გური ოტობაია-სონეტი ბუტუტიას

ეთექ დინუ ბუტუტია,მუჟამს სუა ქაჩანუნი,
მუჟამს დიხას ქდიტენს დო ჟინცას გორუნს დოხორესუ,
მუჟამს ჸვერეთ მიახიოლ მურიცხეფიშ  ნოჸორეფსუ,
მორო მითინს უფსუალეთ უღურალა ვაჭარუნი.

ბუტუტია დინაფილ რე ოდაბადეს ვაჯანუდა,
ულირ დღაში გოჯოგაფა, ვამუჸუნანს  წოხოლენსუ,
ინას ფსუა მეუჸოთანს მონტერე დო მოხოლესუ,
მორო სინთე ვადარზინე ფსუათ ვედეხვარჩალუდა.

ვემიდინე სოვრეთინი გურცუ მუდგა ვეპალუნი,
ტყვია ზეპეს ბაჩაჩიას, მუჟამს ართშა გეჸალუნი,
მინშა ჯვარიშ გეჭკადუა ულიებუ ხვამა დღა რე.

ეგებ გვალო გეღორონთი ფსუალეფი ეფალუნი?!
მაფურინჯე ბუტუტია, ,,ღურა მუში მამარდა რე,
რინაშ ნება ქორდასუნი, ქანა მუში მაფართა რე,,

გური ოტობაია-სონეტი ქაზიმ ქოიუნჯუს

მუკმოქუნა ჩხე ქვიშაში ოსარე,
მუნმორენა სფინქსიშ კვარჩხი ორანი,
შარა ვარე დიხას ვემჲათხორანი,
მიდგა ლანდღვა,უბადო დო თორსა რე.


ამდღა ჩქინდა ჟინცას ვემჲანოსალე,
გურგინქუ დო ტყვაციქ ვაგმაჭყორანი,
ჩქი ქიანაშე გურქუ ვადმაწყორანი,
მორო ინა ბორბოლიაშ მორსა რე.

გობირუნ დო გოლუაფირო,იბირი,
მუჭო ოკო დეჩიჩუე,დილაგვე,
გუთინ ჯიმას ბირგულეფ ელიბირი!


გურშა დაჩხირ გვართა-გვართათ გირაგვე,
ბირაშ ღალას ქელერინე კიბირი,
ბირა ვარა მუთუნს ვამადირაკე! 

ლაშა გვასალია-მუკნაზღილიტა

უჩა რექ დო უჩა ორდა,
ზორღაშ ფოფორს ჸუნაფილი,
ეშნახარცქა დიხაშ გურშე
ჸოროფათი ნდღულაფირი...
ერია დო მორია რე,
მაფორჩალი ბორია რე,
ქუდურქი სი ფორიალე
ცა დო დიხაშ მოდიარე...
ჭილონგუა, ჭილონგით
აკიხართუ დღა დო სერქი,
ბრელქი შურსი ვენინტირუ,
ჭიჭექ იუ ნაბტან ბრელქი...
ეშნახარცქა დიხაშ გურშე
ჸოროფათი ნდღულაფირი,
უჩა რექ დო უჩა ორდა
ზორღაშ ფოფორს ჸუნაფილი!

ლაშა გვასალია-ქუაცანცალია

ქუაცანცალია, ქუაქანცალია –
 ცას მებუ შურიშ ომპა დო რინი,
 შულადირს, ცაშე მუკნალეფ რსხიალს
 ვახვარ ჯაბიში ხვამა დო რსხინი...

 თუდო ქუა დო ჟიშე ცანცალი,
 დიხაშ უშულად ფინქრიშ მაინდა,
 მიორე გვალას ნირსიშ სხარსხალი
 მონჩურუნს შორშე ლერსიშ ბაიდა...

 მაფაშ თუმა დო ოჩოშ კირინი–
 ცირას მუს ოხვარ შორშე თიკინი...
 გვალეფს სერირე აშაბორკილი
 სერ გვალეფით რე აშაჭორკილი...

  მინტებ დღალეფიშ ჩე–ჩე ფოფორი
 ლურ სიზმარს მაფუ მიშაფორილი...
 იჭუ ზისხირ დო შურიშ ლერსეფი,
 ჯერღვებს მიშამრე ჭუათ მესეფი...

