გიორგი სიჭინავა-აჸონება

პოპორც მუ არზენც ჭყანას,
წყარ ეშე ეთმოწენცნჷ,
გვალა ქარწყენო გვალას,
ჭვემას ქუჩქუნო ჭვენცჷნ?

ქარაგადენო მითინც,
მუ შარათ მოურც აფუნ,
ვარა მუ ოკო ნირსის,
ნდოლოეფს მიწიფაფუნ?

მი უგანც ორთას მარდის,
მაფალუს ცუნდის ჩანცჷნ,
ქაგინნო ეთი ვარდის
ჰამო შურც გაფურკანცჷნ?

რჩქინა ქოძჷნო სოთინ,
მუთუნც ქუჩქუნო მუთუნ,
მი მიწინც სოლე მოფრთინ
დო ვარა სო მეურქუნ?


პოპორც მუ არზენც ჭყანას,
წყარ ეშე ეთმოწენცჷნ,
გვალა ქარწყენო გვალას,
ჭვემას ქუჩქუნო ჭვენცჷნ?

გიორგი სიჭინავა-მაფშალიაშ ჩილამური (ტერენტი გრანელს)

სქანო უჩათ მუკობუდუ
ჩხანა რენ დო თუთა რენი,
მასმა რინას მეგორუნდი,
სი შხვა გოკოდ მუდგარენი.

გემნანჯიო ეთი კარი,
ოშურეთის გილაბუნი...
სო შაყარე ათეზჷმა
მაფშალიაშ ჩილამური.

გიორგი სიჭინავა-აფუნც ვაგაფალ თხუმუს

აფუნც ვაგაფალ თხუმუს,
დალახებე დო ხუმუ.

იქილე,მაღალ ჩე ჯას
წკუმონტილ ფალეფ მეჩანც.

ილიებ თინეფიშ დღალეფი,
გერნელო ღურუნა ჯალეფი.

ბადიდი ოსინთეს ონჯანც,
ჯას უჯინე დო ონჯარ.

გიორგი სიჭინავა- რჩქინა

დიდი რჩქინა ქუა რე,
ირო დუდიშ ჭუა რე.

ჭიჭე რჩქინა ქექე რე,
ვეგეხე დო ვეგერე...

შორშა სოთა ანტინე,
მარა იშენ ცხვანტი რე.

გიორგი სიჭინავა-დოხორეს დაჩხირ ქუმონტებ

დოხორეს დაჩხირ ქუმონტებ,
კიჟინუნც,რჩხვიანც მიდგარენ,
დარხირ ჩილამურით ვეშქირიტე,
ტყურათ მუშო გოკო ინგარენ.

ალი ეშე,ცაშა მიპოპორ,
კიდალეფც ნაცხაცხა გატყვაცანც,
უბადო შორშე მიოჯინე,
ფოთქვის მითოხე დო კარკაცანც. 

გიორგი სიჭინავა-შხვანერ მაფუდ ორთა

ბაღანობას შხვანერ მაფუდ ორთა,
ვამოგინუდ მორკება დო ძინა,
მოხიოლჷდ ახალ თუთაშ მორთა,
დო უშქირატ მურიცხეფიშ ჯინა.

ასე მუთუნ ვამენარღებ შხვაშო-
ჸუდე,ფარა,გურაფა დო რჩქინა,
ხვალე კინე დჷმართუდას აშო,
ჭიჭანობაშ უსქვამაში რინა.

გიორგი სიჭინავა-ბარცხინდია

უჯიშე დო უსქვამელა,
აკაბურცხა გიძიგვინა,
დიხას ონდეთ ეშარჩქჷქჷ,
ვეშეილებუ ეწოძინა.

კოჩიშ სქუას ვახიოლჷ
სქანიჸურე მუკოჯინა;
შურ გიდგ მარა მუშო გოკო
ათეჯგუა ჭყელი რინა.

გიორგი სიჭინავა-მუ ოხვარ

ქომწი, მუ ოხვარ ქართის

ათე ტვინ აკოხართილც.

მუდგა სანგარო ძირას,

ვემნოტებუე ბირას.

მითინც ვაურაგად მარდის,

მუშ დუც უწილჷნც ვარდის.

ირო ულა უჩქ მანგას,

ჸვერეს დო ვარა ხანგას.

