გივი ქარჩავა-ჩე გოთანა

გოუსქვამებუნა ქართიშ ვაგზალ. მა მუთ ქოფშუნ თაშნე გოვარვალერ დღას ვა რდ. ჩქიჩქობუაშე ქართის მითიპკილოთუქ დო ჯგირო ფშუ, აკა სამანჯელ მიღუდ, მუშ გეშა ვაგზალშა გიშულა მოხიოლუდუნ - უდეშე ძღვინით გოჭუჭატელ ლაგუჯის მიჯღონანდეს დო მინშა ლაგუჯის მუშ მუმაჯღონალ ხოლო მა უნუდ. სიტიბა მუმაკათუდ. ნანაშ კიდირშე ეტყაბარელ ჩქიჩქუშნერო, შქირენით მორთომაფილს დო ღიაფით ნდღულაფირს კინე ნანაიაშ კიდირს მუჭოთ წურბელა მუკოჭაბილსინ თეშ... შურიშ ინოხ სოთინ დუტე ქო მაპალუდუ-და ყორყელს ღიჟეთოფურგითნაწიმაცალო მიტიბუდ ირ აკან. ოსხირიშ გითოხვამუაბორჯის კაბერჭის გეცუნაფილ ცუხიშორზაშეცალო ბნდღულუდ... ერზამილ პაპროზიშ ღერეფით გილეფხაჩქუნდ ქართიშ ჩხურუთ ციცინაფილ ლერჩქვეფს... საათის გივოკიკინანდ ირ წუთის. ასე ვარ ასე. მუშენ ვა მოურს მუშ ბორჯის. წირკეშ ღალირ იშ დუდ დო მუნდ, ქო მოურს აბა სო ურს. კინ ციფერბლატის გითმიოწენს ნაკაკა თოლიშ შქირენულ რზამა. პაპროზიშ მაჟირა ღერ ბარგუნს, მასუმა მაჟირანს ლერჩქვეფს. ეხანობას, სხულიშ გინნაკვათაშა ვინგით გერაგვაფილ ოქირსეშორო რკიანს მუდგარენ. მოურს! მოურს! შულადა დო მერთომაფათ შვაპილ დუც ონდო ჩქიჩქუობაშ ჰამო შინა გაფაფუდუნ, რანწკის კათაქ გამაკორდ, აწიკინ დო შუშას მელე კომპიუტერს მუკოხუნელ ჩეშმან ცირას ქავოსქიდ  ჯუქურო. პასპორტ  დო ფარა ჭკირილშე გემთოვუსეტელე დო გიწოღალას თიშ ხოწილ კითეფიშ სიტიბას ქაშქირტ ჩქიმ ბუძგურიაქ... დუც გიმე გიმუკინ დო აწნარცხონა თუმაქ ოგვერდაშე ჩხვინდიშახ პიჯ დოუფორ. მუჭოთ ჯიჭონიშ გოგვიგვილერ ალეფქ მუშ ქვინჯღალ შქა დო ჯინჯისინ... ონდო ბილეთის გიშმაჭარუნდუნ დუდშა ვეუკინ. კითეფს კლავიატურას უხაკუანდ ჯაშა ღვენწკმიშახვილაფირ კიდუცალო, ნინა ჟინ ლერჩქვიშა მუნუძუდ დო გვერდო ფორილ აფუდ. ბჟაშ კიდირშე მუკნაჭვალა ჩხანათ გოზიზინაფილ, ყუნწმეხარცქილ დო დიხას გეფაშქაფილ ლაგინძია ჯამკაკალშა ქო უგუდ თუდონ ლერჩქვ. ოხვამეშ ძეკვენეფცალო გოთოლირ  ვინგ დო ყორყელ  ტყარ ტორონჯიშ ნინძგიშფერო უჭვიანდ დო ექი-აქო ჭუჭელეშ ნაცხვაცხვაცალო ჩინჩანა ფარაშ მაფართა-მაფართას აფუდ ეჭითინაფილ. ორქოშ ჯვარ გიობუდ, ქვერსემ დო სქვამ, დახე თიშ მადიდა ქო რდ, ნამდა ჯვარიშ დუდ გოძღოძღოწკუმა აჭყაფუდ... ჯვარიშ ქვინჯ, სოდეთ ქირსეს მუშ გელისმარელ კუჩხეფ მაზაკვალიშ ხოკოშა მუნუძუნ, ძუძუეფიშ ღარდაჭყაფუშა აშუსვანჯუდ. წყინწყარპიც, სობოგა დო ჯვეშ ხიბლას ბაღანობას შინკას იფხირდითინ თიქ ქუგმაშინ  უნელო. მონჭანუა მიშატყურაფილ ბიაშფერ, წყინწყარპიჯიშ 2 სვეტერია დო წიწინაფილ შინკა ინუ ვინთუდ რკინაშარაშ მოხანდეშ ჩე ოთანთანალაია მუკოქვენჯიშა... დიო ხოლო ალსამეთიშ ბაღის დუნარზემ  ალდაჩხირ  ინაბარბანჩუდ  ორქოშ ხეშე გიშნაჭახნაკა ძუძუეფშა. ფეთქუნდ დო ინარა ვალუდ პუტარგით გოპულატირ დადულ კალმახაცალო... - ა, პატონ  , მიდეღითია, - მიწუ დო ბილეთ  გეგთმოჭირინუნ, კვირკვეს ნაფართხა უმურცალო ქუგმოცუ ჯამკაკალქით, ტყარ ტორონჯქით, ბიაქით, შინკაქით დო კალმახაქით. მერქაშ მამალას დიფრთ  თექიანობაშა დო მიდგარენ ოსურქ ოჭიშის ხე ქიგემთვათვ  , მიმაშქვით ბილეთშავან, გვალო გაგშაპკურცხ დო დოპკვარჩხანე. ქართიშ ჭუხის მეფხარუნქ ირანულ დო ფრანგულ შურამიათ გოზიონთილ შოშეს დო ჩქიმ პაპროზიშ მაშქვიდაია ფურკის ვუკუმუანქ თეშით ხუთილ ჰავას. ბაბაღუზეთ ვორექ ნაბტან. გურ მონკათ უზუმპუანს ოგურეს, შურიშღალას მიკმოპჭირდუქ, ნასინჩხუცალო გუმორზანს. გავრიშორო ებუძოლაფირ ვორექ. აფუნ რე. აფუნ დუთმოდირთუ დო ფუნას იჭყანს შურიშ ინოხ. მაჯერღვია იჭყანს ასე ეშულას. ჩქიმ ანგაროს ფალუნს მაჯერღვია, ოთხირეს გინიშ ჯღონჯღო. ჩხონაფილ ჩქიმ ბებ წვანერს ორთუდ თიშის. კალიაშ წვანერს ახაზირენდ ხოლო, ხალირ თხირით ეზადილს. რკინაშარას მელე-მოლე ოძიგირე მოუძ დო თექ გილაპ უნდ მა კალიაშ ოწილუშა. ეკი დო დიკი მიბლენდით თოლონჭეშახ დო აკა ჩახვია ემაფშინედეს-და, ხიოლით ცას ვონჭუდით. ცხვარე დო ნწარე ელაჭკომაფუშ ზადუაშე თელ საგანოს შინელ რდუ ჩქიმ ბებ. სუნელს კაკუნდ  თიჯგურას, ტაბაკის თიშ დო ღუმუშ მეტ ვა გიღუდუკო მუთუნ გილადვალარინ, ვა გეონჯღორებუდ. ძღაბალობაშე უქომოჯნეთ დოსქილადირ, ქომოლიშ საქვარსით გეგაფილირდ, ღვინს დუთმოდგუნდ სქვერიშ ზისხირჯგურას, ორინჯ დო მაფურინჯეს ულუანდ ანდას. კიფერიშ ჯინს კველას გეხედ  დო ხაშილ ჭუჭელეთ ოდიარუანდ  ჭოიეფსინ, ამდღარ დღაცალო ფშუ. მა ხოლოშა ვემვოთინანდ, კითის მიცვანგუნდეს ჭოიეფ დო მოშქურუდ ღურუსხის. ოკუჩხანეშე ათოვუჯანუდ ბების, შხვადო ვებნჯირუდ სოთინ. ონჯირეწკუმა, კიდალაშა ხატ მუკუბუდ, ჯეგემარა დო ჩქიჩქ ქირსეშ ხატ. ართ დუცხე ქიცა უღუდ, დღაშ დო სერით თინა კინაკირუდ. ოჭუმარეს გამწოდოხოდუდ, ხატის ელაჯინედ დო იხვამანდ. ათე წუთის ხოლო ალმასიმე თიშ მარგალურ ხვამა: „ქიანაშ გორჩქინუ ღორონთ დო მარდიან, სქან ოროს ქუგობლუაფუდა, ჩქიმ სქუა დო მოთას, ჩქიმ დინოს, თოლსინთე ქიმეჩ დო ირნერ ჭუაშე ირსხ. მა თინეფიშ ჯგირობუაშა ქაშმოჯინე. უბადო თოლით მაჯინეს, მითინ ქო რე თეჯგურა-და, თოლ გელუწკურ დო ქვარა დუფშინე.