გიორგი სიჭინავა-აჭუ მარას ოჭუმარე

სერით ირო უკმელა რე,
სერც გოთანა ვაუჸორც,
ღორონთც ორთაშ დონწყუალა
გაუთებუდ მარუოს. 

აჭუ მარას ოჭუმარე,
ვაგოთანდას შარა ვარე;
ჯვეში რე დო ახალი რე,
ორთა ირო მახალი რე.

აჭუ მარას ოჭუმარე-
ათაქ ირფელჲ ჭუათ მურც,
სერ ითებ დო უკმელაშე
დღაში სინთე მოჭვათჷნც.

ორთაშ თოლიშ გონწყმა რე,
აჭუ მარას ოჭუმარე,
ჯვეში რე დო ახალი რე,
ორთა ირო მახალი რე.

ახალი ამბე მინჭუაფ,
ვორექ გურიშ გოჩამას,
ორთა ქვარას იჭუანც
სამარგალოშ გოთანას.

გიორგი სიჭინავა-უჩქიმეთ

აკისერ დო მუმულიშ
ჸიონუას ურჩქილექ,
დისერჷდა, მუ ფქიმინა,
კინ გოთანდჷ უჩქიმეთ.

ჸუდეშ ჭიჭე ოსინთეშე,
მუნაფილ ცას უჯინექ,
თენა ხოლო ვამონარღ-
გობჟათჷნცჷ უჩქიმეთ.

ფირქეფი დო არზეფით
ჭკუას ტყურათ მუქინე,
ქარ-ბორიას ჟინი ორთა
დარჩქალუანც უჩქიმეთ.

რინა მითინც ვაუკითხირ-
უკითხირო გოფრჩქინექ,
ღურა ხოლო სოდგარენ
გინომჭყვიდეს უჩქიმეთ.

მათ ქდომტეს ოქიმნალ,
ჭიე-ჭიე მუდგარენი.. ..
ყებურც დაჩხირი ქოშქირტჷდა
შური ოკო უმბარენი.

გიორგი სიჭინავა-ქენობსქიდი ოკოჩეს

კირდეს ცხიმურც გელუფალ,
მიკვე, მუჭო მუკოჩენდ;
კოც კოჩწკმა ვადარინე
დო კოჩ ვერგჷ უკოჩეთ.

მოკოდ ცხიმურცალო რინა,
სოთინჲ, ფერდის მუკორჩელც,
მარა დიხაშ ჸოროფათ
ქენოფსქიდი ოკოჩეს.

გიორგი სიჭინავა-ვაშინერც

ღურელც ტაბაკ მუშო ოკო –
ვაჸუმენც დო ვაშქირენც,
მარა თია ვეგლუდვენი
იშენითჷ ვაშინერც.


მარდი ცოდათ გინუგაფ
ჯგირობუა ვარჩქინელც,
გურქ მოირთდა, ვადოჭყუა,
ჭყალა იშენჲ ვაშინერც.


შანქარქ გაჸუ ჭკუმუნქჷდა
ხუთნერი დო ამშვინერც,
მარა ომბოლც, ხიტა ვარა,
ვამკუტახე, ვაშინერც.


კოჩი ტანიშჲ სინთელეს
ოდინუანც ორჩინელც,
უმინჯურო მიწოტება
ცოდა რე დო ვაშინერც.


სქან მაჸალეს გოუზგირტია,
სოლედგარენჲ მაჩინეს..
კოჩქჷ დუდი ქიმგენდდა
გითოჩამა ვაშინერც.


გური აფუ ფშინაფილი
ჰარამ თოლით მაჯინეს,
მეძობელიშჲ ჯგირობუა
გოწყინდასჷნი, ვაშინერც..


იფრელ ართი გაფუდას,
თენა ხოლო ვაშინერც,
ჸოროფა რე ოთასალი
უბადობას ვაში ნერჩ!

გიორგი სიჭინავა-ვეშმაღინე ტკიბირით

ართ დღას ვაღურუნი ფერი
თე ქიანას მი ძირით,
რინაშ დღალეფ ძგვატილ მაფ
კაკლარი დო ძიგირით.

შურც ნტება ულამუ დო
ონდეთ მიმარგ კიბირით..
ინჭას წყარი ენოდგ, მარა
ვეშმაღინე ტკიბირით.

გიორგი სიჭინავა-გურმეჭვია

მუშ მანწარა უსამართო ჸოფე
თე ქიანა ჭათი გინორთვილი..
გურმეჭვიას გური აფუ ჭვილი,
ძერაქ მიდუღ ღუმა ჸოროფილი.

მითინ ვარე მოხვარე დო მინჯე,
გურმეჭვია შურდგუმა რე ჭიჭე.


1.გურმეჭვია-გულწითელა

გიორგი სიჭინავა-დორთაქ ვაგაშქურინას

ზოთონჯჲ რე დო შარა-შარას
ობირგულე გილაძ თირი,
ცოდა ორე კოჩიშ სქუა
მუმაწკჷმა ჩილათირი,
მუშ ჸუდეშე გინულირ დო
გალე ელასქილადირი.


დიხას მუთუნ ვეფალჷნც
ონდო თჷნც დო ჸინჷნცჷნი,
მუ გოხვარ, მაზაკვალი
ტვინც მოირხინნცჷნი,
ორქოთ მუგოთონუანც
ტყას მუთ ქიმთორწკინნცჷნი.

შურდინაფილქჷ ეშე ცაშა
მუჭო ოკო ფურინას,
მეჩირთიდა, კინ მუმაშა
დორთაქ ვაგაშქურინას.
ოღონც, შურქუ წკუმონტილი
შარეფ ოკო გოთინას..
ღორონთ მიახიოლანც
ჩილათირიშ დორთინას.

გიორგი სიჭინავა-სოდეთ დიხა ითებუნი

ამდღა ზღვაშა მიდაფრთი დო
წვალებურჲ შური მიდეპუნი,
ეგებ თაქ რდას უჯგუშ რინა
სოდეთ დიხა ითებუნი.


ვამიჩქ ანწი, ონჯუაშა,
ზღვაში ჯინა მუს მუჩანც,
მემიჩქჷდა, თაქი ხოლო,
ცოდა ფუნც დო იბურჯანც.


გაჭირებულც ირ დიხას
ქუა მოთხოზ დიკოხონც,
თე ზღვას ხოლო თენა ჸოფე-
დიდ ჩხომ ჭკუმუნც ჭიჭე ჩხომც..


მუშო მოკო თე ფირქეფი,
დუც მუ ჭირი აუჩემი,
ვაუჯგუნო, გილართე დო
მუთუნც გური ვაუჩენი.

გიორგი სიჭინავა-აფუნი

გოთანდჷ დო ბჟაქჷ გერთ,

ოცხიმურეს მუკულუ,

გოხოლუას მაფშალიაქ

სქვამას ქიმიოღურჭულუ.

ბარდეფი დო ბარდეფ შქას

გილაცოჸნც ყურდგელი.

ბრილიანტით აშაფშა რე

ნდოლო გინოცუნდელი.

შუკას ჭიჭე ბოშჲ მოურცჷ,

ჭიჭე ბოში, მაფალუ,

რჷნტუეფი მოურაჸ,

მეტი მუთა აპალუ;

მინდორ აშო მაზადუ

ნოხო ეთორჩაფილი,

ჭყინტ ნდოლოში წვენით აფჷ

ნარჩა გითოღაფილი,

იმენდეფი გააფაფჷ

ცაშე გითორღვაფილი..

აფუნჲ რე დო ირფელ ფუნც,

სერით ნდოლო ცუნდის შუნც,

იშო-აშო გილურქჷნი

ცქირპაპეფი გილაპუნც.

წყარეფი გეშასქირაფე

დო გორდი შარას მესხაპუნც.

ორთა ოცად მუნაფაშ

ცაშა ეშაჸუნაფას.


1.ორთა-ბუნება
2.აფუნი-გაზაფხული
3.ცქირპაპა-წივწივა (ჩიტის სახეობა) 

გიორგი სიჭინავა-ანწ მუთუნ ვარე

ანწ მუთუნ ვარე
თაქ ჩქიმი რინა,
მუშა ვორდა დო
მუშა იბჯინა.
ირ კოც ქუზალი
სიკეთე, ძინა,
ულაშ წოხოლე
მეტ მუ დიფჩინა.


ანწ მუთუნ ვარე
თაქ ჩქიმი რინა,
მა მიდაფრთიდა
სი ვემიწყინა,
ვეკმონგარა დო
ვეკმოკიჟინა,
ანწ მუთუნ ვარე
თაქ ჩქიმი რინა


მოლე ვორექ დო
ვამოხუჯუნდა,
მის უჩქ, შილებე
მელე უჯგუნდა.

გიორგი სიჭინავა-მარუო

ჩხანას თუდო გიმულებ დო

დუც ინწყუანც უჩა ზღვას,

აკოსერელც კინ თუთაშა

დორთა ოკო თუთაშხას.

მარაშ დღალეფც უგურუა

ბორჯიშ ჭიჭე ნახარცქას,

მურიცხეფიშ თარჩია რე,

თახა მოურც თახაშხას.

სერიშ უჩა ნოღართია

გოუსოფნა ღუმა შქას,

ჯუმას ოკო დოხვამლაფა

ათე მარაშ ჯუმაშხას.

მუთ გიძირჷნ თინა ორე,

თაშჲ ჸოფე დო თაში რდას,

ამსერ დიმუნუანც, მარა

გიფთანუა ცაში დღას;

ღორონთიშ ხეთ ერზაფილჲ

სინთექ ოკო ვაშქირტას.

ობი უჩა მურიცხი რე,

ქმმაკათუ ობიშხას,

ჩქიმ გორუას მუთა ოკო

ზუგიდი დო ხობიშქას.

თოლეფჲ მა შხვას მოძირანც

დო მირაგად გური შხვას,

ულირეფიში გოშინა დო

შურიშჲ დღა რე შურიშხას.

დო მაშქვითა გოთანას,

საღორონთო ბჟაში დღას,

ევაშ ცოდაშ ნაშქვიდას

ეგებ რსხება მაშიდას

მაბრუო დღა ხოლო ჸოფე,

მარა ჩქინდა მუთ მორთას,

იშჲ სინთეშა შარა მებჷ

ხვათახვალე გოლგოთას.

გიორგი სიჭინავა-მიშა მეიღუ...

სო ვენტა ათე
ორთაშ რსიოლცჷ,
რინა ვამარზენც
მუთუნ ხიოლცჷ.

თუდო სოდგარენ
მართუ ირთანცჷ,
დო დუც კვარია
გიმოყირტანცჷ.


ათე ზღვა ითამ
სოთინ ვენტირე,
მარა ორთაშო
ინა ჭვეთი რე.


გილვორექ შარას
შარა ერთელი
დო ვამიჩქ ანწი
მიშა მეფრთენი.

სქვამ მაფშალია
სი სო მეული,
მიშა მეიღუ
ნინძგით პეული?

გიორგი სიჭინავა-თუთარჩელა

ცა მურიცხით გოჭკადე დო
დუც გიმორე გოფშა თუთა,
მოშქურ დუმატყობასჷნი,
ელახიშე გობჟათჷდა.


სისანდობა სოთინ ვარე,
ხვალე ინგირი შუმინჷნც,
სისმარეფიშ მინდორეფც
შურეფი გილაფურინჷნც.


მასქურ გილექაქალჷ დო
უკვანწუანც ჯაშ ჸალეფც
ათეჯგუა სერც ლურანი,
მა ათენა მაჸალენც.


გევოდგინა, ქუვოძირა
თე სისქვამეს მაჸალეფც,
ვარა ჭუმე ოჭმარეს
ქომიწინა საჸალეს.

გიორგი სიჭინავა-ღორონთც ვემუდინუაფ

ათე ლერსეფც, მარგალურცჷ,
ნამუთ გურცჷ გაფუანდ,
ეშმაკ მივარანდჷ, მარა
ღორონთ მოჭარაფუანდ.


ჩქიმი ნინა, ამდღარ დღაშა,
სოთინ ვემიშინუაფ;
კოჩქჷ მიოდინუ, მარა
ღორონთც ვემუდინუაფ.


ცასჷ ორდუ ჩუალირი,
ასე აშო აზარეს,
თოლეფც კინე გოუნჯანა,
მუჭოთ ქრისტექ ლაზარეს.


დიო ცოდათ ნაგოლოფა,
შური ოკო დოჩხაპას,
უკულ მოგინაფუანა
ახალ რინაშ დოჭყაფას.

გიორგი სიჭინავა-ჩვამა

ჭიჭე ჩხომიშ მათხოზინე,
ურძღაფელა ჩვამა,
ხვალე ჭკუნქ დო ხვალე შუნქუ,
ვაიჩქ შხვაში ჩამა.

ფსუალეფი მუშო გოკო,
ნინძგი გაფუ ყამა,
შორშე კვატას ქოგჷქ,
მარა ვარექ იშ მასქვამა.


მა იშენით ვაბჯოგჷქ,
უჩარდია ჩვამა,
წყარშე აშო ვეკურქჷდა
ზღვასჷ დოიხვამა.

გიორგი სიჭინავა-ჯოჯოხეთის მივანჭით

ჯგირჲ ბჭკუმით დო ჯგირი ფშვით,
ლაგვან ღვინით ევოფშით,
იპიდით დო გიმოფჩით,
ორქო-ვარჩხილი დობზირით,
მარა თენა იშენით
ბორიაშ ეკოთხოზინირდ.
სქვამ ხასეფჲ მიჸუნდეს,
გურც ზისხირი მიფუნდეს,
მარდშა ცოდა მისხუნდეს;
ჩქინ გემოშა ვორდით დო
ჩქინ არშინით გობზიმით..
ქიმეფხვადით, თენა ხოლო
ბორიაშ ეკოთხოზინირდ.
დეუკმელ დო ქიფჩინით,
მუჭო ტყურათ დიფრჩინით,
ულირი დო ჯვეში ამბე
გურიჭვილო გიფშინით.
ჩილათა დო ქვერსემია
რჩინ თოლეფით ქობძირით..
ჯოჯოხეთის მივანჭით
ბორიაშ ეკოთხოზინით.

გიორგი სიჭინავა-დიონისე

დიონისე, დიონისე,
სამარგალოს დიო ნირზჲ რე,
გვალეფი დო მინდორეფი,
ირფელჲ ართო გეგნონირსე.

დაჭკოლებე ლაგვანეფი,
უჩა ღვინით ნაგვანეფი,
დანარღებე სქანიწკმა
მაშუმალი მარგალეფი.

ბირა, ძიცა, სხაპუათ
ბრელი გილეფხიორით,
მარა შური დამონკებე
წარმართჲ გურიშჲ ხიოლით.


დიონისე, დიონისე,
სამარგალოს დიო ნირსჲ რე,
ფურკო მეურც ცა დო დიხა,
ათაქჲ შურ დო ხორციშჲ ნირზჲ რე.


კოც ვაუჩქუ ათე ნირსი
მუ ოფულარც იჩუანც..
ჩე გოთანა ცას მუკობჷ,
მალას გეითისინთუანც.