 ქუაცანცალია, ქუაქანცალია
 იქანცალუქი მუჭოთ ბორია,
 პილუნს ფიჟვეფიშ ჟღვილირ ხურხინი,
 გუმასხარსხალუ რინათ ჩხორია...

 ქუაცანცალია, ქუაქანცალია,
ქუაქანცალია, ქუაცანცალია...

ლაშა გვასალია-ვარა გოლუა

მეურს დო ჭუათ ოკმართუ შური,
აკოკონკილი ცაში რკიალით,
მიბრტებუქ, შორშე მობთხოზუ რინა,
ჯერღვშე მონტებულ ფინქრიშ რსხიალით...
ქაშადინაბექ თოლ დო ხეშ შკასუ,
მებორებული თუნთიშ ჭყიშუას,
გეშარგვარგვალეს ზღვაშე დო ცაშე,
მივოჯინექი რთელო ჭყვიდუას –
სკანსუ დო გურშე ზისხირ ჭვეთანსუ,
აკოსკირაფილ ჩილამურითუ,
დუდქ ვამავილუ, მარა გოლუა,
სო იბხართალა ათე რინითუ!

ალიო ქობალია-ეკონია

დღა მუმორე მათირე,
 გენქირაფე ნარინე,
 მიშახართილ მერეთემს,
 ქუვორდაო მარინე.

 შური ეშე ინიარ,
 შარა უძუ წკვარამემს,
 სინთე - ჯღვერი ვესიარ
 არგილაფირ ჩე თოლემს.

ალიო ქობალია-ამნახანტი

მუორეფი გალუაფ
ურულაფუშ ორთუმელს,
გარულეფი გაროკანს
ჩე ნაკარუ გორუმელს.

ჸინიშანსუ კილისაშ
ინოხარცქილ ორთვალემს,
მარაშ თოლი უტიბანს
... ქირსე მარდუშ ჩე კუჩხემს.

გური თიშო იგიგანს,
ნაძიგირა, ნაჯვარლენ,
კურკანტელათ მიკივალ
ნაზისხირა ჭურჭულეფ.
 

ალიო ქობალია-მოძირაფა

მოძირუდუ, ჸინიშ გვალას
ძვალეფ გითიჩხირჩხინანდ,
ხიბას ზღვაშე მიკნახარცქა
ზისხირ მიკოზანთალანდ.

გალენ ჯიხა გოსოფილშე
გვერშის პიჯი ურღიმანდ,
დიასქურიშ წკონდა წყარემს
წვანე ხაშმი წამალანდ.

დაჩხირიში ნაჯვარჯვალა
ილორს გერეფ გაჸურანდ,
ჩეთ ნწერილი მუაჩქიმი
ზარას უპოტინუანდ.

ტყვიეფიში ნაცხირასუ
თუთაშ სინთე კილაგანდ.
სუაჭვილი ფაშიქუნჩი
ფოთქვის მითორაბადანდ.

დადმარიაშ ჩე კიდირსუ
ჩილამური ჭურჭულანდ.
ნორცხვა პარკის დუდოხატი
უჩათ მიშაზარზალანდ.

უშურეთი გინოლაფირს
ჭარგა გვერი ბლაკარტანდ.
ხეშ ნაჭარა ფურცელეფსუ
მა თავრეშე მევანგარდ.

ჩქიმ ჯვეში დო ჩქიმ ახალშო
ვეჸუასო თანაფაქ,
ათე სიზმარს ვეგშმართუ და
ვამძირუდას გოთანა.

შემოგვიერთდით Facebook  - ში მეგრული ენის გვერდზე http://www.facebook.com/#!/margalurnina     გელოდებით!

ილო კუხალაშვილი-საჸოროფო

ცირა მოოკვანწანქუნი, შურ ეკორჸუნს ეკორჩვილი,
შეფხვადი დო ელამილე, ეკონგარათ ეკგორჩქილი,
თოლეფ თოფურს იკათუანს, ეკგოყანთანს თუთა კიდირს,
ჩქიმიჯგუა შურმეჭვილი, ღორონთს უჩქუ მუდა გიბირს.


ათე რინა მა ვამიჩქუ, რტინა რე თუ გეჭიშარე,
... ელ დო ვალით ელამილე, შური იშო ქეწიშარე.


