29/11/2012

გივი ქარჩავა-ჩე გოთანა

გოუსქვამებუნა ქართიშ ვაგზალ. მა მუთ ქოფშუნ თაშნე გოვარვალერ დღას ვა რდ. ჩქიჩქობუაშე ქართის მითიპკილოთუქ დო ჯგირო ფშუ, აკა სამანჯელ მიღუდ, მუშ გეშა ვაგზალშა გიშულა მოხიოლუდუნ - უდეშე ძღვინით გოჭუჭატელ ლაგუჯის მიჯღონანდეს დო მინშა ლაგუჯის მუშ მუმაჯღონალ ხოლო მა უნუდ. სიტიბა მუმაკათუდ. ნანაშ კიდირშე ეტყაბარელ ჩქიჩქუშნერო, შქირენით მორთომაფილს დო ღიაფით ნდღულაფირს კინე ნანაიაშ კიდირს მუჭოთ წურბელა მუკოჭაბილსინ თეშ... შურიშ ინოხ სოთინ დუტე ქო მაპალუდუ-და ყორყელს ღიჟეთოფურგითნაწიმაცალო მიტიბუდ ირ აკან. ოსხირიშ გითოხვამუაბორჯის კაბერჭის გეცუნაფილ ცუხიშორზაშეცალო ბნდღულუდ... ერზამილ პაპროზიშ ღერეფით გილეფხაჩქუნდ ქართიშ ჩხურუთ ციცინაფილ ლერჩქვეფს... საათის გივოკიკინანდ ირ წუთის. ასე ვარ ასე. მუშენ ვა მოურს მუშ ბორჯის. წირკეშ ღალირ იშ დუდ დო მუნდ, ქო მოურს აბა სო ურს. კინ ციფერბლატის გითმიოწენს ნაკაკა თოლიშ შქირენულ რზამა. პაპროზიშ მაჟირა ღერ ბარგუნს, მასუმა მაჟირანს ლერჩქვეფს. ეხანობას, სხულიშ გინნაკვათაშა ვინგით გერაგვაფილ ოქირსეშორო რკიანს მუდგარენ. მოურს! მოურს! შულადა დო მერთომაფათ შვაპილ დუც ონდო ჩქიჩქუობაშ ჰამო შინა გაფაფუდუნ, რანწკის კათაქ გამაკორდ, აწიკინ დო შუშას მელე კომპიუტერს მუკოხუნელ ჩეშმან ცირას ქავოსქიდ  ჯუქურო. პასპორტ  დო ფარა ჭკირილშე გემთოვუსეტელე დო გიწოღალას თიშ ხოწილ კითეფიშ სიტიბას ქაშქირტ ჩქიმ ბუძგურიაქ... დუც გიმე გიმუკინ დო აწნარცხონა თუმაქ ოგვერდაშე ჩხვინდიშახ პიჯ დოუფორ. მუჭოთ ჯიჭონიშ გოგვიგვილერ ალეფქ მუშ ქვინჯღალ შქა დო ჯინჯისინ... ონდო ბილეთის გიშმაჭარუნდუნ დუდშა ვეუკინ. კითეფს კლავიატურას უხაკუანდ ჯაშა ღვენწკმიშახვილაფირ კიდუცალო, ნინა ჟინ ლერჩქვიშა მუნუძუდ დო გვერდო ფორილ აფუდ. ბჟაშ კიდირშე მუკნაჭვალა ჩხანათ გოზიზინაფილ, ყუნწმეხარცქილ დო დიხას გეფაშქაფილ ლაგინძია ჯამკაკალშა ქო უგუდ თუდონ ლერჩქვ. ოხვამეშ ძეკვენეფცალო გოთოლირ  ვინგ დო ყორყელ  ტყარ ტორონჯიშ ნინძგიშფერო უჭვიანდ დო ექი-აქო ჭუჭელეშ ნაცხვაცხვაცალო ჩინჩანა ფარაშ მაფართა-მაფართას აფუდ ეჭითინაფილ. ორქოშ ჯვარ გიობუდ, ქვერსემ დო სქვამ, დახე თიშ მადიდა ქო რდ, ნამდა ჯვარიშ დუდ გოძღოძღოწკუმა