მარგალურჷ პოეზია მეგრული პოეზია

05/11/2010

თემურ ელიავა-ლაკადაშე გელავალ

ლაკადაშე გელავალ', მარა გურგინ სოდე რე,
ჭუმანერ დღას მუ ოხვარ ამდღანერ დღა ონდო რე,
მელერსეშ ჭყოლირ გურს უტიბუანს ჭვიმაშ ჭვეთ,
შხვეფ ბჟას ელნა სკილადირს, მეწისქვილეთ, მეჩაფლეთ,
გორდიშ ელნაყაყალას, ღალს-ჭიფე დო სკირაფილს,
ქიგიბშინა აკა დღას მაჟრა განშე დინაფილს,
კიდირს გუმოთაკარანს, გურს დაჩხირო ეფალირ',
ჸოროფილიშ ნაჩიებ' ჩქიმ ოღურუთ მორთაფილ,
ათეზმაშა დოპილინ, ხოლო დოპილ აკაშა,
ხოლო არჩა გეგნომზოჯ' თუთაშ მოკათაფაშა,
ცანცალ ელაფირი აფ' კიბირ გეშკუმალირ გურს,
ტონბას ელმათაკარანს, ალმოჭვიმანს, ალმოთუნს
კინნაკირა სკან დუდიშ, დობღურუქინ ქინმოქუნ,
ჩქიმ ონთხორუს ქელენგარ, მოფშა ჭირქას კინუკუნ,
მუჟან თოლეფს ჩილამურ ჯგირო გოიფშინუანს,
კიდირს დიხა ქუგმორღვ დო მეტშა ვაგომშინუა,
ჸოროფილიშ ნაგანას თუთაშ სი'ნთე მიორე
ლაკადაშე გელავალ', მარა გურგინ სოდე რე!

23/10/2010

თემურ ელიავა-ყურუმია სარკო სერს

ჸურუმია სარკო სერს,
ჭარა მარე მელერსეს,
დოთუნს,დოთუნს ფართო ფათ,
რუმე სერიშ მუნაფათ,
ზოთონჯ გურშა ქათმაკათ,
ცა დო გოლა გეგმიწყურ,
თოლონჭეშახ ქატუ შურჲ,
ღალუშ გინალს თუთაშ ლანდს,
ქუგუჸინაფ,სარკალანს
გაჭირებულ გურმეჭვია,
ნოჸელს გილაცანცალანს,
კისერს გუნწყუმ ობინალ,
ართშა ქიმკუტყობინალ
შქურინაფილ შურჲ ეშმალ,
იშენ ვააფ შურიშ ქალ,
გურმეჭვია სი გურჭვილჲ,
გოკუჭილ დო თოლხუჭილჲ,
მათ გურს მიჭუნქ გურმეჭვია,
თეშით ქმაფ გურმეჭვილჲ,
ჸურუმია სარკო სერს,
ვადოსქიდა ჩქიმ ოზეს,
ჸურუმია სარკო სერს,
ჭარა მარე მელერსეს!

თემურ ელიავა-კვარჩხშე მოიღ ორკოლ ცირა

კვარჩხშე მოიღ ორკოლ ცირა
დიდ გვარიშ რექ, ქოიჩინ
გურ გიძახ დო მიკოჯინას
ვაგაცალენს რჯულიშ ჭინ
ხოლო მითმინ, ხოლო, ხოლო,
ხოლო მითმინ, ხოლო გურზ
ნთხოლოს ქიმთიშკვიდენ ხოლო
ნჯილოშ აკნასოფა გურს
ვადუჯერა, ვაურჩქილა,
ბჟა მოიღუნ მიშო მონწყ'?
სქან გურს ქიმუოხირ კილა
ჩხორო გვალაშ ვიშო დომნწყვ'!
ღვინს ჸოროფა ქაკათუდას
სუფრას ვადაკორდუ ჯიმ
გოთანაშა სქან რდას თუთა
სერობაშა ბჟა რდას ჩქიმ
მარა აშო მიკოჯინას
ვაგაცალენს რჯულიშ ჭინ.
კვარჩხშე მოიღ ორკოლ, ცირა
დიდ გვარიშ რექ, ქოიჩინ!

