გური ოტობაია-სახიოლო

ამდღა ჭვენს დო გესერელ რე,მარა
სახიოლო ქუმწუძახე ოკო,
ხიროკუა ჸოფე ჩქიმი ჭარა,
ნასვართასუ ხოკოს მინობძ ხოკო.

მუ ფსუალეფ ენოხვილ თე დუცუ,
უძირაფ რე ფურინუა ჩქიმი,
სო ვარენო ჟინცას ჟინცა მუძუ,
შქაბანია გურცუ ქენვოჯინი.

სიწკონდე რე თექ თოლსერი სქვამი,
თექ იფრელი ართიანს მობირძღუ,
გახანგებულ ვუჯინექ დო ვამიჩქ,
თესხი მურიცხ შურს მუქ ენმოკირცხუ.

ჩქიმ ჯიმალეფ თაქ ხენა დო შუნა,
გოკონანდა დობკოროცხუნქ არძას,
ჰომეროსიქ  ჸვა ემიფშუ ჯუნათ,
მუ ჭუაქ რე ანწი ეკობწარწას?!

სქან გოლუა რუსთაველი ყილო,
ჩქიმ მარონი,გოეთე დო ვაჟა,
კოლხეთიშე მურქ გურეკონტკილო,
ჩქიმი დანტე,ქიმშამრინეთ შქაშა!

ქომხუტოლეთ,ქიმშარინეთ შქაშა,
წკვარამელი ბორჯეფიშე მოურქ,
ვაბშქურინებ გურგინ-მუნაფაშა,
ნოჸელეფსუ უჭოფუანდ ზღოურს.

ქიმშარინეთ,ქეწმაჸუნით წიმი,
დიხას მითინ ვეპალუ ჩქიმ მანგი,
ფსუა გომნწყი დო ცას ქიმკიბწიმინდ,
ლერსი სი რე დობჭვ დო გამახანგი!

ამდღა ჭვენს დო გესერელ რე, მარა 
ნტერიშ ჯინშე ქუმვობირა ზოხო,
ხიროკუა ჸოფე ჩქიმი ჭარა,
სახელ ხოლო უშქურნაფუ ბჯოხო!

გური ოტობაია-სონ ხანი რე...

სონ ხანი რე ვამძირ მუმაშ საფულე,
ჩქიმ ოხორსუ შორშე მივოყიყინა,
მეხით კასილ გური სოიშახ მაფულე,
ართშა ნტერსუ მეტირხ ძვალი ხიხილა!

სონ ხანი რე დუდშა მემიძ ჯიკი დო
მუნმოქუნსუ ჩელა ნირსი ჩხოროფა,
სონ ხანი რე ვაგომწყუმუ ლიკვი დო
შქვიდელი რე ხეშქაგურსუ ჸოროფა

სონ ხანი რე ორჟონეფიშ ხარკალი
ჩქინ ოსურიშ ურემიას მებირძღუ,
სონ ხანი რე გილებგაგუქ მარგალი,
ბუმბულიში ნორჩალებქუ დექირცხუ.

სონ ხანი რე ქივაგური ლაგვასუ,
მიზღვინდუანს ჟინბორია ჯაქალა,
სონ ხანი რე ვასქუაფუ ლაგვანსუ,
ბინეხეფი ჸურუმულო ნაფალა.

სონ ხანი რე ჩქინი ცირა ჸვირალი,
ნაბურშელა სქუალეფცუ ორჩქინანს,
ჟანგიქ ოჭკუმ ლეკურ ეიოპირალი,
დო მიანგარს ექო-აქო გორჩქინას.

რინ ვა ჯოხო კონჭიშ გეთოლუაფას,
კოჩ ვა ჯოხო კოც ხორხოტა ნკალირსუ,
დუცულაფი დუდიშ ეთოლუაფას
დო გილულას კუდელ ეთომპალირსუ!

გური ოტობაია-წკონდა ვორექ

უკვანწუანს ჰავა ნუზუს,
ჩიტიშ ბირათ ეფშაფილს,
მა თინაშე ბწუნდი ძუძუს,
მწვანე ჭვემათ ერშვაპილს.

უღურალი ფერი მონტუ,
ნაშაყარა ცოდებით,
ჩქიმ სიწკონდეს ოხვარ გონთუ
ჩხორიეფიშ ნოდებით.