ათაქ კურდღელ დო ქოთომც

მუშ დუდ გერგეზო მოთონც...

ქომწი,მუ ოხვარ ქართის,

ათე ტვინ აკოხართილც.

გიორგი სიჭინავა-ბაბუ დო მოთა

ბაბუქ უწუ მუშ მოთას,

ოგურუანდ რინასჷნი:

-თუნთის ბაბა დუძახია,

მუჟამც გიგორჯგინანცჷნი.

მარა მოთაქ მუკართჷდო

უგამ არზიშ გინაწონც:

-თუნთის ბაბა დუძახენი,

სკუათ ქიმერჩქინანცო?

გური ოტობაია-ეჩდოშქვითი ჩილამური

თქვან დუდიშა მუნომლუაფ ჯაშ წვანჯეფი,
ცაშ ნოტეხეფქ ანწი ვარა თე გურს ხირცქას,
თქვათ გიჩქუნა ჸათე შარა ვარდუ ეფი,
თქვათ გიჩქუნა ზისხირ გოპუნდ არძო ბირცხას.

 

ეჩდოშქვითი ჩილამური გეკვოშქვიდე,
ეჩდობრუო მიხაზირენს, ალბათ, თორსას,
ლერსი, ოკო უკახალე ეკმოსქიდე,
ჸათე რინაქ მუდგანერო ვეკმამორსას!

 

კოლხიდაშე წყურგილშორო გემწოფსოფი,
ჩქიმ სისქვამეს მებეჭუდუ მაბჟალია,
ოდაბადეშ თოლიშსინთე გეკობჭოფი
დო ხურხიშა ქიფხუტოლე მაფშალია.

 

ჸათე გურსუ ღურუშ ორან ჭვეთით ვარზუ,
მარა არძა მურიცხიში ლისმარ გეშქუ,
მუჭო ფიქრენთ – იბთირანქო ანწი გვარსუ,
ჩქიმ შარაქუ ბჟაიოლშე გემწოფეშქუ.

 

მიკმაჭაბუ ირფელ ართო, ბჯოგუ მერკე,
ებდიდორი, ქიპოპობრე, ეკიბლანდღვი,
შურშა ოკო თისხი დაჩხირ ქენიბგვერგვე,
მუსხის ვაგურზ ჩქიმი ბირგული დო განთხი!

 

წანეფ,წანფ,ეკოფხართეთ ხაჯალურო,
ეჩდოშქვითი ჩილამური გეკვოშქვიდე,
ჩქიმცალეფი ვეშქურინე ღაჭალურო,
ლერსი ოკო უკახალე ეკმოსქიდე!

 

ჸათეჯგუა წიმოკინა კოჩის ვაშუ,
ნამს ღურუშფერ ართშა ვარა ვეგნოდვალუ,
არძა ჭუაქ მა ვამავილ მა ვემშაშუ,
გურც ნტყოლირი ლეკურეფქუ ვამათვალუ!

 

ეჩდოშქვითი ჩილამური გეკვოშქვიდე,
ეჩდობრუო მიხაზირენს, ალბათ, თორსას,
ლერსი,ოკო უკახალე ეკმოსქიდე,
ჸათე რინაქ მუდგანერო ვეკმამორსას!

ივეტა წითაშვილი-ჰავა უქაქალუანს

ჰავა უქაქალუანს

ჭვეს, არგამათ ირქენსი,

თეში ულაჸაფუანს,

გუჭყოლიდუ ირფელი,

მუქ რე გუგაჸალუა

ოწოწიას უკვენსი,

ჸოროფასი ფულუა

ოკონია იშენი,

ჰავა ჭვესი გალუაფ,

ათაკირუ კისერსი,

ჭვეს ქაცალი ფალუა, -

ოწოწია იშხენსი,

-სკანი საქმე ვარდუა,

ჰავა მუჭო ირქენსი,

შხვაში სი დღას ვათქუა

შხვაშიშ სი მუს ილენქი,

ასე მეტი ვამწუა,

ჸოროფა რე ირფელი,_

მერეხი დო ვალუა

ურჩქინაფ დო რჩქინელით,

ჰავა უქაქალუანს

ჭვეს, არგამათ ირქენსი,

ოწოწიაქ იშხუას,

ვეიალე იშენი….