27/09/2010

რამაზ კუპრავა-ონდეთ ეკიუკმელუანს

ონდეთ ეკიუკმელუანს,
ქოთომეფ ჸას იონუნა,
ოჭმარე ბორჯს,მუმულეფი
ართ ხონარშა ჸიონუნა..
...ათე შვანსჷ ამხარაშა
სქვამ მოჭყუდუ მინოუნა,
ქოფურინუნს თუთა ჩხორო
ჩქიჩქჷ გალე გიმოუნა..
ქიდიჭყაფუ ზეფირ გინძე,
გურჭუა დო ციმუშ ბუნა,
ათავრეშე ჭერჭე რინას
ჭიე-ჭიეთ ეთოუნა...
ბორჯ ქუმურსნ,ირკოჩ ართო
თი ქიანაშა გინმოუნა...

14/09/2010

გიგა ქავთარაძე-მარაშნა რე

მუშ მასკვამას მუკოხენა –

მურიცხეფი ცას…

თუთა თოლეფს უფათქუანს,

მიფერუანს ჸვას.

ასე, სკან დუდ ქომუჩასინ –

მუთას მეფჩა შხვას!

იხ თიშნერო იქაქალჸ –

ვაგგოჭყორდუ დღას!

მარაშნა რე თქვან გოლუა,

მიდგას ოკონ – შვას!

13/09/2010

გიგა ქავთარაძე-მანგარინე

გუთმოთანდუ დო ისერუ,
ისერუ დო გუთმოთანდუ,
დღალეფ გინძას მისერგელუ,
მოფერაფას მითინს ვანდუ...
ბორჯ მეურს,მა ეკოფთხოზუქ,
მუჭოთ ქილორ მოლაღურსი,
ქიფცხვანტალუქ, მარა იშენ,
ირფელ ჭუა ჩქიმდა მურსი.
მეძობელიშ ჸუდეს ვორდი,
სუმარ ჸუნდუ აბაშაშე,
ჩქინობურო ვეჩიებუდჷ,
მუქ მოძირუ, მუ დუაშე?
მუ მოსქიდნა თე ქიანას,
ღურაშა მის აწარინე?
მარა ნინა მიღურნა დო
ათეშ გურშენ მანგარინე...
საქვარ თინა რენო ხვალე,
შვე, ჭკუმე დო რძღაფილი რდე?
სამარგალოს ქიდდებად დო,
მარგალურო ოკო მირდე!
ნინა სქანი გიორდასჷ
სოთინ ვაგოჭყოლიდუა,
კოჩის ვარაგადაფუა,
სოვრე მორთ დო სო იდუა.

22/07/2010

ირაკლი კაჭარავა-თეშ გურჩქინუქ

თეშ გურჩქინუქ სქან ბედისჷ
მოჭყუდცალო ოსვისვინა.
თირამ გვალა მუნგორე დო
გურს მირდუნსუ სქან მეჯინა.
გუმაშინე სქან კირდე რზენს
კერკელი დო აშანჯირა,
ბაწკარიამ ხე დო კუჩხი,
ოკორთესჷ აშარინა.
ვაგმოჭყორდუ სქან სიტიბა,
ჭიჭელობაშ მენგარაფი,
თოლეფ ჩილამურიშ ეფშას
მოძიცინე მელაჸაფი.
ზღვაშე ბორია გეკორაჸი,
ბარდშე ქილორ გეიორტინე,
ტყაშე სქვერი გეგშარაჸი,
მოფერაფე ვამირტინე.
თექ მუთ ქორდუ შურდგუმილი
არძო ართო მა მიჯინე,
თიწკმა ირფელ გუმოჭყორდუ,
უბადო შურს ვაჯინინე,
მიჸორს სქანი ოჯალონე,
სქანი ფერდი, სქანი რობუ,
მელე-მოლე გოლა გოჸუნს,
შქას ჩხორო წყუ აშაროჸუნს.