აჭყაფუდ... ჯვარიშ ქვინჯ, სოდეთ ქირსეს მუშ გელისმარელ კუჩხეფ მაზაკვალიშ ხოკოშა მუნუძუნ, ძუძუეფიშ ღარდაჭყაფუშა აშუსვანჯუდ. წყინწყარპიც, სობოგა დო ჯვეშ ხიბლას ბაღანობას შინკას იფხირდითინ თიქ ქუგმაშინ  უნელო. მონჭანუა მიშატყურაფილ ბიაშფერ, წყინწყარპიჯიშ 2 სვეტერია დო წიწინაფილ შინკა ინუ ვინთუდ რკინაშარაშ მოხანდეშ ჩე ოთანთანალაია მუკოქვენჯიშა... დიო ხოლო ალსამეთიშ ბაღის დუნარზემ  ალდაჩხირ  ინაბარბანჩუდ  ორქოშ ხეშე გიშნაჭახნაკა ძუძუეფშა. ფეთქუნდ დო ინარა ვალუდ პუტარგით გოპულატირ დადულ კალმახაცალო... - ა, პატონ  , მიდეღითია, - მიწუ დო ბილეთ  გეგთმოჭირინუნ, კვირკვეს ნაფართხა უმურცალო ქუგმოცუ ჯამკაკალქით, ტყარ ტორონჯქით, ბიაქით, შინკაქით დო კალმახაქით. მერქაშ მამალას დიფრთ  თექიანობაშა დო მიდგარენ ოსურქ ოჭიშის ხე ქიგემთვათვ  , მიმაშქვით ბილეთშავან, გვალო გაგშაპკურცხ დო დოპკვარჩხანე. ქართიშ ჭუხის მეფხარუნქ ირანულ დო ფრანგულ შურამიათ გოზიონთილ შოშეს დო ჩქიმ პაპროზიშ მაშქვიდაია ფურკის ვუკუმუანქ თეშით ხუთილ ჰავას. ბაბაღუზეთ ვორექ ნაბტან. გურ მონკათ უზუმპუანს ოგურეს, შურიშღალას მიკმოპჭირდუქ, ნასინჩხუცალო გუმორზანს. გავრიშორო ებუძოლაფირ ვორექ. აფუნ რე. აფუნ დუთმოდირთუ დო ფუნას იჭყანს შურიშ ინოხ. მაჯერღვია იჭყანს ასე ეშულას. ჩქიმ ანგაროს ფალუნს მაჯერღვია, ოთხირეს გინიშ ჯღონჯღო. ჩხონაფილ ჩქიმ ბებ წვანერს ორთუდ თიშის. კალიაშ წვანერს ახაზირენდ ხოლო, ხალირ თხირით ეზადილს. რკინაშარას მელე-მოლე ოძიგირე მოუძ დო თექ გილაპ უნდ მა კალიაშ ოწილუშა. ეკი დო დიკი მიბლენდით თოლონჭეშახ დო აკა ჩახვია ემაფშინედეს-და, ხიოლით ცას ვონჭუდით. ცხვარე დო ნწარე ელაჭკომაფუშ ზადუაშე თელ საგანოს შინელ რდუ ჩქიმ ბებ. სუნელს კაკუნდ  თიჯგურას, ტაბაკის თიშ დო ღუმუშ მეტ ვა გიღუდუკო მუთუნ გილადვალარინ, ვა გეონჯღორებუდ. ძღაბალობაშე უქომოჯნეთ დოსქილადირ, ქომოლიშ საქვარსით გეგაფილირდ, ღვინს დუთმოდგუნდ სქვერიშ ზისხირჯგურას, ორინჯ დო მაფურინჯეს ულუანდ ანდას. კიფერიშ ჯინს კველას გეხედ  დო ხაშილ ჭუჭელეთ ოდიარუანდ  ჭოიეფსინ, ამდღარ დღაცალო ფშუ. მა ხოლოშა ვემვოთინანდ, კითის მიცვანგუნდეს ჭოიეფ დო მოშქურუდ ღურუსხის. ოკუჩხანეშე ათოვუჯანუდ ბების, შხვადო ვებნჯირუდ სოთინ. ონჯირეწკუმა, კიდალაშა ხატ მუკუბუდ, ჯეგემარა დო ჩქიჩქ ქირსეშ ხატ. ართ დუცხე ქიცა უღუდ, დღაშ დო სერით თინა კინაკირუდ. ოჭუმარეს გამწოდოხოდუდ, ხატის ელაჯინედ დო იხვამანდ. ათე წუთის ხოლო ალმასიმე თიშ მარგალურ ხვამა: „ქიანაშ გორჩქინუ ღორონთ დო მარდიან, სქან ოროს ქუგობლუაფუდა, ჩქიმ სქუა დო მოთას, ჩქიმ დინოს, თოლსინთე ქიმეჩ დო ირნერ ჭუაშე ირსხ. მა თინეფიშ ჯგირობუაშა ქაშმოჯინე. უბადო თოლით მაჯინეს, მითინ ქო რე თეჯგურა-და, თოლ გელუწკურ დო ქვარა დუფშინე.“ ათეს თქუანდ, პიჯვარს გეგლიჭარუნდ დო გედირთუდ. ვანაფერო ჩქიმ ბებიქ მითინ დოჭყუკონ. თეშით შურუქალ ოსურირდ. დო, ვა პჭყენქია მა მითინს, თქუანდ. ჭყალა ვა შინერისა დო გინოჩამა, მითინ ოჭყალ ქო რენია-ვა-და ირ ღორონთიშ ოჭუმარეს ხატის ვოხვეწუქ დო ვახვამანქია დო მოჯგირე დო მოუბადეს თინა გეგშაგორუნსია. გერგობათუთას დოღურ. ჩქიმ გეშა პიც თუმა ვა მიჩანუა დო გობურძგონილქ ვა გილეძგვიბინუა-ვა, დომჩინ. მუშ ეკონია ხვამა ხატის ქატუ ანარკიაშე ჰამოთ ელნამბარა მასქურცალო. ამსერ უდეშა მევურქ. ბებიშ ჟარნეჩიშ უკულ ვა პოფექ სამარგალოს. ბაბა დო ნანა თექ მიწონებ. ჩქიმ ნაკვაჩხირჯგურა დაია. ჩქიმ ჯაბუნაკიშორ უდე. ჩქიმ ატამეფ დო სხულეფ, უშქურ დო წყი, მარსინაია ხვიმა დო ჩაფულა ლუღ, ხოჯიშთოლიშ დო ალადასტურიშ ღულა-ღულა ჯინჯეფ, ანდაშა წილირ დო წილოხირ, ანდა მეშარე დო მოჯგირეშ ოსხირსმელე ბირა-სხაპუათ გინმაზარებელ. ლეკეფიშ ორხაგუცალო გოჭარჭულერ ორტვინ მიწონებ. ჩქიმ ჯოღორ მიწონებ მუშ ყვაყვალა ლაკვწკუმა, დო ჩქიმ ქაბულა მიწონებ. შურ მიწონებ, ჩქიმ ბაღანობაშ შურ, ჩქიმ არკვანს, ჩქიმ ნორჩალს, ჩქიმ უდეშ კიდალეფს უნთხანსინ თი შურ. ჩქიმ ოზეს ოხვამეცალო კუმაფილ მარენჯობა დო შურდგუმაშ შურ. ამსერ უდეშა მევურქ, საბატონ-ჟაშხას გიმაცადებელო. მეტ ვა ფჩოდ. მარა თენათ ბლეცერანს დო გურს მირდუნს. ჩხვირკიშქვარაშფერო აკოსერილ ქართიშ ცას ელვოკიკინანქ დო კინ პაპროზით გილმეფხაჩქუნქ ლერჩქვეფს. *** ვაგონშა გემთვოსერგელე ჩქიმ მეკონეფ. კოჩიშობას სოდომ დო გომორ მიკნაველ აფუნ, ათაქიან შურით მეხვადუქ. ბგორუნქ ჩქიმ კუპეს დო ჩქიმ მეკონეფს გილახვენჯიშ თუდო მითვოქვირსანქ. ართ ნოშქერქილიაჯგურა უჩა ოსურ მითოხე დო მეჩხორიეშ ხალირ თასეფს