დიდაშ თუმაშ ფერ აძინუ,
თიშ ორო დო სიქექეს,
თოლუბადო ის ვაცილუნ,
დღაჭუმენი ქიგეგენს!

შარაქ ოკო ოლი მეჩას
კოჩიშ ბონი აკანით,
ჩქიმ სიწკონდეს მიაბეჭას
ცხენქ ძუა დო ლაგამით.

წკონდა ვორექ,წკვარამეფსუ
დუდი გეგნოფსქირიტე
მოკო ცოდა ჰარამეფსუ
ჟღამი გეშუშქირიტე.

ლალაქ თუმა ირცხონას,
მა ბჟას წოხლე ეწოპუნქ,
ზგუმონჯილი ქირცხონას
კიბირ-ბირცხათ მეფსოფუნქ.

ჩქიმ სიწკონდეს ოხვარ რულა,
პირბუნსუ დო ბლასირანს,
რულაქ გომთინ ირი ღულა-
მუქ რე ანწი მაცილას!

გური ოტობაია-გურშა ქომიხუტოლეთ

ტანი თქვანით მახუაფუ,
თქვანით ვორექ ჩალაია,
გურშა ქომიხუტოლეთუ,
ჯალეფ ოქვაჩალაი.

გურშა ქომიხუტოლეთ
ეკობოჭილ ოროთი,
ნეტე ვამხუმუანდას
თქვან სინთესუ ღორონთი.

ბრელშა მიძირ  ჸოროფილ,
წყარც თქვანცალო ელებირდ,
კუჩხეფ ვიშო ენუძუდ დო
ორკოლც ბონუნდ ხელეფით.

ჸოხ,წყარ მუჭო ხვარჩალანდ,
ქუეფს მუჭო ვარკალანდ,
ჩქიმ ჸოროფა შურდგუმილს
მის აღინე ართ ღალათ!

ტანი თქვანით მახუაფუ,
თქვანით ვორექ ჩალაია,
გურშა ქომიხუტოლეთუ
ჯალეფ ოქვაჩალაია.

გური ოტობაია-ელხე

მა დო ჩქიმი ელხესუ,
ნირსეფ მუმოგუძუნა,
ინგირპიჯის ფურცელით,
დოყურშილი თხუმწკუმა.

მართუს მეთხოზ მართუ დო
ხუმინუნსუ ფაფალა
გასურეფე სერწკუმა
დღაში ეკონთხაფალა.

რცხონილ აფუ ზღოურსუ
რატიეფიშ ნაჭალი,
სამოხიოს მეჭყვადე,
ბაღანეფიშ ჭაჭალი.

ხერზელ ჸუჩა მინჭუაფ,
შუმილ მიონჩვალანსუ,
ხვალე თოლ რე ქვერსემელ,
კინ თოლიში ჩალამსუ.

გური ოტობაია-სონეტი ეკოთანას

ზღვაპიჯიში მანგასუ ქეკოზღვარზღვუ ხინკეფი,
რე შვერთითუ კირილი,ზისხირითუ ნაჭარა,
ოჩხიჩხინანს ბორკეფი წყვირთალი დო კაჭალა,
გეგლალაფუ ნამთინეს მიკოტახილ ყვინგეფი.

დუღიჭონუ ღვაჭასუ ატარიაშ მინკეფი,
,,მუსხი გილამგაგურუ?!''  ჩქიმ დუდიშე ბღაჭალა,
ექი-აქო რჭკინუნსუ ჩხე გურიში ნაჭვალა,
მაბჟალიას მებეჭნა ბორიეფი წინკეფი.

ჯგირეფი დო ფურეფი ზოხო-ზოხო დოსხუნე,
ოქრო-ხუ რე,ნძორეფი-რობუს ვენინტირენა,
იფრელ წოხლე ეწომძუ სანგარო დო ოსხუნე.

კარაკანტო იძირე სონ რენა დო მი რენა,
დიდი ამბე! სარალო,ჭიჭე ქეთიბორსხუნე!
უღურალშა მეურქდა ქიმაჸალე შქირენა!

გური ოტობაია-თე გურცალო

თე გურცალო ბჟასუთ ვანტუ,
იბორბონჯ დო იკვარკვანტუ,
ზღვაპიც სქვერი მირულენ თუ,
ჸოროფილქუ ეწმალანტუ?!