24/04/2010

კოტე ნაჭყებია-წყურგილი დო მა

წყურგილ მუში მაწკონდასუ
გიქვაქვალუ ღორაშ პის,
დიხაშ გურშე ეშმაწკანტუნს,
თექიან ამბეშ ღორაფის.
გითიოხორცქ, გაკიონტუ,
ქუას თიში ნაკარკალა,
ჸოროფაში დღანო ინტუ
წყარვარჩხილიშ ნაკვაკვალა.
წუწელ წყარიშ მუნაშინა
მა მარჩქილე ხვათახვალე,
ბშოლუნს ჩილამურიშ ჭვიმა,
რღვაფილ ჭვეთიშ გუნაჭვალა.
ჭკვერულემსჷ მირაგადუ
ხოლო მოკოდ დოსქილადა,-
ბირგულს შორიშ შარა მარდუ,
გეგნობჭყვიდი მოზილატა.
მუსხი მაფუ როხი ოლჷ,
ონდღულაფარ ზღვა დო გვალა,
ირიფელი მოხიოლუ,
შურდგუმილი გილვონქვალა.

26/03/2010

კოტე ნაჭყებია-მუშენ ვაგაგინე

სოიშა იბღა ათე ნარღი-
იანარიშ ჸინიჯგუა
მითინიშა ვემმარზინე
ლეხო გინორთელი ჭკუა.

პიჯი აკოცუმილ მაფუ,
ჭიროკილით გუნაშუა,
ჸოროფილიშ ნავარითუ
ალერგინუ კიდირს ქუა.

დუდი ვადმამაგრინე დო
ხომლა როკის ურანჯუა.
ნამთინც მუშენ ვაგაგინე
გურს გორაჸილ ყამაშ ჭუა.

24/03/2010

კოტე ნაჭყებია-ჸუჩა ულუ

ჩქიმი თიშა ქიგვოზინდი,-
ღანჯა გურშე გელაფხუშე,
დუც გიმორე ჩელა სინთე,
ელნაზოჯა ელახუშე.
სონ მუხურიშ ნაღერღეტა,
ჭყოლირ გურშე ელნაფუშა,
ჸუდეშ ქჷგიბჭაბი ლეტა,
ნაჭვიმორიშ ფელამუში.
ნოქურ ვეგიოხე,მარა
იშენ მეჭურჭინუნც შარა,
ჸვასუ ღოზო მიკოდღვაზუ,
დუმაბადეშ მიკნაჭარა.
ქოუსხუნდა,მომინჭანსჷ,
ვაუსხუნდა,ქუდომტენსჷ,
თინერ ჭყანას ქომუჩანსჷ,
ჯანს ვავოტე ჯინჯიშ ნტერსჷ.
ჩქიმი თიშა ქიგვოზინდა,
ღანჯას გურშე გელაფხუშა,
დუც გიმორე ჩელა სინთე
ელაზოჯილ ელახუშე.

20/03/2010

თენგიზ ფეტელავა-კინოხონიშჲ ჸუდე

მა გეგმობჩი ჩქიმჲ ჯვეშეფიშჲ ჸუდე,
თიშ ვარკალიშჲ ცოდას ენობჸუნდე,
ვაგოურზი სიჭიჭარაშ ტირტინცჷ,
საწიმოთო ვამათვინე მითინც!
მა გამვოსქიდ ანდა წანერ ჸუდეს
ნუძუ ჯალეფიშჲ შურ ენართუდეს
თიშ გორგოთის გინარჯგინუ რაქვალქჷ,
მიდამიღუ საწმოხონო ჯაქალქჷ
მირაგადუ აბა თეშჲ იბშიო,
შურიშია შური ვეშებშიო,
მუკი ჸვანა ვეშვაშვალუ ჩხვერი,
მუშენირე რინა ოშინერი?!
დო გოფაბჩუნქ ჩქიმ არზეფიშ თანგალსჷ
ბაღანობა შარას გილეხანგალცჷ
თურმე ნოჸელც ნაფეფინა პირი
მუშჲ ოროსუ გითოღურუ კინი.
ასე მონჯარ ჯვეშეფიში ჯერღვი
უსისხირექ გილაბრთ, გილებყერყი:
მა გეგმობჩი ჩქიმ ჯვეშეფიშჲ ჸუდე
თიშ ვარკალიშჲ ცოდას ენობჸუნდე!...