ხვატუნს. ტინტილაჯგურა თოლეფს აჭი-დო-გაჭით უმარმალუანს დო ნარჩაშე ე უნაფილ ქუდიშ წვანდიშახ ბზიმუნს. მა გალე იბჯინექ დო შურ მოლ აყარებაშა. ჩქინ კუპეშ გიმალწკუმა რხინაფილ ბადიდ ალარე. ღვანწკ დო ვინგ თეშ აფ ღვირნაჭკილ, ნაწყარუშ გეშა ჭიფა-ჭიფას გუნახარცქა ლეკშა მოუგენს. ჩხვინდ გეჯღვალიკერ დო ტერტე. კიბირ  ვა გიაპალუდას ოკო სარალოს დო ჟინ ნოლ  დო ლერჩქვ  ოშმეშამო მარჭვაშა დინუსვანჯ. მუჭო გოლოფაშ გეშა მესქირაფილ წყარ ღარს მოკათაფაბორჯის დიჭყანს თხირთხინ დო ხირხინსინ, ეთეშ თხირთხინუნს, იცანცალ  , უზინდუანს დო უკილოთუანს, მარა მუშ ხვალიშ ეკმაღალარო ხოლო ვერგ, გიოხე. უნელო, შქახანიშ ჩხეშაგოთვითვინაფილ ოსურ  ქო მადირთ  დო, თოლგითოწკურილო, კანდიორო ალარაგადანს, მიკმაშქვითია აკა პატონ. სარკოს ვორწყექ - თე გოფშა ოსურიშ ძირაფა დო რხინაფილ ბადიდ ბოშკოჩო გინმირთუ. თოლეფ ურწკინუნს. მუმულცალო ჩირღონდუ. გითოღალირო ელუძიცანს გოფშა ოსურს, კოსტუმიშ ძგოპის მუთუნ ტანგოშ მასხაპალცალო ფიორით კინუკინანს-დო, მოზოჯითია - მიკმაშქვანს მეშარეს. ბადიდის მაბოშიაშ გურ ალაძ. ათე ბადიდიშ გურიშ უჯგუშო მითინს ვეიასხუნე ქომოლიშ თექიანურ რინაშ ფილოსოფიურ სმელენჯეფ. ჩქიმ კუპეშა ართ ეხომაფილ ოსურს ჭოკაჯგურა მარდუკოჩ მითმაზარენს. ოხვარ. ქორთულო რაგადანა. მარა მარგალეფ რენა, აბაშარეფ, გიოხე ჟირხოლოს. აკოტახილ ქორთულით ეთმუნწყუნს ოსურ  მუშ ჯიმასქუას, ჩქიმ დორთაშახ მუთუნ ვა გილალუა-ვა ბინას. ჭიჭე უმოს გიშათინილ, მარა იშენით აკოლაბარსელ ქორთულით გამენს ჯიმასქუა, ვა გაშქურინასია. გუთმაჯუნუ დო იტენს. ჩქიმ კუპეს ხოლო ართ მეშარე შარენს. ზერზელია დო გვანილ კოჩ, წალენჯიხარ რე. შუმილ რე დო მუდგარენ ლაგარდე კოჩიშ მეჯინა უღ. თენა ხოლო ქორთულო იჩიებ. იჩიებ ვარ, იკილოთ დო ისოფუ, მარა ვა აკანწყუ მუთუნქ. მა შურიშქალ ვა მაფ. თუდონ გილახვენჯიშ ბილეთ მიღ დო ვუჯინექ მუჟამ ეშეხირხოლუნა ჟინ, შულადირ ვორექ დო დორულაფა მოკო. სუმხოლო ჭკვაპალანა მუდგარენს. სუმხოლო ქორთულო. თე აბაშარ ცაგანო ელმორაგადანს, ჟიშე დონჯირელს მარსიოლუაფუნია. მა თოლ უჯის ვა ვარზენქ. ოსურეფ ვექანცუნა. ასე გეხენა დო უჯინენა, დაბა მუჟამს გითოფჩანს ჩქიმ ნერვეფ დო ჟინ გილანჯირალშა ეშაპცო უნქინ. მიარე