ქმაპატი უონჯღორეთ თოლეფ სკანდა მითირთოლუ,
მა თი ღორონთს ქოგუალე, მიქ რხანტუ დო მიქი რთოლუ.


ჩქიმი გურიშ ვარდი ორექ, მოკო ირო ვარდი ორდე,
მარა ნიტე მუს მომიღანს, ვართ რჯოგუდე, ვართ გიორდე.


იშენ სქანი ხვამას ვორექ, თე ნახვამათ ხვამილ ორდა,
ოღონდ ქორდა გოლუაფირო, მუ ვქიმინა ვა გიორქდა.

ჯამბუ ბებია-სი ოკო ორდე

ჭყონიშ ნოჸელას ბჟა გაგარგანჯუ,
ნტერს ოხიოლუ – დოჭუნსო მორო?!
მარა ცაქ თოლეფჲ ჸოროფათ განჯუ,
ზღვაქ დიხვარჩალუ გოძიცაშორო.
სი, ღორონთიშ ბჟა, ქომუჩ მა ჩხანა,
სი, ღორონთიშ ჯა, ქომუჩ მა ორო.


მა მოდირაკილ მაფ ცალ–ბირგული:
ვადაქანცინე ნაჭყოლა კილე;
მარა იქილე გურჲ გეგნირული–
ლაზიშ ბირა დო რაგადჲ მარჩქილე.
თუთა, ქორთხულე, თუთა, ქორთხულე,
ჯიმაშა შარა ქიმემვარჩხილე.


სონდარო ზისხირჲ გინოფუნაფე,
დიხა ჸუნაფე კინე გართალო,
გიშემუნაფე, გედი ჯიმაგე,
შხვა ვაკო კოლხას გინმანათალო;


სი ოკო ორდე,

სი ოკო ორდე

ჩქიმ სამარგალო!

ჯაბა ბასილაია-ქიანაქ დინწყუ

ქიანაქ დინწყუ, დიფალისუ
ტყვაც დო გურგინქ გეგნიღ ჭვიმა,
ცაქ დოდირთუ, იმენდი მიღუ,
ანწი ვარა ქი ვაფუ რინა.


შოლირი დო გოწყვანწყვილი
თენა ვარე გუნაჭვიმა,
უბედურიშ მა ოროფუს
ჩილამურით უჭარ რინა.


მელე მოლე ნაშარუსი,
 ვარდეფიში გუმნაპირა
 ფიაფარჩათ ქუდოირღვაფუ
 წყურ კუჩხიშა მუგონჭუ რინა.



ნაჭვიმორიშ გინარჩხ დიხას
კუჩხიშ გილნალინას,
არძანერო მითმიფრჩქინა
 სქან ნაულათ მიმოჩქ თინა.


 კურკუციას უდე გედგუ
 ჩქინ ჯვეშეფიშ მულნარინა,
 თექი ხოლო ქიგუოგორე
 ნორჩალსი სქანი მითნანჯირა.


ქიანა დიბლი ირ მიოლშე
ვადომიტებუ ხაბო - ქარდა,
ზღვაშ ნალებუს გითმიბჯინექ
სოთინ ბძირენი სქანი ხართა.


თეშინერი გოჯოგაფა
 სოურე, მუსი, მევოჭარა.
 ჩქიმ ჭირო რექ ერჩქინელი
ვადოპილენი ვაიღუ შარა.


 ქაკმასერუ, სოურე იბდა ?!..
 მურიცხეფიშ ორე ციმა.
 ამარ სორე გივოგორე
ცას სქან სქვერიშ გუნასხაპას.


თეიშა მუქი მეი ონუ
არჭვალიში კირდეშ მანგას,
სოდეთ ოლორი მეფურინუნს,
დუდ ქუდოიდვალ ჯილოშ მანგას.


ლაღარკონს კუჩხ გილაბიჯგენ
მუქ ეკგაძირ თეშმა წარას,
 ვაიორდიდა მუშენ ვამწი
 წყარს მუშენ დინომირღვი ხანდა.