“ ათეს თქუანდ, პიჯვარს გეგლიჭარუნდ დო გედირთუდ. ვანაფერო ჩქიმ ბებიქ მითინ დოჭყუკონ. თეშით შურუქალ ოსურირდ. დო, ვა პჭყენქია მა მითინს, თქუანდ. ჭყალა ვა შინერისა დო გინოჩამა, მითინ ოჭყალ ქო რენია-ვა-და ირ ღორონთიშ ოჭუმარეს ხატის ვოხვეწუქ დო ვახვამანქია დო მოჯგირე დო მოუბადეს თინა გეგშაგორუნსია. გერგობათუთას დოღურ. ჩქიმ გეშა პიც თუმა ვა მიჩანუა დო გობურძგონილქ ვა გილეძგვიბინუა-ვა, დომჩინ. მუშ ეკონია ხვამა ხატის ქატუ ანარკიაშე ჰამოთ ელნამბარა მასქურცალო. ამსერ უდეშა მევურქ. ბებიშ ჟარნეჩიშ უკულ ვა პოფექ სამარგალოს. ბაბა დო ნანა თექ მიწონებ. ჩქიმ ნაკვაჩხირჯგურა დაია. ჩქიმ ჯაბუნაკიშორ უდე. ჩქიმ ატამეფ დო სხულეფ, უშქურ დო წყი, მარსინაია ხვიმა დო ჩაფულა ლუღ, ხოჯიშთოლიშ დო ალადასტურიშ ღულა-ღულა ჯინჯეფ, ანდაშა წილირ დო წილოხირ, ანდა მეშარე დო მოჯგირეშ ოსხირსმელე ბირა-სხაპუათ გინმაზარებელ. ლეკეფიშ ორხაგუცალო გოჭარჭულერ ორტვინ მიწონებ. ჩქიმ ჯოღორ მიწონებ მუშ ყვაყვალა ლაკვწკუმა, დო ჩქიმ ქაბულა მიწონებ. შურ მიწონებ, ჩქიმ ბაღანობაშ შურ, ჩქიმ არკვანს, ჩქიმ ნორჩალს, ჩქიმ უდეშ კიდალეფს უნთხანსინ თი შურ. ჩქიმ ოზეს ოხვამეცალო კუმაფილ მარენჯობა დო შურდგუმაშ შურ. ამსერ უდეშა მევურქ, საბატონ-ჟაშხას გიმაცადებელო. მეტ ვა ფჩოდ. მარა თენათ ბლეცერანს დო გურს მირდუნს. ჩხვირკიშქვარაშფერო აკოსერილ ქართიშ ცას ელვოკიკინანქ დო კინ პაპროზით გილმეფხაჩქუნქ ლერჩქვეფს. *** ვაგონშა გემთვოსერგელე ჩქიმ მეკონეფ. კოჩიშობას სოდომ დო გომორ მიკნაველ აფუნ, ათაქიან შურით მეხვადუქ. ბგორუნქ ჩქიმ კუპეს დო ჩქიმ მეკონეფს გილახვენჯიშ თუდო მითვოქვირსანქ. ართ ნოშქერქილიაჯგურა უჩა ოსურ მითოხე დო მეჩხორიეშ ხალირ თასეფს ხვატუნს. ტინტილაჯგურა თოლეფს აჭი-დო-გაჭით უმარმალუანს დო ნარჩაშე ე უნაფილ ქუდიშ წვანდიშახ ბზიმუნს. მა გალე იბჯინექ დო შურ მოლ აყარებაშა. ჩქინ კუპეშ გიმალწკუმა რხინაფილ ბადიდ ალარე. ღვანწკ დო ვინგ თეშ აფ ღვირნაჭკილ, ნაწყარუშ გეშა ჭიფა-ჭიფას გუნახარცქა ლეკშა მოუგენს. ჩხვინდ გეჯღვალიკერ დო ტერტე. კიბირ  ვა გიაპალუდას ოკო სარალოს დო ჟინ ნოლ  დო ლერჩქვ  ოშმეშამო მარჭვაშა დინუსვანჯ. მუჭო გოლოფაშ გეშა მესქირაფილ წყარ ღარს მოკათაფაბორჯის დიჭყანს თხირთხინ დო ხირხინსინ, ეთეშ თხირთხინუნს, იცანცალ  , უზინდუანს დო უკილოთუანს, მარა მუშ ხვალიშ ეკმაღალარო ხოლო ვერგ, გიოხე. უნელო, შქახანიშ ჩხეშაგოთვითვინაფილ ოსურ  ქო მადირთ  დო, თოლგითოწკურილო, კანდიორო ალარაგადანს, მიკმაშქვითია აკა პატონ. სარკოს ვორწყექ - თე გოფშა ოსურიშ ძირაფა დო რხინაფილ ბადიდ ბოშკოჩო გინმირთუ. თოლეფ ურწკინუნს. მუმულცალო ჩირღონდუ. გითოღალირო ელუძიცანს გოფშა ოსურს, კოსტუმიშ ძგოპის მუთუნ ტანგოშ მასხაპალცალო ფიორით კინუკინანს-დო, მოზოჯითია - მიკმაშქვანს მეშარეს. ბადიდის მაბოშიაშ გურ ალაძ. ათე ბადიდიშ გურიშ უჯგუშო მითინს ვეიასხუნე ქომოლიშ თექიანურ რინაშ ფილოსოფიურ სმელენჯეფ. ჩქიმ კუპეშა ართ ეხომაფილ ოსურს ჭოკაჯგურა მარდუკოჩ მითმაზარენს. ოხვარ. ქორთულო რაგადანა. მარა მარგალეფ რენა, აბაშარეფ, გიოხე ჟირხოლოს. აკოტახილ ქორთულით ეთმუნწყუნს ოსურ  მუშ ჯიმასქუას, ჩქიმ დორთაშახ მუთუნ ვა გილალუა-ვა ბინას. ჭიჭე უმოს გიშათინილ, მარა იშენით აკოლაბარსელ ქორთულით გამენს ჯიმასქუა, ვა გაშქურინასია. გუთმაჯუნუ დო იტენს. ჩქიმ კუპეს ხოლო ართ მეშარე შარენს. ზერზელია დო გვანილ კოჩ, წალენჯიხარ რე. შუმილ რე დო მუდგარენ ლაგარდე კოჩიშ მეჯინა უღ. თენა ხოლო ქორთულო იჩიებ. იჩიებ ვარ, იკილოთ დო ისოფუ, მარა ვა აკანწყუ მუთუნქ. მა შურიშქალ ვა მაფ. თუდონ გილახვენჯიშ ბილეთ მიღ დო ვუჯინექ მუჟამ ეშეხირხოლუნა ჟინ, შულადირ ვორექ დო დორულაფა მოკო. სუმხოლო ჭკვაპალანა მუდგარენს. სუმხოლო ქორთულო. თე აბაშარ ცაგანო ელმორაგადანს, ჟიშე დონჯირელს მარსიოლუაფუნია. მა თოლ უჯის ვა ვარზენქ. ოსურეფ ვექანცუნა. ასე გეხენა დო უჯინენა, დაბა მუჟამს გითოფჩანს ჩქიმ ნერვეფ დო ჟინ გილანჯირალშა ეშაპცო უნქინ. მიარე ხანს ა ის ოჯინექ. კინე მუქ გეშეხირხოლ. ასე ჟირხოლო გურმოულირ რენა დო ჩქიმ სა ალეშ ჩიებას იჭყანა. მარგალ ქო ვორექინ ვა ოგონუნა დო გინილეს მარგალურშა. ბერიას ფულირ ნინათ უღუდუა მარგალურ  დო ლემენცეფწკუმა ლიმაბორჯის ოტყვინაფალო მარგალურს ხვარენდესიავან, თი ამბექ ქო გუმაშინ ხათე. ტყობინ დო ფულუაშ ნინა რენო მარგალურ? სა ალეშ გითარაგადალ? მემჩქუნდა ვარ. გითვოჯანუქ დო უჯხირზელო ვურჩქილექ მუჭო ეთმოპჭარუნან. ამდღანერ ახალობას მუთუნ კილ ქო უღუნ-და, სერიალეფს დო „დემონკრატიას“ მუთუნ გლახა ქო უღოლამუნ-და, ირფელ ართო მა ქუმკმოჭარეს. სერიალიშ ალა ოსურეფქ. მა შურიშქალ ვა მაფუნ, დასურო ვა ნოჩქვენია ეს ჩქინობურა-ვა-დო, ოჩიჩალო გახაზირებულ კოკუშეფცალო გოფაჩეს ფსუა დო კუდელ, ფურცქინშე რდგაბალშა გინილეს. უნელო ჩქიმ ტელეფონქ ქო მიორანწკალუ. მარგალურო. მარგალურ ბირა დინომჭარ დო თის ურწკიალუანს ირო. გეპჭოფ დო ქო დოვურაგადე. მარგალურო. ჩიება გავასურ დო ეიბჯინინ, თე ოსურეფ ეშ მაფართა-მაფართა თოლეფით ქომიკიკინანა. მუჭო ქო ბძირეს დო თიშვანს დიტყობეს. გოსისონდეს და მა ხოლო ქო დუმარულ. ცხენწყარ მინიბლით დო გუმაკურცხინ. გეიფხაბარკ, ხე დო პიჯ გამწიბობნ დო ხათე პაპროზის ქო მოვუნტე. მისერგელუდ ანაყუ ვაგონმობუნაფილ მანქანა, ჩქი მახინწალ მიჯოხონან თინა. მიშ დო მეხინწანდ ლურენჯ კათას, თე კათაშ სისმარეფს, თი სისმარეფიშ ჰამოს დო ჭუას დო მუს ხოლო აჭუდ პუხუს. *** ვანაფერო მიძირ თეჯგურა ოჭუმარე ჩქიმ ოფუტეს. ფორონჯიშფერო