ჩილამურიშ ჭვემას ფთასუ,
ბჟა დო თუთაშ ეკორთასუ,
ჸოროფილიშ თუმა რენ თუ
ჯიჭონეფი იგვარგვასუ?!

თე ტან სოვრენ ხუროქ თოლუ,
წყარქ მუჭო რე მეუქურთოლუ,
ჸოროფილიშ ხურხი რენ თუ
ზღვაში ქვიშა მოხუტოლუ?!

გური ოტობაია-სონეტი ლანდაფას

ოლი მაფუ ქართიშა,ქეწმაზადუ ეკიქუ,
ხრეშილი რე კირდე დო ქუალეფიშ კირცხი რე,
ვამიჩქ მუჭო ეკოფრთე,მუნერ შარა იბცხირე,
სეტელია ტკილეფშე ქუმუცალო ეკიქუ.

შხვა აკანშა გინიბლი,სანდალ მიდეღ ლეკიქუ,
წყარი მიზიმოთუ დო ართო ტკუცი ქირცხი რე,
ჟვერდიამუს!ფუთქურშა მუჭო ვემიბირძღინე,
რობუშ ქვინჯის ქენოცუ ვითშა ეკნოხეკიქუ.

,,მიკირთია უკახლე'',იჟღილინუ ბორია,
,,ერსქემებსუ ვათხოზა,სქანი ფენდა ზესქვი რე,
ღუმურგილ დო ლებია უგემურო ნკორია,
ვარა არძა წყურგილი უჭყანეთუ მესქირუ,
თიშ სარკესუ უჯინი,დუდი თექი გორია!''
ჰოდო,ჯვეში ხესქერქუ კინი ქიმიხესქერუ. 

გური ოტობაია-ოდიარე

თე ზღვაშფერი ოდიარე,
ჰავაშ ართი ორგია რე,
მარა ღურუშ მორდია რე.

კიდირშა მუმონჭ შქიორა ჟვერი,-
შურიშ მახინწალ გიმაქვაქვალუ,
ეთეშ ისერუ,ვავა,ჩქიმშენი!
ვარა დღაქ მუჭო გეგნიგვაგვალუ?!

მუშენ მიზალა ოდიარე,მიკოკვალუას,
მეიფერუანქო,მუჟამს იჸი დიხაშ ნწალუა,
კუჩხუჩაფულე,მოპურახილ აკარდამაშე?!  

ვო,ოდიარე აკაბურცხა მიჩქუდ აიშახინ,
თაში თოლონჭექ ღორონთიში დიმაჭიჭორუ,
ვო,ოდიარე, რუმე რინას შურქუ ვაიშაღინ,
მორო ჩამინით გური ამარ-ამარ დიჭორუ.

ვორწყექ:ირნერი წიმოკინა,ფურინი,ღუნა,
ბჟა დო თუთაში წკირონტილი,წყარიშ ნართელი,
რე ტყურაია, კილოთინი, ოჭიშიშ წყუნა,
სქანი ჩხვიჩხვიში ჯღვალიკითუ ეკოხართელი.

ამდღა შილებე ჩქიმდა ველანჭე,
მარა ღურუშა პიჯ მის ელაჭე,
ერჩქინას უჯგუ დიასქანსუ ლუბას ქელაჭვე!

მუს ბგორუნდი დო მუ მაძირედუ,
მუ მაპალუდუ შურიშ მანგური,
ცაშე მურიცხი ვამკმაწილედუნ
თაქ ვამჩქუდუო,მარა ხანგური.

რინა ჟი დო ჟი მემტყურუანდუ,
შქირენით თებულქ ქომიორზოლუ,
შქირატილ ყებურს გემტურუანდუ
დო ჩელა ხურხით დამაბორზალუ.

ართშა იჸი დო ოდიარე,  ჸეთი დღათ ქუმურს
ებიწკოლირო ქეგლაზიმუქ ხორციში ჭკუმურს,
ბაბუში ნარგის მებრიჩუნდე ითამდა ჸუმურს.

ამარ შარაპიც,ხურგეფი დო ტუბუხ-ჩალამი,
აკარდამეფი ელახუნა ჩე-ჩე ძვალამი,
ვო ოდიარე,ეფუნქ თევრე მწვანე დაჩხირო!