გიორგი სიჭინავა-კოჩიშ რინა

კოჩიშ რინა მუთუნ ვარე,
გივობირა გიტარას,
გურს მაჭუ დო მეწამალე,
ღვინიშ შუმას მივარანს.

მა იშენით გივობი დო,
შური მითინქ ვაქალას,
წორო ოკო დიბშუმათ,
მა დო ჩქიმი ლახალაქ.

გური ოტობაია-ჰოუ ნანა

ჰოუ, ნანა, ჰანანი,
ნანაია,დირულე,
მინორთელ რე ქიანანი,
ლურც მუშენი ცირულე,
ნოყორ მოუქიქანი,
მუ რე დიდას კვირულე?
ჰოუ,ნანა,ჰანანი,
ნანაია, დირულე!

ოჩოკოჩი თირხონით,
ტყალეფიშე მირულე,
წყარიშ დიდა ქიფხოლით,
ჩქიმი თოლი გვირულე,
სისმარეფი ქიფხონით,
სინთალეფცუ წირულე,
ჰოუ,ნანა,ჰანანი,
ნანაია, დირულე!

მუსხი კოჩი ქდოწუ,
კოჩ ბედეკოჭვილჸურე,
ჩხონჩხამეფქჷ ქჷდოცუ,
ქიანას მი რე მილურე,
მუმა დიხას მითოძუ,
იშ აკანსჷ ხვილუ რე,
ჰოუ,ნანა, ჰანანი,
ნანაია,დირულე!

მიმოტუეს ნათესეფქჷ,
დო ხვალახე ბრკუნულე,
გოწარწ,ვარა ვაგიჭიშ,
მუმაშ ლეკურ რგილუ რე,
მორდე ოკო ტახილ ჯიშ,
ღულა კათას გინულე,
ჰოუ,ნანა,ჰანანი,
ნანაია,დირულე!


მუჭო ენმოჸვიჸვინანქ,
მუჭო ირფელს რჩქილურე,
დიო ტანით მიგინანქ,
დიო ტანით ბჩინულე,
მუჭო მითიქვიქვინანქ,
წყარი შოშო ძინულე,
ჰოუ,ნანა,ჰანანი,
ნანაია,დირულე!


სქანი ჭუტა ქარმატე,
ჭიჭე სქან წისქვილარა,
ართო გურშა ქალმანტე-
ბედიშ ნაკვისკილარა.
გვიმარა დო ლიმხონა,
ცირეფი დო კულანა,
ბამბეცალი ნირსეფი
ცაშა გეშაქულანა.


აფხაზა დო მარგალი,
ქორთუო დო ლაზონა,
მურიცხეფით გაძგვატუ,
ლური ნადარბაზონა.
ნანაია დირულე,
ჰოუ,ნანა,ჰანანი,
ჭუმანი ბჟა ბარჩხალა,
თოლეფს გითომღანანი.


1.ოჩოკოჩი-მეგრული მითოლოგიის პერსონაჟი, ვაცკაცი.
2.ქარმატე-წისქვილი (ლაზურად)
3.კულანი-გოგონა (ლაზურად)
4. ლიმხონა-გვიმრა (ლაზურად)

გური ოტობაია-ბაღანობა გუმაშინე ჩქინი

ჩქიმ ჸოროფა, ჩქიმ გურიში ჭუა,
სოვრე იმნტა, სოვრეშე იმნჭუა,
ქიფრჩინუქ დო იშენ ვორექ ჩქიჩქი,
გურს ბონდღუნსუ სქან თოლეფიშ ჩხვიჩხვი.
ბაღანობა გუმაშინე ჩქინი,
მუსხი სერ დო ჭუას გივორჯგინი.
ჩქიმ შარა რე ჩეშმანი დო თინუ,
სქან თოლეფშა დღასუ ვამანტინუ,
მუ დაჩხირ რდუ დორზამილ თე გურსუ,
ოხოხოი, მუსხი მუთუნს გურზუ,
ბაღანობა გუმაშინე ჩქინი,
მუსხი სერ დო ჭუას გივორჯგინი.
მირაგადნა-ჸუდეს ხექუ ხვალე,
მუს დართინე ბორჯი უკახალე,
ჩქიმ სურათეფს გაჯინექუ ირო,
ჩქიმ ლერსეფით ცხოვრენქ გოლვაფირო,
ბაღანობა გუმაშინე ჩქინი.
მუსხი სერ დო ჭუას გივორჯგინი.
ჩათხიებუქ როგუნჯ ქომონჯისუ,
ხვალე თიშო ოსაჭირუდ ისუ,
სი ჩქიმ შარაშ გოთანა რდი ძღაბი,
ტყურათ რენო შური დომიჟღვაბი,
ბაღანობა გუმაშინე ჩქინი,
მუსხი სერ დო ჭუას გივორჯგინი.
მორთი, ცირა, ქომიძირე აკა,
ქოძირ თე გურს მუჭო გილაკვაკვა,
ქოძირ თე გურს მუშ მასქვამა რექუ,
ქოძირ, ქოძირ, მუჭო გიმოჭვენქუ,
ბაღანობა გუმაშინე ჩქინი,
მუსხი სერ დო ჭუას გივორჯგინი!

გური ოტობაია-მალას მორთი!

ქიგიკირუ ცაქ სერ წილამურო,
გოწოს ვარინ-ცირა, წი ვამულო?
ამარ ინგირ ხურხის გითაბ ნირსის,
ა, ბორია იჭყანს გილანირზის.
ეფურნელ რე გური ნაპოპორა,
ქინჭე, ცირა, ჯარბი ვაკოგორა!
ვარა ჯასუ ფურცელ ობარ ძალამს,
ვარა სერი შურსუ გოფარსალანს.
ვარა შქირტუ მურიცხ ეჭაჭილი,
ვარა ნდღულუ სქანი ჩეჯა ჭვილი.
ქიგიკურუ ცაქ სერ წილამურო,
გოწოს ვარინ-ცირა, წი ვამულო?

1.ნაპოპორა-ნატალღარი

გური ოტობაია-ნანაია

ნანაია, შხვა ვორდ ირო,
თე გურ ჸოფე სქანი ჭირო,
ჩქიმდა მითინს ვაგაგებუ,
სქან მეტისუ, გოლვაფირო.
სქან სისმარეფ მოფუნს ჸუჩე,
ღორონთ ვორექ გური ქუჩე,
ვაგმაკურცხინ, მარა ქიბგინ,
ნორჩალ მუჭო ელამკუჭე.
ერჩქინაშე ხანგა ვორდი,
სო ვებდი დო სო ვავორდი,
სქვამ ცირეფსუ ქეკვოდინი,
ჩქიმი რინა შქაშა გოფრთი.
უდღანუნა, ნან, ჩქიმჯგურეფს,
მოჯგირეფქუ მიმენდურეს,
მარა ლერსეფქ ამაქექეს
დო ჟი დო ჟი მიდამტყურეს.
ვარე ჰავაშ ფიჩუ-ფაჩუ,
შურქ თიცალო გუმაფაჩუ,
კოჩიშ თოლით უძირაფუ
ოროეფი გიმაქვაჩუ.
ვემგმართინა ანწი გიმე,
ჟინცაშ ქვინჯი ოკო ბზიმე,
კოჩიშ ჸუჯით ურჩქილაფუ
ხონარეფი ელმასიმე.
ქეშილებე დაჩხირქ დირკას,
დაჩხირ მუშო ოკო ნირგას,
მა შილებე გეგნობტორხე,
მარა გურქ დღას ვამოდირკას.
სქან ზისხირქ რე გამაჸალუ,
სქან მასქვამა მი მაპალუ,
ღორონთიში ნოჸელაშე,
თურმე ღორონთს გელამფალუ.

