც ი ვილაფ. მარხვას ვორექია. იპიჩანს. ამარდე, ხუთ თუთაშ წოხლე ნაღურა ჩქიმ ბებ თაშ თქუანდ: იპიჩანსია, პიჩვანს გერენია. ა , თე ოსურ ჩქიმ ბებშე 20 წანათ რე უკულაშ დო მა ძიუთ გუვოშინ თე ზიტყვა. მა ვეპიპჩანქ დო განგერებულ ვუზვირთუანქ ჭითა კვარწახის აშაწაწაფილ ჩელაია ხორცის. მუთუნ ვა თირე თაქ. კინე ხაჩქუნა, კინე ბარგუნა, კინე ტახუნა, კინე ქუნა, კინე ჭყანჭყუნა, კინე შუნა, კინე ნირზენა, კინე ლა აფენა, კინე ოგორანა, კინე ონდურუნა, კინე უ ორა დო კინე ჯოგუნა. კინე ართ აკანს გირსიოლუნა დო დიხას ჭაბაკანა. ახალს მუთუნს ვართუნა. მანგიორ, ჯვეშის გითმიჭყოლიდუანა. ოსოგოთე თაშ ოფე დო თაშ ი უაფ. მა გურ პჭყორდ დო თეშ ვიშო მუთუნიშ მოღე ვა ვორექ. ჩქიმ მეძობელ მივალუანს ხეს. მინილია. რჩინ კოჩ რე, ართო ტიბ დო გემუან. შუმა უ ორს. ჩილს უძახ, ღვინ ქო მარულევა. გვერდ ლიტრა ონტირაშე უღუნ ფერ შუშაშ კულას გითმიობუნს. მა ვარიას გივორექ. მი გირჩქილე. აჯამუშო მომირე: ვარა შუმა, ვარა ღურა-ვა. მარზენს მუშ ლანდღვე ჟოგუშის დო ფუშანს. უკულ ბჯუნუნს დო ფხვამანს. ორკოლს ხეს გითმუჭირინუანს დო მა მიმნტებუქ. ხვალე იშ უდეშე ვარ. ჟაშხა რე დო მიმნტებუქ. ჩქიმ თურკათას, ჩქიმ ზისხირს, ოდღახურ ოხოფანცალო გოფშა კუნთხუს იპტენქ დო მიმნტებუქ, დო ბჯოგ ჩქიმჯგურა მანტენჯეფ. ვაგონშე მუთმუვოკინდუა თოლს ჩქიმ უდეშ აბარწას, ხეს მივალუანა უდეშარეფინ დო მუჭოთ ირონ, ასე ხოლო თხირიშ გურიშ მაფშხვა ჩილამურიშ კაკალ მიხოწუნს გიმე ღვას. ითამ თეთ გიშმეპიდენქ ცოდას. გინმოპკვათუნქ ჩხოუშიას, ჯუმს, ხობწყარს, ც ის, ტეხირს, ნოღელას, აბაშას, ცხენწყარს დო უკახალე დოსქილადირ ართ ტკუ დიხა მეტებულ ოროფილცალო ეკმოძახანს: „ვა გი ორქო მა, ვა მორწონქო მა; იშენ ქო გორლუაფუდა, სქანი ჭირიმა“. ეკმოძახანს დო ფურიალეს გილაცაცილ ჩქიმ შურიშ შქაბანს დინმოძახანს. გივი გ. ქარჩავა 2011-შ აფუნ ქართ

სახარება, გურიმოჭვე მუმა

გიორგი სიჭინავა-უკოჩობაშ კოჩეფი

უკოჩობაშ კოჩეფი
გვალო ბრელი ჸოფეთ,
უკმელაშე არგამათ
დუდი გეითაჭოფეთ,
დინახვილა ვირთხაცალო
ირფელ აკისოფეთ,
უკოჩობაშ კოჩეფი
მუ სანგარო ჸოფეთ.

გიორგი სიჭინავა-აჸონება

პოპორც მუ არზენც ჭყანას,
წყარ ეშე ეთმოწენცნჷ,
გვალა ქარწყენო გვალას,
ჭვემას ქუჩქუნო ჭვენცჷნ?

ქარაგადენო მითინც,
მუ შარათ მოურც აფუნ,
ვარა მუ ოკო ნირსის,
ნდოლოეფს მიწიფაფუნ?

მი უგანც ორთას მარდის,
მაფალუს ცუნდის ჩანცჷნ,
ქაგინნო ეთი ვარდის
ჰამო შურც გაფურკანცჷნ?

რჩქინა ქოძჷნო სოთინ,
მუთუნც ქუჩქუნო მუთუნ,
მი მიწინც სოლე მოფრთინ
დო ვარა სო მეურქუნ?


პოპორც მუ არზენც ჭყანას,
წყარ ეშე ეთმოწენცჷნ,
გვალა ქარწყენო გვალას,
ჭვემას ქუჩქუნო ჭვენცჷნ?

გიორგი სიჭინავა-მაფშალიაშ ჩილამური (ტერენტი გრანელს)

სქანო უჩათ მუკობუდუ
ჩხანა რენ დო თუთა რენი,
მასმა რინას მეგორუნდი,
სი შხვა გოკოდ მუდგარენი.

გემნანჯიო ეთი კარი,
ოშურეთის გილაბუნი...
სო შაყარე ათეზჷმა
მაფშალიაშ ჩილამური.

გიორგი სიჭინავა-აფუნც ვაგაფალ თხუმუს

აფუნც ვაგაფალ თხუმუს,
დალახებე დო ხუმუ.

იქილე,მაღალ ჩე ჯას
წკუმონტილ ფალეფ მეჩანც.

ილიებ თინეფიშ დღალეფი,
გერნელო ღურუნა ჯალეფი.

ბადიდი ოსინთეს ონჯანც,
ჯას უჯინე დო ონჯარ.

გიორგი სიჭინავა- რჩქინა

დიდი რჩქინა ქუა რე,
ირო დუდიშ ჭუა რე.

ჭიჭე რჩქინა ქექე რე,
ვეგეხე დო ვეგერე...

შორშა სოთა ანტინე,
მარა იშენ ცხვანტი რე.