ხანს ა ის ოჯინექ. კინე მუქ გეშეხირხოლ. ასე ჟირხოლო გურმოულირ რენა დო ჩქიმ სა ალეშ ჩიებას იჭყანა. მარგალ ქო ვორექინ ვა ოგონუნა დო გინილეს მარგალურშა. ბერიას ფულირ ნინათ უღუდუა მარგალურ  დო ლემენცეფწკუმა ლიმაბორჯის ოტყვინაფალო მარგალურს ხვარენდესიავან, თი ამბექ ქო გუმაშინ ხათე. ტყობინ დო ფულუაშ ნინა რენო მარგალურ? სა ალეშ გითარაგადალ? მემჩქუნდა ვარ. გითვოჯანუქ დო უჯხირზელო ვურჩქილექ მუჭო ეთმოპჭარუნან. ამდღანერ ახალობას მუთუნ კილ ქო უღუნ-და, სერიალეფს დო „დემონკრატიას“ მუთუნ გლახა ქო უღოლამუნ-და, ირფელ ართო მა ქუმკმოჭარეს. სერიალიშ ალა ოსურეფქ. მა შურიშქალ ვა მაფუნ, დასურო ვა ნოჩქვენია ეს ჩქინობურა-ვა-დო, ოჩიჩალო გახაზირებულ კოკუშეფცალო გოფაჩეს ფსუა დო კუდელ, ფურცქინშე რდგაბალშა გინილეს. უნელო ჩქიმ ტელეფონქ ქო მიორანწკალუ. მარგალურო. მარგალურ ბირა დინომჭარ დო თის ურწკიალუანს ირო. გეპჭოფ დო ქო დოვურაგადე. მარგალურო. ჩიება გავასურ დო ეიბჯინინ, თე ოსურეფ ეშ მაფართა-მაფართა თოლეფით ქომიკიკინანა. მუჭო ქო ბძირეს დო თიშვანს დიტყობეს. გოსისონდეს და მა ხოლო ქო დუმარულ. ცხენწყარ მინიბლით დო გუმაკურცხინ. გეიფხაბარკ, ხე დო პიჯ გამწიბობნ დო ხათე პაპროზის ქო მოვუნტე. მისერგელუდ ანაყუ ვაგონმობუნაფილ მანქანა, ჩქი მახინწალ მიჯოხონან თინა. მიშ დო მეხინწანდ ლურენჯ კათას, თე კათაშ სისმარეფს, თი სისმარეფიშ ჰამოს დო ჭუას დო მუს ხოლო აჭუდ პუხუს. *** ვანაფერო მიძირ თეჯგურა ოჭუმარე ჩქიმ ოფუტეს. ფორონჯიშფერო გოთანელ, ცაშე რგილ დო ჰამო შურიშღალა გიმოუღუდ დო დიხას ნირსის ო არშანდუნ ფერ. მიფშ უდეშა კუჩხით, დიო ხოლო შქაგვერდო გოთანელ ოჭუმარეს დო ლურით ჟიჟინაფილ პიჯ ურთაშ ოფარეს მუკოკვენწელერ გუმათანე მურიცხშა მემიჭოფუდ. ნანაშ გურ შხვა რე გვალო. პიჯშე ზიტყვა ვეკობლაფ, საბატონს მოვურქ მაქინ, მარა ტანშა ქო უგინაფ, გოთანაშა გეუდგინ, ყებურს დაჩხირ დუბენებ, წყარ ქუგვარგვალუაფ დო ამარ, შარამიოლს ქო მუმაზად. ბაბაქ ხოლო ჯვემაშ ფუთქაფით გეგმორთ დო ქო გუმაკირეს ჟირხოლოქ. ჯოღორქ ვა აწოფხვადუნ, გიფჩაკვირე, დღას ვა გიხვილუნა დო სო რე, მუშენ ვა ლალუნს-მაქ. - ჯოღორქ ულირ საბატონს მანქანას ქათასხაპუა. მიწუ ბაბაქ მორდებულო. მუშ ნა ვილა რდუკონ თეშ. გურს