იშენ გესქანჩი,შური,ალაგე
დო გეგნუსკოპი ფიქრის ოვლარი,
ღურუ რთხოზუ დო სოდგა დალაგვე-
სინთე რე სერშე გიშათოლარი.   

სი კუნტახანით მინორექ დიხას,
უმბელე ცხენი მელეშე ჭირხანს,
ვემიახალექ დო გური დირხანს?!

იშენ მარჩქილე რია მართუში,
ზარიში რკია:,,ქორთუ'' ,,მარგალი''
ვენარღა ჭვია პეულ-მარდუში
დო ბირა-ბირათ გენიგვარგვალი!

გემკოზილოტი თანჯი სერიშა,
დო ქიანაშა გუტე ბჟალარა,
სი რექ ღორონთი დო კისერიშე
ეხარცქილ ბირა ვადასარალა!

ვო,ოდიარე შარა გუნწყი სარიკო სუმარს,
მუში კუჩხითუ ქარწყექ, მურს ინა,
ართათ მუ აჸი-ღურუ ნასუმორს,
მუჟამს უშირე ეკი-დიკი გილნაბურსინა.

მოჯგირეს ქჲიანა დუტუას ინაქ,

ვესქილიდუას გემუან ნინაქ,
ვართ ხარხუნტია ჯალებქ დო რინაქ.

ვო,ოდიარე,შარა გუნწყი სარიკო სუმარს,
ვედიონჯღორას დადიობა სქანი გურგინით,
ო,შარა გუნწყი ტომბა ცაშა გეგნოხურთქინი,
ღურა-თელაში მაზებელსუ,ინა ბრელს უმარდ.
ო,შარა გუნწყი,გეწაშანი თიში საფულე,
ცირაშ ჭყუნტურუ კიდირშორო გეკოჭაპულე!  

გური ოტობაია-სონეტი ელულას

ზღვაშა მიშამკეთუდუ ქოქა კიდობანეფი,
ურთხელიშე თოლირი დო კეკვაში ნაჭკადა,
ქიმიბგორე სიტყვეფი აფხა-გორგალ ნაჭყვადა,
მოხუმინნა ღიაშე ბორიაში ბანეფი.

მიკიბჯინინ-ვეპალუ ტკეცერია კანეფი,
იგორგოთუ მართუ დო ონკირეთი ნაჭვათა,
თოლი ქიგმაწკვერემუ ჩილამურით ნაწყათა,
იშაყარუ ქართასუ მინ ცა,მინ არკვანეფი.

დღვეზერია წიგნეფი ვესისანდუ სოთინი,
არძა ართო დოშქვიდე პელაგონიშ რთაფასუ,
ნამთინიშა ვეთქუე ,,სო იდი დო სო დინი ?!''

ასა-გასა ჭუმენიშ ბორჯიქ გეგშართაფასუ,
,,დაჭიფარი შხუ რენდა,ღულა რენდა გოთინი!''
ქიგეჭარუ გვართაში ხირიტილი კაბასუ.   




1.კეკვა-ჩაქუჩი

გური ოტობაია-სონეტი როკის

კირდეს გიმვორექ მერეხელი,ვერეხი როკი,
გოხერჯეკელი,უფურცელე ბორჯეფსუ ბჭყიშუნქ,
ჭარკინტ ბორიეფს იანარიშ ნოჸელით ბჭკვიშუნქ,
მივოტე ტყა დო გურგინ ტყვაცშა მალებხიროკი.

შქაბანია სერს გვერშაპიში იჭყაფ ზილოკი,
გიმაკიროკუ,ბჯღვალიკანსუ,ბორზალსუ ბჯგვიშუნქ,
გესინთორებუნ- ჸვარიეფშე ნაბადებს იფშუნქ,
მაჩილამურუ-ნტერს ირ შარა გეგნუსიროტი.

თაკარია დღას დუდიშ უფი მებთხოზ ნარჩასუ,
ბნატრულენქ წყურგილს,ვაბსუმარენს ზღოურ მეშარე,
ქიმკობდვა თოლსუ-ეგებ სისმარქ მალეხვარჩასუ

მარა ლურიშ ცა მურიცხეფიშ ქაცუთ ეფშა რე,
დომზარზალუანს-თოლონჭესუ მითინ ვეშარე,
გესერელიშა ქანას  ჸვინგი მიკუკვარჩხასუ.



