ივეტა წითაშვილი-მიაშქვს ულაგამეთ

გუტე,
მიაშქვ,
მიაშქვ ულაგამეთ,
ქიმწოლას უმწულაფშახ
სოიშა ალნე!
მუთ რენ – იჸი,
თაშ რე, –
ვარა ვა რე,
შორშა მიაშქვ,
მიაშქვ ულაგამეთ!
იშხას,
ღირთას,
მისვანჯ
უმუსვანჯელ,
მარდ რე,
მიაშქვ,
მიაშქვ ულაგამეთ!
ფირქ რე თინერ,
გურსუ ვადორინელ,
ირქენს,
ილენს,
თოლო ვამოძირელ,
ჸოროფა რე,
ვარა ვა რე
ირფელ ,
ერთელ,
მერთელ,
ჭიჭე,
ვარა ქვერსემ,
თაშ რე იშენ,
წყარ ველიებ ხერკეთ,
მუდგა სერ რდას,
ონდღე იჸი ქერეთ,
ფუბლი,
ფუბლი,
ფირქიქ გეწმენტ ხეშე,
დირთუ
ულირ!
სო ურს?
დიკი-ეკე...
უმწულაფშე
გურშა მაფუ გერთელ,
გუტე,
მიაშქვ,
მიაშქვ
უ ლ ა გ ა მ ე თ.!.. 

ლაშა გვასალია-ჩხაია

ღორონთებიშ ნინა უჩქუ

გვალაშ კიდირს მირსიოლუ,

სისმარ გეუძ ხეშკა გურშა,

ფინქრეფიში ნირსი ორუ...

ჩხან–ჩხაია, ჩხანაშ ზესქვი,

მიბორბოლ დო მიხვარჩალუ,

თეშ მეჯინუ ლერსიშ მონწე

ეშმაკეფიშ ჭყანას ფჩალუ!..

ჟიშე ბურბულ მუნმაქანჩუ,

თუდო გვართაშ ბორბოლია,

ქირქეშ ჸაშე მუკნათოლა –

ქვარაგიდალ ხორხოლია...

ჯამპიშ ჩვაჩვა ნაწვანჯერი

მალაღურიშ ფსუაშ ფერი,

ფუცუცხამიშ ნაჭყილონტა –

ჭარჭულია, ჭერჭე გვერი...

თეშ მეჯინუ ლერსიშ მონწე

სისმარსუ დო ღურუს ფჩალუ,

ჩქიმ ჩხაია,ჩხორო ჩარჩხვა –

მიბორბოლ დო მიხვარჩალუ!..

ლაზი აქტივისტი ჰასანი, ლაზური ენის გადარჩენის საკითხებზე

ლაშა გვასალია-მებონდღილო რაგადელი

ქუა ირახვალ, ცა ჭვეთანს,
ჩეგვალა ინგარს,
ღურელეფქ ირტეს ოხვამეშე
ციორ– ციორით,
მუკილოთ ამბე ჩესერეფშე
უშულად ინგირს,
შურინუნს მასქურ უძირაფშე
შქიორ –შქიორით...

ვენტირენა ღურელეფი
სისმარეფიში ქიანას,
გეგნურთუნა ოშურეთი
ტყურაია ხიოლით,
გიოჭვენა ზისხირეფი
უთანაფუ თანაფას,
ფინქრი ურთანს ოფუტეს
კარკანტით დო რსიოლით...

ეკობთხოზუქ  ღურელებს,
პიჯ ურღიმანს საფულეს,
ჩილამურიშ ყოროფაქ
მელერსეფს ვაფულესი...
ქუმონტებუ ჭურიასი
ჭითა ჩხანაშ ჭართალით,
მიკივალნა არიკეფი
ამარ– ემერ ხართალით...

მაფა, მაფა, მაფაშა
დუგაღორენქ აკაშა,
გონჭყაფუა ჭაკ ცხენს–
მებარებულს ძაკაშა...
ათე ჭინკექ სო მატყობ
ვითომიათ  მართალქი,
მუ უღუნა, გოლვაფირო,
სერ დო დღაშის გართალი...

მეურს, მეურს, მიხიბოკუ
ბორჯ დღალეფით რაბადელი,
არიკშორო ტყურა ოფე
მებონდღილო რაგადელი...

მოუღუ ამბე ჩე სერეფშე
უშულად ინგირს,
მოკვარჩხილრე თე ქიანა,
ონგარალს იბირს...

ოკოცუ დღალეფქ,
აკონდღულ ნჯარეფქ,
ღურელ რაგადანს,
იბრჩქილექ ირფელს,
ვორწყექ ირფელს, ცოდა რაქვალანს!..