 უმინჯურო - მეტებულო
 მუშენ მობრთი მა თე დღაშა
 სქანი თოლეფიში ელნაჯუნა
 მის მეუღა თენა შანათი

ნანაში ნინა

მეგრული დედა ენა-ნანაში ნინა-ს ელექტრონული ვერსია შეგიძლიათ გადმოქაცოთ აქ http://www.link.ge/file/358368/nanashi-nina.pdf.html ან პირდაპირ ნახოტ აქ http://www.scribd.com/fullscreen/56177232?...j6diffnxx5ueop6

მხარი დავუჭიროთ მეგრული ენის - Livemocha - ზე განთავსებას!

მხარი დავუჭიროთ მეგრული ენის დამატებას ენების შემსწავლელ ერთერთ საკმაოდ პოპულარულ Livemocha-ს საიტზე! დავაგროვოთ იმდენი ხმა, რამდენიც არცერთ სხვა ენას არ დაუგროვებია. ხმა მიეცით აქ http://livemocha.uservoice.com/forums/2163-feature-requests/suggestions/1619601-add-a-course-in-mingrelian- სამქულიანი მხარდაჭერით! (ინსტრუქცია იხილეთ ქვემოთ).   საჭიროა ამ მოთხოვნას ბევრი მხარდამჭერი გამოუჩნდეს რომ www.livemocha.com - ის ადმინისტრაციამ გაითვალისწინოს ჩვენი ეს თხოვნა და განათავსოს მეგრული ენა მათ საიტზე სხვადახვა ენების შემსწავლელ კურსებთან ერთად, ყოველივე ამის შემდეგ, ნებისმიერ ადამიანს შეეძლება დარეგისტრირდეს საიტზე - www.livemocha.com და აირჩიოს მისთვის სასურველი ენა, მათ შოირს მეგრული ენა და საიტზე დარეგისტრირებულ მეგრული ენის მცოდნეების დახმარებით გაიაროს ამ ენის შემსწავლელი კურსები.     ამისათვის თქვენ უნდა შებრძანდეთ ქვემოთ მოცემულ ლინკზე, ჩაწეროთ თქვენი მაილი სახელი და შეფასების ქულა 1 დან 3 - მდე, იმედია თქვენ სამით შეაფასებთ!     ამით საქართველო იმ მცირეოდენ წვლილს შეტანს მეგრული ენის გადარჩენის საქმეში რომელიც ასე აუცილებლია დღეს ამ ენისთვის.     გთხოვთ გააზიაროთ ეს წერილი თქვენს კედელზე რათა ყველა ქართველმა მიიღოს მონაწილეობა ამ საქმეში გმადლობთ წინასწარ გულისხმიერებისთვის, პატივისცემით:     მეგრული ენის ადმინისტრაცია       ხმის მიცემის ინსტრუქცია:     1. შევდიბვართ საიტზე - http://livemocha.uservoice.com/forums/2163-feature-requests/suggestions/1619601-add-a-course-in-mingrelian     2. ვაჭერთ - vote - ს     3. ვწერთ ჩვენს მაილს და ქვემოთ სასურველ სახელს     4.ვირჩევთ 3 ქულას -     5. შევდივართ ჩვენს მიერ მითითებულ მაილზე და ვადასტურებთ ჩვენს ხმას გამოგზავნილ ლინკზე დაჭერით.     6. თქვენი ხმა მიცემულია, გმადლობთ.   ძალიან გთხვოვთ გაუზიაროთ ეს მოწოდება რაც შეიძლება მეტ მეგობარს 

გიორგი სიჭინავა-ოხვამერი

მარდობა ქრისტე,
მუჟამც მებდინი,
აშო მორთი დო,
პატი გებდვინი.

შურც ვაკო ჸუნდას
დიხას მოჯგირე,
მა ღურუს ღურათ
ოკო ვორჯგინე.

,,ნახარებ მუჩი
გურიშ ოგინე,
თიშ უმშო შური
ვამატყობინე.

ხანდაქ დო შიბაქ
თოლონჭ გონირსუ
,,მოკო" დო ,,მოკო"
ირ დღას მონირზუ.

ბორიაშ ბპოფექ
მა თაქ მაყარე,
მარდიშ საგამათ
ცოდა ბშაყარე.

კათა დუდიშულ
რინათ მიაშქვი,
მონტუ ჸავავა
ერემიაში.