გოთანელ, ცაშე რგილ დო ჰამო შურიშღალა გიმოუღუდ დო დიხას ნირსის ო არშანდუნ ფერ. მიფშ უდეშა კუჩხით, დიო ხოლო შქაგვერდო გოთანელ ოჭუმარეს დო ლურით ჟიჟინაფილ პიჯ ურთაშ ოფარეს მუკოკვენწელერ გუმათანე მურიცხშა მემიჭოფუდ. ნანაშ გურ შხვა რე გვალო. პიჯშე ზიტყვა ვეკობლაფ, საბატონს მოვურქ მაქინ, მარა ტანშა ქო უგინაფ, გოთანაშა გეუდგინ, ყებურს დაჩხირ დუბენებ, წყარ ქუგვარგვალუაფ დო ამარ, შარამიოლს ქო მუმაზად. ბაბაქ ხოლო ჯვემაშ ფუთქაფით გეგმორთ დო ქო გუმაკირეს ჟირხოლოქ. ჯოღორქ ვა აწოფხვადუნ, გიფჩაკვირე, დღას ვა გიხვილუნა დო სო რე, მუშენ ვა ლალუნს-მაქ. - ჯოღორქ ულირ საბატონს მანქანას ქათასხაპუა. მიწუ ბაბაქ მორდებულო. მუშ ნა ვილა რდუკონ თეშ. გურს მუდგარენქ ქალმანწკირ ნაჭვემერ დო ნაგოლოფა ყამბარცალო. უდეშა გემნოფრთ. ნაჩინებ შურქ ქო მარაგ. უკახალე ოზეშა გეგმოფრთ. ნაჩინებ შურქ ქო მარაგ. უდეშ უკახალე ვით წანაშ წოხლე ჩქიმ დუნარგუა ჭყონს ქავოკინდე თოლ. მორდე დო გოფშაფე, ტან დოსქუ დო დოგიროხუ. ჯერღვ გამანგარებ. ხასილაშ მეძობელქ გამნმაკათ ხათე. ქო გიობია უწუ ბაბას დო დოფხვამუ. ქეგთიგურგინუ სქვერიშ ზისხირ დო ბირგულშა გოფაჩილ ხე ქიტკატკ - ა , ანწ ონჯუაშახ ჩერიაცალო იპკიონტუქია მა. გეიხირხოლ დო ბირა-ბირათ მუშ ოჩხოულეშა ქიგნაჭკირ. დაიაქ გოკურცხ. უნივერსიტეტიშ გამორსაშო იხაზირებ დო ინგლისურს გურაფულენს. ქიმმეხვარია. ვოხვარუქ. ინგლისურს გურაფულენა თიშ მახანეფ, ართიანიშ ორაგადეთ ქორთულ უღუნა. მარგალურ ვა რე მოდას. ნანა ჩახვიაშა ღვინს, ოჭკომალს დო ცუხიშორზაშეს დინმომინწკარანს დო დაიაწკუმა ართო სასაფლაშა მევურქ. დოპუნქ არძას დო სქვერიშ ზისხირით ვუჩხაპუნქ გურპიჯის. ოდუდალე ქუას გითმიოწენს ნდღულაფირ ცუხიშ ჩხე ჩილამურეფ. ბაბუ დო ბებიშ ოდუდალე ურე ჟირხოლო ორზაშე შქირტუ. იპუცუქ დო ბაბუშის ვუნტენქინ იზმახანს ბებიშის მუშით ეთმიანტებუ. უჭყანიე ჩხანა გიმაფარკალ დუც დო ბორია იწარწალ. დაიას ვურაგადუქ, სასაფლას დინორენ თი ხანგა ქო მიგორე აკა, ოჭკომალ ქო დოვუტუათ- მაქ. დოღურუა იქ. ზოთონჯის დო ზარხულს კუჩხუჩაფულე გილეშ  . მუშ უდე ქო გიოფარფალუ დო მიდგარენიშ გინორთვილ სასაფლას გითოჯანუდ. გათებე სარალო. იშ დუნანჯირა აკან გოუქვარქვაშუნა დო ასე ცას მიკოჭაბ ხანგაშ შინა. სოთინ ვა რე მეტ. მი ორს სასაფლას დინოხუნა. თაქ გოუხვადუქ ანდა საღორონთო დუნაზუკოლას, მეტ სოთინ ვარ. დიხაშ ჭყანას ხოლო, ვანა დო ორტვინიშ უმოსო თაქ იგინანქ. დიხაშ გუმარჩქინე, მადიარაფალ დო მაჩუალარ ჭყანას. თაქ იგინანქ დიხაშ უნტუარობას დო დიხაშ აშხარობას. მითაჟამიშ გოზიორილ ოდუდალე ქუალეფს დო ლეყეფამ ჯვარეფს ვართ წანა მუკოჭარ დო ვართ ნაჭარა ეშეკითხირე. მი ათუნთხორ თე ქუალეფს? მითინს ვა შ. მარა თი კათა 100, 200 დო გოკონ 300 წანაშ წოხლე ჩქიმცალო გილაბაჯგანდ  თაქ დო ჩქიმცალო გაჯინედ ჯაშ ჯინს გითონთხორილ მუშ წიმოხონეფიშ ქუალეფს. ამდღა მა გილვობაჯგანქ. მიკილენს წანეფ დო ჩქიმ ფუთქურამ ქუას ხოლო გაჯინედასი უაფ მიდგარენ. დიხაუჩა ირთანს. ქიანა გვარგვალანს. დო მუთუნ ვეთირუ. უდეშა დორთელს გონწყილ ტაბაკ დუთმოფხვადუ. ღუმუ, ვალ, ლებია რკვანილ, ლეჭკერე, ქოთომ ჭვილ დო სქვერიშ ზისხირ. მეძობელს შურ ონთხ დო დუც მინმორე კინ. იხვამანს, შუნს დო მეურს. აკოსერუაშახ ხოლო ართ ჟირშა ქაჭიშუანს თაშ. მაჟირა მეძობელ მოურს. ოსურ. ტაბაკშა ვოპეჯუქ დო დუც ი ვილაფ. მარხვას ვორექია. იპიჩანს. ამარდე, ხუთ თუთაშ წოხლე ნაღურა ჩქიმ ბებ თაშ თქუანდ: იპიჩანსია, პიჩვანს გერენია. ა , თე ოსურ ჩქიმ ბებშე 20 წანათ რე უკულაშ დო მა ძიუთ გუვოშინ თე ზიტყვა. მა ვეპიპჩანქ დო განგერებულ ვუზვირთუანქ ჭითა კვარწახის აშაწაწაფილ ჩელაია ხორცის. მუთუნ ვა თირე თაქ. კინე ხაჩქუნა, კინე ბარგუნა, კინე ტახუნა, კინე ქუნა, კინე ჭყანჭყუნა, კინე შუნა, კინე ნირზენა, კინე ლა აფენა, კინე ოგორანა, კინე ონდურუნა, კინე უ ორა დო კინე ჯოგუნა. კინე ართ აკანს გირსიოლუნა დო დიხას ჭაბაკანა. ახალს მუთუნს ვართუნა. მანგიორ, ჯვეშის გითმიჭყოლიდუანა. ოსოგოთე თაშ ოფე დო თაშ ი უაფ. მა გურ პჭყორდ დო თეშ ვიშო მუთუნიშ მოღე ვა ვორექ. ჩქიმ მეძობელ მივალუანს ხეს. მინილია. რჩინ კოჩ რე, ართო ტიბ დო გემუან. შუმა უ ორს. ჩილს უძახ, ღვინ ქო მარულევა. გვერდ ლიტრა ონტირაშე უღუნ ფერ შუშაშ კულას გითმიობუნს. მა ვარიას გივორექ. მი გირჩქილე. აჯამუშო მომირე: ვარა შუმა, ვარა ღურა-ვა. მარზენს მუშ ლანდღვე ჟოგუშის დო ფუშანს. უკულ ბჯუნუნს დო ფხვამანს. ორკოლს ხეს გითმუჭირინუანს დო მა მიმნტებუქ. ხვალე იშ უდეშე ვარ. ჟაშხა რე დო მიმნტებუქ. ჩქიმ თურკათას, ჩქიმ ზისხირს, ოდღახურ ოხოფანცალო გოფშა კუნთხუს იპტენქ დო მიმნტებუქ, დო ბჯოგ ჩქიმჯგურა მანტენჯეფ. ვაგონშე მუთმუვოკინდუა თოლს ჩქიმ უდეშ აბარწას, ხეს მივალუანა უდეშარეფინ დო მუჭოთ ირონ, ასე ხოლო თხირიშ გურიშ მაფშხვა ჩილამურიშ კაკალ მიხოწუნს გიმე ღვას. ითამ თეთ გიშმეპიდენქ ცოდას. გინმოპკვათუნქ ჩხოუშიას, ჯუმს, ხობწყარს, ც ის, ტეხირს, ნოღელას, აბაშას, ცხენწყარს დო უკახალე დოსქილადირ ართ ტკუ დიხა მეტებულ ოროფილცალო ეკმოძახანს: „ვა გი ორქო მა, ვა მორწონქო მა; იშენ ქო გორლუაფუდა, სქანი ჭირიმა“. ეკმოძახანს დო ფურიალეს გილაცაცილ ჩქიმ შურიშ შქაბანს დინმოძახანს. გივი გ. ქარჩავა 2011-შ აფუნ ქართ