1.როკი-ძელქვა

ერთბგერიანი სიტყვები მეგრულ ენაში (ლექსი)

გური ოტობაია-გემცადიაშ ქიანა

გილართ ოსურიშ ქიცათი,
ვემინდურუა მითინი,
გიცადიადა-გიცადი,
მითვინიადა-მითვინი!

გილეღ ელაფირ კისერი,
ვენარღა სქანი ნახანდა,
დისერევადა-დისერე,
ვახანტავადა-ვახანტა!

სქან ელხე მის რე ეწუხე?!
ჩილამურეფი დარჩქალე!
ვეწუხავადა-ვეწუხა,
ტკარჩალევადა-ტკარჩალე!

კარს თიცალ ბორჯი ალახუ,
ეფორსილ თიში ნოქური,
ოდაბადეშო ხვალახე,
ვაღურავადა-დოღური!

თენგიზ მხეიძე-მუნაფა

გურს გინმოქუნს მუნაფა,
...ღორონთ მუდა წანა რე
ჩილათირი მუ მაფნა,
ჩილამურით ნგარა რენ.

ოღორონთე კირიბეფ,
წირდე ზისხირს ობუნდეს,
ანგელოზეფ ნკირილ რდეს,
უვაიჭარეფს ქოგუდეს.

ჩქიჩქუეფი ღიანდეს,
ღალირ რდეს დო ვალურდეს,
ტყაშ–მაფეფი რკიანდეს,
კირდეს მიკოვალუნდეს.

გინმოქუნა მუნაფა,
ბნარღენთ მუდა წანარე
კოჩიშ შურიშ ხუნაფა
ღორონთ მუშ მანწარა რე.

ცას მიოხე მუნაფა
ღორონთ სქანი მარდი რე,
ოკო ჩქიმი ჸუნაფა
დიხა–უჩას ვაბდინე.

ნარღიანი თოლეფ ურჩქ
ჩილამურეფ ალარე,
დუფულენი, მუ ვაუჩქ
ჩხორო გოლას ამარე.

გურ გუსოფი მუნაფა,
ეშმაკეფიშ მაშინეს,
ჩქინი ათოჸუნაფა
ქოთქვი მუჭო ვაშინერს.

ვამორკუნა გურაფა
ვართ ჸვანა დო ოთხირე
მაზაკვალეფ გუმაფაფ
უჩა თოლშე დოფთხილე.

ქარი ათორულაფა
ტყვა–გურგინი ჭყალა რე
მაფურენჯე მუნაფა
დუდ–ღორონთიშ ჭყანა რე.

გური ოტობაია-სონეტი ბუტუტიას

ეთექ დინუ ბუტუტია,მუჟამს სუა ქაჩანუნი,
მუჟამს დიხას ქდიტენს დო ჟინცას გორუნს დოხორესუ,
მუჟამს ჸვერეთ მიახიოლ მურიცხეფიშ  ნოჸორეფსუ,
მორო მითინს უფსუალეთ უღურალა ვაჭარუნი.

ბუტუტია დინაფილ რე ოდაბადეს ვაჯანუდა,
ულირ დღაში გოჯოგაფა, ვამუჸუნანს  წოხოლენსუ,
ინას ფსუა მეუჸოთანს მონტერე დო მოხოლესუ,
მორო სინთე ვადარზინე ფსუათ ვედეხვარჩალუდა.

ვემიდინე სოვრეთინი გურცუ მუდგა ვეპალუნი,
ტყვია ზეპეს ბაჩაჩიას, მუჟამს ართშა გეჸალუნი,
მინშა ჯვარიშ გეჭკადუა ულიებუ ხვამა დღა რე.

ეგებ გვალო გეღორონთი ფსუალეფი ეფალუნი?!
მაფურინჯე ბუტუტია, ,,ღურა მუში მამარდა რე,
რინაშ ნება ქორდასუნი, ქანა მუში მაფართა რე,,

გური ოტობაია-სონეტი ქაზიმ ქოიუნჯუს (სონეტი ლერსის)

მუკმოქუნა ჩხე ქვიშაში ოსარე,
მუნმორენა სფინქსიშ კვარჩხი ორანი,
შარა ვარე დიხას ვემჲანთხორანი,
მიდგა ლანდღვა,უბადო დო თორსა რე.