თენგიზ ფეტელავა-შხვაშო ეფუნქ თხოლოთ

შხვაშო ეფუნქ თხოლოთ,
ჩქიმ გურც გიობარჩხა,
ქომხუტოლე ართშა
ხოლო ! ხოლო ! ხოლო !
ცა დო დიხაშ ფოლო,
თოლემც მეთხოზ ღოლო,
უსქანობათ მორო,
ირკოც ბჭკუმნა დოლო!
ვორექ სქანი მართვე
ფსუა ქომუჩ მარდ რე
ვარა მორდუ სქანცალ
ეშე ვეიჭვართე!
შხვაშო ეფუნქ თხოლოთ,
ჩქიმი გურც გიობარჩხა,
ქომხუტოლე ართშა,
ხოლო ! ხოლო ! ხოლო !

თენგიზ ფეტელავა-გეიშანათი

სი რექ ჩქიმი ოდაბადე დო ნახაფულ ჸათე ცაში,
ორსხეთიშ ტიბუ ფერეფიშჲ ეკნამუნათჲ გეგმორთი აში,
დარჩიჩიებუ დღახუეფი ოხვამედო ცხოდიშჲ მესი
მიქ მუჩესუ ჩქი ბჟა კოლხიშჲ ზღვასუ ენაქვერსი.
კინოხ მემიჩქ გილეთხინდი სქანჲ სქუაში შურჲ დო გურცუ
ვაგოურკა თინძალასუ დო დიდაშა მურცუ!
სახიოლოს დო ნაბორიუს კინოხონცუ ლურცუ.
გეკოქვაჩი გოძვაძვილი სქანჲ ფაფარი
ჯვეშიქ მიდართ ნოსისმარი, ვითომც ღუმა,
ცას ქუდეფითუ ევოფშანთუ, სით გახიოლე
გუმანგი თოლი სქუარენდო არძო ართირე;
გეიშანათი!
გეიშანათი, გურიში გაბლა კორკონტია.
სქანი ორინესუ არძო დართუ ღორონთია,
ქიდარჩქალი, შქირენული სქანი სქუა
ქირქეშჲ დუცუ მერინელი აშო მიკირთინი, ჭუა!..

03/03/2010

თენგიზ ფეტელავა-ჯიმაგე

მა, დობღურიდა ვადოფულა დუდჲ დიჸვილუშო,

სქანდა მემჩამუ სითელა დო ჩქიმი რთინა,

მა ვამმაჯინ, ნჭყოლირ გურც მუჟამს ბსქიდუქუ,

მუჟამს ეთმოდორთუ ნახაფულიშჲ გოჯორგელი ჩონგურიშჲ ბირა!

თი შური, ნამუთჲ სქანდა მემჩამუ, უღურალაშჲ ნოცხაცხელარე,

ნამუთ გოტყვაცი შქირენალაშჲ გიმოულასჷ

კოჩანობაშო მიორღვი სითჷ ხე დო ბირგულჷ დო,

ფინთილჲ ცაშჷ კარაკანტ ქიგნმოდირთუნჲ!

27/02/2010

თენგიზ ფეტელავა-თუთარჩელაშ ნასოფერა

ითამ ჭუა მიღუდუ დო
მუნაფასუ გილაბლურდუ,
ღურუს თოკით უკირუდი,
პიჯის ბირა გილამჭუდუ.
ჩქიმ ჯარგვალსუ გონწერილსუ
ღორონთ პატინ მოზოჯუნდუ,
ყებურც შური გეშალაფუ,
ტუტას მურიცხ მეჭორჭუდუ.
ჩქიმ ზისხირი ქიმშაბასუნ
ეშეთ დიფა გედორთუდუ,
ლაკვატელი ჭერჭ ქიანა,
რინაშ ჯასუ გოთხოზუდუ.
უიშუგორუ ჭიჭე-დიდის
უთუსბერშა დოთორსუნდუ.
თუთარჩელაშ ნასოფერას,
მუნაფასუ გიმაბლურდუ,
გოუტყობინნა მურიცხეფსუ,
ცას ჩილამურ გილაჸუნდუ.

21/02/2010

თენგიზ ფეტელავა-ბჟა პიჯც იბონს

ბჟა პიჯც იბონც,
ოლაფარეს გინეფ ალარე,
ჭიჭე ტურას ოსურ მოჸუნც
ამარ მარა რე,
მესიშ თუთა, პირიშ ფიორ,
შუმილ ჰავა რე,
აჭყორება ცარაშ ჯუნა
ჸვანაშ ხვამა რე,
სოთ ობმოლ დო ლეხ ქორენი
გურშა ყამარე.