სახარება, გურიმოჭვე მუმა

გიორგი სიჭინავა-უკოჩობაშ კოჩეფი

უკოჩობაშ კოჩეფი
გვალო ბრელი ჸოფეთ,
უკმელაშე არგამათ
დუდი გეითაჭოფეთ,
დინახვილა ვირთხაცალო
ირფელ აკისოფეთ,
უკოჩობაშ კოჩეფი
მუ სანგარო ჸოფეთ.

გიორგი სიჭინავა-აჸონება

პოპორც მუ არზენც ჭყანას,
წყარ ეშე ეთმოწენცნჷ,
გვალა ქარწყენო გვალას,
ჭვემას ქუჩქუნო ჭვენცჷნ?

ქარაგადენო მითინც,
მუ შარათ მოურც აფუნ,
ვარა მუ ოკო ნირსის,
ნდოლოეფს მიწიფაფუნ?

მი უგანც ორთას მარდის,
მაფალუს ცუნდის ჩანცჷნ,
ქაგინნო ეთი ვარდის
ჰამო შურც გაფურკანცჷნ?

რჩქინა ქოძჷნო სოთინ,
მუთუნც ქუჩქუნო მუთუნ,
მი მიწინც სოლე მოფრთინ
დო ვარა სო მეურქუნ?


პოპორც მუ არზენც ჭყანას,
წყარ ეშე ეთმოწენცჷნ,
გვალა ქარწყენო გვალას,
ჭვემას ქუჩქუნო ჭვენცჷნ?

გიორგი სიჭინავა-მაფშალიაშ ჩილამური (ტერენტი გრანელს)

სქანო უჩათ მუკობუდუ
ჩხანა რენ დო თუთა რენი,
მასმა რინას მეგორუნდი,
სი შხვა გოკოდ მუდგარენი.

გემნანჯიო ეთი კარი,
ოშურეთის გილაბუნი...
სო შაყარე ათეზჷმა
მაფშალიაშ ჩილამური.

გიორგი სიჭინავა-აფუნც ვაგაფალ თხუმუს

აფუნც ვაგაფალ თხუმუს,
დალახებე დო ხუმუ.

იქილე,მაღალ ჩე ჯას
წკუმონტილ ფალეფ მეჩანც.

ილიებ თინეფიშ დღალეფი,
გერნელო ღურუნა ჯალეფი.