ამდღა ჩქინდა ჟინცას ვემჲანოსალე,
გურგინქუ დო ტყვაციქ ვაგმაჭყორანი,
ჩქი ქიანაშე გურქუ ვადმაწყორანი,
მორო ინა ბორბოლიაშ მორსა რე.

გობირუნო  გოლუაფირო,იბირი,
მუჭო ოკო დეჩიჩუე,დილაგვე,
გოუთინ ჯიმას ბირგულეფ ელიბირი!
გურშა დაჩხირ გვართა-გვართათ გირაგვე,
ბირაშ ღალას ქელერინე კიბირი,
ბირა ვარა მუთუნს ვამადირაკე! 

ლაშა გვასალია-მუკნაზღილიტა

უჩა რექ დო უჩა ორდა,
ზორღაშ ფოფორს ჸუნაფილი,
ეშნახარცქა დიხაშ გურშე
ჸოროფათი ნდღულაფირი...
ერია დო მორია რე,
მაფორჩალი ბორია რე,
ქუდურქი სი ფორიალე
ცა დო დიხაშ მოდიარე...
ჭილონგუა, ჭილონგით
აკიხართუ დღა დო სერქი,
ბრელქი შურსი ვენინტირუ,
ჭიჭექ იუ ნაბტან ბრელქი...
ეშნახარცქა დიხაშ გურშე
ჸოროფათი ნდღულაფირი,
უჩა რექ დო უჩა ორდა
ზორღაშ ფოფორს ჸუნაფილი!

ლაშა გვასალია-ქუაცანცალია

ქუაცანცალია, ქუაქანცალია –
 ცას მებუ შურიშ ომპა დო რინი,
 შულადირს, ცაშე მუკნალეფ რსხიალს
 ვახვარ ჯაბიში ხვამა დო რსხინი...

 თუდო ქუა დო ჟიშე ცანცალი,
 დიხაშ უშულად ფინქრიშ მაინდა,
 მიორე გვალას ნირსიშ სხარსხალი
 მონჩურუნს შორშე ლერსიშ ბაიდა...

 მაფაშ თუმა დო ოჩოშ კირინი–
 ცირას მუს ოხვარ შორშე თიკინი...
 გვალეფს სერირე აშაბორკილი
 სერ გვალეფით რე აშაჭორკილი...

  მინტებ დღალეფიშ ჩე–ჩე ფოფორი
 ლურ სიზმარს მაფუ მიშაფორილი...
 იჭუ ზისხირ დო შურიშ ლერსეფი,
 ჯერღვებს მიშამრე ჭუათ მესეფი...

 ქუაცანცალია, ქუაქანცალია
 იქანცალუქი მუჭოთ ბორია,
 პილუნს ფიჟვეფიშ ჟღვილირ ხურხინი,
 გუმასხარსხალუ რინათ ჩხორია...

 ქუაცანცალია, ქუაქანცალია,
ქუაქანცალია, ქუაცანცალია...

ლაშა გვასალია-ვარა გოლუა

მეურს დო ჭუათ ოკმართუ შური,
აკოკონკილი ცაში რკიალით,
მიბრტებუქ, შორშე მობთხოზუ რინა,
ჯერღვშე მონტებულ ფინქრიშ რსხიალით...
ქაშადინაბექ თოლ დო ხეშ შკასუ,
მებორებული თუნთიშ ჭყიშუას,
გეშარგვარგვალეს ზღვაშე დო ცაშე,
მივოჯინექი რთელო ჭყვიდუას –
სკანსუ დო გურშე ზისხირ ჭვეთანსუ,
აკოსკირაფილ ჩილამურითუ,
დუდქ ვამავილუ, მარა გოლუა,
სო იბხართალა ათე რინითუ!

ალიო ქობალია-ეკონია

დღა მუმორე მათირე,
 გენქირაფე ნარინე,
 მიშახართილ მერეთემს,
 ქუვორდაო მარინე.

 შური ეშე ინიარ,
 შარა უძუ წკვარამემს,
 სინთე - ჯღვერი ვესიარ
 არგილაფირ ჩე თოლემს.