ეშმაკეფ შორშე მიჯინენა
ძიცა– ხიოლით,
ღურელეფქ ინტეს ოხვამეშე
ციორ– ციორით...

გომთანე მალას, გომთანე მალას,
ჩხანა– ჩხანათი,
გომიტეთ ცაშა, გომიტეთ ცაშა
შურიშ ჭყანათი!..

ლაშა გვასალია-მალას

მალას გეშაბჭოფე ოკო

სქანი ზორღაშფერი თოლი,

თუთას მიორსხუდე მოკო

მუჭო თორსაჭველსი ჭოლი...

დღასჷ ვედგეთხუე, ქვექვე,

ჩელა, ჩე გოთანაშ ფერი,

სი რექ შურობუმუ ჟინ ცა,

ჩქიმი თქუთქუბია ჭკვერი...

ეჰე, ოკონწყველე შარეფ,

ფურინ გაჭირებე ზესქვიშ,

კილოთ ქუდუჭყაფ ჭარას,

ცაშე გიმულებჷ ლერსის...

ქუმორთ პატონეფო რჩქინელ,

ღურშე რტებულო დო ჭყოლირ,

თუთაშ მუკნასოფა თოლით

გითოლენდირი დო თოლირ...

მალას გეშაბჭოფე ოკო

სქანი ზორღაშფერი თოლი!..

ლაშა გვასალია-თუთაშობა

ათე გვალას, ათე ცასჷ, ათე სერს

გუართუქჷ მართუშორო თუთაია,

არძა ხანგას, არძა ბოროს, არძო ჭკვერს

მივოჯინექ მასკილადო თუთუბია,,,

ღორონთ ვორდი სანთელეფიშ ომინჯური,

მუკმოქუნდუ ვარჩხილიში კაბა–სერი,

გილვოცაცანდ აცა–ბაცა ცაშ კირდესი,

მიღირთანდუ შურმორთელი ტყაშფერ გერი...

ჭველა ვორდი, ჯვეშიშ ნჯარით დალებური,

ჸოროფილიშ გურჭუაში მარჩქილარი,

მოტიბუანდ მურიცხეფიშ  რგილ ჸებური –

მუნაფაშ დო გურგინეფიშ მაჸვილარი...

თუთა ვორდი, თუთაია თქუთქუბელი,

გუმორთანდეს ჩხორიეფი არიკეფსი,

ჩე გვალაშე მუკნახარცქა ლეგენდეფი

დინაფილეფს პელაზგეფქი მირიგესი...

ვორწყექ ირფელს – უძირაფ დო უთოლესი,

ურქენს მასქურ ჩქიმ შურით ქიანას,

ვოტიბუანქ გოძიცელო კვიკვილ სერსი,

გუთმოპინუ გულმულირო იანარს...

მა ცაში დო დიხაშ ჸვაშე მუკობტყვაცი,

ჩქიმი ნინა – ღორონთეფიშ ოცქვაფური,

მოკოდ ქრისტეს ვახოლიკო ოკოჩესჷ,

მარა წვებერს თუთაშფერო ქონკობღური...

მიქ ჭარ ბჟაშ დო ჩქიმ ჸოროფაშ არიკეფი,

ჩქიმ ცოდეფიშ მახანტალო მერჩქინელქი?

დუდ ღორონთო მომღუდუ დო სერეფიში

ხვათა–ხვალე მაჯინალო გეფრჩქინექი...

ათე გვალას, ათე ცასჷ, ათე სერს,

გუართუქი კილოთით დო ბურბულით,

გვალო მალას ჩქიმ შულადირ ჸოროფას –

გუათენქჷ – სერ დო დღაშიშ ჭურჭულით!..

ლაშა გვასალია-ცაშმოკონი

ცაშმოკონი კარკუნტია

მუნაფათი გვიგვილერი,

ფიჟვ მასქურით გომბარილი,

ნირსიშ ომპათ გორინელი...

ცია რექდა, ცია ორდა,

ჩხორო თოლით კიბირელი,

გურშე ხვამათ ეშულირი,

წვალებათ კიბირელი...

უღორონთე ქიანასი,

შურიშ ჭარათ მეზიმილი,

რინაშ ბირათ ერჩქინელი

ბორჯიშ შუფის გეზვინილი...

ცაშმოკონი ცარე კუნტა

სერ– წკურუმიშ ოტყობინჯე,

ნჭყოლირ შურიშ მახვილარი,

მაბონალ დო თელო მინჯე...

ცაშმოკონი შურ–ბორია,

კორკონტებშა ჭურინელი,

ჩხონაფა დო ხვამა შკას –

ეფუნელ დო გურგინელი...

ცაშმოკონი – შურიშ ომპა –

ათასნერო კარკუნტელი!..