ბადიდი ოსინთეს ონჯანც,
ჯას უჯინე დო ონჯარ.

გიორგი სიჭინავა- რჩქინა

დიდი რჩქინა ქუა რე,
ირო დუდიშ ჭუა რე.

ჭიჭე რჩქინა ქექე რე,
ვეგეხე დო ვეგერე...

შორშა სოთა ანტინე,
მარა იშენ ცხვანტი რე.

გიორგი სიჭინავა-დოხორეს დაჩხირ ქუმონტებ

დოხორეს დაჩხირ ქუმონტებ,
კიჟინუნც,რჩხვიანც მიდგარენ,
დარხირ ჩილამურით ვეშქირიტე,
ტყურათ მუშო გოკო ინგარენ.

ალი ეშე,ცაშა მიპოპორ,
კიდალეფც ნაცხაცხა გატყვაცანც,
უბადო შორშე მიოჯინე,
ფოთქვის მითოხე დო კარკაცანც. 

გიორგი სიჭინავა-შხვანერ მაფუდ ორთა

ბაღანობას შხვანერ მაფუდ ორთა,
ვამოგინუდ მორკება დო ძინა,
მოხიოლჷდ ახალ თუთაშ მორთა,
დო უშქირატ მურიცხეფიშ ჯინა.

ასე მუთუნ ვამენარღებ შხვაშო-
ჸუდე,ფარა,გურაფა დო რჩქინა,
ხვალე კინე დჷმართუდას აშო,
ჭიჭანობაშ უსქვამაში რინა.

გიორგი სიჭინავა-ბარცხინდია

უჯიშე დო უსქვამელა,
აკაბურცხა გიძიგვინა,
დიხას ონდეთ ეშარჩქჷქჷ,
ვეშეილებუ ეწოძინა.

კოჩიშ სქუას ვახიოლჷ
სქანიჸურე მუკოჯინა;
შურ გიდგ მარა მუშო გოკო
ათეჯგუა ჭყელი რინა.

გიორგი სიჭინავა-მუ ოხვარ

ქომწი, მუ ოხვარ ქართის

ათე ტვინ აკოხართილც.

მუდგა სანგარო ძირას,

ვემნოტებუე ბირას.

მითინც ვაურაგად მარდის,

მუშ დუც უწილჷნც ვარდის.

ირო ულა უჩქ მანგას,

ჸვერეს დო ვარა ხანგას.

ათაქ კურდღელ დო ქოთომც

მუშ დუდ გერგეზო მოთონც...

ქომწი,მუ ოხვარ ქართის,

ათე ტვინ აკოხართილც.

გიორგი სიჭინავა-ბაბუ დო მოთა

ბაბუქ უწუ მუშ მოთას,

ოგურუანდ რინასჷნი:

-თუნთის ბაბა დუძახია,

მუჟამც გიგორჯგინანცჷნი.

მარა მოთაქ მუკართჷდო

უგამ არზიშ გინაწონც:

-თუნთის ბაბა დუძახენი,

სკუათ ქიმერჩქინანცო?

გური ოტობაია-ეჩდოშქვითი ჩილამური

თქვან დუდიშა მუნომლუაფ ჯაშ წვანჯეფი,
ცაშ ნოტეხეფქ ანწი ვარა თე გურს ხირცქას,
თქვათ გიჩქუნა ჸათე შარა ვარდუ ეფი,
თქვათ გიჩქუნა ზისხირ გოპუნდ არძო ბირცხას.

 

ეჩდოშქვითი ჩილამური გეკვოშქვიდე,
ეჩდობრუო მიხაზირენს, ალბათ, თორსას,
ლერსი, ოკო უკახალე ეკმოსქიდე,
ჸათე რინაქ მუდგანერო ვეკმამორსას!

 

კოლხიდაშე წყურგილშორო გემწოფსოფი,
ჩქიმ სისქვამეს მებეჭუდუ მაბჟალია,
ოდაბადეშ თოლიშსინთე გეკობჭოფი
დო ხურხიშა ქიფხუტოლე მაფშალია.

 

ჸათე გურსუ ღურუშ ორან ჭვეთით ვარზუ,
მარა არძა მურიცხიში ლისმარ გეშქუ,
მუჭო ფიქრენთ – იბთირანქო ანწი გვარსუ,
ჩქიმ შარაქუ ბჟაიოლშე გემწოფეშქუ.

 

მიკმაჭაბუ ირფელ ართო, ბჯოგუ მერკე,
ებდიდორი, ქიპოპობრე, ეკიბლანდღვი,
შურშა ოკო თისხი დაჩხირ ქენიბგვერგვე,
მუსხის ვაგურზ ჩქიმი ბირგული დო განთხი!

 

წანეფ,წანფ,ეკოფხართეთ ხაჯალურო,
ეჩდოშქვითი ჩილამური გეკვოშქვიდე,
ჩქიმცალეფი ვეშქურინე ღაჭალურო,
ლერსი ოკო უკახალე ეკმოსქიდე!

 

ჸათეჯგუა წიმოკინა კოჩის ვაშუ,
ნამს ღურუშფერ ართშა ვარა ვეგნოდვალუ,
არძა ჭუაქ მა ვამავილ მა ვემშაშუ,
გურც ნტყოლირი ლეკურეფქუ ვამათვალუ!

 

ეჩდოშქვითი ჩილამური გეკვოშქვიდე,
ეჩდობრუო მიხაზირენს, ალბათ, თორსას,
ლერსი,ოკო უკახალე ეკმოსქიდე,
ჸათე რინაქ მუდგანერო ვეკმამორსას!

ივეტა წითაშვილი-ჰავა უქაქალუანს

ჰავა უქაქალუანს

ჭვეს, არგამათ ირქენსი,

თეში ულაჸაფუანს,

გუჭყოლიდუ ირფელი,

მუქ რე გუგაჸალუა

ოწოწიას უკვენსი,

ჸოროფასი ფულუა

ოკონია იშენი,

ჰავა ჭვესი გალუაფ,

ათაკირუ კისერსი,

ჭვეს ქაცალი ფალუა, -

ოწოწია იშხენსი,

-სკანი საქმე ვარდუა,

ჰავა მუჭო ირქენსი,

შხვაში სი დღას ვათქუა

შხვაშიშ სი მუს ილენქი,

ასე მეტი ვამწუა,

ჸოროფა რე ირფელი,_

მერეხი დო ვალუა

ურჩქინაფ დო რჩქინელით,

ჰავა უქაქალუანს

ჭვეს, არგამათ ირქენსი,

ოწოწიაქ იშხუას,

ვეიალე იშენი….