სო იშაყარუ
წანეფ ჸოფილი
სო მეურც შარა
აკოსოფილი?

ვარა სო ტყობუ 
ღორონთიშ  ნარდი
ჯიმალობა დო
ჸოროფა მარდი?

მითა მაგორე
მუთუნ უჩქუნი,
კისერც გებძუნა
ევაშ უშქური.

მოგურეს ხვალე
რკება დო ძინა
მეტ მუთა ჸოფე
ოფუტეს რჩქინა.

ღორონთ თე ღულა
შარა გომთინი,
 შურც ოკო ულა
სქანდა დორთინი.

მარდობა ქრისტე
მუჟამც მებდინი,
ქუგომშინი დო
პატი გებდვინი. 

ლაშა გახარია-წყურგილია

გიორგი გუგუჩია-ანაკლია

ანაკლიას,ალნარკიას,ბჟა ტანს იბონს უჩა ზღვასი
დიდალეფიშ ალნარკიას,მუმალეფიშ ჭვილი დღასი,
გიშნაგორა ბაღანეფიშ ჩათხია რე მუშ დიხასჷ,
ულა რენ დო ართო სქუა,ღურა რენ დო ართო სქუა,
ხვალე ვარი, ხვალე ვარი, ვამკილუა რინაშ კარი.
შქაშ ენწერსი დაჩხირ ონტუ,იჭუ მარდუალიშ გური,
ხამისკურშე ბორია უმბარს,ინგირც მელე ხუმუშკური,
ულა რენ დო ართო სქუა, ღურა რენ დო ართო სქუა,
ხვალე ვარი, ხვალე ვარი,ვამკილუა რინაშ კარი.
ზღვაშა მეურს უჩა რაში,წყარს კიდირით მეჭკირუნსუ,
ჟი გიმახე უჩა კოჩი, უჩა ბაშლაყ გიორთ დუცუ,
ჭიე-ჭიეთ მედინ რაშიქ, ჭიე-ჭიეთ დინუ კოჩი,
ზღვოურს მოუღ ნარაგადა,ნაჩიებუ უჩა კოჩიშ,
ულა რენ დო ართო სქუა, ღურა რენ დო ართო სქუა,
ხვალე ვარი,ხვალე ვარი, დომკილეო რინაშ კარი?

ივეტა წითაშვილი-მუზმაშა იდი

მუზმაშა იდი, _

დირთი,

მუზმაშა იჩი, _

გირჩქილ,

სკან მოიადეფ

მიკიბლ,

მუთ რდი თიქ დუდი

ქირჩქინ

ღორებათ ტყურათ

დიშკვიდ,

ვამწუა, მეტ

შურ მიხირ,

გურქ შკაშა თეშით

გინწკირ,

თოლს ჩილამურეფქ

მიწილ,

მა პეულ ვორექ

ციზილ,

სიო?.. -სი

ჭარკანტ ხინწილ.

ბრელსი ვაიწინქ,

ქიჩინ, -

მუზმაშა გიწი,-

 დირჩინ!

ედემ იზორია-ვადმარინე

ვადმარინე, იბდე ოკო მა სოთინი,
გური ჩქიმი უჩა მართუთ გინორთელე...
მუ ღირინი, მუ კეკინი, მუ სოფინი,
მუ გარდღეფი, მუ დონთხაფა, მუ მერთელი.


ოკო იბდე, ბორიეფი მესოფელე
ქომშვიტუანს დო მუნაფა მუნორთელი
ქიანაშა ქომფაფუანს ელე-ელე,
იბდე ოკო, იბრტე ოკო ჭარაშ მელე.


ვადმარინე იბდე ოკო მა სოთინი
ჩქიმი გური უჩა მართუთ გინორთელე 

ედემ იზორია- სქანურე ოჸუნე

გოთანე, ბორია ქიანაშ შურიე,
ჯალეფიშ რკიალი რე წკონდა ლერსეფი,
სო იღი ბორია ორია,ორიათ,
პირელი აპრილი დო ჩე-ჩე მესეფი
გოთანე, ბორია ქიანაშ გურიე,
ელახუ მორწკინე გურნორცხვა სკიბუე,
მოუკინ ბორია ერია-მორიათ,
თი ჩხე-ჩხე ჩხორიას ხე  ქუმუტიბუე.
ჩქიმ შური, ბორიაშ ბურჯაფის ქაჸუნი,
დო მა მუ მოსკიდუ სქანიშო ცაშკარი,
ჭვეთიშე ჭვეთიშა სქანურე ოჸუნე
გენიას გესქილად შხვა შარა ოშქარი.  

