ათე ჭველეფჲ - ტყაშ კოჩეფი
ხობწყარს ფინქრო გართუნანი,
ნეტე თინა ქარჩქინანი
ფსუას მუშენ ჭორთუნანი?..
მუქ მიონეს შქველარაშე
ჸოროფათი ფურინელი,
ღურა დღაშა ოკართალო
ლუკაცალო კორინელი...
ცას კოღონა მიკმაღურუ
ზუმინით დო ცარკალით,
თუთას წყარშა გენურთუმუ
დალუაფშე ცაშ კარით...
თოლონჭაფუს სერი მაბუ
წკურუმია უჩა სერი,
ყურანსუ დო ღირინუნსჷ
შკირენულო გვალას გერი...
ოკუმოლშე მიღირკოლუ
ჩე დო უჩა კუმაშ თოლი,
რსიოლია ოდაბადე
გოლვაფირო, სკანო ბგორი...
არკვანს დემი ეშაჯანუ
ეკოფშაფილი თუთაშ ნერი,
მასკურ ჯალებს გარსიოლუ
ართო ხანგა, ართო შერი...
მუს ვაძირუ თაკარელო
გობარჩხალერ დალიასი,
თუთას ჩხანა ეკოთხოზუ
მურიცხეფი გარკიანსი...
შარა შურსი მიკობონდღუ
უღურალო ერჩქინელი,
მუ ნჯარეფი ემირცხონუ
ჭველაქ დიშკათ მერჩქინელქი...
გორდის ბორკეფჲ მოურხინუ
ოჭკადურეშ აბარწას,
ხოჯ ჭკადილო საქვარეფსი
ოხვამალო ოკვანწანსჷ...
ჟინღორონთიშ ოკნანწყუა,
ჸოროფათი ფურინელი,
ოხვამეში ოკართეშე
ლუკაცალო კორინელი!...