20/02/2010

თენგიზ ფეტელავა-ჟინ ბორია ირქენჷდ

ღუმა მე მიჩქ ჟინ-ბორია ირქენჷდ,
პეულეფი დუღიმინწუ გვალო,
შულადირცჷ ლური რინას მირკენჷდ,
ვართ სისმარეფ მოხოლუდუ ჭვალო,
ქუდმოგურე ჰავა სქანი ნინა,
მათჷ მოკო აშო ვადორთინა.

27/12/2009

ლაშა გახარია-რუმე სერი

რუმე სერიშ ლანდღვერ თოლცჷ
თუთაქ სინთე ქალაჭვალჷ;
ჭველეფ ნირსი გეგნიცხონესჷ
მურიცხეფი იჭვარჭვალჷ,

ჭილამ ნეძიქ გამკოლჷ დო
ჸურუმ ქუას გიკაჭალჷ
აურე ხობწყარ მოშინთანცჷ
ევრე მაფერ მიკვაჭალჷ;

სოფელც კამაცალო ლურცჷ,
ელვოჯინექ აკან ცასჷ,
წიწინაფილ ჩაფლა ლუღის,
ბერწულ ათაკარკაცანსჷ.

თუთარჩელა მუნმოქუნცუ,
თოლ მეთხოზჷ ნაკვაცასჷ;
დია,მურე ათე ორთა-
ირფელც მუჭო დაკვაწანსჷ?!

ლანჯეფი დო თხომუეფი,
ოჯალეშით გონაბადე,
მალას მაჭარ გობორდიშანც-
ბრელ ბორულიშ მორაგადე

გედ შქჷრენი,თე ტაბაკი
ჯგირ დო სქვამით მორაბადე;
გაკოკურცხით ჯიმალეფი,
დომხვამითჲ ოდაბადე!

1.მაფერი-ჩანჩქერი
2.ორთა-ბუნება
3.ლანჯი-იფანი,კოპიტი

17/12/2009

ლაშა გახარია-ოდაბადე

ჸა ოჭმარეს ზესქვ გილარხე,
ჸა ონჯუას -მალაღური…
სქან ოსქვებურ ვამათქუნი,
კოჩ თაშ მუჭო ალაბღური?!

ვართ მასქურო ეშმოლ შურქუ,-
ქიგნოირქიე თუმასჸნი:
სქან უჯგუშო მის უჩქ, ცაშა
მუ მეუღუ კუმასჸნი…

ნარღიშ ჸასჷ გილაჸონუნქ
პირსელიში მუმულჯგუა,
გინაიჸია სამარგალოს-
ჯგირობუას უკუჩხუა.

ირიკოჩიშჲ მენძელი რექ,
გოონჯღორუ სუმარუა;
ჭყოლირ გურიშ ლეცერი რექ,
ღურუს ცურუს უვარუა.

ანწ ვარენო ქომკითხენ დო,
ქიგლულ, ქიგლებლანთირუქჷ…
ოშ ქიანა მიბლი, მარა
ნამთინიშა ვამთირუქჷ…

რამაზ კუპრავა-მორთი ღურუ

ირ ოჭმარეს  ჸუდშა მუნმურს,
ქოთჲ შქირენი,ქოთჲ ჩხურუ,
მარდიშენი,მორთი ღურუ
თი შარაშა მიდმოქურე...

თინა ხოლო ქიშილებე
ოლაფარეს ქალაბღურე,
სო იტყობუქ,მორთი ღურუ,
სქანდა შურო ვამოშქურუ...

თავრე კარაკანო ვორწყექ,
სო მიტახნა მა საფულეს,
მორთი,
              მორთი,
                            მორთი
                                         ღურუ.
სქან მონჭაფას ბგინაფულე...
თექ ქიმერქუნ, თი ქჲანაშა,
მა ონჯღორე ვადმაგურე,
თიშენ ნამდა,ირფელ მიჩქუ,
თაქ
      მუ რე
                დო
                       თექით-
                                     მუ რე...

რამაზ კუპრავა-დამორჩილი

ბჟაქ დოშურდუ,
ჩხურუქ ქუდანთხჷ,
ქიმკოდინეს ვალალეფქი,
გვალეფს თირი
ვანდღულუ დო
დეჭიჭარეს მალწყარეფქი…

მოწკიპატელ არაბებსჷ
ეწოჸუნა ბაღანეფი,
ლაიტეფით ეთმიფშაფუ
ოთხბორკამი მაღაზეფი.