ედემ იზორია-ფარფალიეფი

მისხუნ ფარფალია ვორდე,

სუას უფათქუანდე,
ხარხუნტია პეულეფს,
შურსუ გინვორთუანდე.


კაკაბია ცჷმს ბშუნდე დო
გურშა იბკოკობანდე,
მასკვამია მოკო ვორდე,
ატამაშ პირს მობგენდე.


სითჷ სუა ქორჩანუას
ხურჭკუმი დო ფორონჯი,
ვაგორჩუდას მაჭირხოლი,
ქილორი დო ტორონჯი.


ოციმუეს ღალიშ პის,
წყუ ორთჷდას ხჷრჩჷსი
ჩქით გიბქვეთათ, გიბკვერწათ,
ქუას თიში ნარჩხჷსი.


ართიანს გევაფარფალათ,
შამარაში ხოლოს,
უთანთალუას ჩხორიაქ
სუალეფიშ ოროს.


მინშა ქიგლაფართხუდენი
ვარდიშ ჭითა პიორს,
მათი გუგახურთქინუდე
მივოტენდე ფიორს.


ხუტიათჷ ხურხეფი დო
მეფათქჷდას სუეფი,
ორთეს გამწათ ოჭჷდას
ჩქინ ჸოროფაშ ჭუეფი.

დღა ორდასჷ ულიებუ,
ბჟა ქვერსემი დარანა,
ოდო ირო თაშო ვორდათ
რახან ვამივარანა.

დანიელ ფიფია-ქაჭვინჯიშ ჯიხა

მისთი შარა მეჩამუნი
ზუგდიდიშ ბჟაიოლც,
ჯვეშ სოფელი ჭაქვინჯირე
ხვალე ჟირი სათიშ ოლც.
ვითი ვერსი ვაილჷნა,
ქალადირთით დიკოხონცჷ,
ქოძირითო უძირაფუ,
ვაუჯერთო თქვანი თოლცჷ.
მუკი-მუკი სუკეფი რე,
მოთინილი ფალო-ტკილი,
ბაბუშობაშ ცურუეფით
გობანდილი, მოფინილი
ცაშა წვანდი უნჭუნ-ფერი.
არძო შხუ დო არძო რჩინჷ,
სუკიშ წვანცჷ ფუთქურამი
ცხიმურეფი მუკორშვინჷ.
ჟირ საჯენიშ მაჟიაშე
ემერ წყურგილ მოსოფუნც,
გვართა-გვართა მუკოხორცქჷ,
ქუაშ კიდას მიკოფუნც
უკულ ტკილცჷ უზოგარო
მიანთხუ დო გვარგვალანც.
ჯუნუნს ჸოროფილიშორო,
ბონუნცჷ დო ხვარჩალანცჷ,
თუდო ქვიშა ვარჩხილიში
ეთმოცენცჷ, ვარკალანცჷ.
ბჟაშ ჩხორიას გამშეტყობუ
შქას მიშაბარჩხალანცჷ
გიჯინექჷ იშო-აშო.
დუგარძღუ შური-გური.
ხეშქაგურიშორო მოჩქჷ
ჯვეშ ოხვამე წენდიხური.
ჭითა გვალა, თუდო სქური,
ნაოხვამუ ობუჯური.
ჯვეშ ბორჯიში მოჭიშეფი,
ამდღა არძო უმინჯური.
მუხურ-ნაცხა გოჭკადილს
უჯინექჷ კარაკანო,
ჭითა გვალა, თუდო სქური,
ნაოხვამე ობუჯური.
ჯვეში ბორჯიში მოჭიშეფი,
ამდღა არძა უმინჯური,
მუხური _ ნაცხა გოჭკადილს
უჯინექ კარაკანო.
მინდორს გინოსილონგირი
გოფაჩელე შხვა აკანო.
თუდოლეშე შორც იძირე
ურთა, თეკათი დო ეკი,
ჟიმოლოშე გვალას - გვალა.
მინორცხილე ეკი - ეკი.
სქანი წოხოლე სუკი გერე,
ურთას მოხარცქაფილი,
სუკოკოჩი ვადაჸოთა,
ხეთე გიჩქუ გაფილი.
გინმოჯინე კანდიორო
სქვამი, მოჸუნაფილი,
ჯვეში ჭაქვინჯური ჯიხა,
თელი ოდიშის ცქვაფილი.
მაღალ კიდა გინოჭყვართუ,
გახუტოლუ სუკიშ დუც,
ქარიატაშა ონჭუნ ფერი,
შქას - შქას ყორშეფ აშაჸუნცჷ,
ფუთქურითჷ გოფორილცჷ
ცურუშ ნაბად გინაქუნცჷ,
თუდო სქვამი ჭენი წყარი,
ლენტიშორო მუკოჸუნცჷ.
კოჩიშ თოლქჷ მუ ძირასჷ,
თეში მანგი ოძირაფუ,
დღა დო სერი უჯინეთი
კინ ჯინაშა გური გაფუ.
ულირ ბორჯიშ სქვამი ლანდი
სქან წოხოლე გილეფაფუ,
შური შხვადო მინჯჭუაფუ.
სოდგარენ შორს ილაჸაფუ.