გური ოტობაია-არდა

შხვებქ დათირუ, მუ თირანსუ არდას,
ჯარგვალიას სერეფს ტახუნც ფართას,
ჸათე ტყა დო ჸათე დიხაშ ნარდას,
შეულებნო ჩელაია ვარდას?!
ოჭმარესუ ფსუალეფი არდუ,
მარა არდაშ ჯარგვალშა ვემნართუ,
მეფუნს ქიანა წყარიშორო მართუ,
არდა ირო მუშ ჯარგვალშა დართას.
შვერთიშ თოკის დოგიხორუნს არდას,
თოფურიშფერ ხოჯეფს ეკოხართანს,
ცხვინშა გუმუძ დამორჩილიშ ხანდა,
არდა ირო მუშ ჯარგვალსუ დართას.
ტყას ორტყაფუთ გეკოკირუნს ხინკის,
ტყათ ოდეფი ქიგიბანჭუ მინქი,
მარაშ ოღალს თირუნს არდაშ ყვინგი,
არდაქ ირო მუშ ჯარგვალსუ დართას.
ყებურიშ დუც გეკოჭოფუნს ნორცხვას,
არდაშ ზესქვიშ მებირაფა ორძღანს,
არდაშ გური ჩილამურქუ გორჩხას,
არდაქ ირო მუშ ჯარგვალსუ დართას.
ქარღადისუ ქიმიოკირანს თუთუნს,
ნირსეფიშე ვეიშაჸუნე მუთუნს,
არდას გურსუ ზოთონჯეფი უთუნს,
არდაქ ირო მუშ ჯარგვალსუ დართას.
ვადუდვალუ მითინს არდაშ განთხი,
ჯიმა გაფუ გიკინდუ თუ დანთხი,
არდა, წიე, წკვარამეფი განთხი,
გიოსქირუ ოსურსქუა ქარდას!
უჸორქუ და ვათქუალუ მორო,
ორთუმალშა მეჩანს სქანი ორო,
არდა, ხვალე თიშო ვარექ ბორო,
ჯარგვალიაშ კარ გოუნჯი ფართას!

გური ოტობაია-აკა მუშენ ვემირულექ?

იხი, ხარენც ლაკაციაშ
ციორითუ,
აკა მუშენ ვემირულექ
ფიორითუ?!
გეგმათხოზუ თოლი ფერდის
წაწაფითუ,
ვემირულექ მუშენ კოკაშ
კვანწაფითუ?!
სო ვარენო დამორჩილიშ
ფოფორ ჩანსუ,
სონ ხანი რე იხი ნოხო
იფორჩანსუ.
სონ ხანი რე დამორჩილი,
შურსუ ჭვეთანს,
სონ ხანი რე წყუ ყვინთელო,
ბონუნს ჩე ტანს.
ლილაშფერი ოროეფი
გვალენს ლოლუნს,
აკაბრცხათ დო ბჟა ოჭმარეს
გეიშათოლუნს,
დრო რე, ცირა, სქან ორკოლშე
წყარსუ ფშუნდე,
დრო რე ხურხის მასქურცალო
ეთმარშუდე!
იხიქ-ეიფშ ლაკაციაშ ციორითუ,
ვემირულექ მუშენ კაბაშ ფიორითუ?


1.იხი-ქარი(ლაზურად)

გური ოტობაია-დებჯერაო?

ოქუმი დო ჩქიმი რეფი,
ჩქიმ ფიჩორიშ მინდორეფი,
ჭველეფ ,მით ტყას მითორეთი,
ათე გურიშ ჭუა რეთი.

ჩქიმ ინგირ დო ჩქიმი ხურჩა,
ქელამჭიშეთ მუთ რე ხუჯშა,
ჰავა,ფურცელს სო მეხუშა,
ეშმანტირეთ არძა ხუშა

.ჩქიმ წისქვილ დო ჩქიმი კარე,
ჩქიმ ვარჩხილიშ ოჭუმარე,
დებჯერაო ,გოლუაფირო,
შხვაში რენ დო ჩქიმი ვარე?!


1.ჭველა-ნორჩი ხე

გური ოტობაია-გვიმარა

ოხვამურ ჯა რდი, მარა
დეჩიჩიო, გვიმარა?
ვეგლენგარა ირიათო
თი თუთა დო თი მარა,
ოხვამურ ჯა რდი, მარა
დეჩიჩიო, გვიმარა?!

ჩელაია ნირსი ცაშე მირაჸვალუ,
გოკურცხია, დიდა ინგირ გირაქვალუ,
გოლუაფირო, გოლუაფირო, ირო ფალუ,
კუჩხეფიშა წყურგილეფი ქუმოიდვალუ,
ოხვამურ ჯა რდი, მარა
დეჩიჩიო, გვიმარა?!

შხურიშ ტყების გეჭარუდუ სქან ნინაშა,
მუჭო ოკო ონდღულესკო ფულანდი!
ითამ კუჩხი გეიდგუმუდკო ტინტილაშა,
ეკორჩვილი გილეში დო ქულანდი!

შხურიშ ტყების გეჭარუდუ სქანობურო,
ორქო ქვიშაშ კორობუაშ წესეფი,
გიკურცხინე, გიკურცხინე, გოლუაფირო,
სი მუნაფას გიწილოხუნს მესეფი!
ოხვამურ ჯა რდი, მარა
დეჩიჩიო, გვიმარა?!

ბირგულ მუშენ გიდირკუ,
კოლხურ ბირაშ მარჩქილეს,
ქარწყექ - ჰავაქ ქიდირქუ,
ფსუა გეკოვარჩხილე!
ქიგიშინი ხიოლი,
რე მუმულიშ ჸიონი,
მობაღუნა ქიონი,
უზისხირე გვიმარა!

ნჭყოლირ გური მუჭო ვემკისქილადე,
ღურა თელათ მუჭო ვემკიზგილატე,
კოლხიდაშე ლანდი ქუდოსქილადე,
უზისხირე, გვიმარა!

ჩელაია ნირსი ცაშე მირაჸვალუ,
გოკურცხია, დიდა ინგირ გირაქვალუ,
გოლუაფირო, გოლუაფირო, ირო ფალუ,
კუჩხეფიშა წყურგილეფი ქუმოიდვალუ.

ოხვამურ ჯა რდი, მარა
დეჩიჩიო, გვიმარა?
გიკურცხინე, გოლუაფირო,
ვარა გიმორჯგინანა!

გემწოდირთი, გემწოჟვენგი,
გემწოსოფი გვიმარა!

გური ოტობაია-ჭეჭეთობა

ჭიჭიკელა, მერეკელა, ინტელა,
თე რინა რე მინ ღურა დო მინ-თელა,
გერნელ ვორექ ორინაფილ შარას დო,
ნტერიშ ჯინშე არქა ვედიყვინთელა!


ჭიჭიკელა, მერეკელა, ინტელა,

ტატიჩხია, ტატურელი, ტატალი,
ყებურს ღუმუს ქუდუჭყაფუ ჭვარტალი,
დიდაშ ხეეფს უჯინენა მარდუეფ,
ბინ შარაშა ბრელ რე გიოჭვართალი,

ტატიჩხია, ტატურელი, ტატალი,


ოფოფორე, ფოფორია, ფაფარუ,
კინოხონიშ ნერჩი მოთაქ გაფარუ,
სოთინ მუთუნ ვეძირებე ოხორსუ,
აბრაგიშ დო გერიშ გიონთხაფარუ,
ოფოფორე, ფოფორია, ფაფარუ,



კიკორია, კიკოდემი, კოკორო.
ქიდოიტესო მაღაზეფი ხოკორო?
გინორთექო თუნთიშ დირთხიშ
მანგურო?
გინორთექო ტოჯეფრო დო ნოყორო?