ადესათი, ვარვალერი,
მახვიხვინეს ლაგვანეფი,
ახალ გითნაღელი რახის
გამწეთ შუნა ყაზაყეფი,
ოსურკათა უმოსო რე
ციმუშ დუმაბუნალეფი…

ნდოლოქ დოხუმ, ჭაშ იმენდო,
ბჟა მისქირეს ორინჯეფქი,
მოონჯუეთ მარაკაშა
მინჭუაფნა რინტუეფი.

ჯალეფიშე ხუმლა-ხუმლა
მიკმოცენა ხიმფორეფი,
ირკოჩ ჸვანეფც მითიკილოთ
მათჷ თექჷ მითვორექი…

რამაზ კუპრავა-ძვალიშჲ მატახალჲ მარგალჲ

სო დიგურე, სი ნავარი
თე კუდელიშ ქვათალაფა,
ჩხორო გვალას გეგნირულექ
ქიგეგონე ტყვიაშ ლაფა…

ითამ კოჩანას ლაჸაფე
გილარრაჸნა გირინცალო,
ჭირაკილჲ გურ მილარძუ
ნანაკვერა თხირიცალო…

მუშო გოკო ჩილ დო სქუა,
ვარა ოზე დო ოხორე
ვაგარჩქილე ჩქინობურა
კოჩანა დო ხი დო ორე…

კუჩხმოდვალიშჲ გოსირქუას
ირკოჩის სი უწორუა,
უნჩაშალაშ გინნაჸათემ
გიჸორს ძვალიშ ხუტორუა…

ათე ძვალიშ მატახალი,
ქართის ჭკორო მუს მითორე,
ხორხოტაშა შურ გეგკალენ
ოკო დაცე, ქაშაფორე!..

რამაზ კუპრავა-ოლაზეშა მეძუ შორი

ოლაზეშა მუთა მეძუ,
სერ დო დღაშით თქვანდა მიფში…
ქუმურქუნი, ქუდუვობათ
ჩილამური ხიოლიში…

შურ დო გურით მოკო მიბლე
ტრაპზონი დო ხოპი, ხოფა…

ქჲნას ოკო ქუვოძირე
ლაზ-მარგალიში ჸოროფა…

აშოთ მანჭი, ჩქიმი ჯუმა,
სადღემუშოთ ვადმეთხუა,

მუ მიჭირა, მუ მირხინა
დობზოჯათ დო ართო ბთქუათ…

…ოლაზეშა მუთა მეძუ,
მარა იშენ მეძუ შორი…

რამაზ კუპრავა-ესო (ჩილშა მინაჭარა)

ესო, ესო, ჩქიმი ესო,
მოსემართემთ ქუმორთესო,
ჩქინი ჭიჭე გერგი ბოშის
ჯგირ დო სქვამი ქუგარღვესო…

თუ, ყვარილი, დადულეფი,
სუმარემშო გოჭყვიდესო,
ლაგვანს დუდი გამნონწყესო
ღვინ ლაგვანშე გეხერკესო…

სქანიანეფ, ქომოლურო
ვალნედეს თეშ, დაშუმესო,
გვალო კოჩო წაჸუნესო,
წკირით ორზოლ ქაჸუნესო…

თინა ხოლო ქუმობჭარი
ჩქიმ მაჸალემქ ქუმორთესო,
ჯვეშობურო, ხიარულო
ქიბირეს დო ქოსხაპესო…

ჸოროფათჷ გომშინესო,
შურ დო გურით დოფხვამესო…
კვარჩხო დაბადებულეფქჷ
რია-რია ვაქიმნესო…

თოფ დო ლივერ ქიჸოთესო,
მედაჩხირეფ დომშქურნესო,
უგუთებელ რაგადითჷ
ტვინ ოშ დიხას გოირხვესო…

ვითოჟირი ჩაყვაშ უკულ
ვერწემ ყანწეფ გეყურწესო,
პატონსქუა გვანჯი ჩიქვანს
თამადობა მიდუღესო…