მუდგარენქ ქალმანწკირ ნაჭვემერ დო ნაგოლოფა ყამბარცალო. უდეშა გემნოფრთ. ნაჩინებ შურქ ქო მარაგ. უკახალე ოზეშა გეგმოფრთ. ნაჩინებ შურქ ქო მარაგ. უდეშ უკახალე ვით წანაშ წოხლე ჩქიმ დუნარგუა ჭყონს ქავოკინდე თოლ. მორდე დო გოფშაფე, ტან დოსქუ დო დოგიროხუ. ჯერღვ გამანგარებ. ხასილაშ მეძობელქ გამნმაკათ ხათე. ქო გიობია უწუ ბაბას დო დოფხვამუ. ქეგთიგურგინუ სქვერიშ ზისხირ დო ბირგულშა გოფაჩილ ხე ქიტკატკ - ა , ანწ ონჯუაშახ ჩერიაცალო იპკიონტუქია მა. გეიხირხოლ დო ბირა-ბირათ მუშ ოჩხოულეშა ქიგნაჭკირ. დაიაქ გოკურცხ. უნივერსიტეტიშ გამორსაშო იხაზირებ დო ინგლისურს გურაფულენს. ქიმმეხვარია. ვოხვარუქ. ინგლისურს გურაფულენა თიშ მახანეფ, ართიანიშ ორაგადეთ ქორთულ უღუნა. მარგალურ ვა რე მოდას. ნანა ჩახვიაშა ღვინს, ოჭკომალს დო ცუხიშორზაშეს დინმომინწკარანს დო დაიაწკუმა ართო სასაფლაშა მევურქ. დოპუნქ არძას დო სქვერიშ ზისხირით ვუჩხაპუნქ გურპიჯის. ოდუდალე ქუას გითმიოწენს ნდღულაფირ ცუხიშ ჩხე ჩილამურეფ. ბაბუ დო ბებიშ ოდუდალე ურე ჟირხოლო ორზაშე შქირტუ. იპუცუქ დო ბაბუშის ვუნტენქინ იზმახანს ბებიშის მუშით ეთმიანტებუ. უჭყანიე ჩხანა გიმაფარკალ დუც დო ბორია იწარწალ. დაიას ვურაგადუქ, სასაფლას დინორენ თი ხანგა ქო მიგორე აკა, ოჭკომალ ქო დოვუტუათ- მაქ. დოღურუა იქ. ზოთონჯის დო ზარხულს კუჩხუჩაფულე გილეშ  . მუშ უდე ქო გიოფარფალუ დო მიდგარენიშ გინორთვილ სასაფლას გითოჯანუდ. გათებე სარალო. იშ დუნანჯირა აკან გოუქვარქვაშუნა დო ასე ცას მიკოჭაბ ხანგაშ შინა. სოთინ ვა რე მეტ. მი ორს სასაფლას დინოხუნა. თაქ გოუხვადუქ ანდა საღორონთო დუნაზუკოლას, მეტ სოთინ ვარ. დიხაშ ჭყანას ხოლო, ვანა დო ორტვინიშ უმოსო თაქ იგინანქ. დიხაშ გუმარჩქინე, მადიარაფალ დო მაჩუალარ ჭყანას. თაქ იგინანქ დიხაშ უნტუარობას დო დიხაშ აშხარობას. მითაჟამიშ გოზიორილ ოდუდალე ქუალეფს დო ლეყეფამ ჯვარეფს ვართ წანა მუკოჭარ დო ვართ ნაჭარა ეშეკითხირე. მი ათუნთხორ თე ქუალეფს? მითინს ვა შ. მარა თი კათა 100, 200 დო გოკონ 300 წანაშ წოხლე ჩქიმცალო გილაბაჯგანდ  თაქ დო ჩქიმცალო გაჯინედ ჯაშ ჯინს გითონთხორილ მუშ წიმოხონეფიშ ქუალეფს. ამდღა მა გილვობაჯგანქ. მიკილენს წანეფ დო ჩქიმ ფუთქურამ ქუას ხოლო გაჯინედასი უაფ მიდგარენ. დიხაუჩა