კიკორია, კიკოდემი, კოკორო,


შიბა რენი, იშიმბორი, იშიმბე,
ჯგირ დო სქვამითჩილი გიგმოხიშიმბე,
მუჟამს იინ ქეკახატა კვიჭინხეს,
მუჟამს იინ ეგებ ძალამს დიდშიმბე,

შიბა რენი, იშიბორი, იშიმბე.

გური ოტობაია-სისმარი

ღუმა ოტობურ ცირეფს,
თოლსერ სისმარ მუძირე,
ტანს პეულეფ მიკმოქუნდ,
მუჭო გვალაშ დუცი რე.

ღუმა ოტობურ ცირეფს,
თოლსერ სისმარ მუძირე,
ორთუმელშა ნოჸელეფ
ტკიბირშორო მუცირე.

ღუმა ოტობურ ცირეფს,
ვენტი, ვენტი მუთი რე,
ხვალე ართის ვადურულაფ
ნამუთ ჸათე გურცი რე.

ნამუთ ჸათე გურცი რე,
ჸოროფილსუ ქუჯინე,
ღუმა ოტობურ ცირეფს,
თოლსერ სისმარ მუძირე.

გური ოტობაია-თაშ ვარენო?!

მუს ოცილუ ჭყონი მეხი ჸალას,
ჭყონი ჟინცას ქიმკიქუნანს მალას,
ჭყონქი ოკო ჭყონიცალო ფალას,
თაშ ვარენო ,ჩეცხენამი ჯეგე?!

მაფშალია მუს ოცილუ ქირეფს,
მაფშალია გილმაქარგუნს ბირეფს,
ორულუანს ატამეფიშ ცირეფს,
თაშ ვარენო,ჩეცხენამი ჯეგე?!

საქორთუო მუს ოცილუ თურქის,
ვარა რუსის უნწალუნსო ფურკის,
გოღურჯოლსუ ხარხუნტია ხურხის,
იფსხუნუათ სქან ბორზალი, ჯეგე.


1.ჯეგე(გეგე)-წმინდა გიორგი
2.ბორზალი-მახვილი

გური ოტობაია-კვინჩა

ბჟაქ გინილ გვალაშ ხინჯი,
სერ ილიებუ ჸინჩას,
იჭირჭკინ ლურიშ ქვინჯი,
ჭვიანს ნოჸელშე კვინჩა.

ალბათ ჸოროფა ორკუ,
დო ანგარინე კინი,
ანწალა ჯას მებორკუ,
სერ ილიებუ ჸინი.

1.ანწალა-ხეზე ჩამოკიდებული ზვინი

გური ოტობაია-დამორჩილი

მეურს ურემი, დამორჩილი რე,
სერი გინძე დო დღა- მორჩილი რე,
ჯათ გორჩვილი რე თავრენჸურენი,
ოდაბადეში მოკო ბღურენი.


მეურც ურემი დო მირსიოლუ,
ჸოროფაქ დუდი მომირსიოლუ,
ტან მარზიოლუნ აკა, მუ რენი?!
-ოდაბადეში მოკო ბღურენი.


ემერ სქუა და ემერ ჩილი რე,
შური ფურცელით მოფორჩილი რე,
ფოფორ ჭვილი რე, ვეფანდურენი?!-
ოდაბადეში მოკო ბღურენი

გური ოტობაია-მაფშალია

ჩქიმ ქიანაშ მაფშალია,
შხვა ქიანაშა ვაფურინა,
გოლუაფირო,უსქანეთუ
გეწკურილი მაფუ რინა.

სქან ოგვაჯეშ ხეშქაგური,
ჩილამურით მაფუ ეფშა,
სქანი ართი ბირაშენი
თე შურს ხოლო ღურუს მეფჩა.

საქორთუოშ ცე ქიცა რე
თე გოთანა ხვარჩალია,
შხვაშ ქიანაშა ვაფურინა
ჩქიმ ქიანაშ მაფშალია.

გონწყი ფსუა დო კისერი,
თუთაშფერი ქუმოძირი,
არძა ჩქიმდა,არძა ჩქიმდა,
სქან ჭუა დო სქანი ჭირი.

უღურჭულე წკონდა ღალეფს,
წვირალ თხუმ დო მაბჟალიას,
შხვაშ ქიანაშა ვაფურინა,
ჩქიმ ქიანაშ მაფშალია.

გური ოტობაია-ჯარშა ვაზარენთ უკლაშ ჯიმას

ჰავას ნახვილეფ ვამკასოფ თოკშე,
კიროკილ თუმას წყარ გეწენს დოქშე,
ეფურნელ ჩეჯას ვარკუ მეჯინა,
მარა უსქვამაშ ბონილ რე ჯიმა.

ჭუმე ქუდოცენს ორქოშფერ თუმა,
ჭუმე იჸუაფ ნატრიშ ერთუმა-
დობადონაშო გვალო დო ფალო!
ჩეჯაშ უსქვამაშ ბონილ რე ჯიმა.

დორზამილ ბუხარც აფუ ართ ამბე,
ალდაჩხირ ცხვინშა გეშაჭვართაფე,
ეფურნელ ჩეჯას ვარკუ მეჯინა,
მარა უსქვამაშ ბონილ რე ჯიმა.

ალიო ქობალია-წალენჯიხა, მანცხვარიში კილისა

წალენჯიხა, მანცხვარიში კილისა,
სანთელჯგუა ივალუნა ცხვაცხვეფ...
ორჩინელშო ირთუდ ნერჩ – სადგიმიშა,
მუ დინაფუდ ბერზემეფიშ კარეს...

მუშ ნახანტა მანცხვარიში კილისა
დოხვამუ დო შურ ქიმეჩუ გონთეს...
დუდშუშელო ათანგარდ- ცხვაცხვემს,
მახარებელს გურს ეკაჭუდ ცოტნე...

წალენჯიხა. მანცხვარიში კილისა,
სანთელჯგუა ივალუნა ცხვაცხვეფ...
ხვია ხუმა ათაკირუ კონქემს,
გოჩხონუას, მახარებელ, ამენ!

ალიო ქობალია-ონწარე

ბარას გარე წკონდა ღალი
მაფელ ონწარე.
ოზეშ სანძღო ბაღანობაშ
მაფუ მოწამე.

ხვარჩალია წყარიშ ზესქვიშ
მორჩე ნოხორი,
ქვაჩახია ლეფონეფიშ
რუმე ოხოლი.

წყარ-პატონი მიშატყობუ
გორდა ქალამი...
ამარ, გოთეს დუგაგორე
ტყაში წამალი.

სია-სია იფაჩალ
დოლო – ისირი,
ქოლოწყუსუ ინივალ
ბჟალა სილირი.

...ნანა მიჭანს, ხიოლი რე,
ორო მუმაში...
წყარი მოჩქუ, ქიგნოდვალ
ფერი კუმაში.

ალიო ქობალია-ჯიმალეფი

უჩა ნირსეფ მეთხოზუნა ჩქინ ნარინა გვალემს,
ათეზჷმა გაჭირებათ კვარზალ შურო ვარე.
სიზმარ-ცხადო გეჸურანსჷ ჩქიმ ცოქია გალე,
ჩილამური მიშქვიდუანს ჩქიმ გონწერილ დალემს.
ღურას ბრელშა ვოხვეწუქუ ჟინ ღორონთი ხვამელს,
ირო ართო ვორდითჷ დო ქუდომიტეს ხვალე.
მუშენირე, მოგაფუანს მა უსურებ ვალემს,
ართშა ვარა ქუმოძირას ჩქიმ შალვა დო ვალე.