ივეტა წითაშვილი-ქომხუტოლე

ქომხუტოლე დო
ჩქიმ გურქ სკან გურს ჯერღვი ქიმკაჸონ,
დომზუკოლე დო
მიკნაჸონას ზისხირქ ქიმწახორცქ,
მიჸორქია დო
ხიოლქ ჭუა გამწას ქიმწაფორჩ,
ბჯოგუქია დო
ჭუაქ ხიოლ კუნთხუს ქიმკაპონ,
დეჯერიაო,
ძიცაქ ნგარათ კიდირს ქიმკახორცქ,
ვამშკურდავა დო
ჩილამურეფ თოლეფქ ქიმკაფორ,
გირსხენქია დო
ნაზისხირას ბაწკარ ქიმკაჸოთ,
გურ მიწყუნე დო
ნარღი ანწი ქუას ქიმკასოფ,
გამმოსკიდიო?-
ეზნახ ანწი ჯეგე მისარონს,
სი იჯინი დო
სკან სანთელო, შხვაქი მიდამჸონ…

ივეტა წითაშვილი-ვამრჩქილ

ვ ა მ რ ჩ ქ ი ლ,
ღირდას რაგად ვარა,
ვ ა მ ლ ი ნ,
ღირდას შარა ვარა,
მ ა რ დ ი რ დ
რჩქინა დუდშე მარა,
თ ა შ ი რ დ,
ირფელს რჩქინა ვახვარ,
ვ ა ს კ ი რ
ნაჭვემაქი აკაქ,
ნ ა ფ ი რ ქ
მუს აჭარე არძა,
თ ა ს ი ლ
ხარენს ხვალე ხვამათ,
ვ ა დ ი ნ
ჸოროფათი ნარგა,
ვ ა ს კ ი დ
გური ნინაშ ნართა,
ა კ ი ნ წ ყ
არძა ჭუაქ ართათ,
ვ ა რ ძ ი რ
გიბჯინი დო აკანს,
მ ა შ კ ვ ი დ
ჩილამურეფ წყარმალს,
ს ქ ა ნ  ჭ ი რ,
მუ გოკოდუ აბა,
ლ ა დ ი რ
ხუმუ, ხუმლა ვაფალს,
ა ნ წ   მ ი ჩ ქ
სო მისოფუ შარა
ვ ა ღ ი რ,
შორშა ულა ვარა…

თენგიზ ფეტელავა-სითელა დო ღურუშ ონწე

ცხვინშე გეგმიბღ ჩქიმი ონწე,

მურიცხიში ვარე მონძე,

დიდაშ ძუძუშ გინნარულეფ,

არტახეფი გეგლაბკონწე,

იკვანწალუ ჩქიმი ონწე,

ბაღანობა აშო მორწყე,

ბონდოიაშ ნოსისმარი,

გურიშ მართუს ქენოწონწე,

ვაგმარზინუ ნტერალაშა,

წყურგილეფიშ,ჸუმენითუ,

ოდაბადექ ვეკმაჭოფუ,

ამდღარით დო ჭუმენითუ,

ჩქიჩქობასუ მეტებული,

ნდოლოეფი მირკიანსუ,

გურიშ მელე ინგირწყარი,

მის უჩქ მუსი მიდიარცუ,

მიშ ჭუებსუ მიდიარცუ,

მუშ სისმარეფც მიდიარცუ,

მიშ ფიქრიში ბოწოწეფრე,

მართუს ენიირკიალცუ?!

მიკვანწალე ჩქიმი ონწე,

მიჩქუ არძა ჭყონი მონწყვე,

ბოლოს არძა ჸინჩი თოლი,

ჸოროფილიშ გურცუ დონწყვე!

მიკვანწალე ჩქიმი ონწე,

მა შხვა მელუ ბორჯი მონჭე,

მინჭუაფუ ჸუნგა ჭუა

დო მანირსუ თოლიშ ონჭე!

თენგიზ ფეტელავა-ჟინ ბორია ირქენდ

ღუმა მემიჩქ ჟინ ბორია ირქენჷდ,
პეულეფი დუღიმინწუ გვალო,
შულადირცჷ ლური რინას მირკენჷდ,
ვართ სისმარეფ მოხოლუდუ ჭვალო,
სოვრე გეიძ ჟინბორია,შარა,
მემბარენი პეულ ვორექ ფალო.
ქუდმოგურე ჰავა სქანი ნინა,
მათჷ მოკო აშო ვადორთინა.

თენგიზ ფეტელავა-მეფურკე

შულადირი ზისხირიშე გეიფალუ,
სქანი ცასუ ბჟა დო თუთა ვემიპალუ,
მახურჭოლცჷ მუზმა გოკონ ურგინე,
ელეხიშე დღაში გეგნიგურგინე.
მარქვალს რჩინდუნ გაბათქალუ თი გური,
მითაჟამშე ამდღარშაღი მიჸუნინ,
ენაცვათჷ შური მუჭოთ კოჭობის,
მეფურკე რე სქან ნტერეფიშ გოჭოფილცჷ.
ქიგიფშინა ჟირანთასიშ გეთებას,
გაცხადებას-ქრისტეშ შურიშ ერკებას,
მარა თეშო მითინ ვარე მუთუნი,
კინ სქან სქუა რინა კარცჷ გითულირ,
აფხაზაქ მარგალს ყებურ გომირგილუ,
ეკოხუნა ნტერალათუ გომითირუ,
ბონდოიაშ მაჭყიშარო ვარა ქირგი,
საწიმოთოთ ჭუჭელია ვარა დირგი,
შულადირი ზისხირიშე გეიფალუ,
სქანი ცასუ ბჟა დო თუთა ვემიპალუ.

რამაზ კუპრავა-გიაშქვი დო გოფელეკე

ჯიმალეფი,

                       ჯგირი რინა,

ოკოლხეშა 

                      მალას მურსჷ,

მისით ვაკო

                     თეში რჩქინა

გამაღეთჷ

                     ითამ ლურსჷ...

გვიგვილ

                    მალას გოპირანსჷ

ზეფირს გეპუნთ

                     ეკე-ეკე...

გითმაჩამალ

                     ქეშერხვადჷნ

გიაშქვი დო გოფელეკე!... 

რამაზ კუპრავა-როკი ბაბუ

ჩქიმ ფრიმულამ

                 როკი ბაბუს
ეჩ დო ვითი
                 მოთა არდუ,
ოთხონეჩის
         მიკაჩირთ დო
ჸოროფილშა მირაბადუ...
მოგოთანეთ
          გემნოტყობუნს:
    -ჭკვერას ქორდა,-მირაგადუ
    -ფარა ქომუ
            ვარა იფრელს
ქოჲთხობელა
             -ურაგადუქ...
-წიე,სი მუს ოცირქინა,
გოძიცელო მირაგადუ,
       დადის მუთუნ
ვაუწუა დო
ირფელ სქანო
             მოკო ბაბუ...

რამაზ კუპრავა-ლაზონა დო მარგალონა

ოდაბადე,

               დობადონა,

ოდაბადე,

               დობადონა,

ლაზონა დო

                  მარგალონა,

ლაზონა დო

                   მარგალონა...

ჩქი ჸოროფაშ,

               ჯუმალოფაშ

მეტ მუთუნი ვამოკონა...

მითაჟამშე 

                  წორო

                          ვორდით,

ასე ზოხო,

                  ხვალე-ხვალე,

მუშენ

           გოფრთეს,

                              ჯიმალეფი

ოლაზე

             დო

                             ომარგალე...

იბსარჯელუქ

                        ჟირხოლოშენ,

                                        (შურო  შური

ვამიბკაშე)

                   უკუნეფიშ

                                      კინოხიან

ეგრისშე

              დო

                     ლაზიკაშენ...

რამაზ კუპრავა-ჯგირო ქორდა

ჯგირო ქორდა,
ჯგირო ქორდა,
ჯგირო ქორდა,
ვაგოკოქ და...


ჩქინი ჭიჭე,
სქვამ ჸუდესჷ
სი ქორდა
დო
მა-ვავორდა...


ანწიანიშ წიმი
ჩქიმო,
ვეჸი ხიოლი
დო ბირა,
იმენდ მიღუ,
კალკალეშა,
სქუალეფსჷ ქუმოძირა...


ჯგირო ქორდა,
ჯგირო ქორდა,
ვამოკოქ დო
ვაგოკოქდა,
მა,სი ხვალე
ართის რთხულე:
ბოშეფ ჩქინი
ართო მობრდათ...


ჯგირო ქორდა,
ჯგირო ქორდა,
-ირიათო
ჯგირო ქორდა...