ივეტა წითაშვილი-ქომხუტოლე

ქომხუტოლე დო
ჩქიმ გურქ სკან გურს ჯერღვი ქიმკაჸონ,
დომზუკოლე დო
მიკნაჸონას ზისხირქ ქიმწახორცქ,
მიჸორქია დო
ხიოლქ ჭუა გამწას ქიმწაფორჩ,
ბჯოგუქია დო
ჭუაქ ხიოლ კუნთხუს ქიმკაპონ,
დეჯერიაო,
ძიცაქ ნგარათ კიდირს ქიმკახორცქ,
ვამშკურდავა დო
ჩილამურეფ თოლეფქ ქიმკაფორ,
გირსხენქია დო
ნაზისხირას ბაწკარ ქიმკაჸოთ,
გურ მიწყუნე დო
ნარღი ანწი ქუას ქიმკასოფ,
გამმოსკიდიო?-
ეზნახ ანწი ჯეგე მისარონს,
სი იჯინი დო
სკან სანთელო, შხვაქი მიდამჸონ…

ივეტა წითაშვილი-ვამრჩქილ

ვ ა მ რ ჩ ქ ი ლ,
ღირდას რაგად ვარა,
ვ ა მ ლ ი ნ,
ღირდას შარა ვარა,
მ ა რ დ ი რ დ
რჩქინა დუდშე მარა,
თ ა შ ი რ დ,
ირფელს რჩქინა ვახვარ,
ვ ა ს კ ი რ
ნაჭვემაქი აკაქ,
ნ ა ფ ი რ ქ
მუს აჭარე არძა,
თ ა ს ი ლ
ხარენს ხვალე ხვამათ,
ვ ა დ ი ნ
ჸოროფათი ნარგა,
ვ ა ს კ ი დ
გური ნინაშ ნართა,
ა კ ი ნ წ ყ
არძა ჭუაქ ართათ,
ვ ა რ ძ ი რ
გიბჯინი დო აკანს,
მ ა შ კ ვ ი დ
ჩილამურეფ წყარმალს,
ს ქ ა ნ  ჭ ი რ,
მუ გოკოდუ აბა,
ლ ა დ ი რ
ხუმუ, ხუმლა ვაფალს,
ა ნ წ   მ ი ჩ ქ
სო მისოფუ შარა
ვ ა ღ ი რ,
შორშა ულა ვარა…

თენგიზ ფეტელავა-სითელა დო ღურუშ ონწე

ცხვინშე გეგმიბღ ჩქიმი ონწე,

მურიცხიში ვარე მონძე,

დიდაშ ძუძუშ გინნარულეფ,

არტახეფი გეგლაბკონწე,

იკვანწალუ ჩქიმი ონწე,

ბაღანობა აშო მორწყე,

ბონდოიაშ ნოსისმარი,

გურიშ მართუს ქენოწონწე,

ვაგმარზინუ ნტერალაშა,

წყურგილეფიშ,ჸუმენითუ,

ოდაბადექ ვეკმაჭოფუ,

ამდღარით დო ჭუმენითუ,

ჩქიჩქობასუ მეტებული,

ნდოლოეფი მირკიანსუ,

გურიშ მელე ინგირწყარი,

მის უჩქ მუსი მიდიარცუ,

მიშ ჭუებსუ მიდიარცუ,

მუშ სისმარეფც მიდიარცუ,

მიშ ფიქრიში ბოწოწეფრე,

მართუს ენიირკიალცუ?!

მიკვანწალე ჩქიმი ონწე,

მიჩქუ არძა ჭყონი მონწყვე,

ბოლოს არძა ჸინჩი თოლი,

ჸოროფილიშ გურცუ დონწყვე!

მიკვანწალე ჩქიმი ონწე,

მა შხვა მელუ ბორჯი მონჭე,

მინჭუაფუ ჸუნგა ჭუა

დო მანირსუ თოლიშ ონჭე!

თენგიზ ფეტელავა-ჟინ ბორია ირქენდ

ღუმა მემიჩქ ჟინ ბორია ირქენჷდ,
პეულეფი დუღიმინწუ გვალო,
შულადირცჷ ლური რინას მირკენჷდ,
ვართ სისმარეფ მოხოლუდუ ჭვალო,
სოვრე გეიძ ჟინბორია,შარა,
მემბარენი პეულ ვორექ ფალო.
ქუდმოგურე ჰავა სქანი ნინა,
მათჷ მოკო აშო ვადორთინა.