ალიო ქობალია-რჩინა

თიშო დუსუ ვაზოგენდი,
ტაროზ, ჭვიმა, ნათუას...
სერ დო დღაში გიხანდებუ,
ცოდა მითინქ ვათქუას.

ვადარკებუქ სქან სოფელიშ
ჯგირ დო ფურიშ კვათუას...
მეზობელიშ დიარასჷ,
ხვამასჷ დო ნათუას.

მინშა ღორონს ოხვეწუდი,
ნიტე, შურო ვაპუას...
ირკოს ართო უხვამუქუ,
ჯგირობუა ქატუას.

მარა ორთა მუშ კისერიშ
უღუს ოთოლაფუანს...
მოხოლებე სირჩინუე,
დღალემს გოთვალაფუანს.

კოჩი მინშა შიშის ღურუ,-
მუთუნ ქიდილანდუანს...
გოჯოგაფუ სქუალემს,
ტორონს ოდიარუანს.

ალიო ქობალია-შარა შარა ბორზიეფი

სერიშ კარსუ გემნუონჯა,
ქელვოჯინექ ცაშ კარეს,
მურიცხეფიშ ჭვემა ცენსუ,
მევარჩქილექ ხონარემს:

მუაჩქიმი გაფურცქინანს
თეა ხოჯიშ ქასანთელს,
დიაჩქიმი გიობირანს
პატონემსუ ფანდურელს.

ია-იაშ წყარი წენსუ,
ჭურჭულანსუ ოდაშ რჩელს,
გუნაცხანტა პეულანსუ
მუმულიაშ ბირბილემს.

სასინთოშე მუთოფუნსუ
ჩელაია თუთაშ თე,
ჸვას ფურცელო გემოფინუ
ნანაიაშ რგილი ხე.

სინჩხე უთაკარუანსუ
ბაღანობაშ სიზმარემს,
ცხვინსუ გილაწირწინუნა
უჩა ორო-მესერეფ.

დუსუ ქიმთიბტყობინუა
შქართუნს, სქვამას გურისტელს,
გურშა ქიმიბხუტოლუა
ჭითა-ჭითა ჩაფულემს.

...ირფელ ართო დაფთხიებუ,
ელვოჯინექ ცაშ კარეს,
მირე გიშმოწურუანსუ
შარა - ჭარა ბორზიემს

ალიო ქობალია-ელიშორი

სამარგალოშ ნაშქასერს
თუთას უცენს ვარჩხილეფჷ,
ოლო მარდუშ მასიმერ,
იკარკალნა ვერჩხილეფ.

არიკეფი მიშატყობ
დოფა-დაჩხირ ფანილემს,
ჭყონონიში ტებენეს
მითონათუნს ფაშქუნჩეფჷ.

დიასქურიშ ინიგირს
ილასირუ ლაზურეფჷ,
მიკახორცქუ კოდმე-ტკილს
ეკიმალუ ქვითორეფჷ.

ორთვალემსუ ყინიშელს
გილახენა ჭარუეფჷ,
გასოფუნა ჟინიშის
აგაგა დო ორუეფჷ.

სერგეგიაშ ნანიშოლს
ისასუნა ისირეფჷ,
მელანიში ელიშორს
წყემიშ ორქი იხვიებ.

ეუკუნანქჷ, თუთა რენ დო
დუკუნანქი – ტუტა რე.
მურე ოჩქვანს თუთაშფერო,
დიხას შხვაშო ტუტაშფერს?..

ალიო ქობალია-გესერელს

კირიბია წინიკელს
გიოხანტანდ მურიცხემს,
მენცარული წიგნეფი
მითუტყობუდ ფსუალემს.

აკა ქიგმაგორედას,
მიშეფსოფუქ სიზმარემს.
,,მებდინაო გესერელს?” –
მევორექუ თუთაშემს.

ალიო ქობალია-ნოღურიში

ნაბადიაშ მიშაჭელს
ჸასუ ქიგლამტენქო,

დიხაშფერო გოსანთილს
არწის ქაშმოტენქო,

ჟინორთაშე ვარჩხილიშ
ჭვემათ ქიგმოწენქო.

მოლასირი მურიცხიშ
ტვერო ქიგმოცენქო,

თარშურო დო უჯგუშშურო
ზღვასუ გინილენქო,

ჩხორო ცაში მაძირაფუ
ეშე მეხარენქო,

მა სი ირო გამონკანდ,
აშ ვემკიჯინექო,

რინას უჩათ დოხართელს,
დღას ვემისაჯენქო?..

ალიო ქობალია-ორთაშ ლუბა

ნარღიშ ზღვასჷ ქიგიოლუ,
შურიაკონკარილი,
ქუნჭუანსჷ გიმე როხუ,
თოკიშ აკოჯვარილი.

წყარპის რინა ქეკასკიდუ,
ტვერქუმუო ფანილი,
წყითეშ მოსა ქუგაკირუ,
ხვიარიაშ ბანდილი.

მაფა-ჩხომი გეიაზადუ,
ერქემ-სუა ფაჩილი,
შიშ დო ორო ქუგადირთუ,
ქვერსემიას ფალირი.


ხოლო ცაშა უჯგუ ულა,
შარა გობუ სარკილი,
მიანტებუ ორთაშ ლუბას,
ჩხურუშ ეჸოთამილი.

ალიო ქობალია-ნწკელი

მესეფიში მარუასჷ, მოსოფელიშ ზღვარუას,
არზენაში ზარზალსუ დო კურუმ კაპუშ ზარუას,
გარულ თოლიშ გორზამას დო გვარგვანჯუა – ქარუას,
ნაჯვარლენსჷ დუნაწიმა ზისხირიში ჸალუას.

ძელ დო ძვალიშ ჟვარუასჷ, გურგიშ ჸვილიშ ტკვარუას,
თუთა ფორცხოლერღვაფილიშ კუმა-რუმეს ნკარუას,
დიხა გოდარდალაფირიშ ეშა-გიმე ყარუას,
ქვერსემიაშ ნაფულეში ელე ეშაყარუას,

ერთელ წყარი ზვირთილიში ცასუ მიკოხარცქუას,
არქანეფი გუნაჭაში ხირატუა-ხართუას,
გოჯარილი ჭკანდერეფიშ უკმო-კვარჩხო ქართუას,
მურიცხონიშ სარსიოლშე გინოციმა-კვარჩხუას,

ცაშ ლაკვეფიშ რულაიას, ჸურუა დო ლალუას,
ვითაამშვი მასქურიშ დო მუში დიაშ ნჭალუას,
მართუში დო მაშარულიშ დაჩხირს მიშარგალუას,
დალურიში კველა-დინცხო კარუელიშ გალუას,

ზღვაშე წყარ დო ცაშე ტვერიშ უჩათ აკოწყათუას,
რინა-ღურუშ მერთელეფიშ ჩილამურით წყარუას,
...ქიგვაჸუნუქ ქირსეშ ლებირ კუჩხეფიში ნაულას,
კირდე-ჩქონშა გეკვანთხუქუ, შურს გინვოტე წაულას.


1.ნწკელი-ძველი კოლხური ღვთაება 

ალიო ქობალია-სამუელიშ ობინეხე

სამუელიშ ობინეხე
ყურზენიში ეფშა...

ჩქინი შქაგას გეუჭოფუ
დოქუნილი ჩხეშა...

ხოლო ჯგირო დოსქილადე
ათე ბორჯიშ გეშა.

ალიო ქობალია-ჭვიალია

დიყვინთუქუ ოლე ზღვას
მურუჟეფიშ მაგორუ,
მესეფეფი გილეშხანს,
ინისქირიშ მაფორუ.

დარანიშე იფუჟღანს
ვერეხიში ნაშურუ,
ნაშქვიდერიშ ხოპო მოჩქ,
კიბოიაშ ნასულუ.