რამაზ კუპრავა-გიტარა,ბარი

ონჯუა
             ბორჯი,
გიტარა
            ბარი,
ბარი,
            გიტარა,
ინჯუა
           ბორჯი...
სი სქან
             სისქვამეთ
დო თოლ
            დო წარით
გომიაფუნე
             შურიშ ზოთონჯი
ბარი,
          გიტარა,
გიტარა,
            ბარი,
სქან თოლ
              დო წარი,
სქან თოლ
             დო წარი....

რამაზ კუპრავა-ვადმარინე

ბჟაქ გვალაშე,

       გელეჸვინთელ,

ჸიონუნა 

       მუმულეფი,

ონდე-ონდეთ

        თოლს ონჯანა

არძა

        შურიდგუმილეფი...

ბჟაქ გვალაშე

        გელეძიცუ,

ცაქ დიღაფუ

        ბიაშნერო,

თე სისქვამე

       მეტებულო

ვადმარინე

       მუთუნნერო...

  

რამაზ კუპრავა-პოეტ შოთა ჩანტლაძეს

ირფელქ ჭარკონტით ეკიპელეტე,

ქჲანემქ გინირთან ალდაჩხირონი,

იშენ დოსქიდუ ღორონთიშ სმეტი,

მუჭოთ ხეოპსი დო პართენონი...

მაჸალეცალი მულა დღალეფი,

არჩქილე სქანი დო მუში მისით

სი ვადგოკორდუ იროიანი

შურიშ მოშინა დო პარაკლისი.

დღალეფ მიდულა მუჭოთ მეულან,

ართი სერიში ჸოროფილეფი,

სი ირიათო იჸიქ ჩქინწკუმა,

შურიშ ჭუალათ,შხვანერ ფიქრეფით.

დირულე ჯიმა, ირკოჩ მალჷ რე,

თაქ ოჸოროფე ჩქი მით ქოპუნა,

ვერა,ვარაზი,შოთა ჩანტლაძე,

ჩქი ღურა დღაშა ვაგმოჭყორდუნა.

რამაზ კუპრავა-ერჯიცალო ქივერკინათ

დიხას მუსხი ქიმთოდვესჷ
ტან-ჩეჯა დო თოლი-გვირა,
წირდა,მუჭოთ წყარი წკონდა
გამბახესჷ სქვამი ცირა...


მუსხი ორე,მუსხი ორე
ჩილამურით თოლი ეფშა,
გილურს გურიგოსოფილი
მითინს ვაგარზინე თეშა...


დორაგვაფილ ომარგალეშ
მიდგას ვაკო წამოდგინა,
მუშიანიშ გითმაჩამალს,
ერჯიცალო ქივერკინათ!...


ქოღირონო ქომიწითი
დორაგვაფილ ჩქინი რინა
ჯაბაშ უღუშ მინოდგუმა,
ვემიფთვინათ,ვემიფთვინათ!


ერჯიცალო,ერჯიცალო
ბოშკოჩურო ქივერკინათ!...

რამაზ კუპრავა-ზესნახე

ინჭას ზესნახე ეკორე,

კიდირს გინოძ ბეჭილ თუმა,

ბირკულს დალეფ გინორენა

ქუმორთია, უძახუნა...

წკონდა წყარით გემინაფშუ,

ხურხისქვამი ორკოლ მერკე,

ჭველაშ ბარჯგირ ქიმკაციკუ,

ტუტლაშ გიშნათოლა ხერკე...

ხე ეურქუ დო კიდირშე

გეგნიჸოთუ ბეჭილ თუმა,

ბირგულქ ვეკლურჩქინდას ვარა

გეგნილასუ კოჩ თიწკუმა...

კიდირ ეშაჭკირილ კაბათ

ცირა სქვამა მიმირმიშჷ,

აბარწაშე ქუმოხვად

ღარს პიკვალი კიდირიში...

ქეწასერ დო თოლ დოწკურუ,

ვაგარზინუ სისქვამეშა,

თე კოს სარკოქ გემკუოლ და

-ირფელ ზესნახეში გეშა...

 

რამაზ კუპრავა-დუშა დადის

მა იფრელ ფშუ,
                 ჩქიმი დადი,
შქასერს
                 ლერსის მიკითხანდი...
,,ნანა ასე
                  ქიდირულე'',-
ხე დო დუს
                  გომილუანდი...
სქვამ არიკეფს
                 მიკითხანდი,
ბირათ
                 მიმორულუანდი...
სი ვაიძირჷ,
                ჩქიმი დადი,
სი ღურინი,
                მა იმნგარდი...   

რამაზ კუპრავა-სოხუმიშ გვალას

ჩეთ პირელი
        მაგნოლია,
ცა-სარკილი
       ბროლი...
სქან ვორექ
დო
        მუთ გოკონი''...
-მირაგადუქ თოლი...
          ბორჯქ მიკილ დო
ჩქი გვალაშა
           ჟი ეკულას 
გურკით,
          მილარნალი
ეფშა მაფუ
          სიგარეტიშ
ფურკით...

რამაზ კუპრავა-მარგალეფი მუშ ყებურს

ახავაი,ვოი,ნანა,

მარგალს ნინას მიდმუღანა,

გურ მიხორცქჷ,შურ ეშმოლჷ

ვეგნმაღინე ათე წანა...

ირფელქ თაში მიდართუდა,

დერუმებუ ბჟა დო ჩხანა,

მარგალეფი მუშ ყებურსჷ

მალას დაჩხირს ვეკარზანა...

რამაზ კუპრავა-ათე სქანი ჸოროფილშა

ათე სქანი

             ჸოროფილშა

თიცალ კაბაქ

               ვაგაჸიდირ,

კოჩეფს

              ვახანგენდასჷ დო

დოფულუნდას   

               ბისკვალ კიდირს...

რამაზ კუპრავა-შინკაშ მახირალეფი

იალონშა გედირთეს,

ქიმკიქუნეს,ქიმიდვეს,

ხე დო პიჯი გიბონეს

ოზეშე თეშ გინილეს...

ცუხიშ კარშა გემნაცქვარეს,

შურიშ ქალი ვაფუდეს,

შინკას შური ქიგუნთხეს

ნამშათ გური აფუდეს...

არძაშ უმოს ბეხვერია

დახე ცაშა ქაფურნეს...

ოლაგესჷ გინულეს,

ოთხირეშე გითილეს,

ოკაკლარე გიშელეს,

ფაფალაშე გიმელეს,

ნდოლოია-ნდოლოთი

ინგირპიჯშა წიმილეს...

ყვინთელ შინკა ქელასვართეს

ობონუეს,ოჩხომეს,

სუნელმინოსუმალირო

გემუანო ოჭკომეს...

ნანაშ კიდირცალო შირგეს

შინკა,ნამუთ იხირეს,

ჟი ოშ-ოში ქიგჲოყურწეს

ქიბირეს დო იძიცეს,

ჩხანას ბარგეფ გისქირეს,

ქიმკიქუნეს,ქიმიდვეს,

ნაარაბუ ფაფალაშე

რულაიათ ეკილეს...

ოთხირეშა მითილეს,

წურფა თხირი გოწილეს,

ოროიას იკერკელეს

,,სისა-ტურა'' ქიბირეს.

მაჟრა შინკაშ ოხირალო

ლასირანა კიბირეფს....

რამაზ კუპრავა-იფრელშა გურქ გემიოლჷ

ართნერ დღალეფს მებკოროცხჷ,

მუ უწუა თეცალ რინას,

დიხას ჟი მუთუნ ვეპალუ,

გურიშ ჭუა ვამომძინას.

ირფელშა გურ გემიოლჷ,

დღალეფ ქაგურ კოლო ჭურას,

შქასერ ბორჯის,აზრი მოურს:

ნოტე რინი გამკოსურას...