თენგიზ ფეტელავა-მეფურკე

შულადირი ზისხირიშე გეიფალუ,
სქანი ცასუ ბჟა დო თუთა ვემიპალუ,
მახურჭოლცჷ მუზმა გოკონ ურგინე,
ელეხიშე დღაში გეგნიგურგინე.
მარქვალს რჩინდუნ გაბათქალუ თი გური,
მითაჟამშე ამდღარშაღი მიჸუნინ,
ენაცვათჷ შური მუჭოთ კოჭობის,
მეფურკე რე სქან ნტერეფიშ გოჭოფილცჷ.
ქიგიფშინა ჟირანთასიშ გეთებას,
გაცხადებას-ქრისტეშ შურიშ ერკებას,
მარა თეშო მითინ ვარე მუთუნი,
კინ სქან სქუა რინა კარცჷ გითულირ,
აფხაზაქ მარგალს ყებურ გომირგილუ,
ეკოხუნა ნტერალათუ გომითირუ,
ბონდოიაშ მაჭყიშარო ვარა ქირგი,
საწიმოთოთ ჭუჭელია ვარა დირგი,
შულადირი ზისხირიშე გეიფალუ,
სქანი ცასუ ბჟა დო თუთა ვემიპალუ.

რამაზ კუპრავა-გიაშქვი დო გოფელეკე

ჯიმალეფი,

                       ჯგირი რინა,

ოკოლხეშა 

                      მალას მურსჷ,

მისით ვაკო

                     თეში რჩქინა

გამაღეთჷ

                     ითამ ლურსჷ...

გვიგვილ

                    მალას გოპირანსჷ

ზეფირს გეპუნთ

                     ეკე-ეკე...

გითმაჩამალ

                     ქეშერხვადჷნ

გიაშქვი დო გოფელეკე!... 

რამაზ კუპრავა-როკი ბაბუ

ჩქიმ ფრიმულამ

                 როკი ბაბუს
ეჩ დო ვითი
                 მოთა არდუ,
ოთხონეჩის
         მიკაჩირთ დო
ჸოროფილშა მირაბადუ...
მოგოთანეთ
          გემნოტყობუნს:
    -ჭკვერას ქორდა,-მირაგადუ
    -ფარა ქომუ
            ვარა იფრელს
ქოჲთხობელა
             -ურაგადუქ...
-წიე,სი მუს ოცირქინა,
გოძიცელო მირაგადუ,
       დადის მუთუნ
ვაუწუა დო
ირფელ სქანო
             მოკო ბაბუ...

რამაზ კუპრავა-ლაზონა დო მარგალონა

ოდაბადე,

               დობადონა,

ოდაბადე,

               დობადონა,

ლაზონა დო

                  მარგალონა,

ლაზონა დო

                   მარგალონა...

ჩქი ჸოროფაშ,

               ჯუმალოფაშ

მეტ მუთუნი ვამოკონა...

მითაჟამშე 

                  წორო

                          ვორდით,

ასე ზოხო,

                  ხვალე-ხვალე,

მუშენ

           გოფრთეს,

                              ჯიმალეფი

ოლაზე

             დო

                             ომარგალე...

იბსარჯელუქ

                        ჟირხოლოშენ,

                                        (შურო  შური

ვამიბკაშე)

                   უკუნეფიშ

                                      კინოხიან

ეგრისშე

              დო

                     ლაზიკაშენ...

რამაზ კუპრავა-ჯგირო ქორდა

ჯგირო ქორდა,
ჯგირო ქორდა,
ჯგირო ქორდა,
ვაგოკოქ და...


ჩქინი ჭიჭე,
სქვამ ჸუდესჷ
სი ქორდა
დო
მა-ვავორდა...


ანწიანიშ წიმი
ჩქიმო,
ვეჸი ხიოლი
დო ბირა,
იმენდ მიღუ,
კალკალეშა,
სქუალეფსჷ ქუმოძირა...


ჯგირო ქორდა,
ჯგირო ქორდა,
ვამოკოქ დო
ვაგოკოქდა,
მა,სი ხვალე
ართის რთხულე:
ბოშეფ ჩქინი
ართო მობრდათ...


ჯგირო ქორდა,
ჯგირო ქორდა,
-ირიათო
ჯგირო ქორდა...