ირთანს. ქიანა გვარგვალანს. დო მუთუნ ვეთირუ. უდეშა დორთელს გონწყილ ტაბაკ დუთმოფხვადუ. ღუმუ, ვალ, ლებია რკვანილ, ლეჭკერე, ქოთომ ჭვილ დო სქვერიშ ზისხირ. მეძობელს შურ ონთხ დო დუც მინმორე კინ. იხვამანს, შუნს დო მეურს. აკოსერუაშახ ხოლო ართ ჟირშა ქაჭიშუანს თაშ. მაჟირა მეძობელ მოურს. ოსურ. ტაბაკშა ვოპეჯუქ დო დუც ი ვილაფ. მარხვას ვორექია. იპიჩანს. ამარდე, ხუთ თუთაშ წოხლე ნაღურა ჩქიმ ბებ თაშ თქუანდ: იპიჩანსია, პიჩვანს გერენია. ა , თე ოსურ ჩქიმ ბებშე 20 წანათ რე უკულაშ დო მა ძიუთ გუვოშინ თე ზიტყვა. მა ვეპიპჩანქ დო განგერებულ ვუზვირთუანქ ჭითა კვარწახის აშაწაწაფილ ჩელაია ხორცის. მუთუნ ვა თირე თაქ. კინე ხაჩქუნა, კინე ბარგუნა, კინე ტახუნა, კინე ქუნა, კინე ჭყანჭყუნა, კინე შუნა, კინე ნირზენა, კინე ლა აფენა, კინე ოგორანა, კინე ონდურუნა, კინე უ ორა დო კინე ჯოგუნა. კინე ართ აკანს გირსიოლუნა დო დიხას ჭაბაკანა. ახალს მუთუნს ვართუნა. მანგიორ, ჯვეშის გითმიჭყოლიდუანა. ოსოგოთე თაშ ოფე დო თაშ ი უაფ. მა გურ პჭყორდ დო თეშ ვიშო მუთუნიშ მოღე ვა ვორექ. ჩქიმ მეძობელ მივალუანს ხეს. მინილია. რჩინ კოჩ რე, ართო ტიბ დო გემუან. შუმა უ ორს. ჩილს უძახ, ღვინ ქო მარულევა. გვერდ ლიტრა ონტირაშე უღუნ ფერ შუშაშ კულას გითმიობუნს. მა ვარიას გივორექ. მი გირჩქილე. აჯამუშო მომირე: ვარა შუმა, ვარა ღურა-ვა. მარზენს მუშ ლანდღვე ჟოგუშის დო ფუშანს. უკულ ბჯუნუნს დო ფხვამანს. ორკოლს ხეს გითმუჭირინუანს დო მა მიმნტებუქ. ხვალე იშ უდეშე ვარ. ჟაშხა რე დო მიმნტებუქ. ჩქიმ თურკათას, ჩქიმ ზისხირს, ოდღახურ ოხოფანცალო გოფშა კუნთხუს იპტენქ დო მიმნტებუქ, დო ბჯოგ ჩქიმჯგურა მანტენჯეფ. ვაგონშე მუთმუვოკინდუა თოლს ჩქიმ უდეშ აბარწას, ხეს მივალუანა უდეშარეფინ დო მუჭოთ ირონ, ასე ხოლო თხირიშ გურიშ მაფშხვა ჩილამურიშ კაკალ მიხოწუნს გიმე ღვას. ითამ თეთ გიშმეპიდენქ ცოდას. გინმოპკვათუნქ ჩხოუშიას, ჯუმს, ხობწყარს, ც ის, ტეხირს, ნოღელას, აბაშას, ცხენწყარს დო უკახალე დოსქილადირ ართ ტკუ დიხა მეტებულ ოროფილცალო ეკმოძახანს: „ვა გი ორქო მა, ვა მორწონქო მა; იშენ ქო გორლუაფუდა, სქანი ჭირიმა“. ეკმოძახანს დო ფურიალეს გილაცაცილ ჩქიმ შურიშ შქაბანს დინმოძახანს. გივი გ. ქარჩავა 2011-შ აფუნ ქართ