შუმილია ხანგა ჭიჭი
ორიორით გაგმიღესო…

ირფელ ჭიფას ქუმობჭარი,
ვედიზარა, ჩქიმი ესო,
ციხეს ვოხექუნ ფერ კოჩის
დიანთელი ვაბწონენსო…

ამნისტიაქ გიშელუო,
წანა ვარა ვამომრკესო,
მა თაქ ბრელ ხანს ქიმთობსქიდდა
დუც ეხვარი, ჩქიმი ესო…

გიჩქდასუ, სქან ჸოროფა
გურცუ ენინაცხუ კვესო…

რამაზ კუპრავა-ჩქინ დორთაში ოხვამერი

ჩაყვა ტომბა გეიოფში,
ქიგიობი ღვინი წკონდა,
თიცალ გურჸვილირი ვორექ
ვითის გეფშუნქ, ქუგოკონდა…

ჩაყვა დუდშა მახვიხვინე,
მოხანტილი ტომბა ჩაყვა
ილორს ელჸრ ქიგიოდვეს
სოხუმს ჯოხო ამდღა აყვა.

ეგბა გვალო გურქ გოხორცქუ
შურ გობტუე ართ მარაშა,
მუჟამ იბდათ, მუჟამ იბდათ,
ჩქი სოხუმშა დო გაგრაშა…

ხოლო ართშა ქიგიფშინათ
მუჭო გილეფშითი მოქვშა,
გითახვამშა მუჟამ იბდათ
ერებამო ჩქი ილორშა…

ჩაყვა ტომბა გეიოფში,
ქუდმოკინე, აშო ეფშა,
აფხაზს ხვალე ვაგარზინე
ვანდურებე მარგალეფშა…

მუ მოჭირა, ჯიმალეფი,
დუდი ვეგიდგინე თეშა,
ოაფხაზეს შქურნაფილო
კუნტათ ბხვამანთ კალკალეშა…

ჯიმა, სი მუს ოღვიზინა,
მა ქორთხინთი, გეზოჯათი,
ოაფხაზეშ ოხვამერი
ვენიტუათ ცვალი ართი…

სქანი რჯება ვამოხუჯუ,
მა ვაფქიმინ, თენა ვაშვე,
მუთ ქოფშუნი, აფხაზეფი
დუცუ დვანდეს კოლხობაშე…

გიწინქ, გური გონჯამილო,
გაჭყოლადარ ვამაფუნა:
კოლხემსუ დო აფხაზემსუ
ართ ზისხერი მიშაბდგუნა…

ქიგემიბით, ქიგემიბით,
ატარც ღვინი ვადარკათი,
ღორონთქ ქიმნას, მელე-მოლე,
მიღუდანი არზი ართი…

ასე განთხის ქიგებდირთათ,
მივოტუათ შურიშ ბუნა,
ვოჩხონუათ, ინგირს მელე
საფულებცუ მით ქოპუნა…

სი, ბოშკოჩი, მაკინ აშო,
ქაწომიდგი, ატარ ეფშათ
ჩქინ დორთაში ოხვამერი
ქომოლურო ქვინჯშა გეფშვათ…

გემანგარით, გეფულანდით,
ირო ვეჸი თენა თაში,
კოლხიშ დიხას გემშუმდანი
კოლხეფიში დორთინაში…

ხოლო ჭიჭე ქიმითვინით,
ხოლო ართი თუთაშ მორთა,
წი ვეჸუდა, წანას იშენ,
წანას იშენ იჸი დორთა…