ლაშა გახარია-მინც წყარმალო მიოჩქ დო

მინც წყარმალო მიოჩქუ დო, 
მინც ორზოლცალო ზუკოლუნც.
ჸუმენქ გემძირუ ვამიჩქუ დო,
ითამ წენდიხაში დუკოლს.
შარას წარი ეწირუნ ეთი განს,
ტერე ქმკოჟღარტუ უწირდალე,
ურწკინ ფიროსმანი ქმკანგარდუ,
ჩოლერ ორკოლცალო უწირსფალე.
 გოფსქიდი, შურქ ქინმანწკირ გურიშ წკაშა,
ვართ კოჩი ივალდ დო ვართ ჯოღორი...
გვალო ართ ცინდა მეძ თანაფაშა
მის უჩქ ეცალ ჭარას მუ ჯოხონი.
ხოლო თოლი უნჯანს, ჩქიმი ღურა,
 ნარღენს, მანცხვარ მუმალ ვარენია.
ნიკო მივარანც – ვეგუწკურა,
 დეთხი, თიშ თოლეფი ცა რენია.
ვარა პაპა მაქ, ვარა კიზი,
თოლით მიღანკუნაც ვაკონია.
დახე სქირი ლერჭყვას ქიგიპყირზი,
კირზა ურზუმცუ დო ეკონია.
გეკიბუროცხუ დო გექიონუ,
ღურუქ ცხომურონას გერჩიონუ,
 თუთაქ ქათიჸონუ მურიცხეფი
 ჸვერეშ თოლიცალო გერჩიოლუ.
 გობკურცხი ნაწაფილ ოჭმარეს
ზესქვიქ ქიგიობინ გურც ქინისთე.
 მურე შხვაშ თანაფა ვარწანანი,
 ემერ მიკოზგანჯუდ ლერსიშ ქრისტე.

სოსო კაკუბავა-ნამ მაზაკვალქ დომიჭყუ?

ჟინიშ ორო თე ქანაშ

განჩ ქოფთქუენ, ვაშინერს,

ღორონთ ვაგომგტიბუანს

გურიშ-ჭუაშ მაშინეს.

მაფშალიაქ ილორიშ

ბაღის ბირა მიოტუ,

ოკალმახეს, ინოხონს

ბორია ინიკიონტუ.

ვარდიშ ბაღი მიღუდუნ,

ნამ მაზაკვალქ დომიჭყუ?

ჩქიმ კინოხონგ დოხორეს

ამდღა ქუაქ დოკირცხუ,

ოკუმაფეშ შურ ინთხანდგ

მუმაშ ოდას, უჭვესჷნ,

რინას ვაღუ ფურჩაშ ფას,

მუმაშ გურშა მიჭვესჷნ.

ერამხუტუს გუნია, -

თქუეს, სოდგა ძირესჷნ,

პიჯის ფიმულ ვამოჩანდჷ

ძიძეს ქუას, ჸვილესჷნ.

