ლაშა გვასალია-ლიმა დო რინა...

ბუძგურიას გუმორთანსუ, ბათა,

ძუძუეფიშ უმუდირაკ ორო,

ზღვინდალ ტანიშ სიორია გვართა

გიმანთხუმუ ცანცალიში წორო...

ნჭილაფა დო მახუალი ხუმა

ტუჩეფიში ჭაბუია ნირსი,

მორგინუანდ შულადაშა ღუმა

მახანგენდ ლიმაფა დო ნირზი...

ვადოპილა სირჩინუე ჭკოლა,

ვამშკირიტა დაჩხერი დო ცხვიცხვი,

ქომხანგე დო მუდგას გოკო ბღოლა,

მემჭე ცაშა უღურალაშ რიცხვი...

ქუგომჩანე ცურ–ცურია ართო,

ქომცხვანტალე შურღუა დო ხვინჭი,

ქინმოკირი მართაია – მართუს,

ვამდინუა ჸოროფაში ნიჭი...

უვაიჭარე სირჩინუე ძაღვა,

სქან ხირთინა, ქიონია სერი,

გეგნოფთირე რინაშა დო ლიმათ –

იბკილოთუქ კიბირ–ჭველა გერი!..

ვაორანსუ ჸოროფასი ნატრი,

მუ აღოლე სქან სქიბუშა ოროს,

ზღვინდაია, ციორია ცირა,

ქიგმანთხუმუქ ცანცალიში წორო!..