რამაზ კუპრავა-სოხუმს,ზღუაპის

სოხუმს,ზღუაპის პალმაშ თუდო,

მითინ ვეითორდ სქან მასქვამა,

ართ ბოშის შჷ ფიჭვეფიშე

სქან თოლეფიშ გითონჯამა...

წუწელ ორქოშ გურიში რდი,

იძიცანდი თუთაცალო,

ცირა სქვამი,ბრელს ოკოდი

საოსუროთ,სანოსალოთ...

მარა სი თის ვაუჯინი,

ქოფურინი შხვა შარაშა,

თი ჸოროფა გურს ენუხე

ჩუალირო,ამდღარ დღაშა...

თინა ორე, მუთი რჷშნი,

თი ბოშიში გურ ვათირე,

ჸოროფაშ დო ლერსიშ უმშო

ართ დღას ხოლო ვაგარზინე...

რამაზ კუპრავა-გიწორუ ბორჯიქ

სი თე ქჲანაშა

            მორთ თოლწკურელი

მუჭო უკოროცხ 

             სქან თურეფქითი,

თოლი განჯინი

             სი ქოძირი

ჟი მურიცხეფი

             დო გოდირაკილ

ქვიშნაშ ნოყელა,

        მონდა ბულეფით

გინოკასილი...

...მენცარულ რჩქინათ

       მოხორცქი დიხას,

ამდღა სი კუჩხი

           გეიდგ თუთაშა

დო ჭიჭე-ჭიჭეთ გურაფულე

            თე საარიკო

დო უთანჯო

         გალაქტიკეფსჷ...

სი ირ დღას ონჯანქ

უშულად დო

       ურძღაფელ თოლეფს

დო ოკვირუქ

          თი მურიცხეფს,

ნამუთ სი ძირი

          დებადინ თიწკმა...

ბრელ ხანიშ კინოხ

           გოხუმუ ქვიშნაქ

გეგლეპირტოლუ

           ნოჸელაქ თიში,

ნამუთ ორდუ

          სქან ჭიჭანობას

მონდა ბულეფით

        გინოკასილი

გიწორუ ბორჯიქ

         დო ათე შვანო

სი თევრეშე გაძახუ გური

      სოთჷ დებადი

აკაბურცხა

      თოლეფწკურილო...   

რამაზ კუპრავა-ვედირთუნ ეფერ დღა

ელახიქჷ,
გელესარკ,
დუდი გეშაჭოფუ
ბჟაქ,
ქიანერობაშ გვერდის
ამდღარ დღა
იჭყაფუ თაქ...


მინშე იჭყაფ
ჭიროთით,
მინშე ხოლო 
ხიოლით,
მუჭო გოჭყაფილ
რენ თეში
იროიან რსიოლით...


ელახიქჷ
გელესარკ,
დუდი გეშაჭოფუ
   ბჟაქ,
ვაგგაჭყორდან,
დღას ვედირთუნ,
ვედირთუნ ფერ
დღა იჭყაფ...

რამაზ კუპრავა-ცოდა მონკა რე

სი ვაგიჸორქჷ,მარა გიჩქუდას,

შურს ახიოლე მა სი დონმგარე...

ასე იბშინა: ეთი ონჯუას

ჩხე ჩილამურით მა სი გონგარე,

ჸურუ ვორდი დო ვამოგინუდჷ:

ცოდა მონკა რე,

                         ცოდა მონკა რე...

რამაზ კუპრავა-ნანა თქუანდ

ჩხე-ჩხე ღუმუს ეულუანდით
ლებიას კოტოშ ნახაშას,
კაზლას მიკომცხანტუნდეს
კალანდას დო მარაშნას...


ღორონთიში ჭყოლოფუა,
ჩქიმ ფანიას ვეგნოწუმ,
ბაბა დღაშ დო სერით ხანდენდ
-ბაბას დიო ვამურთუმ''...


ნანა თქუანდ:თქვა ქჷგგალეთ
ჭიჭე ჸვალ დო დიდი ღუმ...

რამაზ კუპრავა-ვემგოტე დო ვემმოტუა

გურს დაჩხირი ელმორზუნი

სი შეილებ თიშ შქირიტუა

ოდო შური ქენმაქანცჷნ

ვემგოტე დო ვემმოტუა...

სქანი უმშო ვეგნმაღინე

კაკალია დღა დო სერი,

თეს ვარწყექო,გირაგადუქ

დო კოს თოლშა ეწმასერუ...

იმენდ მიღუ,დუმართუქჷ,

შურსჷ თისჷ გინვორთუა,

ცა დო დიხაქ ეკინწყვასჷნ

ვემგოტე დო ვემმოტუა...

მა მილინდას,სი ჸოფედა,

საფულეს ქიგმოთუას,

ჩქიმ შურ თევრე ვემგოტენს დო,

მა სი ათაქ ვემმოტუა...

რამაზ კუპრავა-ავტოპორტრეტი

რინაშ დოფას ენოწკირუნქ,
გიგიბიში გარზე ნორცხვა,
ნინას ფულირს აბჟალარე
ირო სქან მარგალურს ოცქვა...

ბრელ ხანი რე,ულა გოკონ,
ხაზირი რექ ამდღა ხოლო,
იშენ სქიდუქ ჩქინ ორთაში,
ათე სისქვამეში ჭკორო...

თე ქიანაქ ვემგატებუ,
თი ქჲანაშა გოკო ულა
დღალეფ კოროცხილი გაფუ
ღორონთს გინოტებას თხულე...

ფსუალეფსჷ ქიჩანუა,
ქოფურინუნქ სი ჟი ცაშა,
შურ მიგოლჷ თექიანი
ელი-მოლიშ გოჯინაშა...

ოშურესჷ,შურეფწკუმა
გითახუნალ გიღუ ორო,
მარა იშენ სქიდუქ ირო
თაქიანი ჸოფაშ ჭკორო... 

რამაზ კუპრავა-დუდი ოკო დიპილე

გურ ჸოროფათ მაფუ ეფშა,

დუდი ოკო დიპილე,

ქიანა ვენწყუ,კალკალეშა

ჩქიმ საგანოს მიკილენ...

უიმენდოთ მიჸორქინი

შორშე ვარა ქირჩქილექ,

ქუმორჩქინას,მუს იქუნქი

დუდ მართალო დიპილენ?...

...ნგარამოდღას ჩქიმ ოზესჷ

გურიგაგათ მიკილენქ

რამაზ კუპრავა-ბაღანობაშ გოშინა

იალონშე მიბრულედი,

ცუნდი ვარდჷ სქირაფილი,

მახვამარეფ მანცხვარკარსჷ

გერდეს ოჭიშ დირაკილო...

მოხიოლდეს მანცხვარიში

ყოლანდარიშ ეშარგინა,

საფულეფიშ ქუალეფსჷ

ენოლაფირ აფდეს ნინა...

მასორენდეს თი კიდელა,-

ღორონთითჷ მოხანტილი,

ვოქუჩუდით ჩქიჩქუეფი

თოლ დო გური გონჯამილო...

იხვამანდჷ თეოფილე,

თოლეფ ცაშა მებიჯილო,

ღვას ხეთ ქუმომფერუანდჷ

ხე აფუდუ ჰამოთ რგილი...

ვერწემ ჯაშე იფრჩქილედი

მაფშალიაშ ჰამო ხუმას,

ირემ ქალეფ გეღობილი

მიკოკირუდ ხიბაწკუმა...


მორო მუჭო გუმოჭყორდჸ
ინგირს კილეშ მოსუმალა
კორობუა ჭუბურიში
ტყა-ტყა,რზენ-რზენ,გვალა-გვალა...


მუთ ქოფშუნი,ირიათო
იმენდ მიღუდ ღორონთიში,
ჭიჭანობას-მანცხვარიში,
დიდანობას-ილორიში...