07/11/2012

გიორგი სიჭინავა-უკოჩობაშ კოჩეფი

უკოჩობაშ კოჩეფი
გვალო ბრელი
ოფეთ,
უკმელაშე არგამათ
დუდი გეითაჭოფეთ,
დინახვილა ვირთხაცალო
ირფელ აკისოფეთ,
უკოჩობაშ კოჩეფი
მუ სანგარო
ოფეთ.

06/11/2012

გიორგი სიჭინავა-აჸონება

პოპორც მუ არზენც ჭყანას,
წყარ ეშე ეთმოწენცნ,
გვალა ქარწყენო გვალას,
ჭვემას ქუჩქუნო ჭვენცნ?

ქარაგადენო მითინც,

მუ შარათ მოურც აფუნ,
ვარა მუ ოკო ნირსის,
ნდოლოეფს მიწიფაფუნ?

მი უგანც ორთას მარდის,

მაფალუს ცუნდის ჩანცნ,
ქაგინნო ეთი ვარდის
ჰამო შურც გაფურკანცნ?

რჩქინა ქოძნო სოთინ,

მუთუნც ქუჩქუნო მუთუნ,
მი მიწინც სოლე მოფრთინ
დო ვარა სო მეურქუნ?


პოპორც მუ არზენც ჭყანას,
წყარ ეშე ეთმოწენცნ,
გვალა ქარწყენო გვალას,
ჭვემას ქუჩქუნო ჭვენცნ?


05/11/2012

გიორგი სიჭინავა-მაფშალიაშ ჩილამური (ტერენტი გრანელს)


სქანო უჩათ მუკობუდუ
ჩხანა რენ დო თუთა რენი,
მასმა რინას მეგორუნდი,
სი შხვა გოკოდ მუდგარენი.

გემნანჯიო ეთი კარი,
ოშურეთის გილაბუნი...
სო შაყარე ათეზმა
მაფშალიაშ ჩილამური.



04/11/2012

გიორგი სიჭინავა-აფუნც ვაგაფალ თხუმუს

აფუნც ვაგაფალ თხუმუს,
დალახებე დო ხუმუ.

იქილე,მაღალ ჩე ჯას
წკუმონტილ ფალეფ მეჩანც.

ილიებ თინეფიშ დღალეფი,
გერნელო ღურუნა ჯალეფი.

ბადიდი ოსინთეს ონჯანც,
ჯას უჯინე დო ონჯარ.

03/11/2012

გიორგი სიჭინავა- რჩქინა

დიდი რჩქინა ქუა რე,
ირო დუდიშ ჭუა რე.

ჭიჭე რჩქინა ქექე რე,
ვეგეხე დო ვეგერე...

შორშა სოთა ანტინე,
მარა იშენ ცხვანტი რე.

02/11/2012

გიორგი სიჭინავა-დოხორეს დაჩხირ ქუმონტებ

დოხორეს დაჩხირ ქუმონტებ,
კიჟინუნც,რჩხვიანც მიდგარენ,
დარხირ ჩილამურით ვეშქირიტე,
ტყურათ მუშო გოკო ინგარენ.

ალი ეშე,ცაშა მიპოპორ,
კიდალეფც ნაცხაცხა გატყვაცანც,
უბადო შორშე მიოჯინე,
ფოთქვის მითოხე დო კარკაცანც. 

01/11/2012

გიორგი სიჭინავა-შხვანერ მაფუდ ორთა

ბაღანობას შხვანერ მაფუდ ორთა,
ვამოგინუდ მორკება დო ძინა,
მოხიოლდ ახალ თუთაშ მორთა,
დო უშქირატ მურიცხეფიშ ჯინა.

ასე მუთუნ ვამენარღებ შხვაშო-
უდე,ფარა,გურაფა დო რჩქინა,
ხვალე კინე დმართუდას აშო,
ჭიჭანობაშ უსქვამაში რინა.

ლაშა გვასალია-ფხოსარე დო ბჟას ვონჭუქ

  ჩქიმ ხოსარს მუ ოხვარ გურჭუელო ერჩქინელს, უჭარ ლერსიშ ოფუტეს მუნაფეფშა მერჩქინელს... "ძია ბძირ დო კაკა ბძირ" აგოთანაშ ეზმოჯეს, ბო...