წყარმურიცხი ივარვალ
ტობა-გირი ნარუმუს,
ფირტველია ინივალ
დაფორტვებულ ნანიშუს.

ვემიოხე ელე წყარს
ნიშეფიში ნალინუ,
უსისანდე ლიარემს
ჭარაქ ბრელი დალინუ.

გიმეიან გორობას
ზღვაშიერი ისასურ,
რეჭილია კორობას
მირგატული მიშალურს.

მეგე ვარე მუთუნ შხვა
ჸოროფილიშ ჩილამურს,
შურიაკოკორობილი
სქან ნიშიშა გეკანთხუქ.

მესეფემსუ გიოსქიდ
ღინჭილიაშ ხუმლა ხუ...
ჭვიალიას აფუნიშ
პეულეფი გიოთუნს.


1.მურუჟი-ლანდი
2.მესეფი-წარმართული წყლის ღვთაება
3.ვერეხი-გოლიათი
4.წყარმურიცხი-ზღვის ვარვსკვლავი
5.ფირტველია-წვრილი თევზი

ალიო ქობალია-მოქვი

მიქუმინ- ჩქიმი მოქვი,
ვარჩხილ ოხოლ მიარე...
ვამარგენს მუთუნ თოკი,
კალმახაში ბინა რე.

ართი აფუ ჭვიმა, კოხი,
ადრე ენადგინა რე...
მელე-მოლე უფინ ნოხი,
ჟინი ორთაშ ნინა რე.

გაფაფუნა, ჯალა-ჩქონი
კირდედუსუ მინარე,
მესოფუნსუ სქვამას ორქი,
ნდღულაფირი კინა რე.

მოჭითარე მუში როკი
ჭილოუში ჭილა რე
ტაროზემსუ ცაში კონკი
ჩხორიათუ გინარე.

მიხარჩალუ ქუა-მოქირს,
უჩა ზღვაში კილარე,
დიაწყარსუ მოქვიშ კონქი
სიზმარცალო დილარე.

ალიო ქობალია-ნამაჸალუ

მეშარულო მეშაყარანქ
დოსქილადირ წონწემს…
ვარსქილადჷ ჸოროფაში
ჯვეშებური მონძე.

მუს გოხვარუ საჯიმალოს
გუნანტებუ ონწე,
ათეზჷმა საცოდებას
დუდო ღორონთ ორწყე.


1.მონძე-მემკვიდრე,შთამომავალი

ალიო ქობალია-ზარა

ტანი ოხვარჩალაია
სქანი წყარი წკონდა რე…
პოპორ ოქვაჩალაია,
ჩქინი უმშო ცოდა რე…

ჸვანა ოშვაშვალაია,
ლაიტეფი – მოტარე.
აქ გიბირუ, მაფშალია,
გვალო ჯვეში, სონდარე.

ჯიმაკოჩი მარშანია
მიხვიჩინანს, მოთარე,
აქ ალიო ქობალია,
სამუელიშ მოთა რე.


მა მონირზუ, მი დარღალა,
მუნაველი, მოშარე…
დიადიხაშ მიდაღალა,
ვავა, მუზმა ცოდა რე.


ქაარწყეთო ,,ისტორია,,
მუშ მაპუხა გორდა რე,
მერთომესუ ნისორიათ,
ზარაქ, ცოდა მონკა რე.

ალიო ქობალია-ლიმაში

დიირთითო, თქვა ცოდეფი,
დაჩატებე გურმანგარი,
ჩილამურით დოშოლერე
დიაჩქიმიშ ყვალანდარი.

ცოდაშ კითხირ გადიდებე-
გოჭყოლადა ღორონთიში,
გურს ნოღვენა, შორს მითირე,
ქორენია ბოლო თიში.

დიირთითო, თქვა ცოდეფი,
გურ ნორღვენა მუ მანგარი…
ჩილამურით დოშოლერე
დიაჩქიმიშ ყვალანდარი.


1. ლიმაში-საბრძოლო  

ალიო ქობალია-ჯვეშ შარეფი

ჯვეშ ნაულა ნაშარემს
ძიგირ-ბარდი მორიებუ…
მეურაყუ, აჩქარენს
ჭვიმემს ასე ბორიეფი.

მაშარემსუ ელუდეს
ამდღარიშა ნაშარეფი…
ორთა ირთანს, ბრელი რდეს,
ვეპალუნა გაშარეფი.

მაშარემსუ ელუდეს
ამდღარიშა ნაშარეფი…
ნანა, მუზმა ბრელი რდეს,
ვეპალუნა გაშარეფი.

ალიო ქობალია-აკმანთხაფუ გვალეფშქას

აკმანთხაფუ გვალეფშქას ბჟა დო თუთა კილაგანს,
აშნაჭოფა ჩიტეფიშ ფსუა ივალ კირდანას,
საარქანო იჭკირჭკინ, პელაგონი მიაგანს,
გასოფუნა გვერშაპეფი ლეჭკანდერიშ კილანას.

ბორიეფი მითოხვილ არქანემსუ კიაპამს,
დიასქანშა ქუგუ თოლი ჯაშ ნათოლა კიბალას,
კოჩიშ შურშო ფულირიე ჟინი ორთაშ პიანა
ბედი რენდა, უწორუა ბიკარუა-კილარას.


1.ღორონთიში პიანა-ღვთის ნება

ალიო ქობალია-ოდაბადეში

დიაჩქიმიშ ჩე კისერს
დარაია გაფარფალუ,
ოდაბადე ოხვამერს
შარა ვაკო ნაბარბალუ.

სანთელ გილაქიმინელს
ოროეფი მიშევალუ,
ღორონთიში ფსუალერი
ნირსო ცაშა მისარსალუ.


1.დარაია-აბრეშუმის თავმოსასხამი

ალიო ქობალია-შქედი

…ამარ შქედი, საორიო,
ჩიტეფიში ეფშა…
ჩქიმ აბლაკი მეჭირხინუნს
თე სოფელიშ გეშა.
მეურქუ დო გურსუ მიღუ,
ქომიშითო ხეშა…
მარა იშენ,საწყალცალო,
ართს ვემუოქეშა.
გერს კირიბი ნოხირით
დოგვანუნო ჩხეშა,
ირიათო ჸურუას,
ვამოშქურუ თეშა.


1.შქედი-ჩრდილნარი 

ალიო ქობალია-დეიშ ჸუდე

მიოხვამუ დეა–დიას
ათუჩოქუ დეიდია,
შუმნაშუა დარაიას
აწუწილუ ია–ია.
დუდოხატის მუცირუანს
ფეროსუ დო ფერაიას,
შურუბადუ ქიმთოშქურდუ
ისიროტა–ისირიას.
პეულეფიშ მინდორიას
გილევალუ მასქალია,
ხუს გილაბხე სინთორია
დადა ცირა–მაცირია.
ოზეს გინი გილერულე
ქაუჩა დო სქვამაშია,
კიდას ყამა მიკორწკინუნს
ვარჩხილერი შანაშია.…
სი ქომიწი,ჭვიმაშია,
რინა რენ დო სისმარია.…
კურკანტელა ჭითაშია
გარზუ დეიშ სამარიას.


1.მასქალია-კრაზანა
2.დარაია-აბრეშუმის წამოსასხამი
3.ისიროტა-ქასრა

ალიო ქობალია-ნაცოდალი

ცაშ ნოტეხი გამკოლაფე
უხვამერიშ ნაჭარა,
აკოსერილც უსერეთუ
ვემიოჩქუ ნავალა.
მუხურონსუ გილესოფუ
ჭითა ხოჯი ნაზალა,
ჭყეში ოროს ქოთხოზაფუ,
მისარონი ზარზალანს.