გაჩემებე კიპირისი, -

მიარჩქილენ, გურს უჩანსჷ, -

ოქუმიშ წყარ, დომგარით,

ჩილამურო მექურჩანს.

ბორია ჸურანს, წყარ ინგარს,

ცა, ქომწი, მუ გილამუნ,

აფხაზაშ დო მარგალიშ

ქანას მერჩხუნს ჩილამურ.

ბენედიქტ ჯალაღონია -ნანინა

*უდე გედგ დო კოჩი გერე
ჩხოუ გებიჯ, ჯა გეჩანს, 
მარგალურიშ ვამიჩქ გერე,
გეგნოთანგენ - მუს მერჩანს?

ჩხოუ ხოლო გერენია 
შხვაში ნინა ეკიშქვანს.

წყარს დინოდგ დო წყარს დინორე
მალს, დინობიჯ, დინოჩანს, 
ფერდის მუკოდგ და მუკორე,
მუკობიჯ დო მუკოჩანს,

ჯას გითოდგ დო ჯას გითორე...
გინმათანგალ ნინა სო რე?

მელ მინოდგ დო მელ მინორე,
მინობიჯ დო მინოჩანს,
მოხილს გინოდგ დო გინორე,
გინობიჯ დო გინოჩანს,

ინ ინოდგ დო ინ ინორე...
გინმათანგალ ნინა სორე?

ვეს წუმოდგ დო ვეს წუმორე,
წუმობიჯ დო წუმოჩანს,
მითე მითოდგ დო მითორე, 
მითობიჯ დო მითოჩანს,

ძგას ეკოდგ დო ძგას ეკორე...
გინმათანგალ ნინა სო რე?

გონთეს აშადგ დო აშარე, 
აშაბიჯ დო აშაჩანს,
წკვაფანს ალადგ და ალარე,
ალაბიჯ დო ალაჩანს.

ჟი მუნოდგ დო ჟი მუნორე..
გინმათანგალ ნინა სორე?

ჩქიმ ნანინა სატანკუჩხეს
გუთმოურთუნს კოჩის ტანს;
წელიშ ეშე მუკოქუნა,
წელიშ გიმე მითმიდვანს.

მარგალურიშ ვამიჩქ გერე,
გეგნოთანგენ მუს მერჩან?

თი შხვა ძიქვას მუკმიქუნანს
მარგალცალო ვემიდვანს!

ლადო გაგუა-ნანაშ ნინა(მე-19 საუკუნის ბოლო)

მარგალ ვორექ, ძალამ მიორს,
ნანაშ ნინა მარგალური,
ენა ოგორაფალ ვარე,
აქ მუთა რე უსქვამური,

მის ვა უორს მუშ ქიანა,
მუშ ყუდე დო მუშ ყებური,
ეშენ მუშენ მიღვიზინა,
მუშენ გიხორცქ ჯავრით გური?

მეგრული ენაა და არანაირი დიალექტი ფაშისტებო!

სოსო კაკუბავა-შურიგე

თელო ღურელქჷ მუშოთ მოკო შურ იბღე,

თეცალ რინა წვალება რე, შურიგე.

ქომწი, ჯიმა, იმენდ მუშა მიღუდას,

ხოლო ართჷშა გაგმუჩამუთჷ იუდას.

მაგნოლიაშ ტყა მორიებჷ ნოხორის,

ღუ კიჟინჷნს  ჩქიმ ელმოლიშ გოხოლის.

ინგირიშ პის ბორია ირქენს მანგარო,

წყარიშ მელე ტურა რკიანს სანგარო,

დიდა მოთვანს ჯვეშ ოხვამეშ იქილე,

დიოსქურშე მოლაშ ჸურაფ ირჩქილე.

ცა ონჯღორეთ მუჭო გოჭითინაფე,

სათანჯოშ ტყას ჯიხა ქიმშადინაფე.

ხატო მოკოდ, მოკოდჷ ოფერაფალო,

ამდღა ჭკორჲ რე ჩქიმ სქვამ სამურზაყანო.

გურ  ჭყოლირ მაფ, მუშოთ მოკო შურ იბღე,

გურიშ ორდალ სიტყვა ქომწი, შურიგე!