რამაზ კუპრავა-გომიძიცე, ოკოლხეში თუთა

გომიძიცე, ჯვეშობურო,
ოკოლხეში თუთა,
გეგნომივარჩხილე ლიხი,
აუადჰარა, ურთა…

უჩა ზღუასჷ ენორწკინუნც
უკოროცხუ ქუა,
ქიგიშინი, ვორექ სქანი
კიდირიში სქუა…

ქიგიშინი, სოიშახ ონჭუდ
სქანი ვე დო გვალა,
დიოსკუს დო პიტიუნტის
თიშა ქიმეითვალა…

ვო სატანა! სი ჩქინ ჭარას
მუჭოთ გოკონ, ურთა,
მუნაფეფი ქიმნაქუნი
ოკოლხეში თუთას…

მუნაფეფი გეგნიფაჩი
ოკოლხეში თუთა,
ქავოსქიდით ართ-მაჟიას
მა დო სი დო ურთა…

თუთა ნარღით გინაჯინე
სათანჯოში გვალას,
გეურთუო, შურდინაფილს
კოლხეფიში ჭყალაქ…

მორდებულო უფურცქინუნს
აუადჰარა-ურთას:
მახიოლე, ჯიმალეფი
მალას ქუმოურთდა…

ჩქინ ორთაშე, ამდღარიშო
მაპალუნა მუთა,
გომიძიცე, გომიძიცე,
ოკოლხეში თუთა…

11/12/2009

რამაზ კუპრავა-ოდაბადე

ოდაბადე, ოდაბადე,
სქანდა ბრელჲ მაფ ორაგადე,
სი მა მაჟრათ ქუდმაბადი
შხვა ნინაშა მორაგადე…

ენომხანტუდ გურშა ირო
ომარგალეშ ბჟა დო თუთა,
მანცხვარიში ოზეშ ორო
ჩქიმ ზუგდიდი, ჯუმი, ურთა…

მა ვორდიკო სოდგა-სოდგა
სქან ჸოროფაშ ვამიღ კილი,
გონწყჲ კიდირი, ქომხუტოლე
რთხინქჷ ბირგულმოდირაკილი.

თოლეფჲ მუნაფილი გაფუ,
ნირსი ორე ჟი დო თუდო,
ქუმმაზადი, ჯვეშობურო
შონეშ გვალათ მალამრთუმდო…

ოდაბადე, დორრაბადეს,
დორრაბადეს, ოდაბადე,
მარაბადალს დორაბადანქ
რაბადელი ოდაბადე…

ჭყანიორ რექ ოდაბადე,
ბრელი ოკო ქუდაბადე,
მალიმარი გერ-ბოშეფი
დაიბადებ დო ქუდაბადენქ…

ოდაბადე, უბადობა
კინოხ გინნაღელი გაფუ,
მუსხანი რე, ვა გოიძიცუ,
ვაიბირუ დო ვაილაჸაფუ…

ჟიშე ღორონთ ქუმოიჩინანს
ტერ-მოჯგირე მითი გაფუნ,
ველუქ თეში, ნინაშჲ სქანიშჲ
წიმოდგინა ქიდიჭყაფუ…

ოდაბადე, ოდაბადე,
ქუგონებ და, ქენმაფალი,
ქუდამჯერი, სქუა გაფუქ
ლუბაშ მილახუნაფალი…

შურ დო გურით განინალუქ
კილე კინოკართანელო,
თოლეფჲ სქან ხეთ ქიგემწკური
სქან გოლუა, სქანჲ სანთელო…

ოდაბადე, ასე ოკო
გავასურე ორაგადე,
თელო ქუგორლუაფუდა
სქან ნინაშა მორაგადე…

მითაჟამიშ სქვამ ნინაშა
დუდიშულო მორაგადე…

02/12/2009

ზაურ გერგედავა-რინა

მუვახიოლჷქ რინას-შქაბანია ომურიცხეს
მიშაფულირ მერქაშ რიალს...
ტორონჯი დო ტინტილაშე
გვალო ჭკუას ვოდინუა.
...
მოჰამუ ფიშქალჲ პეულეფშე
გჷშნახორცქა ფურკით შუმილი
ფსკალეფიში ზჷმოთი დო ბგჷნაფულე
თინეფს მუთი გურც ენაგუმინნა;
ნოტე,სქანი ჯღარი თოლეფიშჲ
ნერჩის დჷმოლანდაფუას
ჩქიმ წკუმონტილ მაჟირუ დო
უკული ქირქეს ქენმოქოსენი,
შურს ვაფქალ,გიფუჩუა.
....
ალ-დაჩხირი გჷგორზჷდ დო
ისხვარსხვალჷდი ზჷნთხჷჯგუა,
გოთართალერჲ ძუძუეფშა
მოკოდ კირიბი გერდჷკო,მარა,
სისმარს ებჸუნაფუქუ დო,
უკმელას უქვანთუა.
ეჸ! ქელმასიმუ ჟიშე
გუმოზოჯილეფიშჲ ხონარქ,
დო ნახონებუ ჩხე ფურცელს
ჩილამურს ვოწისუა.

1.მერქა-წამი