1.მისარონი(მირსობა)-რელიგიური დღესასწაული სამეგრელოში

ალიო ქობალია-ჭყონი

ჭყონი გერე ასე
ვადირიკუნს ჸას…
გოსოფილსუ შქაშე
რინა იშენ წანს.

ქარ-ბორია სოლე
ოკონ ლამბუნს, ჭანს…
მარა ზღვაში მოლე
ვორწყექ მენდიშ ჸას.

ალიო ქობალია-ცარ-მეცარე

დიასქურიშ ეშნაველს,
ორქო უცენს კირიბემს,
თუთა გალე ეშალემს,
ბორჯეფიში კიბირელს.

მენჭაფილი ომუნეს,
თუთაშეფიშ ორეკე
უსინთუანს უკუმეფს
ნაწყარუა ურეკეს.

აფხარხვილი მეცარე
გირინუანს ოროემს,
სილირ ორქომელანემს
ორგილუანს ორეემს.

მიშესოფუ, მიორე
ურთა-ორთაშ ფულირემს,
მეორიე-მიორელს,
მასქურეფიშ ფიორემს.

ტომბა სერიშ დალიერს,
მოგოთანე, კიაპელს,
გეგნირულე თუთაშ თე
ზღვაში წვანე ნიარემს.

ალიო ქობალია-ნირსიშ ფელუკეფი

ზღვაშ მორია, თუთაშ მორთა ართო აკოშაყარელი,
ძინულენსუ რუმე წყარი, ოკიდირეს მორინელი,
კიბოია გილეღვარღვუ, ტყასუ მიშახვიარელი,
ნანწყვიშ არფის მიკოკირუქ, თოლეფ გაფუ დონირსელი.

ულირ ბორჯემქ ქინოიტუ, ჩხოროფათუ დოხართელი,
მორო ესუთ ვეკაწამა, ვაგურქიე შურო ხენი,
დუდი მედვალირი გაფუ, ზღვაში ლუბას დოკარელი,
შურიშ ვესუ მეჭირხინუნს თოლეკირილ სქანი ცხენი.

ქვინსუ მურე გიწონებუ – კოკიშ კოკი, ფერთიშ ფერთი,
ექ ნათუნსუნ, შხვა მუთა რე - მუკნაციმა მურიცხეფი…
ელე ცაშა ქელეჯინი, ქიგიშინი ორგიეფი,
ჯვეში ნიშიშ არფიშ გამა მოჩქუ ნირსიშ ფელუკეფი.

ალიო ქობალია-გალენიში

უჩა ზღვასუ ამუსერი
მურიცხეფი ქინოცენს
ქიგვაყუნუქ საროტემს,
თუთა მართუშ ნამოსერს.

ზღვაში მაფა გონირსელი
უფაჩუანს მუარემს,
მირე ალმოფურცქინანს,
სოფელიში მუორეს?..

აქ მუთუნსუ ეკვაჭუქდა,
ვარჩხილჯგუა სქუალემს,
ჩილამურით გომბონუნა
ბრელშა ტახილ ფსუალემს.


ასე ვარა მუნულუანქ,
ორუმეს დო ორომეს,
მუაჩქიმით ქიგლაბარჯგანს,
თუთაშ ქართა-დოხორეს.


1.საროტი-ბილიკი

ალიო ქობალია-ფაშქუნჩიშ მუორე

შქასუ მურე აშაჸუნსუ ტომბა ზღვას დო მუშ პოპორს,
აკამურიცხიში ცას დო კამარეფიშ სარსიოლს,
სოფელსუ დო მოსოფელსუ, ოლე ჯას დო ტყაფარონს,
სამარგალოშ უღურ შურს დო კუნტა ხანიშ მარგალ კოს?

ეში გამაშ გორუასუ ნიშ დობრაქუ სარაქონს,
სერით გვალო გამწობლაფექ, აჸუნაფილ სანარღოს…
ფაშქუნჩიში ორქოსუა ქუგორზამუ სინთეთ ჭყონს:
,,სითი ღურაშ უკულ გენწყუნქ მუორელ ირიათონს”.


1.ირიათონი-მარადისობა
2.პოპორი-ტალღა
3.გამა-პასუხი
4.დობრაქუ-გაჩერდა
5.ტყაფარონი-უღრანი ტყე

ალიო ქობალია-ათაბოგი-კირდე-ზღვას

ათაბოგის ქიგვოღობა
კირდე-ჩქონიშ მოფერდას,
მითინქ ოჭიშ ქომრთინუდა,
არძა ჯგირო ჸოფედას.

ოჭმარესუ ქიგვოჯინექ
წყარიშ წვანე დობერას.
თომაშ სირმას ქიგვოჭაჭანქ
ჩილამურ დო მონგერას.

სერიშ ზღვასუ ქიმვარჩქილექ,
ნიარეფიშ მოფენდას,
ჩხომეფს ქიმიბდიარუა,
ორქოს მუთას ოფერდას.

ინორობას ქინვოხვილა
წკონდა ჭვიმაშ მობენას,
ნიშის დომწყუნქ,დღას ვებზალა
ქიანეფიშ მოლებას

1. ათაბოგი-ბოძებზე შემდგარი საცხოვრებელი
2.დობერა-დაბლობი
3.ინორობა-ხრამი
1.ჩქონი-პატარა კუნძული

ალიო ქობალია-ცალსაროტი

წყარმალუში მერულაფას
კამარეფი იბარბალ.
მუნარქია, ორო, ლაფას,
ჟინიშ ჸინი ივარვალ.

უჟამური ჟამიშ მერქა
ვერჩხიშორო იკარკალ,
მერცხულეში ჟირფა ჭირქას
ცაიშარა იკარკანტ.

ქიანურიშ თარი შური
უქიანოს გილევალ,
ჩეთ ნწერილი თუთაშურო
უფალუსუ ალაფალ.

მურიცხეფიშ ბეჭილია
ცასუ ცალსაროტო გაბ,
ქაჸუნი დო ვადგართინე
უკულ დიხა მუთა გაფ.


1.ცალსაროტი- ცისარტყელა,ცის ბილიკი.
2.მერქა-წამი

ალიო ქობალია-მენიშოლი

ათე ნიში მიში რდას, ზღვაში ეკნაჸოთემი,
ბორბოლიაშ ნამოსას მითუტყობუ ნოთენი,
მუჟამიში ფარონემს ნარდიე დო ნოგეფი,
სონი ბორიეფიში უსოფუანდ ნოდეფი?

ქოძირუო ნასისმარჷ მაფა-ბჟაში ნოხვენი,
უკულ ბორჯემს ჸუნაფილ, უკიანოს ნოზღვენი…
მურე მიკიფიორუნ, ცასუ მიკოქოსელი,
მენიშოლიშ შური რენ დო ერქემიშ ნოსეფი?..

1. მენიშოლი-მენავე
2. ფარონი- დაბურული ტყე
3.ერქემი-აფრა
4.ბორბოლიაშ ნამოსა-ობობას ნაქსოვი

ალიო ქობალია-ჭოროფა დო გოლოფა

გური მუზმა წყანწყილ მაფუ,
ჭვიმა რე დო გოლოფა...
მიდგა–მოდგა გილერქაფუ,
ვამაცალეს ჸოროფა.
წყარპის ფეშერ დომირჩაფუ,
ბაწარ გობძუ ჩხოროფა,
გურჲ ბრელიშა ჩართილ მაფუ,
შური ოკნაკორობა.
ცას მუნაფა მუშე გაბუ,
ეშმაკეფიშ ჭყოლოფა
ბრელსჷ ირფელ ართი აფუ,
ჭოროფა დო გოლოფა.


1. ფეშერი-ფუჩეჩი,ნეშო.